Published:Updated:

“ஜூ.வி-யால் எங்களுக்கு நல்ல காலம் பொறந்துருச்சு!” - சாமக்கோடாங்கிகள் நெகிழ்ச்சி

சாமக்கோடாங்கி
பிரீமியம் ஸ்டோரி
சாமக்கோடாங்கி

சாதிச்சான்று இல்லாததால் குழந்தைகளுக்குப் பள்ளிகளில் எந்தச் சலுகையும் கிடைக்கவில்லை.

“ஜூ.வி-யால் எங்களுக்கு நல்ல காலம் பொறந்துருச்சு!” - சாமக்கோடாங்கிகள் நெகிழ்ச்சி

சாதிச்சான்று இல்லாததால் குழந்தைகளுக்குப் பள்ளிகளில் எந்தச் சலுகையும் கிடைக்கவில்லை.

Published:Updated:
சாமக்கோடாங்கி
பிரீமியம் ஸ்டோரி
சாமக்கோடாங்கி

ஊருக்கெல்லாம் ‘நல்ல காலம் பொறக்குது...’ என்று நல்வாக்கு சொல்லும் சாமக்கோடாங்கிச் சமூகத்தினருக்கு நல்லது நடந்திருக்கிறது. அவர்களின் 30 வருட கோரிக்கையான சாதிச்சான்று கிடைக்க துணைநின்ற ஜூ.வி-யிடம் அவர்களின் மகிழ்ச்சியை நெகிழ்ச்சியோடு பகிர்ந்துகொண்டார்கள்!

நெல்லை மாவட்டம், தருவை கிராமத்தில் காட்டு நாயக்கர் சமூகத்தைச் சேர்ந்த 47 குடும்பத்தினர் வசித்துவருகிறார்கள். அவர்கள் குடியிருக்கும் இடத்துக்கான பட்டா, குழந்தைகளின் நலனுக்கான சாதிச்சான்று கிடைக்காமல் தவித்துவந்தார்கள். கொரோனா தடுப்புப் பணிக்காக நெல்லை மாவட்டப் பொறுப்பாளராக நியமிக்கப்பட்ட தொழில்துறை அமைச்சர் தங்கம் தென்னரசு கவனத்துக்கு இதை நாம் கொண்டுசென்றதை அடுத்து, அவர்களின் இருப்பிடத்துக்கே சென்று பார்வையிட்ட அவர், தேவையான உதவிகள் செய்வதாக உறுதியளித்தார். இது தொடர்பாக 20.06.2021 தேதியிட்ட ஜூ.வி-யில், “உங்களுக்கும் நல்ல காலம் பிறக்கும்!” என்ற தலைப்பில் கட்டுரை வெளியிட்டோம். அதன் தொடர்ச்சியாக ஜூலை 19-ம் தேதி நெல்லையில் நடந்த ஆய்வுக் கூட்டத்தில் பங்கேற்ற வருவாய்த்துறை அமைச்சர் கே.கே.எஸ்.எஸ்.ஆர்.ராமச்சந்திரன், அந்த மக்களில் 144 பேருக்கு ‘காட்டு நாயக்கன்’ எனப் பழங்குடியினருக்கான சாதிச்சான்றிதழ் வழங்கினார்.

மகேஸ்வரி - ஜேம்ஸ் - அந்தோணி
மகேஸ்வரி - ஜேம்ஸ் - அந்தோணி

‘தமிழகப் பழங்குடி நாடோடிகள் கூட்டமைப்பின்’ நிறுவனரான மகேஸ்வரி நம்மிடம், ‘‘சாதிச்சான்று இல்லாததால் குழந்தைகளுக்குப் பள்ளிகளில் எந்தச் சலுகையும் கிடைக்கவில்லை. பலரும் குழந்தைகளை எட்டாம் வகுப்புக்கு மேல் படிக்கவைக்கவில்லை. இப்போதைய தமிழக அரசின் இந்த நடவடிக்கையால், ஏழைக் குழந்தைகளின் வாழ்க்கை இனி வளம்பெறும். இதற்கு உதவிசெய்த அமைச்சர்கள், அதிகாரிகள் அனைவருக்கும் நன்றி’’ என்றார்.

சாதிச்சான்று கிடைத்த மகிழ்ச்சியிலிருக்கும் ஜேம்ஸ் என்ற மாணவர், ``‘நான் பி.எஸ்சி கம்ப்யூட்டர் சயின்ஸ் முடிச்சுருக்கேன். நல்லாப் படிச்ச பலரும் பத்தாவது முடிச்சதும் பெற்றோருக்கு உதவியா ‘குறி’ சொல்லும் வேலைக்குப் போயிட்டாங்க. எனக்கு ஸ்காலர்ஷிப் எதுவும் கிடைக்காத சூழ்நிலையிலும்கூட எங்கப்பா என்னை கஷ்டப்பட்டுப் படிக்கவெச்சார். இனி என்னால மேற்படிப்பை முடிச்சுட முடியும்” என்றார் நம்பிக்கையோடு.

“ஜூ.வி-யால் எங்களுக்கு நல்ல காலம் பொறந்துருச்சு!” - சாமக்கோடாங்கிகள் நெகிழ்ச்சி

காட்டுநாயக்கர் சமுதாயத் தலைவரான அந்தோணி, “சாதிச்சான்று கேட்டு 30 வருசத்துக்கும் மேல நாங்க பல ஆபீஸ்ல முறையிட்டும் கிடைக்கலை. ஜூ.வி-யில எங்க பிரச்னை வந்த பிறகுதான், எங்க வாழ்க்கையில ஒளி வந்திருக்கு. எங்களுக்கு நல்ல காலம் பொறக்க உதவி செஞ்ச ஜூ.வி-க்கு நன்றி’’ என்றார் நெகிழ்ச்சியுடன்.

விளிம்புநிலை மக்களின் கோரிக்கையை நிறைவேற்றிய அதிகாரிகள், அமைச்சர்கள் அனைவருமே பாராட்டுக்குரியவர்கள்!