Published:Updated:

“உர்ர்ர்ர்... லொள்... லொள்!” - திகில் கிளப்பும் தெரு நாய்கள்

திகில் கிளப்பும் தெரு நாய்கள்
பிரீமியம் ஸ்டோரி
திகில் கிளப்பும் தெரு நாய்கள்

ஆண்டுக்கு 8 லட்சம் பேரைக் கடித்துக் குதறும் கொடூரம்!

“உர்ர்ர்ர்... லொள்... லொள்!” - திகில் கிளப்பும் தெரு நாய்கள்

ஆண்டுக்கு 8 லட்சம் பேரைக் கடித்துக் குதறும் கொடூரம்!

Published:Updated:
திகில் கிளப்பும் தெரு நாய்கள்
பிரீமியம் ஸ்டோரி
திகில் கிளப்பும் தெரு நாய்கள்

‘தங்கச்சிய நாய் கடிச்சிடுச்சுப்பா...’ நடிகர் ஜனகராஜின் பிரபல நகைச்சுவை வசனம் இது. சினிமாவுக்கு வேண்டுமெனில் இது நகைச் சுவையாக இருக்கலாம். ஆனால், யதார்த்த சூழலில் மிகவும் கொடுமையாக இருக்கிறது. தெருவுக்கு ஒருவரேனும் ‘என்னை நாய் கடிச்சிடுச் சுப்பா...’ என வலி தாங்காமல் முனகிவருகின்றனர். நாய்க்கடி தொடர்பாக விகடன் ஆர்.டி.ஐ குழு தகவல்கள் திரட்டியது. அதன்படி, தமிழகத்தில் ஆண்டுக்குச் சுமார் எட்டு லட்சம் பேர் தெரு நாய்க் கடியால் பாதிக்கப்படும் `பகீர்’ தகவல் தெரியவருகிறது. இதோ, முழுப் பின்னணியைப் பார்ப்போம்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

உலக அளவில் ஆண்டுக்குச் சராசரியாக 55,000 பேர் ரேபிஸ் நோயால் உயிரிழக்கின்றனர். இந்தியாவில் மட்டும் ஆண்டுக்குச் சுமார் 20,000 பேர் உயிரிழக்கின்றனர். சராசரியாக இரண்டு கோடிப் பேர் நாய்க்கடியால் பாதிக்கப்படு கிறார்கள். இதில், தமிழகத்தின் கணக்கையும் நிலைமையையும் கேட்டால் தலைசுற்றுகிறது.

சென்னை: தலைநகர் சென்னையின் ராஜீவ் காந்தி, ஸ்டான்லி, கீழ்ப்பாக்கம் ஆகிய மூன்று அரசு மருத்துவக் கல்லூரி மருத்துவ மனைகள் மற்றும் ராயப்பேட்டை அரசு மருத்துவமனை ஆகியவற்றில் மட்டும் ஆண்டுக்குச் சராசரியாக 50,000 பேர் நாய்க்கடிச் சிகிச்சைக்கு வருகிறார்கள். ஸ்டான்லி மருத்துவமனையில் மட்டும் 2010 முதல் 2017-ம் ஆண்டு வரை 1,59,303 பேர் நாய்க்கடிச் சிகிச்சைக்கு வந்துள்ளனர்.

இப்படிப் பெரிய மருத்துவமனைகள் தவிர்த்து, நகர்ப்புற ஆரம்ப சுகாதார நிலையங்கள், தாலுகா மருத்துவமனைகள் மற்றும் தனியார் மருத்துவமனைகளில் சிகிச்சை பெற்றவர்களின் எண்ணிக்கையைக் கணக்கெடுத்தால், சென்னையில் நாய்க்கடி யால் பாதிக்கப்பட்டவர்களின் எண்ணிக்கை ஆண்டுக்கு ஒரு லட்சத்தைத் தாண்டும்.

சென்னை நகரத்தின் பரப்பளவுக் கணக்கீட்டின்படி சுமார் 15 லட்சம் தெரு நாய்கள் சுற்றித் திரிவதாகக் கணக்கிடப்படுகிறது. ஆனால், 2016 முதல் 2019-ம் ஆண்டுவரை சென்னை மாநகராட்சியில் வெறும் 41,992 தெரு நாய்களுக்கு மட்டுமே கருத்தடை செய்யப்பட்டு, வெறிநோய்த் தடுப்பூசி போடப்பட்டுள்ளது.

சேலம்: சென்னைக்கு அடுத்தபடியாக சேலம் அரசு மருத்துவமனையில் ஆண்டுக்குச் சராசரியாக 30,000 பேர் வரை நாய்க்கடிச் சிகிச்சைக்கு வருகின்றனர். அதிகபட்சமாக, கடந்த 2017-ம் ஆண்டில் மட்டும் 36,960 பேர் சிகிச்சை பெற்றுள்ளனர். 2019, ஏப்ரல் மாதம் ஒரு வெறிநாய் ஒரே நாளில் 70 பேரைக் கடித்துக் குதறியது. சேலத்தில் இது பெரிய அளவில் பேசுபொருளானது.

கோவை: கோவை அரசு மருத்துவமனையில் ஆண்டுக்குச் சுமார் 30,000 பேர் நாய்க்கடிச் சிகிச்சைக்கு வருகிறார்கள். 2015-ம் ஆண்டு முதல் 2019 மார்ச் வரை ரேபிஸ் நோயால் பாதிக்கப்பட்டு 20 பேர் இறந்துள்ளனர்.

மதுரை: மதுரை அரசு மருத்துவமனையில் ஆண்டுக்குச் சுமார் 35,000 பேர் நாய்க்கடிச் சிகிச்சைக்கு வருகிறார்கள். 2015 முதல் 2019-ம் ஆண்டுக்குள் 24 பேர் ரேபிஸ் நோயால் பாதிக்கப்பட்டு இறந்துள்ளனர்.

திருச்சி: திருச்சி அரசு மருத்துவமனையில் ஆண்டுக்குச் சுமார் 25,000 பேர் நாய்க்கடிச் சிகிச்சைக்கு வருகிறார்கள். 2015-ம் ஆண்டு தொடங்கி 2019 மார்ச் மாதம் வரையிலாக 24 பேர் ரேபிஸ் பாதிப்பால் இறந்துள்ளனர்.

வேலூர்: வேலூர் அரசு மருத்துவமனையில் ஆண்டுக்குச் சுமார் 5,000 பேர் நாய்க்கடிச் சிகிச்சைக்கு வருகிறார்கள். 2015-ம் ஆண்டு முதல் 2019 மார்ச் வரை 37,863 பேர் நாய்க்கடிக்காகச் சிகிச்சைக்கு வந்துள்ளனர். இவர்களில் ஐந்து பேர் ரேபிஸ் பாதிப்பால் இறந்துள்ளனர். வேலூர் மாநகராட்சியில் பிரத்யேகமாக நாய்பிடி வாகனமும், 11 பணியாளர்கள் இருந்தும் 2016-ம் ஆண்டு முதல் 2019 மார்ச் வரை ஒரு தெருநாய்க்குக்கூடக் கருத்தடை செய்யவில்லை என்பது குறிப்பிடத்தக்கது.

மேற்கண்ட மாநகராட்சிகள் தவிர தஞ்சாவூர், விழுப்புரம், திருநெல்வேலி, கன்னியாகுமரி, தூத்துக்குடி, தேனி, சிவகங்கை, புதுக்கோட்டை, ராமநாதபுரம் உள்ளிட்ட அனைத்து அரசு மருத்துவக் கல்லூரி மருத்துவமனைகளிலும் ஆண்டுக்குச் சராசரியாக இரண்டு லட்சத்துக்கும் அதிகமானோர் நாய்க்கடிச் சிகிச்சைக்கு வந்துள்ளனர். மேற்கண்ட புள்ளிவிவரங்கள் அனைத்தும் மருத்துவக் கல்லூரி மருத்துவ மனைகளில் மட்டுமே எடுக்கப்பட்டுள்ளன. இவை தவிர நகராட்சி, தாலுகா மற்றும் கிராமப்புறச் சுகாதார நிலையங்களைக் கணக்கிட்டால், ஆண்டுக்குச் சுமார் நான்கு லட்சம் பேர் நாய்க்கடியால் பாதிக்கப்பட்டு சிகிச்சை பெறுகிறார்கள். தனியார் மருத்துவ மனைகளுக்குச் சிகிச்சைக்காகச் செல்வோரைக் கணக்கிட்டால், இந்த எண்ணிக்கை இரு மடங்காக அதிகரிக்கக்கூடும். இதன்படி தமிழகத்தில் ஆண்டுக்குச் சுமார் எட்டு லட்சம் பேர் வரை நாய்க்கடியால் பாதிக்கப்படுகிறார்கள் என்பதை கணிக்க முடிகிறது.

திகில் கிளப்பும் தெரு நாய்கள்
திகில் கிளப்பும் தெரு நாய்கள்

மருந்துச் செலவு 90 கோடி ரூபாய்!

தமிழ்நாடு மருத்துவச் சேவைக்கழகம் கடந்த 2010-11 முதல் 2018-19 நிதியாண்டு வரையிலான ஒன்பது ஆண்டுகளில், தனியார் மருந்து நிறுவனங்களிடமிருந்து 90.61 கோடி ரூபாய்க்கு ரேபிஸ் தடுப்பு மருந்துகளைக் கொள்முதல் செய்துள்ளது. அதிகபட்சமாக 2018-19-ம் ஆண்டில் 9,58,056 டோசேஜ் மருந்துகளை 14.57 கோடி ரூபாய்க்குக் கொள்முதல் செய்துள்ளது. முந்தைய

2017-18-ம் ஆண்டு கொள்முதல் செய்த டோசேஜ் 5,12,970. ஒப்பீட்டளவில் ஒரு வருடத்தில் நான்கு லட்சம் டோசேஜ் அதிகமாக வாங்கப்பட்டிருக்கிறது. மருந்தின் தேவை ஆண்டுக்கு ஆண்டு அதிகரித்துக்கொண்டே செல்கிறது.

இது குறித்து மாநகராட்சி உயரதிகாரி ஒருவரிடம் பேசினோம். “நாய் இனக்கட்டுப்பாடு சட்டம் 2001-ன்படி, தெரு நாய்கள் பிடிக்கப்பட்டு அவற்றுக்கு இனக்கட்டுப்பாடு அறுவை சிகிச்சையும், வெறிநோய் தடுப்பூசியும் போடப்பட்ட பிறகு அவற்றைப் பிடித்த இடத்திலேயே விட்டுவிட வேண்டும். தமிழகத்தைப் பொறுத்தவரை இரண்டு லட்சம் நாய்களுக்கும், சென்னை போன்ற பெருநகரங்களில் ஆண்டுக்கு 50,000 நாய்களுக்கும் இதைச் செய்ய வேண்டும். இதில் எங்களுக்கிருக்கும் சிக்கலே விலங்குகள் நல ஆர்வலர்கள்தான். அவர்களின் குறுக்கீடுகளே இந்தப் பணி தடைப்படுவதற்குக் காரணமாக இருக்கிறது” என்று அலுத்துக்கொண்டார்.

இது குறித்து சுகாதாரத்துறைச் செயலாளர் ராதாகிருஷ்ணனிடம் கேட்டோம். “தற்போது கொரோனா தடுப்புப் பணியில் இருப்பதால் இது தொடர்பான விளக்கத்தையும் தகவல்களையும் சரிபார்த்த பிறகே தர முடியும்” என்றார்.

‘நாய், மனிதனைக் கடித்தால் அது செய்தி அல்ல... மனிதன் நாயைக் கடித்தால்தான் செய்தி’ என்பார்கள். ஆனால், நாய் மனிதனைக் கடித்து, அது செய்தியாகிறது என்றால் விஷயம் விபரீதமாகிக்கொண்டிருக்கிறது என்றே அர்த்தம்! தேவை, போர்க்கால நடவடிக்கை.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

20 லட்சம் ரூபாய்வரை நிவாரணம்!

கடந்த 2016-ம் ஆண்டு கேரளாவில் தெரு நாய்க்கடி பிரச்னை விஸ்வரூபம் எடுத்தது. ‘ஒரே வருடத்தில் ஒரு லட்சத்துக்கும் அதிகமானோர் தெரு நாய்க்கடியால் பாதிக்கப் பட்டார்கள். 10 பேர் உயிரிழந்தார்கள்’ என்கிற தகவல் அங்கு வெளியானது. பொதுமக்கள், அரசியல் கட்சியினர் போராட்டத்தில் ஈடுபட்டார்கள். இது குறித்து விசாரிக்க உச்ச நீதிமன்றம் 2016-ம் ஆண்டு மூவர் விசாரணைக்குழுவை அமைத்தது.

`நாய்க்கடியால் பாதிக்கப்பட்டவர்களுக்கு உரிய நிவாரணம் வழங்க வேண்டும்’ என்று உத்தரவிட்டதுடன், கேரள அரசுக்கும் கண்டனங்களைத் தெரிவித்தது உச்ச நீதிமன்றம். தவிர, கடந்த 2018-ம் ஆண்டு கேரளா உயர் நீதிமன்றம் மற்றொரு வழக்கு ஒன்றில் தெரு நாய்க்கடியால் பாதிக்கப்பட்டவர்களுக்கு, பாதிப்புக்குத் தக்கபடி 20 லட்சம் ரூபாய்வரை நிவாரணம் வழங்க வேண்டும் என்று தீர்ப்பளித்தது. கேரளா உடனடியாக தீர்வுகளை நோக்கி நகர்ந்தது. இந்தியாவிலேயே முதன்முறையாகக் கேரள அரசு 150 கோடி ரூபாய் பட்ஜெட்டில் நாய்க்கடி மருந்தைத் தயாரித்துவருகிறது. தமிழகத்திலும் நாய்க்கடிக்கான மருந்தை அரசு உற்பத்தி செய்ய வேண்டும். தவிர, தமிழகம் முழுவதும் நாய் இனக்கட்டுப்பாடு சட்டத்தைத் தீவிரமாகச் செயல்படுத்த வேண்டும்.

“5 பேரா வந்தாதான் ஊசி போடுவோம்!”

சமீபத்தில், திருவாரூரில் குடவாசல் வழியாக கும்பகோணம் நோக்கி பைக்கில் சென்று கொண்டிருந்தார் ஒருவர். தெரு நாய் ஒன்று பாய்ந்து அவரைக் கடித்துவிட்டது. நேராகக் குடவாசல் தாலுகா மருத்துவமனைக்குச் சென்றிருக்கிறார். அங்கு மருத்துவர்கள் இல்லை. பணியிலிருந்த செவிலியரோ, ‘ஐந்து பேர் மொத்தமாக வந்தால்தான் ஊசி போட முடியும்’ என்று சொல்லி அதிர்ச்சி வைத்தியம் கொடுத் துள்ளார். ‘நான்கு பேருக்கு நான் எங்கு போவேன்?’ என்று நொந்துகொண்டவர், உடனடியாக மருத்துவக் கல்லூரி மருத்துவ மனைக்குச் சென்று ஊசி போட்டுக் கொண்டிருக்கிறார்.

“ஏன் இப்படி?” என்று மருத்துவர் ஒருவரிடம் கேட்டோம். “நாய்க்கடிக்கான ஒரு மருந்துத் தொகுப்பில் (VIAL) ஐந்து நபர்களுக்கான மருந்து இருக்கும். ஒரு முறை திறந்துவிட்டால், சில மணி நேரத்துக்குள் பயன்படுத்திவிட வேண்டும். இல்லாவிட்டால் வீணாகிவிடும். அதனாலேயே, ஐந்து பேருக்காகக் காத்திருக் கிறார்கள். இது மிகவும் தவறான, ஆபத்தான போக்கு. ஒருவேளை வெறிநாய் கடித்திருந்து, அது எலும்பு வரை ஆழமாக பாதித்திருந்தால், உடனடியாக ‘ரேபிஸ் இம்யூனோகுளோபுலின்’ (Rabies Immunoglobulin) மருந்தைச் செலுத்தியே ஆக வேண்டும். இப்படியான சூழல் களில் உடனடியாக மருந்தைச் செலுத்துவதை அரசு உறுதிப்படுத்த வேண்டும்” என்றார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism