Published:Updated:

பங்குச் சந்தை மியூச்சுவல் ஃபண்ட் ரியல் எஸ்டேட் - பட்ஜெட் 2020 எதிர்பார்ப்புகள்!

ஈக்விட்டி மியூச்சுவல் ஃபண்டுகளில் இருக்கும் டிவிடெண்ட் டிஸ்ட்ரிபியூஷன் டாக்ஸையும் நீக்க வேண்டும்

பிரீமியம் ஸ்டோரி

ருகிற பிப்ரவரி 1-ம் தேதி நிர்மலா சீதாராமன் மத்திய பட்ஜெட்டைத் தாக்கல் செய்யவிருக்கிறார். இந்த பட்ஜெட்டில் அனைத்துத் துறையினரும் பல்வேறு விஷயங்களை எதிர்பார்த்துவரும் நிலையில், பங்குச் சந்தை, மியூச்சுவல் ஃபண்ட் மற்றும் ரியல் எஸ்டேட் துறை சார்ந்தவர்கள் என்னென்ன அம்சங்களை எதிர்பார்க்கிறார்கள் என்பதைத் தெரிந்துகொள்ள, அந்தந்தத் துறை சார்ந்த நிபுணர்களிடமே பேசினோம்.

பங்குச் சந்தை

பங்குச்சந்தை எதிர்பார்ப்பு குறித்து, ஓரியன்டல் ஸ்டாக்ஸ் நிறுவனத்தின் தலைவரும், பங்குச் சந்தை நிபுணருமான வ.நாகப்பனிடம் பேசினோம்.

மியூச்சுவல் ஃபண்ட்
மியூச்சுவல் ஃபண்ட்

“பங்கு பரிவர்த்தனை வரியை (எஸ்.டி.டி - Security Transaction Tax) நீக்க வேண்டும் என்பதே எங்களுடைய முதல் எதிர்பார்ப்பு. ஏனெனில், எஸ்.டி.டி கொண்டு வருவதால் நீண்டகால மூலதன ஆதாய வரியை நீக்குவதாக அறிவித்து அதன்படி நீக்கினார்கள். ஆனால், சில ஆண்டுகளுக்குமுன் மீண்டும் நீண்டகால மூலதன ஆதாய வரியையும் நடைமுறைக்குக் கொண்டுவந்தார்கள். இதைக் கொண்டுவந்தவர்கள் எஸ்.டி.டி-யை நீக்கியிருக்க வேண்டும்.

ஆனால், அப்படிச் செய்யவில்லை. தற்போது இரண்டு வரிகளும் நடைமுறையில் இருந்துவருகின்றன. முதலீடு செய்யும் போதும் வரி, லாபத்துக்கும் வரி என ஒரே தொகைக்கு இரண்டு வரி விதிப்பு என்பது எந்த விதத்தில் நியாயம்?

ஒருவர் பங்குச் சந்தையில் நீண்டகால அடிப்படையில் முதலீடு செய்து, அவருக்கு இழப்பு இருந்தால் அதனை ஈடுசெய்து லாபத்துக்கு மட்டும் வரி செலுத்தினால் போதும். ஆனால், எஸ்.டி.டி என்பது அப்படியல்ல; பங்குகளை வாங்கினாலும், விற்றாலும் வரி செலுத்த வேண்டும். அதனால், மறைமுக வரியாகக் கருதப்படும் எஸ்.டி.டி-யை நீக்குவதுதான் சரியாக இருக்கும். ஒருவேளை, எஸ்.டி.டி-யை நீக்க முடியாது; அப்படி நீக்கினால் அரசாங்கத்துக்கு அதிக அளவில் வரி வருமான இழப்பு ஏற்படும் என நினைத்தால், பழையபடி எஸ்.டி.டி தொகையைச் செலுத்த வேண்டிய வரியில் கழித்துக்கொள்ள அனுமதிக்க வேண்டும்.

ஒரு நிறுவனம் லாபத்தில், முதலீட்டாளர்களுக்கு டிவிடெண்ட் கொடுக்கிறது. இப்படி வழங்கும் டிவிடெண்டுக்கு ‘டிவிடெண்டட் டிஸ்ட்ரிபியூஷன் டாக்ஸ்’ (டி.டிடி) செலுத்திய பிறகு, குறைவான டிவிடெண்ட் தொகைதான் முதலீட்டாளர்களுக்குக் கிடைக்கிறது. ஒரு நிறுவனம் கொள்முதல் செய்யும் அனைத்துப் பொருள்களுக்கும் ஜி.எஸ்.டி வரி செலுத்துகிறது; தவிர, அனைத்துச் செலவுகளுக்கும் ஜி.எஸ்.டி வரி செலுத்துகிறது. பொருளைத் தயாரித்து விற்கும்போதும் கிடைக்கும் லாபத்துக்கு வருமான வரி செலுத்துகிறது. இவ்வளவு வரி செலுத்தியபிறகும், கிடைக்கும் லாபத்தை முதலீட்டாளர்களுக்கு டிவிடெண்டாக பிரித்துக் கொடுக்கும் போது மீண்டும் ‘டிவிடெண்டட் டிஸ்ட்ரிபியூஷன் டாக்ஸ்’ செலுத்த வேண்டும் என்பது எந்த வகையில் நியாயம்?

பட்ஜெட் 2020
பட்ஜெட் 2020

இதனால்தான் இந்த வரி விதிப்பையும் முற்றிலுமாக நீக்க வேண்டும் என எதிர்பார்க்கிறோம். நீக்க முடியாமல் போனால், இதையும் முதலீட்டாளர்கள் தாங்கள் செலுத்த வேண்டிய வருமான வரியில் கழித்துக்கொள்ள அனுமதிக்க வேண்டும்.

1980-களில் மொரீசியஸ் ஒப்பந்தங்கள் இந்தியாவுக்குள் வந்தபோது, வெளிநாட்டு முதலீடு பெரிய அளவில் தேவைப்பட்டது.அப்போது இந்தியர்கள் பெருமளவில் வேலையில்லாமல் இருந்தார்கள். இந்தியர்கள் கையில் முதலீடு செய்ய பணம் அன்று இல்லை. அதனால் இந்த மாதிரியான ஒப்பந்தங்களைப் போட்டு, வெளிநாட்டு முதலீட்டாளர்களுக்கு முக்கியத்துவம் தந்து முதலீட்டை ஈர்க்க வேண்டியிருந்தது.

ஆனால், இன்று அந்த நிலை தலைகீழாக மாறிவிட்டது. வேலைக்கு ஆட்கள் தேவை என்ற வாசகங்களை ஆங்காங்கே பார்க்கிறோம். இந்தியர்களின் கையில் நிறைய பணம் இருக்கிறது. இந்த நேரத்திலும் வெளிநாட்டவர்களின் கையை எதிர்பார்த்துக் கொண்டிருப்பது சரியான அணுகுமுறை அல்ல. வெளிநாட்டவர்களிடம் போய் கெஞ்சிக் கொண்டிருக்காமல், உள்நாட்டு முதலீட்டாளர்களுக்கு அதிக முக்கியத்துவம் கொடுத்து, அவர்களிடம் இருக்கும் பணத்தை முதலீடு செய்ய வைப்பதுதான் ஒரு நல்ல அரசுக்கு அழகு.

முதலீடு மற்றும் லாபத்துக்கு வரிச் சலுகைகளை முதலீட்டாளர்களுக்கு ஏற்படுத்திக் கொடுக்கும்போதுதான், அதிகமான தொகை பங்குச் சந்தை முதலீடு நோக்கிவரும்’’ என்றார் அவர்.

ஈக்விட்டி மியூச்சுவல் ஃபண்டுகளில் இருக்கும் டிவிடெண்ட் டிஸ்ட்ரிபியூஷன் டாக்ஸையும் நீக்க வேண்டும்

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

மியூச்சுவல் ஃபண்ட்

மியூச்சுவல் ஃபண்ட் துறையினரின் எதிர்பார்ப்பு என்ன என்பதைத் தெரிந்துகொள்ள மியூச்சுவல் ஃபண்ட் நிபுணரும் ப்ரகலா வெல்த் மேனேஜ்மென்ட் நிறுவனத்தின் இயக்குநருமான சொக்கலிங்கம் பழனியப்பனிடம் கேட்டோம்.

வ.நாகப்பன், சொக்கலிங்கம் பழனியப்பன்
வ.நாகப்பன், சொக்கலிங்கம் பழனியப்பன்

“மியூச்சுவல் ஃபண்ட் முதலீட்டைப் பொறுத்தவரை, நீண்டகால நோக்கில் முதலீடு செய்பவர்கள்தான் அதிகம். மியூச்சுவல் ஃபண்டில் நீண்டகால அடிப்படையில் லாபம் பார்க்கும் முதலீட்டாளர்களுக்கு நீண்டகால மூலதன ஆதாய வரி முன்பு இல்லாமல் இருந்தது. ஆனால், அந்த வரி விதிப்பைப் பா.ஜ.க அரசு மீண்டும் நடைமுறைப்படுத்தியது. இப்போது எஸ்.டிடி வரியும் மியூச்சுவல் ஃபண்ட் ஈக்விட்டி திட்டங்களில் இருக்கிறது.

ஆனால், மியூச்சுவல் ஃபண்ட் முதலீடுகளில் எஸ்.டி.டி வரியின் தாக்கம் மிகவும் குறைவு. லாங் டேர்ம் கேப்பிட்டல் வரி விதிப்பின் தாக்கம்தான் அதிகம். அதனால்தான் இந்த வரி விதிப்பை மீண்டும் நடைமுறைக்குக் கொண்டுவரும் போது, மியூச்சுவல் ஃபண்ட் முதலீட்டாளர்கள் அதிருப்திக்கு ஆளானார்கள். இந்த பட்ஜெட் அறிவிப்பில் மியூச்சுவல் ஃபண்டில் இருக்கும் லாங் டேர்ம் கேப்பிட்டல் கெயின் டாக்ஸை நீக்க வேண்டும் என்பதே எங்கள் எதிர்பார்ப்பு.

அதேபோல, ஈக்விட்டி மியூச்சுவல் ஃபண்டுகளில் இருக்கும் ‘டிவிடெண்ட் டிஸ்ட்ரிபியூஷன் டாக்ஸையும் நீக்க வேண்டும்.

முதலீட்டாளர்களின் இந்தக் கோரிக்கை நிறைவேற்றப்பட்டால், பங்குச் சந்தை இன்னும் வேகமாக உயரும். இன்னும் பல கோடி முதலீட்டாளர்கள் மியூச்சுவல் ஃபண்டில் முதலீடு செய்வது அதிகரிக்கும்” என்று முடித்தார்.

பங்குச் சந்தை வளர்ச்சிக்கு உதவும் இந்த எதிர்பார்ப்புகளை நிதியமைச்சர் நிறைவேற்றுவாரா..?

ரியல் எஸ்டேட் துறையின் எதிர்பார்ப்பு!

ஆர்.குமார், எம்.டி., நவீன்ஸ் குழுமம்

பங்குச் சந்தை மியூச்சுவல் ஃபண்ட் ரியல் எஸ்டேட் - பட்ஜெட் 2020 எதிர்பார்ப்புகள்!

“வீட்டுக் கடனுக்குச் செலுத்தப்படும் வட்டிக்கு வருமான வரி விலக்கு வரம்பை ரூ.2 லட்சத்திலிருந்து ரூ.5 லட்சமாக உயர்த்த வேண்டும். இதனால் அதிகமான மக்கள் வீடு வாங்குவார்கள். எம்.ஐ.ஜி வீட்டு வசதி பிரிவுகளுக்கான பி.எம்.ஏ.வி திட்ட நன்மைகள் 31.3.2020 அன்று முடிவடைகின்றன. இ.டபிள்யூ.எஸ் மற்றும் எல்.ஐ.ஜி ஆகியவற்றுடன் இணைந்து, இந்தத் தேதியை 31.3.2022 வரை நீட்டிக்க வேண்டும். ஒருவர் வீட்டை விற்றுவிட்டு, அந்தப் பணத்தை மறுமுதலீடு செய்து வாங்கும் ஒன்று அல்லது இரண்டு வீட்டுக்கு மட்டுமே மூலதன ஆதாய வரிச் சலுகை தரப்படுகிறது. இந்த விதிமுறையையும் தளர்த்த வேண்டும்.”

பங்குச் சந்தை மியூச்சுவல் ஃபண்ட் ரியல் எஸ்டேட் - பட்ஜெட் 2020 எதிர்பார்ப்புகள்!

என்.ஈஸ்வர், செயல் துணை இயக்குநர், காசாகிராண்ட்

“நம் நாட்டின் பொருளாதாரம் வீழ்ச்சியடைந்துவரும் நிலையில், ரியல் எஸ்டேட் ஏராளமான பிரச்னைகளை எதிர்கொண்டு வருகிறது. நாட்டின் ஜி.டி.பி வளர்ச்சியில் ரியல் எஸ்டேட் துறை 8-10% வரை பங்காற்றி வருவதால், வருகிற பட்ஜெட்டில் இந்தத் துறையின் வளர்ச்சிக்கு மத்திய அரசாங்கம் அதிக கவனம் செலுத்தும் என எதிர்பார்க்கிறோம். கட்டுமான சொத்துகளின் மீதான ஜி.எஸ்.டி-யை 5% ஆகக் குறைக்கும் அதே வேளையில், உள்ளீட்டு வரிக் கடன் விதிமுறைகளை வாபஸ் பெறவேண்டும். ஏனெனில் இது வீடு வாங்குபவர்களுக்கு அதிக சுமையை ஏற்படுத்துகிறது. மேலும், வீட்டுமனை மற்றும் ஃப்ளாட் மொத்த மதிப்பில் ஜி.எஸ்.டி-யைக் குறைக்க வேண்டும்.’’

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு