Published:Updated:

“கொரோனா எண்ணிக்கையில் மோசடி இல்லை!”

“கொரோனா எண்ணிக்கையில் மோசடி இல்லை!”
பிரீமியம் ஸ்டோரி
“கொரோனா எண்ணிக்கையில் மோசடி இல்லை!”

கொரோனா வைரஸ் நம்மை விட்டு முழுமையாக நீங்கும்வரை சில கட்டுப்பாடுகளைக் கடைப்பிடித்துதான் ஆகவேண்டும்.

“கொரோனா எண்ணிக்கையில் மோசடி இல்லை!”

கொரோனா வைரஸ் நம்மை விட்டு முழுமையாக நீங்கும்வரை சில கட்டுப்பாடுகளைக் கடைப்பிடித்துதான் ஆகவேண்டும்.

Published:Updated:
“கொரோனா எண்ணிக்கையில் மோசடி இல்லை!”
பிரீமியம் ஸ்டோரி
“கொரோனா எண்ணிக்கையில் மோசடி இல்லை!”

மீண்டும் பீதி கிளப்பத் தொடங்கியிருக்கிறது கொரொனா. தொற்று எண்ணிக்கை குறைந்து படிப்படியாக இயல்பு திரும்பிவந்த நிலையில், மீண்டும் தொற்று அதிகரித்துவருவது மக்களைப் பதற்றத்தில் ஆழ்த்தியிருக்கிறது. கூடவே லாக்டௌன் வதந்தியும் பற்றிக்கொண்டுள்ள சூழலில், சென்னை மருத்துவக் கல்லூரி மற்றும் ராஜீவ்காந்தி அரசு மருத்துவமனையின் முதல்வர் டாக்டர் தேரணி ராஜனிடம் சில சந்தேகங்களை முன்வைத்து உரையாடினேன்.

டாக்டர் தேரணி ராஜன்
டாக்டர் தேரணி ராஜன்

‘`இடையில் குறைந்திருந்த கொரோனாத் தொற்று திடீரென மீண்டும் நான்கு இலக்கத்தைத் தொட்டிருக்கிறது. என்ன காரணம்?’’

‘`நாம்தான் காரணம். தொடக்கத்தில் நாம் மிகவும் கட்டுக்கோப்பாக இருந்தோம். முகக் கவசம் அணிந்தோம். சமூக இடைவெளியை உறுதியாகக் கடைப்பிடித்தோம். சானிட்டைசர் மூலம் கைகளைச் சுத்தமாகப் பராமரித்தோம். அதனால் கொரோனாப் பரவல் கட்டுப்பாட்டுக்குள் வந்தது. ஒரு கட்டத்தில் நாம் இந்த மூன்று விஷயங்களையும் கைவிட்டுவிட்டோம். பொது இடங்களில் மக்கள் திரள் திரளாகக் குவிகிறார்கள். திருமணங்கள், பொதுக்கூட்டங்கள், திருவிழாக்கள் என கொரோனாவையே மறந்து முழுமையாக மக்கள் இயல்புக்குத் திரும்பிவிட்டார்கள். பெரும்பாலானோர் மாஸ்க் அணிவதே இல்லை. அப்படியே அணிந்தாலும் கழுத்துக்குத்தான் போடுகிறார்கள். மூக்குக்கோ வாய்க்கோ போடுவதில்லை. அதனால் மீண்டும் தொற்று அதிகரிக்கிறது. இப்போது நோயாளிகள் குடும்பம் குடும்பமாக வருகிறார்கள். இதை ‘ஃபேமிலி கிளஸ்டர்’ என்று சொல்வோம்.

கொரோனா வைரஸ் நம்மை விட்டு முழுமையாக நீங்கும்வரை சில கட்டுப்பாடுகளைக் கடைப்பிடித்துதான் ஆகவேண்டும். விழாக்களோ, நிகழ்வுகளோ... செல்வதற்கு முன்பாக கட்டாயம் நாம் சென்றே ஆகவேண்டுமா என்று ஒருமுறைக்கு இருமுறை யோசிக்க வேண்டும். பொதுவிடங்களில் அதிக நேரம் செலவிடுவதைத் தவிர்த்துத்தான் ஆகவேண்டும். கட்டாயம் எல்லோரும் தடுப்பூசி போட்டுக்கொள்ள வேண்டும். மருத்துவத்தைப் பொறுத்தவரை நம் முன்னால் இருக்கும் நல்ல தீர்வென்பது தடுப்பூசி ஒன்றுதான்.’’

“தடுப்பூசி போட்டுக்கொள்ள மக்கள் ஆர்வம் காட்டவில்லை. எல்லோரையும் தடுப்பூசி போட்டுக்கொள்ள வைக்கவே தொற்று எண்ணிக்கை அதிகரித்துக் காட்டப்படுகிறது என்று சிலர் சொல்கிறார்களே?”

‘`இதெல்லாம் ஆதாரமற்ற வெற்றுக் கற்பனை. இந்தச் சூழலில் இப்படி வதந்தி பரப்புவது நிலைமையை மோசமாக்கிவிடும். இந்தியாவில் எந்த மாநிலத்தில் ஆர்டிபிசிஆர் டெஸ்ட் எடுத்தாலும் உடனடியாக ஒரு ஐ டி உருவாகிவிடும். அது உடனடியாக மத்திய அரசுக்குச் சென்றுவிடும். அதை வைத்துதான் எந்த மாநிலத்தில் தொற்று அதிகம் என்ற கணக்கையெல்லாம் மத்திய அரசு எடுக்கும். எண்ணிக்கையில் யாரும் எந்த இடத்திலும் மோசடி செய்ய வாய்ப்பே இல்லை. இந்தியா முழுவதும் எண்ணிக்கை வெளிப்படையாகவே பராமரிக்கப்படுகிறது.”

“கொரோனா எண்ணிக்கையில் மோசடி இல்லை!”
ilkercelik

‘`தொற்று எண்ணிக்கை அதிகரிப்பதால் தேர்தலுக்குப் பிறகு மீண்டும் லாக்டௌன் வரும் என்று சொல்லப்படுகிறதே?’’

‘`நாம் நேர்மறையாக யோசிக்கலாம். தன்னளவில் எல்லோரும் விழிப்புணர்வோடு இருந்துவிட்டால் தொற்றைக் கண்டிப்பாகக் கட்டுக்குள் கொண்டு வந்து விடலாம். மேலும் நாம் எல்லாவற்றையும் எதிர்கொள்ளும் வல்லமையோடுதான் இருக்கிறோம். தினமும் பல ஆயிரம் தொற்றாளர்களை நாம் எதிர்கொண்டிருக்கிறோம். இப்போதைக்கு சென்னை ராஜீவ்காந்தி மருத்துவமனையில் 1,618 படுக்கைகள் கொரோனாத் தொற்றாளர்களுக்காகத் தயார் நிலையில் இருக்கின்றன. 150 தொற்றாளர்கள் சிகிச்சை பெறுகிறார்கள்.168 பேர் அறிகுறிகளோடு சிகிச்சை பெறுகிறார்கள். அத்திப்பட்டு, எழும்பூரில் முகாம்கள் தயாராகிவருகின்றன. 50 சதவிகிதப் படுக்கைகள் நிறைந்துவிட்டால் அடுத்த 50 சதவிகிதப் படுக்கைகளைத் தயார் செய்துவிடுவோம். யாரையும் இடமில்லை என்று வீட்டுக்கு அனுப்ப மாட்டோம். ‘இந்த மருந்து வேலை செய்யுமா’, ‘அந்த மருந்து வேலை செய்யுமா’ என்ற குழப்பமெல்லாம் இப்போது நமக்கு இல்லை. தெளிவான முடிவுகள் கிடைத்து விட்டன. அதனால் முன்புபோல பதற்றப்படத் தேவையில்லை.’’

``கோவாக்சின் மட்டுமே தரமான மருந்து. கோவிஷீல்டு சரியாக வேலை செய்யாது என்று ஒரு செய்தி பரவுகிறதே?”

‘`பொதுவாக தடுப்பூசிகள் இரண்டு விதமாக உருவாக்கப்படும். ஒன்று, கில்டு வேக்சின், இன்னொன்று லைவ் வேக்சின். கோவாக்சின், கில்டு வேக்சின் முறையில் உருவாக்கப்பட்டது. அதாவது கொல்லப்பட்ட ஒரு கொரோனா வைரஸில் இருந்து தயாரிக்கப்பட்டது. கோவிஷீல்டு லைவ் வேக்சின் வகையைச் சேர்ந்தது. கொரோனா வைரஸ் போன்ற சாயல் (imitation) கொண்ட ஒரு வைரஸை உடம்புக்குள் செலுத்தி ஆன்டிபாடியை உருவாக்குவது. இரண்டுமே வெவ்வேறு வகையில் வேலை செய்யும். இரண்டு தடுப்பூசிகளுமே உலகளாவிய சோதனைகளில் தரமானவை என்று நிரூபிக்கப்பட்டுள்ளன. கொரோனா குறித்துக் கிளம்பும் பிற வதந்திகளைப் போலவே கோவிஷீல்டு பற்றிப் பரவுவதும் வதந்திதான்.’’

“தடுப்பூசி போட்டுக்கொண்டால் சிக்கன் சாப்பிடக்கூடாது, பிரொக்கோலி சாப்பிடக்கூடாது என்றெல்லாம் சொல்கிறார்களே... அது உண்மையா?”

“இதெல்லாமே தவறான செய்திகள்தான். கொரோனாத் தடுப்பூசி போட்டுக்கொண்டவர்கள் எதை வேண்டுமானாலும் சாப்பிடலாம். மூன்று நாள்களுக்கு ஆல்ஹகாலை மட்டும் தவிர்க்க வேண்டும். கொரோனாத் தடுப்பூசி போட்டுக்கொண்டவர்கள் 72 மணி நேரத்துக்கு மது அருந்தக்கூடாது. அதேபோல் கொரோனா என்பது சுவாச மண்டலத்தை பாதிக்கும் நோய் என்பதால் புகை பிடிப்பதை முற்றிலும் தவிர்ப்பது நல்லது. தடுப்பூசி போட்டவர்கள் முடிந்தவரை புகைப்பதைத் தவிர்க்கலாம். சாப்பாட்டிலெல்லாம் எந்தக் கட்டுப்பாடும் இல்லை”