Published:Updated:

முடங்கிக் கிடக்கும் தடுப்பு மருந்து நிறுவனம்...

இந்திய சுகாதாரத்துறையின் அலட்சியம் காரணமா?

பிரீமியம் ஸ்டோரி
“குன்னூரில் உள்ள பாஸ்டியர் நிறுவனம், ஆண்டுக்கு 130 மில்லியன் குப்பிகள் (டோஸ்) தடுப்பு மருந்து தயாரிக்கும் கட்டமைப்பைக்கொண்டது. கொரோனா வைரஸ் நம்மை நடுங்கவைத்துக் கொண்டிருக்கும் இந்தச் சூழலில், மக்களுக்கு எந்த வகையிலும் பயனளிக்க முடியாமல் முடங்கிக் கிடக்கிறது பாஸ்டியர் நிறுவனம். இதற்கு, மத்திய சுகாதாரத் துறையின் அலட்சியம்தான் காரணம்” என்று குமுறுகிறார்கள் விவரமறிந்தவர்கள்.

நுண்ணுயிரியலின் தந்தை என்று அழைக்கப் படும் வேதியியலாளர் லூயி பாஸ்டியரின் பெயரில், நீலகிரி மாவட்டம் குன்னூரில் 1907-ல் தொடங்கப்பட்டதுதான் பாஸ்டியர் நிறுவனம். 14 ஏக்கர் பரப்பளவில் உள்ள இந்த நிறுவனத்தில், வெறிநாய்க் கடியால் ஏற்படும் ரேபிஸ் நோய்க்கான மருந்து, முத்தடுப்பூசி மருந்து (ரண ஜன்னி, தொண்டை அடைப்பான், கக்குவான் ஆகியவற்றுக்கான தடுப்பு மருந்து) ஆகியவை தயாரிக்கப்பட்டன. மனிதர்களைக் கொத்துக் கொத்தாகக் கொன்று குவிக்கும் நுண்ணுயிர்களுக்கு எதிரான போராட்டத்தில், இந்த நிறுவனம் பெரும்பங்கு வகித்தது. உலக சுகாதார மையத்தின் பரிந்துரையின்படி கட்டமைப்பு வசதிகளை ஏற்படுத்தத் தவறியதாக, இங்கே மருந்து உற்பத்தி மேற்கொள்ள 2007-ம் ஆண்டு தற்காலிகத் தடை விதிக்கப்பட்டது. நிறுவன ஊழியர்கள், குன்னூர் மக்கள், அரசியல் கட்சியினர் ஆகியோரின் தொடர் போராட்டங்களை அடுத்து, நிறுவனத்தில் மருந்து உற்பத்தியைத் தொடர 2010 பிப்ரவரியில் அனுமதி வழங்கப்பட்டது. இருப்பினும் பிரச்னைகள் தீரவில்லை.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

தமிழ்நாடு அறிவியல் இயக்க நீலகிரி மாவட்டத் தலைவர் ராஜு நம்மிடம், ‘‘இந்த நிறுவனம் சிறப்பாகச் செயல்பட்டுவந்ததால் தனியார் மருந்து நிறுவனங்களுக்கு பெரும் போட்டியாக இருந்தது. அவர்களின் அழுத்தம் காரணமாக இந்த நிறுவனத்துக்கான நிதிகளை முடக்கி நலிவடையச் செய்தனர் ஆட்சியாளர்கள். 2010 டிசம்பரில் இந்த நிறுவனத்தை ஆய்வுசெய்த குழு ஒன்று, ‘மருந்து உற்பத்தி தரமாக உள்ளது. ஆனால், ஆய்வகக் கட்டமைப்பை நவீனமாக்க வேண்டும்’ என உத்தரவிட்டது. அதற்கு மூன்று ஆண்டுகள் அவகாசமும் வழங்கியது. அதன் பிறகு பல ஆண்டுகளாக உற்பத்தி நிறுத்தப் பட்டுள்ள நிலையில், ‘சீரமைப்புப் பணிகள் மேற்கொள்ளப்பட்டுவருகிறது’ என்று சொல்லியே காலத்தைக் கடத்துகின்றனர். இதன் பின்னணியில் என்ன இருக்கிறது என்பது அவர்களுக்கே வெளிச்சம்’’ என்றார் வேதனையுடன்.

ராஜு, மனோகரன்
ராஜு, மனோகரன்

பாஸ்டியர் நிறுவனத்தில் பணிபுரியும் பெயர் வெளியிட விரும்பாத அறிவியலாளர் ஒருவர், “இந்த நிறுவனத்தில் 140 நிரந்தர ஊழியர்கள், 100 ஒப்பந்த ஊழியர்கள் பணியில் உள்ளனர். இந்திய அளவில் இந்த நிறுவனத்தின் சிறப்பான செயல்பாடுகள், தனியார் மருந்து நிறுவன முதலாளிகளின் கண்களை உறுத்தின. அதன் பின்னணியில்தான் அரசு இந்த நிறுவனத்தைக் கண்டுகொள்ளாமல் விட்டுவிட்டது. இந்த நிறுவனத்தை எப்போதோ தனியாருக்குத் தாரை வார்த்திருப்பார்கள். எங்களின் தொடர் போராட்டங்களால் அதைத் தடுத்தோம். இன்றைக்கு இதே தடுப்பு மருந்து உற்பத்தியில் ஈடுபட்டுள்ள தனியார் நிறுவனங்கள், பல கோடிகளைக் குவிக்கின்றன. ஆனால், முன்னோடி யாகச் செயல்பட்ட நிறுவனம் முடங்கிக் கிடக்கிறது’’ என்று புலம்பினார்.

இதுகுறித்துப் பேசிய குன்னூர் நுகர்வோர் விழிப்புணர்வு சங்கத் தலைவர் மனோகரன், ‘‘நோய்களுக்கான மருந்துகளை வெளிநாடுகளி லிருந்து வாங்கிக்கொள்ளலாம் என்ற வாய்ப்பு கொரோனாவால் முடக்கப்பட்டுள்ள சூழலி லாவது நம் நிறுவனங்களின் தேவையை நாம் உணர வேண்டும். நாட்டிலேயே சிறப்பு வாய்ந்த தடுப்பு மருந்து தயாரிக்கும் நிறுவனங்களில் ஒன்றாகச் செயல்பட்டுவந்த இந்த நிறுவனம், ஒருசிலரின் ஆதாயத்துக்காக முடக்கப்பட்டிருப்பது எந்த வகையிலும் இந்திய சுகாதாரத் துறை மீதும் அரசு மீதும் நம்பிக்கையை ஏற்படுத்தாது’’ என்றார்.

பாஸ்டியர் நிறுவன இயக்குநர் சிவகுமாரைச் சந்தித்துப் பேசினோம். “கடந்த நான்கு ஆண்டுகளாக, புனரமைப்புப் பணிகளை மேற்கொண்டுவருகிறோம். 137 கோடி ரூபாய் மதிப்பில் ஏழு ஆய்வகங்கள் உட்பட மொத்த வளாகமும் தயாராகிவருகிறது. நம்மிடம் ஆண்டுக்கு 130 மில்லியன் குப்பிகள் (டோஸ்) தயாரிக்க, கட்டமைப்பு வசதிகள் உள்ளன. சோதனை முயற்சி தொடங்க உள்ளோம். 2021-ம் ஆண்டு முதல் உற்பத்தி தொடங்கவுள்ளது. இது பாக்டீரியா சோதனையை மையமாகக் கொண்ட நிறுவனம். ஒருவேளை கொரோனா போன்ற வைரஸுக்கு எதிராக புதிய மருந்து உற்பத்திகள் தொடங்க அரசு வழிகாட்டினால் அதற்கும் தயாராவோம்’’ என்றார் நிதானமாக.

முடங்கிக் கிடக்கும் தடுப்பு மருந்து நிறுவனம்...

இந்த நிலையில் நீலகிரி மாவட்ட ஆட்சியர் இன்னசென்ட் திவ்யா, பாஸ்டியர் நிறுவனத்தை ஆய்வுசெய்ய சுகாதார அதிகாரிகள் குழு ஒன்றை அனுப்பியுள்ளார். இந்த அசாதாரணமான சூழலில் இந்த‌ ஆய்வகத்தைப் பயன்படுத்த முடியுமா எனப் பரிசீலித்து வருகின்றனர்.

இதுகுறித்து நீலகிரி மாவட்ட ஆட்சியர் இன்னசென்ட் திவ்யாவிடம் கேட்டபோது, ‘‘கொரோனாவை எதிர்கொள்ள, பல்வேறு வகைகளிலும் தயாராகி வருகிறோம். பாஸ்டியர் நிறுவனத்தில் ஆய்வக வசதி இருப்பதால், ஆய்வகத்தைப் பயன்படுத்திக்கொள்ளுமாறு மத்திய அரசிடம் தெரிவித்துள்ளோம்’’ என்றார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு