நிவர் கடந்த நிலம்!

‘கொரோனாவால் நொந்துபோயிருக்கும் மக்களை நாமும் வதைக்க வேண்டாம்’ என்று நினைத்திருக்குமோ என்னவோ... வட தமிழகத்தையும் டெல்டா மாவட்டங்களையும் புரட்டிப்போடும் அளவுக்கு அச்சத்தை ஏற்படுத்திய ‘நிவர்’ புயல், கடைசி நிமிடத்தில் நிம்மதி தந்திருக்கிறது. அரசும் முன்னெச்சரிக்கை நடவடிக்கைகளை எடுத்தது. கடந்த காலங்களில் பெற்ற படிப்பினைகளின் பலனாக மக்களும் உஷாராக இருந்தனர். புயலும் வீரியம் இழந்து பெரும் சேதங்களை விளைவிக்காமல் கடந்திருப்பதால் நிம்மதிப் பெருமூச்சுவிடுகிறது தமிழகம். . நவம்பர் 21-ம் தேதி, வங்கக் கடலில் உருவான காற்றழுத்தத் தாழ்வு பகுதி, நிவர் புயலாக வலுப் பெற்றது. மாமல்லபுரத்துக்கும் நாகப்பட்டினத்துக்கும் இடையே இது கரையைக் கடக்கலாம் என்று கணிக்கப்பட்டது. கஜா புயலைவிட ஆபத்தானதாக இது இருக்கும் எனப் பலரும் கணித்தனர். மெல்ல மெல்ல நகர்ந்தும், இடையிடையில் அமைதியாக நின்றும் இது கரையை நோக்கி வந்தது. இதன் வேகத்தைக் கணிக்க முடியாததால், துல்லியமாக எந்தப் பகுதியில் கரையைக் கடக்கும் என்று வானிலை ஆய்வாளர்களால் கூற முடியவில்லை.

நவம்பர் 25-ம் தேதி, அது கரையை நெருங்கிய நேரத்தில் கடலூரும் புதுச்சேரியும் பீதியில் உறைந்தன. ‘நிவர், புதுச்சேரிக்கும் மரக்காணத்துக்கும் இடையே கரையைக் கடக்கும்’ என்று கூறப்பட்டதும், நிம்மதிப் பெருமூச்சுவிட்டார்கள் கடலூர்வாசிகள்.

. 25-ம் தேதி மதியம் முதலே புதுச்சேரியில் தொடர் மழை கொட்டத் தொடங்கியது. இரவு 11 மணிக்கு புதுச்சேரிக்கும் மரக்காணத்துக்கும் இடையே அழகன்குப்பம் என்ற பகுதியில் 80 கிலோமீட்டர் வேகத்தில் கரையைக் கடக்கத் தொடங்கிய புயல், 26-ம் தேதி அதிகாலை 3:30 மணிக்குக் கடந்து சென்றது. அந்த நேரத்தில் கடலூர், புதுச்சேரி, மரக்காணம் பகுதிகளில் கனமழை கொட்டித் தீர்த்தது. புயலைவிட மழையே பெரும் பாதிப்பை ஏற்படுத்தியது.

. நிவர், வட தமிழகத்தை நோக்கித் திரும்பியதும் முதலில் பீதியடைந்தது கடலூர் மாவட்டம்தான். வடிகால் பகுதியாக இருக்கும் அந்த மாவட்டம், கடந்த 10 ஆண்டுகளில் ‘சுனாமி’, ‘வர்தா’ புயல், ‘நீலம்’ புயல், ‘தானே’ புயல் எனத் தொடர்ச்சியாக சேதங்களைச் சந்தித்துவருகிறது. அந்த அனுபவம் கொடுத்த பாடத்தில் இம்முறை அலெர்ட்டான கடலூர் மாவட்ட நிர்வாகம், 21-ம் தேதி முதலே மீனவர்களைக் கடலுக்குச் செல்ல வேண்டாம் என்று அறிவுறுத்தத் தொடங்கியதுடன், அவர்களின் படகுகளையும் வலைகளையும் கரைக்கு இழுத்து வந்து பாதுகாப்பாக நிறுத்தியது. கடலூர் மாவட்டத்தின் புவியியல் தன்மையை நன்கு அறிந்தவரான தமிழக அரசின் முதன்மைச் செயலர் ககன் தீப் சிங் பேடி, மாவட்ட ஆட்சியர் சந்திர சேகர சாகமுரியுடன் களத்தில் இணைந்தார். புயல் தாக்கும் அபாயமுள்ள 278 இடங்களை அடையாளம்கண்டு, அங்கிருந்த மக்களை நிவாரண முகாம்களில் தங்கவைத்தார். அதற்காக மாவட்டம் முழுவதும் 191 தற்காலிக நிவாரண முகாம்களை ஏற்படுத்தியதுடன், 40 புயல் பாதுகாப்பு மையங்களையும் பயன்படுத்தினார்கள். அரசின் அறிவுறுத்தலாலும் மக்களின் விழிப்புணர்வாலும் 25-ம் தேதி இரவு 53,000 பேர் நிவாரண முகாம்களில் தஞ்சமடைந்தார்கள்.

ஜென்செட்டுகள், ஜெனரேட்டர்கள், ஜே.சி.பி இயந்திரங்கள், மணல் மூட்டைகள், டிரான்ஸ்ஃபார்மர், மின் இணைப்புக் கம்பிகள், மீட்புப் படகுகள் என அனைத்தையும் மாவட்டம் முழுக்க நிறுத்தியது மாவட்ட நிர்வாகம். அத்துடன் ஜே.சி.பி இயந்திரத்தைக்கொண்டு தண்ணீர் தடைப்படும் நீர்வழிப் பாதைகளை அடையாளம் கண்டு அவற்றை விரிவுபடுத்தியது. அதனால் வடிகால் பகுதியான கடலூர் மாவட்டம் இம்முறை பெரும் சேதமின்றி தப்பியது.

. புதுச்சேரியும் கடலூரும் வெவ்வேறு மாநிலங்களாக இருந்தாலும், நிலப்பரப்பைக் கணக்கிட்டால் இடையில் இருப்பது வெறும் 18 கிலோமீட்டர்கள்தான். அதனால்தான், ‘தானே’ புயலால் கடலூர் மாவட்டத்துக்கு ஏற்பட்ட சேதத்தை புதுச்சேரியும் சந்தித்தது. அதனால் இம்முறை அலெர்ட்டான புதுச்சேரி அரசு, நவம்பர் 24-ம் தேதி முதல் 26-ம் தேதி காலை வரை 144 தடையுத்தரவைப் பிறப்பித்தது. அன்றைய தினம் பொதுவிடுமுறையையும் அறிவித்தது. ஆட்டோ, பேருந்து உள்ளிட்ட அனைத்து போக்குவரத்துகளையும் தடை செய்தது. மீனவ கிராமங்கள் மற்றும் தாழ்வான பகுதிகளில் வசித்த சுமார் 2,000 மக்களைத் தற்காலிக நிவாரண முகாம்களில் தங்கவைத்தது. 25-ம் தேதி அன்று மதியம், 50 சதவிகித மின் இணைப்பையும், அன்றிரவு 10 மணிக்கு 100 சதவிகித மின் இணைப்பையும் துண்டித்தது. புயல் கரையைக் கடக்கத் தொடங்கியதும் பலத்த காற்றுடன் மழை பெய்யத் தொடங்கியது. கடலும் சுமார் ஆறடி உயரம் வரை கொந்தளித்தது. கடற்கரைச் சாலைகள் முழுவதும் சீல் வைக்கப்பட்டன.

கனமழை காரணமாக புதுச்சேரியின் பெரிய வாய்க்கால், சின்ன வாய்க்கால் ஆகியவை நிரம்பி, ஆம்பூர் சாலை, செஞ்சி சாலையில் இடுப்பளவு மழைவெள்ளம் பெருக்கெடுத்து ஓடியது. ஒட்டுமொத்த சாலைகளும் வெள்ளத்தில் மூழ்கின. வெங்கட்டா நகர், கிருஷ்ணா நகர், ரெயின்போ நகர் உள்ளிட்ட பகுதிகளில் 1,000-க்கும் மேற்பட்ட வீடுகளுக்குள் மழைவெள்ளம் புகுந்தது. பல்வேறு இடங்களில் சாய்ந்து விழுந்த மரங்களை வனத்துறையினர் உடனுக்குடன் வெட்டி அப்புறப்படுத்தியதால், இயல்புநிலை

திரும்பியது. ‘‘ஏரிகளைத் தூர்வாருவதில் அரசு காட்டிய அக்கறையை, கழிவுநீர் வாய்க்கால்களிலும் காட்டியிருந்தால் நகரைச் சூழ்ந்த வெள்ளத்திலிருந்து தப்பித்திருக்கலாம்’’ என்கின்றனர் பொதுமக்கள்.

. ‘கஜா’ புயலால் பாதிக்கப்பட்ட நாகை மாவட்டம் மற்றும் காரைக்கால் மாவட்ட மக்கள், ‘அதற்குள் அடுத்த புயலா?’ என்று நடுங்கிப்போனார்கள். ஆனாலும், சுதாரித்துக்கொண்ட அவர்கள், முன்கூட்டியே தேவையான பொருள்களை வாங்கியதுடன் தாங்களாகவே பாதுகாப்பு நிவாரண முகாம்களில் தஞ்சமடைந்தனர். மரக்காணத்தில் புயல் கரையைக் கடந்ததும் நிம்மதிப் பெருமூச்சுவிட்டனர்.

. நிவர் புயல் கரையைத் தொட்ட பிறகு, அதே வேகத்துடன் பயணம் செய்து, திருவண்ணாமலை மாவட்டத்தையும் ஒரு கை பார்க்கும் என அஞ்சப்பட்டது. 25-ம் தேதி இரவு முதல் தொடர்ந்த, கனமழையால் குளங்கள் மற்றும் ஏரிகள் நிரம்பின. பெரிய சேதங்கள் ஏதுமில்லாமல், நிறைய மழையை மட்டும் தந்துவிட்டுப் போனது நிவர். ஆனால், வேலூர் மாவட்டத்துக்கு இந்தக் கருணையைக் காட்டவில்லை.

. மரக்காணத்தில் கரையைக் கடந்த புயல், நேராகச் சென்று புரட்டிப்போட்டது வேலூரைத்தான். மாவட்டம் முழுவதும் பல இடங்களில் பெரிய மரங்கள் வேரோடு முறிந்து விழுந்து போக்குவரத்து முற்றிலும் பாதிக்கப்பட்டது. காற்றின் வேகத்துக்குத் தாக்குப்பிடிக்க முடியாமல் ஏராளமான கூரை வீடுகள் தூக்கி வீசப்பட்டன. காட்பாடியை அடுத்திருக்கும் வீரந்தாங்கல் ஏரி, பொன்னை அருகேயுள்ள குகையநல்லூர் ஏரி உட்பட பெரும்பாலான ஏரிகள் நிரம்பி கரைகள் பலவீனமானதால், அவற்றினருகில் வசிக்கும் மக்கள் பாதுகாப்பான இடங்களில் தங்கவைக்கப் பட்டனர். காட்பாடி, பேரணாம்பட்டு பகுதிகளிலிருந்த நாடோடியின மக்களும் நிவாரண முகாம்களில் தங்கவைக்கப்பட்டனர்.

நிவர் புயலை எதிர்கொள்வதற்காக மாவட்டம் முழுவதும் களப்பணியாளர்கள் தயார்நிலையில் இருந்ததால், முன்னெச்சரிக்கைப் பணிகளில் தொய்வு ஏற்படவில்லை. அதேசமயம், வேலூர் கன்சால்பேட்டை மற்றும் திடீர் நகர்ப் பகுதிகளில், முட்டியளவுக்குத் தண்ணீர் தேங்கியிருந்தது. வீடுகளுக்குள்ளும் தண்ணீர் புகுந்ததால், குழந்தைகளைத் தூக்கிக்கொண்டு பாதுகாப்பான இடங்களை நோக்கி மக்கள் சென்றனர். மழைநீர் அதிகமாகச் சூழ்ந்திருந்த பகுதிகளில், படகுகள் மூலம் பொதுமக்கள் மீட்கப்பட்டனர்.

நகரின் பல இடங்களில் மின்கம்பிகள் அறுந்து விழுந்தன. முன்னெச்சரிக்கை நடவடிக்கையாகப் பல பகுதிகளில் காலை முதலே மின் நிறுத்தம் செய்யப்பட்டிருந்ததால் பாதிப்புகள் தவிர்க்கப் பட்டன. ஆனாலும், கலெக்டர் பங்களாவுக்கு அருகில் விழுந்த மரம், மின்கம்பிகளையும் அறுத்துவிட்டதால் அங்கு நிறுத்தப்பட்டிருந்த ஆட்டோ எரிந்து சேதமடைந்தது. மாவட்டத்தின் பல பகுதிகளிலும் 20,000-க்கும் மேற்பட்ட வாழை மரங்கள் சாய்ந்து விழுந்தன. அறுவடைக்குத் தயாராக இருந்த நெற்பயிர்களும் மற்ற பயிர்களும் மழைநீரில் மூழ்கியதால், விவசாயிகள் கவலையடைந்துள்ளனர். ‘நீர்நிலைகள் இருக்கும் பகுதிகளுக்குப் பொதுமக்கள் செல்ல வேண்டாம்’ என்று ஓரிரு நாள்களுக்கு முன்னரே மாவட்ட நிர்வாகம் மூலம் எச்சரிக்கப்பட்டதால், உயிரிழப்புகள் தடுக்கப்பட்டன.

. மாவட்டத்தின் ஒவ்வொரு பகுதிக்கும் வருவாய்த்துறை, மின்துறை, பொதுப்பணித்துறை, காவல்துறை உள்ளிட்ட பிரிவுகளில் பணியாற்றும் 11 உறுப்பினர்களைக்கொண்ட குழு அமைக்கப்பட்டு முன்னெச்சரிக்கைப் பணிகள் மேற்கொள்ளப் பட்டன. 25-ம் தேதி நள்ளிரவு முதல் பலத்த காற்று வீசத் தொடங்கியது. கடற்கரையை ஒட்டிய கிராமங்களில் அன்று காலை முதலே மின்சாரம் துண்டிக்கப்பட்டது. தாழ்வான பகுதிகளில் இருந்த 6,538 பேர் மீட்கப்பட்டு, பாதுகாப்பு முகாம்களில் தங்க வைக்கப்பட்டனர். மாவட்டத்தின் பல்வேறு பகுதிகளில் சில மின்கம்பங்களும், 30 வீடுகளும் சேதமடைந்தன. ‘இந்த மழையால் வேடந்தாங்கல் ஏரியில் 75 சதவிகிதம் நீர் நிரம்பியுள்ளது. தொடர்ந்து தண்ணீர்வரத்து இருப்பதால் முழுக்கொள்ளளவை எட்டும் என எதிர்பார்க்கிறோம். இன்னும் சில தினங்களில் பறவைகள் வரத்து அதிகரித்துவிடும். இதனால், சுற்றுலாப் பயணிகளும் கணிசமான அளவு வருவார்கள்’ என்கின்றனர் அப்பகுதி மக்கள்.

புயல் கரையைக் கடந்த பாதையில் கல்பாக்கம் இருந்ததால், ஒட்டுமொத்த தமிழகமும் மிரட்சியுடன் காணப்பட்டது. காரணம், கல்பாக்கம் அணுமின் நிலையத்தில் ஏதாவது பாதிப்பு ஏற்படுமோ என்ற அச்சம்தான். நல்லவேளையாக, சிறிய அளவில் மரங்கள் முறிந்து விழுந்ததோடு சரி, வேறெந்த பாதிப்பையும் புயல் அங்கு ஏற்படுத்தவில்லை.

. புயல் கடந்த பகுதி, விழுப்புரம் மாவட்டத்தின் மரக்காணம். முன்கூட்டியே இது கணிக்கப்பட்டதால், 25-ம் தேதி மதியம் 12 மணி முதலே மின் இணைப்பைத் துண்டித்தது மாவட்ட நிர்வாகம். இரவு 11 மணியளவில் புயலின் ஆரம்பப் பகுதி கரையைத் தொட்டதும் மழையின் வேகம் அதிகரித்தது. நள்ளிரவு 1 மணியளவில் புயலின் மையப்பகுதி கரையைக் கடக்கத் தொடங்கியபோது பலத்த காற்றுடன் மழை பெய்யத் தொடங்கியது. இந்த மழையால், மரக்காணத்திலிருந்து 4 கிலோமீட்டர் தொலைவிலுள்ள கூணிமேடு - மண்டகப்பட்டு கிராமங்களை இணைக்கும் தரைப்பாலம் தண்ணீரில் மூழ்கி போக்குவரத்து துண்டிக்கப்பட்டது. அப்பகுதியிலுள்ள விவசாய நிலங்களும் முழுமையாக வெள்ளத்தில் மூழ்கின.

‘‘இதற்கு முன்னால வந்த புயலைவிட இப்போ பாதிப்பு குறைவுதான்னாலும், விவசாய நிலங்கள் மழையில மூழ்கிடுச்சு. ஆடு, மாடுகளை வெள்ளம் அடிச்சிட்டுப் போயிடுச்சு. அரசாங்க அதிகாரிங்க வந்து சும்மா பார்வையிட்டு மட்டும் போறாங்களே தவிர, எந்தவிதமான உதவியும் செய்ய மாட்றாங்க. இங்க இருக்குற தரைப்பாலத்தைக் கட்டி 15 வருஷத்துக்கு மேல ஆகுது. `புதுப் பாலத்தைக் கட்டித் தாங்க’னு அரசாங்கத்துகிட்ட ரொம்ப நாளா சொல்லிட்டுவர்றோம். அதைச் செய்தால் மட்டுமே ஊருக்குள்ள வெள்ள நீர் வராம இருக்கும்’’ என்று புலம்புகிறார்கள் அப்பகுதி மக்கள்.

மரக்காணம் பகுதியிலுள்ள உப்பளங்களில் நிறுத்திவைக்கப்பட்ட படகுகள் நீரில் மூழ்கிய நிலையில், அவற்றைக் கரைக்கு கொண்டுவரும் பணியில் ஈடுபட்டிருந்த மீனவர் பக்தவச்சலத்திடம் பேசினோம். ‘‘படகுகளைக் கரையிலேத்தி ஒண்ணோட ஒண்ணா கட்டிவெச்சுட்டுப் போயிருந்தோம். ஆனா, காத்தோட மழை வந்ததால, படகுகள் மூழ்கியிருக்குது. படகுங்க, வலைங்க சேதமடைஞ்சா அரசுகிட்டருந்து குறிப்பிட்ட அளவு மட்டுமே உதவிங்க வருது. ஆனா, நாங்கவெச்சிருக்குற படகு மற்றும் வலைகள் பல்லாயிரக்கணக்கான ரூபாய் மதிப்புள்ளவை. இயற்கைச் சீற்றங்கள்ல பாதிக்கப்படும் அனைத்து மீனவர்களுக்கும் அரசு முழு உதவியைச் செய்யணும் என்பதுதான் எங்க கோரிக்கை’’ என்றார்.

. சென்னையில் ‘நிவர்’ முன்னெச்சரிக்கை நடவடிக்கைகளை அரசு துரிதமாக எடுத்திருந்தது. நவம்பர் 23-ம் தேதி, தலைமைச் செயலகத்தில் நடைபெற்ற ஆலோசனைக் கூட்டத்தில், உயரதிகாரிகளிடம் பேசிய முதல்வர் பழனிசாமி, “கஜா புயலில் ஏற்பட்ட பாதிப்பைப் போன்று இம்முறை ஏதும் நிகழ்ந்துவிடக் கூடாது. உடனுக்குடன் நிவாரண நடவடிக்கைகளை முடுக்கிவிடத் தயாராக இருங்கள். இன்னும் ஆறு மாதங்களில் தேர்தல் வரவிருக்கிறது. நாம் எடுக்கப்போகும் நடவடிக்கைகள் தேர்தலிலும் எதிரொலிக்கும். அரசுமீது அதிருப்தி ஏதும் ஏற்படாதவாறு செயல்படுங்கள்” என்று ஆலோசனை வழங்கினார்.

நவம்பர் 25, 26-ம் தேதிகளில் முழுவீச்சுடன் அரசு அதிகாரிகள் படை சென்னை வீதிகளில் களமிறங்கியிருந்தது. பிரதான சாலைகளில் தண்ணீர் தேங்காத வண்ணம் மாநகராட்சி ஊழியர்களைவைத்து மழைநீர் வடிகால்வாய்கள் சரிசெய்யப்பட்டன. உயரமான கட்டடங்கள் மீதிருந்த விளம்பரப் பலகைகளை எடுக்கச் சொன்ன அரசு, மெரினா கடற்கரை சாலையிலிருந்த உயர்கோபுர மின் விளக்குகளை அகற்றியது. சென்னை ஐஸ் ஹவுஸ் பகுதியில் மரம் விழுந்ததில் ஒருவர் பலியான விபத்தைத் தவிர்த்து, பெரும் அசம்பாவிதம் ஏதுமில்லை. அதேசமயம், சென்னையில், செம்பரம்பாக்கம் ஏரி நீர் திறந்துவிடப்பட்டபோது அடையாற்றின் இரு கரையோரப் பகுதிகளும் ஆரம்பத்தில் மிதக்கவே செய்தன. ஆனாலும், சில மணி நேரங்களில் நீர் வடிந்துவிட்டது. அதேசமயம் வேளச்சேரி மற்றும் தாம்பரம் தொடங்கி பெருங்களத்தூர், வண்டலூர், ஊரப்பாக்கம், கூடுவாஞ்சேரி, மறைமலைநகர் சுற்றுவட்டாரங்களில் ஏரிகள் அனைத்தும் நிரம்பிவிட்டதால், வெள்ளநீர் குடியிருப்புகளைச் சூழ்ந்தது. இப்பகுதிகளிலிருந்து நீர் வெளியேற வழி இல்லாததால் மக்கள் பெரும் சிரமத்துக்குள்ளாகி யிருக்கிறார்கள்.

புயல், கனமழை என்றதும் சென்னை மக்கள் முதலில் செம்பரம்பாக்கம் ஏரியைக் குறித்துத்தான் பயந்தார்கள். ஏனென்றால், 2015-ம் ஆண்டு வெள்ளம் தந்த வேதனையான அனுபவம் அப்படி. பழைய படிப்பினையோடு, இம்முறை திட்டமிட்டு, படிப்படியாக ஏரி நீர் திறந்துவிடப்பட்டதால், பெரிய அளவில் அசம்பாவிதங்கள் ஏதும் நிகழவில்லை. ஆனாலும் செம்பரம்பாக்கம் ஏரி குறித்த பதற்றங்களுக்கும் வதந்திகளுக்கும் பஞ்சமில்லை. எதிர்பார்த்ததைவிட மிகக் குறைவான சேதங்களுடன் ‘நிவரை’ கடந்திருக்கிறது நம் நிலம்!

. ‘தானே புயல்’ ஏற்படுத்தியதைப் போன்ற சேதத்தை நிவர் புயலும் ஏற்படுத்திவிடுமோ என்ற அச்சத்தில் புதுச்சேரி மக்கள் மூழ்கிக்கிடந்தனர். அதேநேரத்தில், ‘சட்டப்பேரவைத் தேர்தலுக்கு முன்பாக வரும் இந்தப் புயலை சேதாரமில்லாமல் கடந்துவிட வேண்டும்’ என்ற டென்ஷனில் முதல்வரும், ‘இதில் எப்படியாவது ஸ்கோர் செய்துவிட வேண்டும்’ என்று ஆளுநரும் குறுக்கும் நெடுக்குமாக நடந்து புயலை வழியனுப்பி வைத்திருக்கிறார்கள். புயல் விஷயத்திலும் இவர்களின் ஈகோ, புதுச்சேரி அரசியலில் சூறாவளியாகச் சுழன்றடித்திருக்கிறது.

‘நிவர் புயலின் டார்கெட் புதுச்சேரியாகவும் இருக்கலாம்’ என்று கணிக்கப்பட்டபோது, முதலில் டென்ஷன் ஆனவர் முதல்வர் நாராயணசாமிதான். கடந்த நான்கரை ஆண்டுகளாக அவர் செல்லும் வழியெங்கும் ஆளுநர் கிரண் பேடியைவைத்து முட்டுக்கட்டை போட்டுவந்த மத்திய பா.ஜ.க அரசு, புதுச்சேரிக்குக் கொடுத்துவந்த நிதியையும் குறைத்து நெருக்கடி கொடுத்தது. ‘தேர்தல் வாக்குறுதிகளைக்கூட நிறைவேற்ற முடியவில்லையே’ என்று அவர் கையைப் பிசைந்துகொண்டிருந்த நேரத்தில், புதுச்சேரியின் பிடரியைப் பின்புறமிருந்து தட்டியது கொரோனா. மத்திய அரசிடம் நிதி கேட்டுக் கேட்டு அலுத்துப்போன நாராயணசாமி, தனியார் நிறுவனங்களின் சி.எஸ்.ஆர் நிதி, முதல்வர் நிவாரண நிதி ஆகியவற்றை வைத்து கொரோனாவுடன் போராடிக்கொண்டிருந்தார். இந்த நேரத்தில் ‘நிவர்’ புயல் அறிவிப்பு வரவும், அவர் நொந்தேபோனார்.

‘ஒருவேளை ஏதும் சேதம் நேர்ந்தால், தேர்தல் நேரத்தில் கெட்ட பெயர் எடுக்க நேரிடுமே...’ என்று உஷாரான நாராயணசாமி, முன்னெச்சரிக்கை நடவடிக்கைகளில் பரபரப்பாக இறங்கினார்.

கொரோனா தொற்றுக்கு பயந்து மாதக்கணக்கில் ஆளுநர் மாளிகையில் முடங்கியிருந்த ஆளுநர் கிரண் பேடி, பிரதமர் கூறியபடி விளக்கேற்றவும், கைதட்டவும் மட்டுமே ஆளுநர் மாளிகையின் வாயிலுக்கு வந்திருந்தார். நாராயணசாமியின் நடவடிக்கைகள் அவரை உசுப்பேற்ற, திடீரென்று ஆளுநர் மாளிகையைவிட்டு ஆய்வு என்ற பெயரில் வெளியே வந்தார். ‘‘புதுச்சேரிக்கு பாதிப்பு ஏற்பட்டால் மீட்புப் பணிக்கு விமானப் படையின் ஹெலிகாப்டர் தயாராக இருக்கிறது’’ என்று போகிற போக்கில் வாட்ஸ்அப் செய்தி ஒன்றையும் தட்டிவிட்டார். தொடர்ந்து, அரசு ஏற்பாடு செய்திருந்த நிவாரண முகாம்களுக்குச் சென்று அங்கிருந்த அதிகாரிகளிடம், ‘‘எல்லாம் சரியாக இருக்கிறதா?’’ என்றரீதியில் கேட்டுவிட்டு அதைப் புகைப்படம் மற்றும் வீடியோ எடுத்து பத்திரிகைகளுக்கு அனுப்பிவைத்தார். அடுத்து, ஆளுநர் மாளிகைக்குச் சென்று மழையை வீடியோ எடுத்து சமூக வலைதளங்களில் பதிவிட்டதுடன் தனது கடமையை முடித்துக்கொண்டார்.

. இன்னும் ஐந்து மாதங்களில் தேர்தலை எதிர்கொண்டாக வேண்டிய கட்டாயத்திலிருக்கும் நாராயணசாமி, மழை முடியும்வரை பாதிக்கப்பட்ட பகுதிகளில் விசிட் அடித்துக்கொண்டிருந்தார். தேர்தல் நேரத்தில் மட்டும் மக்களைச் சந்திப்பதை வழக்கமாக வைத்திருப்பவர் முன்னாள் முதல்வர் ரங்கசாமி. தற்போது எதிர்க்கட்சித் தலைவராக இருக்கும்போதும், நிதி நெருக்கடி, அரசு ஊழியர்களுக்குச் சம்பளம் வழங்காதது உள்ளிட்ட எந்தப் பிரச்னைக்கும் அவர் வாய் திறப்பதில்லை. நான்கரை வருடங்களை இப்படியே ஓட்டிவிட்ட ரங்கசாமி, தற்போது தேர்தல் நெருங்கும் நிலையில் வெளியே வந்திருக்கிறார். கடந்த அக்டோபர் மாதம் கிழக்குக் கடற்கரைச் சாலையில் கட்சி அலுவலகத்துக்கு அடிக்கல் நாட்டிய ரங்கசாமி, `நவம்பர் 26-ம் தேதி அலுவலகத்தைத் திறப்போம்’ என்று நாள் குறித்திருந்தார். அதே தேதியில் புதுச்சேரிக்குப் புயல் எச்சரிக்கை விடப்பட்டிருந்த நிலையில், திட்டமிட்டபடி தனது கட்சி அலுவலகத் திறப்புவிழாவை ஆதரவாளர்களுடன் அசராமல் நடத்தி முடித்திருக்கிறார்.

எல்லாம் தேர்தல் படுத்தும் பாடு!

. டெல்டா மாவட்டங்களில் சுற்றுப்பயணம் செய்துவரும் தி.மு.க இளைஞரணிச் செயலாளர் உதயநிதி ஸ்டாலின், ‘நிவர்’ புயல் காரணமாகத் தன் சுற்றுப்பயணத்தை ஒத்திவைத்திருக்கிறார். நவம்பர் 27-ம் தேதி அவர் பிறந்தநாள் முடிந்த பிறகுதான், சுற்றுப்பயணத்தை மீண்டும் தொடங்குவது குறித்து முடிவெடுக்கப்படுமாம். வேல் யாத்திரை மேற்கொண்டுவரும் பா.ஜ.க தலைவர் எல்.முருகனும் தன் பயணத்தைப் பாதியிலேயே கைவிட்டுவிட்டு கடலூருக்குச் சென்றிருக்கிறார். விடுபட்டுள்ள அறுபடை முருகன் கோயில்களான சுவாமிமலை, திருப்பரங்குன்றம், பழமுதிர்சோலையில் வழிபாடு நடத்திவிட்டு, டிசம்பர் 5-ம் தேதி திருச்செந்தூரில் நிறைவு விழா நிகழ்ச்சியை நடத்த முடிவெடுத்திருக்கிறது கமலாலயம்.

. பெருவெள்ளம், புயல், நிலநடுக்கம் போன்ற பேரிடர்க் காலங்களில் களத்தில் நிற்கும் விகடனுடன் துணையாக எப்போதும் நிற்பார்கள் வாசகர்கள். ‘நிவர்’ பேரிடரிலும் வாசகர்கள் கைகோத்தனர். புயலால் பாதிக்கப்பட்டு உதவி தேவைப்படுவோரையும், உதவ முன்வரும் தன்னார்வலர்களையும் ஒருங்கிணைக்க #NivarVikatanHelp என்ற ஹேஷ்டேகுடன் விகடன் களமிறங்கியது. உணவு, பால், தண்ணீர் போன்ற அத்தியாவசியப் பொருள்கள் கேட்டும், தண்ணீர் சூழந்ததால் பாதிக்கப்பட்டவர்கள் தங்களை மீட்க வேண்டியும் நம்மைத் தொடர்புகொண்டனர். அந்தப் பகுதியின் அதிகாரிகள் மற்றும் விகடனுடன் தன்னார்வலர்களாகப் பதிவுசெய்துகொண்ட வாசகர்களைக்கொண்டும் பலரது தேவைகளைப் பூர்த்தி செய்தது விகடன்.

உதவி கேட்டு அழைப்புகள் வருவதற்கு முன்னரே தன்னார்வலர்களாகத் தங்களைப் பதிவுசெய்துகொண்ட வாசகர்கள், விகடனை நெகிழவைத்தனர். புயல் பாதித்த மாவட்டங்கள் மட்டுமன்றி, பிற மாவட்டங்களிலும் பிற நாடுகளிலுமுள்ள வாசகர்களும் இதில் இணைந்து தம்மாலான உதவிகளைச் செய்ய முன்வந்தனர்.

. ‘நிவர்’ நிவாரணத்துக்கான அரசியலும் சூடுபிடித்திருக்கிறது. ‘கழகத் தொண்டர்கள் உடனடியாக நிவர் நிவாரண நடவடிக்கையில் ஈடுபட வேண்டும்’ என்று அ.தி.மு.க தலைமையிலிருந்தே அறிக்கை வெளியிடப்பட்டது.

கடலூர் மாவட்டத்தில் சுமார் 3,300 ஏக்கர் விவசாயப் பயிர்கள் வெள்ளத்தில் மூழ்கியிருக்கின்றன. 26-ம் தேதி மதியம் 2:30 மணிக்கு, கடலூர் சென்ற முதல்வர் பழனிசாமி, வெள்ளத்தில் மூழ்கிய பகுதிகளைப் பார்வையிட்டார். தொடர்ந்து தேவனாம்பட்டினம் பகுதியில் புயலால் சேதமடைந்த பகுதிகளைப் பார்வையிட்ட அவர், நிவாரண முகாம்களில் தங்கியிருந்த மக்களிடம் நலம் விசாரித்து அத்தியாவசியப் பொருள்கள் அடங்கிய பெட்டகத்தை வழங்கினார்.

. இன்னொரு பக்கம், கொட்டும் மழையிலும் களமிறங்கி நிவாரணப் பொருள்களை தி.மு.க தலைவர் ஸ்டாலின் வழங்கியிருக்கிறார். பா.ம.க., காங்கிரஸ், அ.ம.மு.க., பா.ஜ.க., மக்கள் நீதி மய்யம் ஆகிய கட்சிகளின் தலைவர்களும் புயல் நிவாரண நடவடிக்கைகளில் தங்கள் கட்சியினரை ஈடுபட அறிவுறுத்தியிருக்கிறார்கள். தேர்தல் காலம் என்பதால், ஒவ்வொரு கட்சியினரும் கோதாவில் குதித்திருப்பது நிவாரண நடவடிக்கையை அரசியலாக்கியிருக்கிறது!

நிவர் கடந்த நிலம்!

ஜூனியர் விகடன் டீம்

Tamil News

Cinema News

Spiritual News

Vikatan TV

Business News

Sports News

Photo Story

Agriculture News

Automobile News

Health News

Lifestyle News

Vikatan's Choice

நிவர் கடந்த நிலம்!

ஜூனியர் விகடன் டீம்

Tamil News

Cinema News

Spiritual News

Vikatan TV

Business News

Sports News

Photo Story

Agriculture News

Automobile News

Health News

Lifestyle News