Published:Updated:

ஸ்மார்ட் சிட்டி ஊழல்... கேரளாவுக்கு மணல் கடத்தல்... சி.இ.ஓ ராஜினாமா!

நெல்லை மாநகராட்சி
பிரீமியம் ஸ்டோரி
நெல்லை மாநகராட்சி

சர்ச்சை வளையத்தில் நெல்லை மாநகராட்சி

ஸ்மார்ட் சிட்டி ஊழல்... கேரளாவுக்கு மணல் கடத்தல்... சி.இ.ஓ ராஜினாமா!

சர்ச்சை வளையத்தில் நெல்லை மாநகராட்சி

Published:Updated:
நெல்லை மாநகராட்சி
பிரீமியம் ஸ்டோரி
நெல்லை மாநகராட்சி

நெல்லை மாநகராட்சியில் தோண்டத் தோண்ட வெளியே வருகின்றன ஊழல் பூதங்கள். கடந்த சில ஆண்டுகளாக நெல்லையில் நடந்துவரும் ‘ஸ்மார்ட் சிட்டி’ பணிகளில் மணல் கொள்ளை மற்றும் சில ஊழல்கள் அரங்கேறிய நிலையில், இது தொடர்பாக உயர் நீதிமன்றம் சாட்டையைச் சுழற்றத் தொடங்கியிருக்கிறது. இதையடுத்து, ஸ்மார்ட் சிட்டிக்கான சி.இ.ஓ-வாக இருந்த நாராயணன் நாயர் ராஜினாமா செய்துவிட்டு ஒதுங்கிக்கொண்டதால், விவகாரம் சூடுபிடித்திருக்கிறது.

கடந்த 2017-ம் ஆண்டு, 950 கோடி ரூபாய் மதிப்பீட்டில் நெல்லை மாநகரில் ஸ்மார்ட் சிட்டி பணிகள் தொடங்கப்பட்டன. அதன்படி நவீன பேருந்து நிலையங்கள், வணிக வளாகங்கள், பாதாளச் சாக்கடைத் திட்டம், குடிநீர் திட்டங்கள் உள்ளிட்ட பணிகள் நடந்துவருகின்றன. இவற்றில்தான் ஊழல் நடந்திருப்பதாகப் புகார்கள் கிளம்பியிருக்கின்றன.

ஸ்மார்ட் சிட்டி ஊழல்... கேரளாவுக்கு மணல் கடத்தல்... சி.இ.ஓ ராஜினாமா!

மாநகராட்சியின் அதிகாரிகள் சிலர், ஊழல் நடந்ததன் பின்னணி குறித்து நம்மிடம் விவரித்தார்கள்... ‘‘நெல்லை மாநகராட்சியில் இளநிலை பொறியாளராக வேலையில் சேர்ந்தவர், நாராயணன் நாயர். உயரதிகாரிகள் மற்றும் அரசியல்வாதிகளை அனுசரித்துப் போனதால் உதவி செயற்பொறியாளர், மாநகர செயற்பொறியாளர், தலைமைப் பொறியாளர், கமிஷனர் (பொறுப்பு) என அடுத்தடுத்து உயர் பொறுப்புகளை வகித்தவர், 2019, மே 19-ம் தேதி ஓய்வுபெற்றார். கடந்த ஆட்சியில் கொங்கு மண்டல அமைச்சர் ஒருவருக்கு இவர் நெருக்கமாக இருந்ததால், ஓய்வுபெற்ற சில மாதங்களிலேயே நெல்லை ஸ்மார்ட் சிட்டி பணிகளுக்கான சி.இ.ஓ-வாக நியமிக்கப்பட்டார்.

இவர் சி.இ.ஓ-வாக இருந்த காலகட்டத்தில், நெல்லை சந்திப்பு பேருந்து நிலையத்தில் ஸ்மார்ட் சிட்டி பணிக்காக அஸ்திவாரம் தோண்டிய இடத்தில் ஆற்று மணல் கிடைத்திருக்கிறது. அதை அவர் முறைகேடாக விற்பனை செய்துவிட்டார் என்பதுதான் புகார். இது தொடர்பாக காங்கிரஸ் கட்சியைச் சேர்ந்த சுடலைகண்ணு என்பவர் சென்னை உயர் நீதிமன்ற மதுரைக் கிளையில் வழக்கு தொடர்ந்தார். வழக்கை விசாரித்த நீதிமன்றம், சி.பி.சி.ஐ.டி விசாரணைக்கு உத்தரவிட்டது. இந்தநிலையில்தான், கடந்த சில நாள்களுக்கு முன்பு நாராயணன் நாயர் பதவியை ராஜினாமா செய்திருக்கிறார்” என்றார்கள்.

சுடலைகண்ணு, பிரம்மா, விஷ்ணு சந்திரன்
சுடலைகண்ணு, பிரம்மா, விஷ்ணு சந்திரன்

வழக்கு தொடர்ந்த சுடலைகண்ணுவைச் சந்தித்தபோது கூடுதல் விவரங்களைச் சொன்னார்... “நாராயணன் நாயர் சி.இ.ஓ பொறுப்பிலிருந்தபோது, தாமிரபரணி ஆற்றுக்கு அருகிலிருக்கும் சந்திப்பு பேருந்து நிலையத்தில் ஸ்மார்ட் சிட்டி பணிக்காகப் பள்ளம் தோண்டினார்கள். அப்போது 6 அடிக்கு கீழ் 30 அடி வரை ஆற்று மணல் கிடைத்தது. அதை ‘கட்டுமானத்துக்குப் பயன்படாத களிமண்’ என்று சொல்லி கேரளாவுக்குக் கடத்தி விற்றுவிட்டார்கள். இதில் சுமார் 100 கோடி ரூபாய் அளவுக்கு மோசடி நடந்திருக்கிறது. இதன் பின்னணியில் அப்போது அதிகார வர்க்கத்தில் இருந்தவர்கள், அதிகாரிகள் எனப் பலருக்கும் தொடர்பு இருந்தது. இது குறித்து மாவட்ட நிர்வாகத்துக்குப் பலமுறை புகார் அனுப்பியும் நடவடிக்கையும் எடுக்காததால், நீதிமன்றம் சென்றேன். நீதிமன்றம் சார்பாக புவியியல் வல்லுநர் சம்பந்தப்பட்ட இடத்தில் ஆய்வுசெய்தபோது, அங்கு ஆற்று மணல் மட்டுமன்றி, தாது மணலும் கிடைத்தது தெரியவந்தது.

நாராயணன் நாயர்
நாராயணன் நாயர்

இதையடுத்து இந்த வழக்கை சி.பி.சி.ஐ.டி விசாரித்து நான்கு மாதங்களில் முடிக்கும்படி நீதிமன்றம் கண்டிப்புடன் உத்தரவிட்டிருக்கிறது. நாராயணன் நாயர் ராஜினாமா கடிதம் கொடுத்திருக்கும் நிலையில், இதில் தொடர்புடைய மேலும் ஐந்து அதிகாரிகள் நெல்லை மாநகராட்சியில் பணிபுரிகிறார்கள். அவர்களை வேறு இடத்துக்கு மாற்றினால் மட்டுமே நியாயமான விசாரணை நடக்கும்’’ என்று படபடத்தார். நெல்லை மாநகராட்சியில் நடந்த வேறு சில மோசடிகள் பற்றியும் தகவல் அறியும் சட்டத்தில் வெளிக்கொண்டு வந்திருக்கிறார் வழக்கறிஞர் பிரம்மா. அவர் நம்மிடம், ‘‘நெல்லை மாநகராட்சியில் குடிநீர் விநியோகத்தைக் கண்காணிக்க, 3 கோடி ரூபாயில் வாங்கிய ‘ஸ்கேடா’ கருவி ஓராண்டில் பழுதடைந்துவிட்டது. செயல்படாமல் இருந்த அந்தக் கருவியைப் பராமரிப்பதற்கு என்று சொல்லி 65 லட்சம் ரூபாயை முறைகேடு செய்திருக்கிறார்கள். இந்த விவகாரத்திலும் விசாரணை நடத்த உயர் நீதிமன்றம் உத்தரவிட்டுள்ளது. இதிலும் நாராயணன் நாயர் உள்ளிட்ட ஆறு அதிகாரிகளுக்குத் தொடர்பிருப்பதாக போலீஸாரிடம் தெரிவித்திருந்தேன். இது தவிர, டோல்ஃப்ரீ நம்பரைப் பராமரிக்க லட்சக்கணக்கில் செலவானதாக பொய்க் கணக்கு எழுதியிருக்கிறார்கள். இந்த மோசடிகளில் நாராயணன் நாயருக்குத் தொடர்பு இருப்பதால், அவரது ராஜினாமாவை ஏற்கக் கூடாது. அவர்மீது விசாரணை நடத்தி சொத்துகளைப் பறிமுதல் செய்ய வேண்டும்” என்றார் காட்டமாக.

ஸ்மார்ட் சிட்டி ஊழல்... கேரளாவுக்கு மணல் கடத்தல்... சி.இ.ஓ ராஜினாமா!

இந்தப் புகார்கள் தொடர்பாக விளக்கம் கேட்க நாராயணன் நாயரைத் தொடர்புகொண்டபோது, அவரது அலைபேசி சுவிட்ச் ஆஃப் செய்யப்பட்டிருந்தது. தொடர்ந்து விளக்கம் கேட்டு அவருக்கு வாட்ஸ்அப் அனுப்பியிருக்கிறோம். புகார்கள் மற்றும் நீதிமன்ற உத்தரவு குறித்து நெல்லை மாநகராட்சி ஆணையாளர் விஷ்ணு சந்திரனிடம் கேட்டதற்கு, ‘‘நான் மாநகராட்சி ஆணையாளராகப் பொறுப்பேற்று ஒரு மாதம்தான் ஆகிறது. மணல் கடத்தப்பட்டதாகப் புகார் எழுந்துள்ள விஷயத்தில், சி.பி.சி.ஐடி விசாரணைக்கு முழு ஒத்துழைப்பு அளிப்போம். நாராயணன் நாயர் கொடுத்துள்ள ராஜினாமாவை இதுவரை ஏற்கவில்லை. புகார்கள் நீதிமன்ற விசாரணையில் இருப்பதால், மேற்கொண்டு எதுவும் பேச விரும்பவில்லை” என்றார்.

ஊழல் செய்த அதிகாரிகள் கடுமையாக தண்டிக்கப்பட்டால்தான், அடுத்தடுத்து தவறு செய்யத் துணியும் அதிகாரிகளுக்கு பயம் வரும். நேர்மையான நிர்வாகம் நடக்கும்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism