Published:Updated:

செகண்ட் ஹேண்ட் காருக்குத்தான் இப்போது மவுசு! - பட்டையைக் கிளப்பும் பழைய கார்கள்..!

பழைய கார்கள்
பிரீமியம் ஸ்டோரி
பழைய கார்கள்

ரூ.4 லட்சம் மதிப்பிலான செகண்ட் ஹேண்ட் கார்களுக்கு நல்ல வரவேற்பும் தேவையும் இருக்கின்றன.

செகண்ட் ஹேண்ட் காருக்குத்தான் இப்போது மவுசு! - பட்டையைக் கிளப்பும் பழைய கார்கள்..!

ரூ.4 லட்சம் மதிப்பிலான செகண்ட் ஹேண்ட் கார்களுக்கு நல்ல வரவேற்பும் தேவையும் இருக்கின்றன.

Published:Updated:
பழைய கார்கள்
பிரீமியம் ஸ்டோரி
பழைய கார்கள்
கொரோனா தொற்றுநோயால் கார்களின் விற்பனை கொஞ்சம் சுணங்கி யிருந்தாலும், செகண்ட் ஹேண்ட் கார்களின் விற்பனை தற்போது படுவேகமாக இருக்கிறது.

பொருளாதார பாதிப்பு, நிறுவனங்களின் வருவாய் இழப்பு, ஊழியர்களுக்கு ஊதியம் குறைப்பு, பணிநீக்கம் போன்றவை மக்களின் கவனத்தைப் புது கார்களிலிருந்து பழைய கார் பக்கம் திருப்பியிருக்கிறது.

தொழில் நகரமான கோவை, தமிழகத்தின் செகண்ட் ஹேண்ட் கார்களுக்கு முக்கியமான ஒரு கேந்திரம். சென்னை உட்பட பல்வேறு நகரங்களிலிருந்து கோவைக்கு வந்து கார்களை வாங்கும் அளவுக்கு மக்களின் நம்பிக்கையைப் பெற்றிருக்கிறார்கள் கோவை கார் டீலர்கள். செகண்ட் ஹேண்ட் கார் விற்பனை குறித்து விளக்கமாகத் தெரிந்துகொள்ள நவ இந்தியா பகுதியிலுள்ள மாருதி ட்ரூ வேல்யூ ஷோ ரூமில், அம்பாள் ஆட்டோ உரிமையாளர் அசோகனிடம் பேசினோம்.

கார்
கார்

‘‘நாங்கள் 20 ஆண்டுகளுக்கும் மேலாக ஆட்டோமொபைல் துறையில் இருக்கிறோம். கிட்டத்தட்ட 18 ஆண்டுகளாக செகண்ட் ஹேண்ட் கார்களையும் விற்றுவருகிறோம். செகண்ட் ஹேண்ட் கார்களைப் பொறுத்தவரை, ஊரடங்குக்கு முன்பிருந்த வரவேற்பைவிட தற்போது சீராக அதிகரித்துவருகிறது. செகண்ட் ஹேண்ட் கார் வேண்டும் என்று முன்பு ஒரு நாளைக்கு எட்டுப் பேர் வரை நேரடியாக வருவார்கள். இப்போது 10 முதல் 12 பேர் வரை நேரடியாக வருகிறார்கள். செகண்ட் ஹேண்ட் கார் வேண்டும் என்று விசாரிப்பவர்களின் எண்ணிக்கை 30% வரை அதிகரித்துள்ளது.

`பொதுப் போக்குவரத்து முடங்கியதால் செளகர்யமாக, பாதுகாப்பாகப் பயணிக்க வேண்டும் என மக்கள் நினைப்பதால், செகண்ட் ஹேண்ட் கார்களின் தேவை அதிகரித்திருக்கலாம்’ என்று சொல்வது சரிதான். கடந்த ஏப்ரல், மே என இரண்டு மாதங்கள் நாடே முடங்கிப் போனது. பிறகு ஊரடங்கு ஓரளவு தளர்த்தப்பட்டபோது, பொதுப் போக்குவரத்து இல்லாததால், அங்குமிங்கும் செல்ல முடியாமல் பலரும் தவித்தனர். அப்போதுதான் `பழைய காராவது வாங்க வேண்டும்’ என்று மக்களுக்குத் தோன்றியுள்ளது. இப்போது அனைத்தும் இயல்புநிலைக்குத் திரும்பியிருப்பதால், செகண்ட் ஹேண்ட் கார்களை வாங்கி வருகிறார்கள்.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

தற்போது நான்கு லட்ச ரூபாய் மதிப்பிலான செகண்ட் ஹேண்ட் கார்களுக்கு நல்ல வரவேற்பும் தேவையும் இருக்கின்றன. அந்த பட்ஜெட்டுக்குள் மாருதியில் நிறைய கார்கள் இருக்கின்றன. அது எங்களுக்குப் பெரிய அட்வான்டேஜ்.

கார்
கார்

பொதுவாக, விசாரிப்புகள் அதிகரித்தாலே விற்பனையும் அதிகரிக்கும். ஊரடங்குக்கு முன்னர் ஸ்லோ டௌன் காலகட்டத்தில், ஆட்டோமொபைல்துறையில் புதிய கார்கள் அளவுக்கு இல்லாவிடினும், செகண்ட் ஹெண்ட் கார்கள் விற்பனையுமே சற்று மந்தமாகத்தான் இருந்தது. தற்போது அந்தச் சூழல் மாறியிருக்கிறது. மேலும், இப்போது புதிய கார் விற்பனையும் 80% அளவுக்கு முன்னேற்றம் அடைந்திருக்கிறது.

செகண்ட் ஹேண்ட் கார்களை நாம் தயாரிக்க முடியாது. எக்ஸ்சேஞ்ச் மூலம்தான் நமக்குப் பயன்படுத்தப்பட்ட கார்கள் கிடைக்கும். ஆனால், கொரோனாவுக்குப் பிறகு எகஸ்சேஞ்ச் செய்பவர்களின் எண்ணிக்கை மிகவும் குறைந்துவிட்டது. இதன் பிறகும், எத்தனை பேர் எக்ஸ்சேஞ்ச் மூலம் பழைய காரைத் தருவார்கள் எனத் தெரியவில்லை. இதுவும் எங்களுக்கு ஒரு பெரிய சவாலாக இருக்கும்.

முழு ஊரடங்கு முடிந்தவுடனேயே, செகண்ட் ஹேண்ட் கார்களுக்குத் தேவை அதிகரிக்கும் என்று எதிர்பார்த்தோம். ஆனால், இந்த அளவுக்கு வரவேற்பு இருக்கும் என்று நாங்கள் எதிர்பார்க்கவில்லை. காரணம், தற்போது செகண்ட் ஹேண்ட் கார்களுக்கான மார்க்கெட் ஆன்லைன், ஆஃப்லைன் என்று பல்வேறு வழிகளில் பெரிதாக இருக்கிறது. நாங்கள் கோவையில் இருந்தாலும், நீலகிரியிலும் எங்களுக்கு அதிக அளவு வாடிக்கையாளர்கள் இருக்கின்றனர். ஊரடங்கு அமலில் இருப்பதால், இ-பாஸ் பெற முடியாமல் வெளியூர்களிலிருந்து மக்கள் வர முடிவதில்லை. மாவட்ட அளவிலிருக்கும் கட்டுப்பாடுகளைத் தளர்த்தி, மண்டல அளவில் மாற்றினாலே அனைவருக்கும் உதவியாக இருக்கும்.

இந்த ஆண்டில் இரண்டு மாதங்கள் விற்பனை முற்றிலும் முடங்கிவிட்டது. எந்தத் தொழிலிலும் பெரிய லாபம் வைத்து பிசினஸ் செய்ய முடியாது. அதுவும் செகண்ட் ஹேண்ட் கார்களிலெல்லாம் பெரிய லாபத்தை நாங்கள் எதிர்பார்க்க முடியாது. எனவே, இந்த ஆண்டு மீதமுள்ள மாதங்களில் பிசினஸ் நல்லபடியாக இருந்தால்தான் சமாளிக்க முடியும்” என்றார் அழுத்தமாக.

கார்
கார்

ஆர்.எஸ்.புரம் பகுதியிலுள்ள `மண்ணாடியார் கார்ஸ்’ நிறுவனத்தின் பொது மேலாளர் சந்தோஷிடம் பேசினோம். ‘‘செகண்ட் ஹேண்ட் கார்களுக்கான தேவை அதிகரித்திருப்பது உண்மைதான். எங்களுக்கும் நிறைய இடங்களிலிருந்து அழைப்புகள் வருகின்றன. மூன்று லட்சம் ரூபாய்க்குள் இருக்கும் கார்களுக்கு நல்ல வரவேற்பு இருக்கிறது. ஐந்து லட்சம் ரூபாய்க்கு மேலுள்ள கார்கள் வேண்டும் என்று கேட்கிறவர்களின் எண்ணிக்கை குறைவாகத்தான் இருக்கிறது.

பொதுவாக, ஒரு மாதத்துக்கு எங்களிடம் 150 முதல் 200 பேர் கார் வாங்குவதற்கு நேரடியாக வந்து விசாரிப்பார்கள். தற்போது, ஊரடங்கால் மக்கள் நேரடியாக வருவது குறைந்து, போன் விசாரிப்புகள் அதிகரித்துள்ளன. பொதுப் போக்குவரத்து முடங்கியதும் இதற்கு ஒரு காரணமாக இருக்கலாம்.

அதே நேரத்தில் மக்கள் பி.எஸ் 6 ரக வாகனங்களைவிட, பி.எஸ் 4 ரக வாகனங்கள் வேண்டும் எனக் கேட்கிறார்கள். மேலும், புதிதாக ஒரு காரை வாங்கி, சில ஆண்டுகளில் விற்றால் ரீ-சேல் மதிப்பு சற்றுக் குறைவாகத்தான் இருக்கும். அதுவே செகண்ட் ஹேண்ட் கார்களை வாங்கி, சில ஆண்டுகளில் விற்றால்கூட, பெரிய அளவில் மதிப்பு குறையாது. இதனால்தான் செகண்ட் ஹேண்ட் கார்களை மக்கள் விரும்புகிறார்கள்.

அசோகன், சந்தோஷ்
அசோகன், சந்தோஷ்

மக்களின் மனநிலையைப் பொறுத்து, நாங்களும் பட்ஜெட் கார்களில்தான் அதிக கவனம் செலுத்திவருகிறோம். தற்போது, வெளியூர்களிலிருந்து நிறைய பேர் கார்கள் வேண்டும் என்று விசாரிக்கிறார்கள். வாட்ஸ்அப்பில் போட்டோ மற்றும் விவரங்களை அனுப்பினாலும், நேரடியாக வந்து பார்த்துவிட்டுத்தான் கார்களை வாங்குவார்கள். தற்போது இ-பாஸ் கிடைக்காமல் இருப்பதால், பலரும் நேரில் வர முடிவதில்லை. உள்ளூர்வாசிகளில் சிலர் கார்கள் குறித்து விசாரிக்கவும் வருவார்கள், வாங்கவும் வருவார்கள். அதேநேரத்தில் வெளியூர்களிலிருந்து வருபவர்கள், கார்களை வாங்க வேண்டும் என்று உறுதியான மனநிலையில் வருவார்கள். அப்படிப்பட்ட வாடிக்கையாளர்களின் பிசினஸ் எங்களுக்கு டௌன்தான். ஊரடங்கு, இ-பாஸ் போன்றவற்றில் தளர்வுகளை ஏற்படுத்தினால் எங்களுக்கு மிகவும் பயனுள்ளதாக இருக்கும்.

பட்ஜெட் கார்களைப் பொறுத்தவரை, பெரும்பாலும் மிடில் கிளாஸ் மக்கள்தான் வாங்குவார்கள். அதில், சிலரால் முழுத்தொகை கொடுக்க முடியாமல் வங்கிக் கடனை எதிர்பார்த்துக் காத்திருப்பார்கள். ஆனால், தற்போது வங்கிக்கடன் கிடைப்பதிலும் சிரமங்கள் இருக்கின்றன. இந்தப் பிரச்னைகளெல்லாம் சரியானால், செகண்ட் ஹேண்ட் கார் விற்பனை சூடுபிடித்து, குறிப்பிடத்தக்க அளவு முன்னேற்றம் அடையும்” என்றார் நம்பிக்கையுடன்.

சொந்தமாக ஒரு கார் வைத்திருக்க வேண்டும் என்பது நம் மக்களின் கனவு. பழசோ, புதுசோ கார் விற்பனை மீண்டும் ஒரு ரவுண்ட் வரும் என்றே தோன்றுகிறது!