Published:Updated:

முன்களப்பணியாளர்கள்... சலுகைகள், உரிமைகள், கோரிக்கைகள் என்ன?

தூய்மைப் பணியாளர்கள், காவல்துறையினர், பத்திரிகையாளர்கள் ஆகியோருக்கு நிகராக மின்வாரிய ஊழியர்களும் ரிஸ்க் எடுத்துதான் வேலை செய்கிறார்கள்

பிரீமியம் ஸ்டோரி

கொரோனா பெருந்தொற்றுக் காலத்தில் மக்களுக்காகப் பணியாற்றும் மருத்துவர்கள், செவிலியர்கள், தூய்மைப் பணியாளர்கள், காவல் துறையினர், பத்திரிகையாளர்கள் ஆகியோரை முன்களப் பணியாளர்களாக அறிவித்துள்ளது அரசு. இதைத் தொடர்ந்து தமிழ்நாடு மின் உற்பத்தி, மின் பகிர்மானக் கழகம் மற்றும் தமிழ்நாடு போக்குவரத்துக் கழக ஊழியர் களையும் முன்களப் பணியாளர்களாக அறிவிக்க வேண்டும் என்கிற கோரிக்கை எழுந்துள்ளது. சரி, இத்தகைய முன்களப் பணியாளர்களுக்கான வரையறை என்ன, இப்படி அறிவிக்கப்படுவதால் கிடைக்கும் உரிமைகளும் சலுகைகளும் என்ன?

பலரும் பல்வேறு துறைகளில் பணியாற்றி னாலும், சில துறைகளில் வேலை செய்பவர்கள் தாம் வெள்ளம், புயல் போன்ற பேரிடர் காலங்களிலும், பெருந்தொற்றுக் காலங்களிலும் தங்கள் உயிரைப் பணயம் வைத்துப் பணியாற்று கிறார்கள். தற்போதைய கொரோனா பெருந்தொற்றுக் காலத்தில் நோயாளியின் அருகிலிருந்து பணியாற்றும் மருத்துவர்களும் செவிலியர்களும்தாம் இவர்களில் முதன்மை யானவர்கள். அதனால்தான் அவர்களை முன்களப் பணியாளர்களாக முதலில் அறிவித்த மத்திய அரசு, இதர முன்களப் பணியாளர் களுக்கான வரையறைகளை மாநில அரசுகளே வகுத்துக்கொள்ளலாம் என்று கூறிவிட்டது. இதன்படி தமிழகத்தில் தூய்மைப் பணியாளர் களையும் காவல்துறையினரையும் முன்களப் பணியாளர்களாக அறிவித்தது கடந்த அ.தி.மு.க அரசு. தொடர்ந்து செய்தி சேகரிக்கும் பத்திரிகை யாளர்களையும் முன்களப் பணியாளர்களாக அறிவிக்க வேண்டுமென்ற கோரிக்கையை அடுத்து, அவர்களையும் முன்களப் பணியாளர்களாக அறிவித்தது தற்போதைய தி.மு.க அரசு. மேற்கண்ட முன்களப் பணியாளர் களுக்கு கொரோனா கால ஊக்கத் தொகையும், பணியின்போது இறக்க நேரிட்டால் இழப்பீட்டுத் தொகையும் கொடுக்கப்படும். அதன்படிதான் கொரோனா பணிக்காலத்தில் இறந்த 43 டாக்டர்களின் குடும்பங்களுக்கு தலா 25 லட்சம் ரூபாய் வழங்கப்பட்டது.

சமீபத்தில் பத்திரிகையாளர்களை முன்களப் பணியாளர்களாக அரசு அறிவித்தபோதும், அவர்களுக்கான ஊக்கத்தொகை 5,000 ரூபாய் மற்றும் பணியின்போது இறந்தால் இழப்பீடு 10 லட்சம் ரூபாய் ஆகிய இரண்டும் அரசு அங்கீகாரம் பெற்ற பத்திரிகையாளர்களுக்கு மட்டுமே கிடைக்கும். ஆனால், துரதிர்ஷ்டவசமாக ஒரு பத்திரிகை அல்லது தொலைக்காட்சி நிறுவனத்தில் அதிகபட்சமாக நான்கு முதல் பத்து பேருக்கு மட்டுமே அரசு அங்கீகாரம் வழங்கப்படுகிறது. இது மொத்த பத்திரிகை யாளர்கள் எண்ணிக்கையில் 10 சதவிகிதம் மட்டுமே. அதனால், கொரோனா காலத்தில் பணியாற்றும் அரசு அங்கீகாரம் பெறாத அனைத்துப் பத்திரிகையாளர்களையும் முன்களப் பணியாளர்களாக அறிவிக்க வேண்டு மென்ற கோரிக்கையும் வைக்கப்படுகிறது. இதேபோல், மின்வாரிய ஊழியர்களும், போக்குவரத்து ஊழியர்களும் தங்களை முன்களப் பணியாளர்களாக அறிவிக்கும்படி கோரிக்கை வைத்துள்ளனர்.

மின்வாரிய ஊழியர்களின் கோரிக்கை தொடர்பாக, தமிழ்நாடு மின் ஊழியர் மத்திய அமைப்பின் (சி.ஐ.டி.யு) தலைவர் ஜெய்சங்கரிடம் பேசினோம். “தூய்மைப் பணியாளர்கள், காவல்துறையினர், பத்திரிகையாளர்கள் ஆகியோருக்கு நிகராக மின்வாரிய ஊழியர்களும் ரிஸ்க் எடுத்துதான் வேலை செய்கிறார்கள். கொரோனா தொற்று ஆபத்து எங்களுக்கும் இருக்கிறது. கொரோனா தீவிரம் அதிகமிருக்கும் தடைசெய்யப்பட்ட பகுதிகளிலும் மின் ஊழியர்கள் வேலை செய்கிறார்கள். கொரோனா நோயாளிகளுக்கு தேவையான மருத்துவமனை, ஆக்ஸிஜன் உள்ளிட்ட அனைத்துக்கும் மின்சாரம்தான் அடிப்படை. அதனால், 24 மணி நேரமும் பணியிலிருந்து மின்சேவையை எங்கள் ஊழியர்கள் கண்காணிக்கிறார்கள். அதிலும், சுமார் 45,000 காலிப் பணியிடங்களை வைத்துக் கொண்டு மின்வெட்டு, மின்தடை எனத் தொடர்ந்து பணி செய்து வருவதால் எங்களையும் முன்களப் பணியாளர்களாக அரசு அறிவிக்க வேண்டும்” என்றார்.

போக்குவரத்து ஊழியர்களின் கோரிக்கை தொடர்பாக நம்மிடம் பேசிய தமிழ்நாடு அரசுப் போக்குவரத்து ஊழியர் சம்மேளனம் (சி.ஐ.டி.யு) பொதுச் செயலாளர் ஆறுமுக நயினார், “போக்குவரத்து ஊழியர்கள் மக்களுடன் நேரடித் தொடர்பில் இருப்பவர்கள். தற்போது லாக்டெளனில் பயணிகளுக்கான பேருந்துகள் இயக்கப்படாவிட்டாலும் சுகாதாரப் பணி யாளர்கள், மருத்துவர்கள், அரசு ஊழியர் களுக்காகப் பேருந்துகளை போக்குவரத்துத் துறை ஊழியர்கள் இயக்கிக்கொண்டுதான் இருக்கிறார்கள். இதுவரை எங்கள் ஊழியர்கள் சுமார் 500 பேர் கொரோனா தொற்றால் இறந்தி ருக்கிறார்கள். லாக்டெளன் முடிந்து பேருந்துகள் இயக்கப்படும்போது டிரைவர்கள், நடத்து நர்களுக்கு தொற்று அதிகரிக்க வாய்ப்புள்ளது. எனவே, சுமார் 1,40,000 போக்குவரத்து ஊழியர்கள் மற்றும் அவர்களின் குடும்பங்களை மனதில் வைத்து முதல்வர் ஸ்டாலின் அவர்கள் போக்குவரத்து ஊழியர் களையும் முன்களப் பணியாளர்களாக அறிவிக்க வேண்டும்” என்றார்.

எடப்பாடி பழனிசாமி, ஓ.பன்னீர்செல்வம், வைகோ, சீமான், வேல்முருகன் உள்ளிட்டோரும் மின்வாரியம் மற்றும் போக்குவரத்து ஊழியர்களை முன்களப்பணியாளர்களாக அறிவிக்க வேண்டும் என்று தமிழக அரசிடம் வலியுறுத்தியுள்ளனர். பலரது கோரிக்கைகளுக்கும் செவிசாய்க்கும் ஸ்டாலின் அரசு, இதற்கும் நல்லதொரு முடிவை அறிவிக்க வேண்டும்.

முன்களப்பணியாளர்கள்... சலுகைகள், உரிமைகள், கோரிக்கைகள் என்ன?
முன்களப்பணியாளர்கள்... சலுகைகள், உரிமைகள், கோரிக்கைகள் என்ன?
முன்களப்பணியாளர்கள்... சலுகைகள், உரிமைகள், கோரிக்கைகள் என்ன?
முன்களப்பணியாளர்கள்... சலுகைகள், உரிமைகள், கோரிக்கைகள் என்ன?
முன்களப்பணியாளர்கள்... சலுகைகள், உரிமைகள், கோரிக்கைகள் என்ன?
முன்களப்பணியாளர்கள்... சலுகைகள், உரிமைகள், கோரிக்கைகள் என்ன?
தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு