Published:Updated:

“மதுக்கடைகளை அரசே நடத்த வேண்டும்!”

புதுச்சேரி
பிரீமியம் ஸ்டோரி
புதுச்சேரி

- புதுச்சேரியில் வலுக்கும் கோரிக்கை

“மதுக்கடைகளை அரசே நடத்த வேண்டும்!”

- புதுச்சேரியில் வலுக்கும் கோரிக்கை

Published:Updated:
புதுச்சேரி
பிரீமியம் ஸ்டோரி
புதுச்சேரி
மதுக்கடைகளை நிரந்தரமாக மூட வேண்டும் என்ற கோரிக்கை, தமிழகத்தில் வலுவடைந்துள்ளது.

புதுச்சேரியிலோ, ‘தமிழகத்தைப்போல் அனைத்து மதுக் கடைகளையும் அரசே ஏற்று நடத்த வேண்டும்’ என்ற கோரிக்கை வலுக்கத் தொடங்கியிருக்கிறது. இதை கவனிக்கும் மக்களோ “நன்றாக இருக்கிறது இந்தக் கபட நாடகம்” என்று அலுத்துக்கொள்கிறார்கள்!

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

கடும் நிதி நெருக்கடியில் சிக்கித் தவிக்கிறது புதுச்சேரி யூனியன் பிரதேசம். புதுச்சேரி அரசின் பிரதான வருமானமே கலால் வருவாய்தான். மத்திய அரசு கொடுக்கும் நிதி மற்றும் மாநில அரசின் வரி வருவாயில் பெரும்பகுதி, அரசு ஊழியர்களின் சம்பளத்துக்கே சென்றுவிடுகிறது. இதனால், மக்கள் நலத் திட்டங்களைச் செயல்படுத்த முடியவில்லை.

“மதுக்கடைகளை அரசே நடத்த வேண்டும்!”

இந்த நிலையில்தான், ‘நிதி நெருக்கடியைச் சமாளிக்க, அனைத்து மதுக்கடைகளையும் அரசே ஏற்று நடத்த வேண்டும்’ என்று துணைநிலை ஆளுநரான கிரண் பேடியிடம் மனு அளித்துள்ளார் அ.தி.மு.க எம்.எல்.ஏ-வான அன்பழகன். அவரிடம் பேசினோம்.

“புதுச்சேரியில் மொத்த மற்றும் சில்லறை மதுபான விற்பனை கடைகளுக்கான 455 பார் உரிமங்கள் இருக்கின்றன. இவற்றின்மூலம் சுமார் 53 கோடி ரூபாய் மட்டுமே அரசுக்கு வருமானம் கிடைக்கிறது. அதே சமயம் இங்கிருக்கும் சாராயக்கடை மற்றும் கள்ளுக்கடைகளுக்கான 102 உரிமங்கள் ஏலத்தின் வாயிலாக வருடத்துக்கு அரசுக்கு சுமார் 95 கோடி ரூபாய் வருமானம் கிடைக்கிறது. இதேபோல் பார் உரிமங்களையும் முறையாக ஏலம்விட்டால், இப்போது கிடைப்பதை விட பல மடங்கு தொகை அரசுக்குக் கிடைக்கும். ஆனால், புதுச்சேரியில் அப்படியான நிலை இல்லை.

தனிநபர்கள் பார்களை நடத்தும் மாநிலங்களில், மூன்று வருடங்களுக்கு ஒருமுறை பொது ஏலத்தின் மூலம்தான் உரிமங்கள் வழங்கப் படுகின்றன. ஆனால் புதுச்சேரியில், பரம்பரைச் சொத்தைப்போல் ஐம்பது வருடங்களாக சுமார் 40 பேர் மட்டுமே இந்த உரிமங்களை வைத்துள்ளனர். அவர்கள் ஒரு பார் உரிமத்துக்கு வருடத்துக்கு ஆறு லட்சம் முதல் 23 லட்ச ரூபாய் வரை மட்டுமே கட்டிவிட்டு, கோடிக்கணக்கில் சம்பாதிக்கிறார்கள்.

அன்பழகன் - லட்சுமி நாராயணன்
அன்பழகன் - லட்சுமி நாராயணன்

சட்டப்படி இந்த பார் உரிமத்தை வேறு ஒருவருக்கு விற்க முடியாது. ஆனால், பங்குதாரர் என்கிற பெயரில் ஒரு பார் உரிமத்தை நான்கு கோடி ரூபாய் வரை தந்திரமாக விற்கின்றனர். சாராயக்கடை உரிமங்களைப்போல் பார் உரிமங்களையும் ஏலம்விட்டால், வருடத்துக்கு சுமார் 750 கோடி ரூபாய் அரசுக்கு கூடுதல் வருவாய் கிடைக்கும். ஆனால், ஒட்டுமொத்த பார் உரிமங்களும் அரசியல் கட்சியினரின் கட்டுப்பாட்டில் இருப்பதால் இதைச் செய்வதில்லை.

அடுத்ததாக, மது விற்பனை வரியின்மூலம் ஆண்டுக்கு சுமார் 900 கோடி ரூபாய் அரசுக்குக் கிடைக்கிறது. அரசே மதுக் கடைகளை ஏற்று நடத்தும் பட்சத்தில் ஆண்டுக்கு சுமார் 600 கோடி ரூபாய் கூடுதல் வருவாய் கிடைக்கும். தமிழகத்தின் ‘டாஸ்மாக்’ போல் புதுச்சேரியில் ஒரு வாரியத்தை ஏற்படுத்தலாம். அது முடியாத பட்சத்தில், புதுச்சேரியில் இருக்கும் ஏழு மதுபான ஆலைகளில் உற்பத்தி செய்யும் மதுபானங்களையும், வெளி மாநிலங்களிலிருந்து இறக்குமதி செய்யப்படும் சுமார் 600 வகை சரக்கு களையும் அரசே கொள்முதல் செய்து சில்லறை கடைகளுக்கு விற்பனை செய்ய வேண்டும். இப்படிச் செய்தால், நிதிக்காக மத்திய அரசிடம் கையேந்தி நிற்க வேண்டியதில்லை” என்றார்.

“மதுக்கடைகளை அரசே நடத்த வேண்டும்!”

ஆளும் காங்கிரஸ் கட்சியின் எம்.எல்.ஏ-வும் நாடாளுமன்றச் செயலாளருமான லட்சுமி நாராயணனும் இதை ஆமோதிக்கிறார். ‘‘புதுச்சேரியில் ஆண்டுக்கு 4,500 கோடி ரூபாய்க்கு மது விற்கப்படும் நிலையில், 900 கோடி ரூபாய் மட்டுமே வரி வருவாயாக அரசுக்கு கிடைக்கிறது. மது விற்பனையை அரசே கையில் எடுக்கும்பட்சத்தில், கூடுதலாக சுமார்1,000 கோடி ரூபாய் கிடைக்கும்” என்கிறார் லட்சுமி நாராயணன்.

புதுவை மாநில ‘எஃப்.எல் 2’ மதுபான வியாபாரிகள் சங்கத்தின் தலைவரான சுதாகரிடம் பேசினோம். “ஏற்கெனவே அரசுவசம் இருந்த சுமார் 60 பார் உரிமங்களை, ‘நடத்த முடியவில்லை’ என்று கலால்துறை யிடம் திருப்பி ஒப்படைத்த இவர்களால் எப்படி மதுக்கடைகளை லாபத்தில் நடத்த முடியும்? ஒருசில மதுக்கடைகளைத் தவிர மற்ற மதுக்கடைகளில் பெரிதாக வியாபாரம் இல்லை. கடை வாடகை, ஊழியர்கள் சம்பளம், அரசுக்குச் செலுத்த வேண்டிய வரி என எல்லாம்போக, மாத வருவாயாக 50,000 முதல் 60,000 ரூபாய் வரைதான் கிடைக்கும். அவர்களுக்கு வேறு தொழில் தெரியாததால் பரம்பரையாக நடத்திக் கொண்டிருக் கின்றனர்.

கொள்முதல் செய்த மதுவுக்கான பணத்தைக் கொடுக்க முடியாமல், கடன் சுமை அதிகமாகும்போதுதான் சிலர் பார் உரிமங்களை விற்கின்றனர். கோடிக்கணக்கில் வியாபாரம் நடக்கும் துணிக்கடைகள் மற்றும் நகைக் கடைகளிடம் உரிமங்களைப் புதுப்பிக்க லட்சக்கணக்கில் அரசு பணம் கேட்பதில்லை. ஆனால், பார் உரிமங்களைப் புதுப்பிக்க மட்டும் வருடத்துக்கு ஆறு லட்சம் முதல் 23 லட்ச ரூபாய் வரை அரசுக்கு நாங்கள் செலுத்திவருகிறோம்” என்றார்.