கெளரி கொலை குறித்து மக்கள் பேச வேண்டும்! - பிரகாஷ்ராஜ் உருக்கம்...

பத்திரிகையாளர் கெளரி லங்கேஷ் படுகொலை செய்யப்பட்டு, இரண்டு ஆண்டுகள் நிறைவடைந்திருக்கின்றன. பத்திரிகையாளர், சமூகச்செயற்பாட்டாளர் என்பதையெல்லாம் தாண்டி, `தொடர்ந்து இந்துத்துவத்துக்கு எதிராகப் பேசினார் என்ற காரணத்தால் துப்பாக்கிக் குண்டுகளுக்கு பலியானார் கெளரி லங்கேஷ்’ எனக் குற்றம்சாட்டி தொடர் போராட்டங்கள் நடந்தன. ஆனாலும், கெளரி லங்கேஷ் கொலையில் தொடர்புடையவர்கள் இதுவரை சட்டத்தால் தண்டிக்கப்படவில்லை.

கன்னட வார இதழான ‘லங்கேஷ்’ பத்திரிகையின் ஆசிரியராக இருந்தவர் கௌரி லங்கேஷ். கடந்த 2017-ம் ஆண்டு செப்டம்பர் 5-ம் தேதி பசவன் குடி பகுதியிலுள்ள அலுவலகத்திலிருந்து வீட்டுக்குச் சென்றார். அங்கு இரண்டு மர்ம நபர்களால் சுட்டுக் கொல்லப்பட்டார். கௌரி லங்கேஷின் மார்பு, கழுத்து, வயிறு ஆகிய பகுதிகளில் குண்டுகள் பாய்ந்தன. சமூக செயற்பாட்டாளர்கள் தபோல்கர், கல்புர்கியைச் சுட்டுக்கொன்றதைப் போன்றே கௌரி லங்கேஷும் சுட்டுக் கொல்லப்பட்டுள்ளார் என்பதை சிறப்புப் புலனாய்வுப் பிரிவினர் உறுதிபடுத்தினர். பல மாதங்கள் நடந்த விசாரணையையடுத்து இந்த வழக்கில் பரசுராம் வாக்மோர், பிரவீன்குமார், நவீன்குமார் உள்ளிட்ட ஆறு பேரை கைதுசெய்தது காவல்துறை.

. கல்புர்கி கொலைக்கு முன்னதாக, கோலாபூரில் தங்கள் குடியிருப்புக்கு அருகே காலை நேர நடைபயிற்சி மேற்கொண்டிருந்த சமூகச் சீர்திருத்தவாதி கோவிந்த் பன்சாரேவும் அவரின் மனைவியும் சுட்டுக் கொல்லப்பட்டனர். 2011 ஆகஸ்ட் 30-ம் தேதியன்று, நரேந்திர தபோல்கர் துப்பாக்கியால் சுட்டுக் கொல்லப்பட்டார். இவர்களைப்போலவே கெளரியும் சுட்டுக்கொல்லப்பட்டார். இந்துத்துவ எதிர்ப்புக் கொள்கை என்பதே இந்த நான்கு கொலைச் சம்பவங்களின் மையப்புள்ளியாக இருக்கிறது.

. கெளரி லங்கேஷ் கொலை வழக்கில், வெடிபொருள்களை விநியோகம் செய்தவர்கள் மற்றும் சாத்தியமான சதிகாரர்கள் யார் என்பதை மட்டுமே இதுவரை நடைபெற்ற விசாரணைகள் காட்டுகின்றன. ஆனால், இந்தக் கொலைகளுக்கான காரணகர்த்தா யார், திட்டமிட்டுச் செயல்படுத்தியவர்கள் யார் என்பது போன்ற முடிச்சுகள் இன்னும் அவிழ்க்கப்படவில்லை.

. தபோல்கர், பன்சாரே, கல்புர்கி மற்றும் கெளரி லங்கேஷ் ஆகியோரின் மரணத்துக்குப் பின்னால் இந்துத்துவ அமைப்புகள் இருக்கின்றன எனக் குற்றம்சாட்டுகிறார் நடிகர் பிரகாஷ்ராஜ். கெளரி லங்கேஷ் கொல்லப்பட்டதற்குப் பிறகு, இந்துத்துவ அமைப்புகளுக்கு எதிராக தொடர்ந்து குரல்கொடுத்துவருகிறார். இந்தக் கொலை வழக்கின் விசாரணை குறித்து அவரிடம் பேசினோம்.

. “கெளரியின் கொலைக்கு யார் காரணம் என்று எல்லோருக்கும் தெரியும். இந்துத்துவத்துக்கு எதிராகப் பேசிய நான்கு பேர், தொடர்ச்சியாகக் கொல்லப்பட்டிருக்கிறார்கள். கொலையாளிகள் மக்கள் முன் அடையாளப்படுத்தப்பட வேண்டும். ஆனால், கொலையாளிகள் காப்பாற்றப்படுகிறார்கள். கெளரி, தன்னுடைய சொந்தக் காரணங்களுக்காகவா கொல்லப்பட்டார்? சமத்துவம் நிலவிய மண்ணில் இந்துத்துவ வெறியுடன் நடந்துகொண்டதை எதிர்த்துப் பேசினார். கேள்விகள் கேட்டார். அதற்காகவே கொல்லப்பட்டார்.

. கெளரி கொலைகுறித்து மக்கள் பேச வேண்டும். அப்போதுதான் ஆளும் அரசு கொஞ்சமாவது அசைந்துகொடுக்கும். இந்த வழக்கில், கடந்த இரண்டு ஆண்டுகளில் ஆறு பேரை கைது செய்திருக்கிறது காவல்துறை. ஆனால், உண்மையான குற்றவாளிகள் இதுவரை தண்டிக்கப்படவில்லை. ஆசிரியர் தின நாளில்தான் கெளரி கொலைசெய்யப் பட்டார். எங்களில் பலருக்கும் கெளரிதான் ஆசிரியர். அவர் விட்டுச் சென்ற பணியை நாங்கள் தொடர்ந்து செய்துவருகிறோம். கெளரி கொலை வழக்கில் உண்மை ஒருநாள் வெளிவரும். நீதி வென்றே தீரும். இன்னொரு கெளரி கொல்லப்படுவதற்கு முன், மக்கள் விழிப்படைய வேண்டும்’’ என்றார்.

. கெளரி லங்கேஷ் இரண்டாம் ஆண்டு நினைவஞ்சலிக் கூட்டம், பெங்களூரில் செப்டம்பர் 5-ம் தேதி நடைபெற்றது. `இந்த வழக்கின் விசாரணையை விரைவுபடுத்த வேண்டும். குற்றவாளிகள் விரைவில் தண்டிக்கப்படவேண்டும்’ என்று கெளரி லங்கேஷ் நினைவு அறக்கட்டளை சார்பில் கூட்டத்தில் வலியுறுத்தப்பட்டது.

சமூக செயற்பாட்டாளர்கள் கொலைகளில் நீதி நிலைநாட்டப்பட வேண்டும்.

. ‘‘சுகாதாரப் பிரச்னைக்கும் எங்களுக்கும் தொடர்பில்லை!’’

ஜூ .வி 11.8.19 தேதியிட்ட இதழில் ‘அச்சுறுத்தும் ஆலை... மரண பயத்தில் மக்கள்...’ எனும் தலைப்பில் தஞ்சை மாவட்டம், செங்கிப்பட்டி அருகே புதுக்குடி கிராமத்தில் இயங்கும் சிக்ஜில்சால் நிறுவனத்தைப் பற்றிய கட்டுரை வெளியிட்டிருந்தோம். கட்டுரை வெளியானதும் ‘சிக்ஜில்சால்’ நிறுவனத்தினர் நமது அலுவலகத்தைத் தொடர்புகொண்டு விளக்கம் அளித்துள்ளனர். ‘‘சுற்றுச்சூழலுக்கு எந்தவித பாதிப்பும் ஏற்படுத்தாத வகையில், தமிழ்நாடு மாசுக்கட்டுப்பாடு வாரியத்தின் முறையான அனுமதி பெற்றுதான் ஆலை இயங்குகிறது. வளிமண்டலத்தில் உள்ள ஆர்கான், ஆக்சிஜன், நைட்ரஜன் உள்ளிட்ட வாயுக்களைப் பிரித்தெடுக்க, எந்தவிதமான ரசாயனங்களும் பயன்படுத்தப்படுவதில்லை. ஆலைக்குத் தேவையான நீரை டேங்கர் லாரி மூலமே வெளியிலிருந்து வாங்குகிறோம். ஆழ்குழாய் நீரைப் பயன்படுத்துவதில்லை. இந்தப் பகுதியில் நிலவும் சுகாதாரப் பிரச்னைக்கும் எங்களுக்கும் எந்தவித தொடர்பும் இல்லை’’ என்று தெரிவித்திருக்கின்றனர்.

கெளரி கொலை குறித்து மக்கள் பேச வேண்டும்! - பிரகாஷ்ராஜ் உருக்கம்...

இ.லோகேஷ்வரி

ஜெ.வேங்கடராஜ்