Published:Updated:

“ஆவினில் ஆட்டம் போடுகிறார் ஓ.ராஜா!”

பால் கொள்முதல்
பிரீமியம் ஸ்டோரி
பால் கொள்முதல்

கொந்தளிக்கும் பால் உற்பத்தியாளர்கள்

“ஆவினில் ஆட்டம் போடுகிறார் ஓ.ராஜா!”

கொந்தளிக்கும் பால் உற்பத்தியாளர்கள்

Published:Updated:
பால் கொள்முதல்
பிரீமியம் ஸ்டோரி
பால் கொள்முதல்

‘‘அண்ணன் துணை முதல்வராக இருப்பதால், எது வேண்டுமானாலும் செய்யலாம் என்ற எண்ணத்தில் ஆட்டம்போடுகிறார் ஓ.ராஜா. குறிப்பாக மதுரை, தேனி மாவட்ட ஆவினில் அவருடைய ஆதிக்கம் நாளுக்குநாள் அதிகரித்துவருகிறது. இல்லாத ஊரில் பால் சொசைட்டி வைத்திருப்பதாகச் சொல்லி, ஏற்கெனவே மதுரை மாவட்ட ஆவின் தலைவர் ஆனவர், இப்போது முறைப்படி தேர்தலில் போட்டியிடாமல் விதிகளை மீறி நியமனத் தலைவர் ஆகியிருக்கிறார்’’ என்று புலம்புகின்றனர் ஆவின் புள்ளிகள்.

கடந்த டிசம்பர் மாதம், மதுரை ஆவின் தலைவராக ஓ.ராஜா தேர்ந்தெடுக்கப்பட்டார். பால் கொள்முதல் செய்பவர்கள்தான் ஆவின் தலைவர் பதவிக்குப் போட்டியிட முடியும். போடேந்திரபுரம் ஊராட்சியில் உள்ள ரோசி நகர் பகுதியில் பால் சொசைட்டி வைத்திருப்ப தாக ஆவணங்கள் தாக்கல் செய்திருந்தார் ஓ.ராஜா. இந்த நிலையில், ‘போடேந்திரபுரத்தில் ரோசி நகர் என்ற பகுதியே கிடையாது. இல்லாத இடத்தின் பெயரைச் சொல்லி ஓ.ராஜா ஏமாற்றுகிறார்’ என்று உயர் நீதிமன்றத்தில் வழக்கு தொடர்ந்தார் தேனி பி.சி.பட்டியைச் சேர்ந்த அம்மாவாசி. இந்த வழக்கு, நிலுவையில் இருக்கிறது.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer
“ஆவினில் ஆட்டம் போடுகிறார் ஓ.ராஜா!”

இந்த நிலையில்தான் மதுரை மாவட்ட ஆவினை மதுரை ஆவின், தேனி ஆவின் என இரண்டாகப் பிரித்தனர். மதுரை ஆவின் தலைவராக தமிழரசனும், தேனி ஆவின் தலைவராக ஓ.ராஜாவும் நியமிக்கப்பட்டுள்ளனர். ‘கூட்டுறவுச் சங்க விதிப்படி, உறுப்பினர்கள்தான் தலைவரைத் தேர்ந்தெடுக்க வேண்டும். தலைவரை நியமனம் செய்வது சட்டவிரோதம்’ என்று

ஓ.ராஜா நியமனத்துக்கு எதிராக அம்மாவாசியும், தமிழரசுன் நியமனத்துக்கு எதிராக உசிலம்பட்டியைச் சேர்ந்த மிதுன் சக்கரவர்த்தி என்பவரும் தனித்தனியாக வழக்கு தொடர்ந்தனர். இதையடுத்து இருவருடைய நியமனங்களுக்கும் இடைக்காலத் தடை விதித்திருக்கிறது மதுரை உயர் நீதிமன்றக் கிளை.

இதுதொடர்பாக அம்மாவாசியிடம் பேசினோம். ‘‘நாங்கள், ஓ.ராஜாவை ஆவின் தேர்தலில் போட்டியிட வேண்டாம் என்று சொல்லவில்லை. ஏன் குறுக்கு வழியில் நுழைகிறீர்கள் என்றுதான் கேட்கிறோம். போடேந்திரபுரத்தில் ரோசி நகர் என்ற பகுதியே இல்லை. ஆனால், அப்படி ஒரு பகுதி இருப்பதாகச் சொல்லி, முறைகேடாக மதுரை ஆவினில் தலைவர் ஆனார் ஓ.ராஜா. அந்த மோசடியை அம்பலப்படுத்துவதற்கான ஆவணங்களை நீதிமன்றத்தில் தாக்கல் செய்திருக்கிறோம். அந்த வழக்கு நிலுவையில் இருக்கிறது.

இந்நிலையில், மதுரை ஆவினை இரண்டாகப் பிரித்திருக்கிறார்கள். அதிகாரிகளை கைக்குள் போட்டுக்கொண்டு, தேனி ஆவின் தலைவராக நியமனமாகியிருக்கிறார் ஓ.ராஜா. முதலில் பால் உற்பத்தியாளர்கள் பொதுக்குழுவைக் கூட்ட வேண்டும். அதன் பிறகு மாநில தேர்தல் ஆணையத்தை அணுகி, தேர்தல் நடத்த சொல்ல வேண்டும். தேர்தலில் போட்டியிட்டு வெற்றி பெறுபவர்கள்தான் தலைவராக முடியும். ஆனால் ஓ.ராஜாவோ, அதிகாரிகளை கைக்குள் போட்டுக்கொண்டு தலைவர் ஆகிவிட்டார். இது கூட்டுறவின் அடிப்படைக்கே உலைவைக்கும் வேலை. அதனால்தான், இடைக்காலத் தடை வாங்கியிருக்கிறோம்.

கட்சிப் பிரமுகர்கள் பலருக்கும் பதவி கொடுக்க வேண்டும் என்பதற்காகவே, லாபத்தில் இயங்கிய மதுரை ஆவினை இரண்டாகப் பிரித்திருக்கின்றனர். இதனால், பால் உற்பத்தியாளர்கள் கடும் சிரமத்துக்கு ஆளாகியிருக்கிறார்கள். தேனியில் உள்ள பால் உற்பத்தியாளர்களின் பங்குகள் அனைத்தும் மதுரையில் உள்ளன. அதை முறையாகப் பிரித்துக் கொடுக்கவில்லை. முறைப்படி தேர்தல் நடத்த வேண்டும். இதே நிலை தொடர்ந்தால் ஆவின் அழிந்துவிடும்” என்றார் அக்கறையுடன்.

ஆவின் முறைகேடுகள் குறித்து விவரம் அறிந்த சிலரிடம் பேசினோம். ‘‘ஓ.ராஜா மதுரை ஆவின் தலைவராக இருந்தபோது 60 காலிப் பணியிடங்களுக்கான அறிவிப்புகள் வெளியிடப் பட்டன. ஒரு பணியிடத்துக்கு 5 லட்சம் முதல் 15 லட்சம் ரூபாய் வரை வசூல் செய்திருக்கிறார்கள் என்ற புகார், றெக்கைக் கட்டிப் பறக்கிறது.

“ஆவினில் ஆட்டம் போடுகிறார் ஓ.ராஜா!”

இதை தொடர்ந்து சமீபத்தில் மதுரை ஆவினில் லஞ்ச ஒழிப்புத் துறையினர் சோதனை நடத்தியிருக்கிறார்கள். கடந்த இரண்டு வருடங்களில் செயல்படுத்தப்பட்ட திட்டங்கள், டெண்டர்கள், கொள்முதல் செய்யப்பட்ட உபகரணங்கள், தற்காலிக ஊழியர்கள் நியமிக்கப்பட்டதில் பணம் கைமாறியது என, பல விவகாரங்கள் குறித்து அவர்கள் தீவிர விசாரணை செய்திருக்கிறார்கள்.

குறிப்பாக, சோலார் பேனல் வாங்கியதில் மட்டும் 50 லட்சம் ரூபாய்க்கும் அதிகமாக ஊழல் நடந்துள்ளதாகக் கூறப்படுகிறது. இந்தக் குற்றச் சாட்டுகளில் ஓ.ராஜா சிக்குவதற்கான வாய்ப்புகள் இருக்கின்றன. ஆனால், ஓ.பன்னீர்செல்வத்தை மீறி ஓ.ராஜா மீது நடவடிக்கை பாயுமா என்பது சந்தேகம்தான்’’ என்றனர்.

இந்தப் புகார்கள் குறித்து ஓ.ராஜாவிடம் கேட்டதற்கு, ‘‘இதைப் பற்றிப் பேச விரும்பவில்லை’’ என்பதோடு முடித்துக்கொண்டார்.

ஆவின், இப்படி மோசமான சூழலில் இருக்கிறது. பால்வளத் துறை அமைச்சர் ராஜேந்திர பாலாஜியோ, ‘ராகுலுக்கு தாய்மாமா யார்?’ என்று கேள்வி கேட்டு அலப்பறைக் கூட்டிக்கொண்டிருக்கிறார்.