Published:Updated:

அடிமைகள்போல் நடத்தப்படும் ஆண்கள்... பாலியல் தொந்தரவுக்கு உள்ளாக்கப்படும் பெண்கள்...

கண்ணீர் வடிக்கும் ஊர்க்காவல் படையினர்

பிரீமியம் ஸ்டோரி

‘‘எங்களை அவர்களின் அடிமைகள்போல் நினைக்கும் உயரதிகாரிகள், அவர்களின் சொந்த வேலைகளுக்குத்தான் அதிகமாகப் பயன்படுத்திக் கொள்கின்றனர். பெண்களுக்குப் பாலியல் தொந்தரவு கொடுக்கின்றனர். இது தொடர்பாக நாங்கள் எங்கு புகார் கொடுத்தாலும் நடவடிக்கை எடுக்க மறுக்கின்றனர்’’ என்று கண்ணீர் வடிக்கின்றனர் `ஹோம் கார்ட்ஸ்’ எனப்படும் ஊர்க்காவல் படையினர்.

`ஊர்க்காவல் படை’ என்னும் அமைப்பு தமிழகக் காவல்துறையில் ஆட்கள் பற்றாக்குறை காரணமாக உருவாக்கப்பட்டது. இந்த அமைப்பில் தமிழகம் முழுவதும் சுமார் 15,000 பேர் பணிபுரிகின்றனர். சென்னையில் மட்டும் 400 பெண்கள் உட்பட 3,000 பேருக்கு மேல் பணி புரிகின்றனர். ஒரு காவல்நிலையத்துக்கு சுமார் 20 பேர் என்கிற அளவில் இருக்கும் இந்த ஊர்க்காவல் படையில் ஹோம்கார்டு, அசிஸ்டன்ட் செக்‌ஷன் லீடர், செக்‌ஷன் லீடர், கம்பெனி கமாண்டர், டிவிஷனல் கமாண்டர், ஏரியா கமாண்டர், அசிஸ்டன்ட் கமாண்டர் ஜெனரல் உள்ளிட்ட பல பதவிகள் இருக்கின்றன. இவற்றில் குறிப்பிட்ட சில பதவிகள் தேர்வுகள் மூலமாகவும், சில பதவிகள் நியமனத்தின் மூலமாகவும் பூர்த்தி செய்யப் படுகின்றன. ‘‘அசிஸ்டன்ட் ஏரியா கமாண்டர், ஏரியா கமாண்டர் போன்ற உயர் பதவிகளில் தங்களுக்கு வேண்டப்பட்டவர்களை வைத்துள்ளார் அசிஸ்டன்ட் கமாண்டர் ஜெனரல் மஞ்சித் சிங் நய்யார். இவர்தான் ஒட்டுமொத்த சென்னைக்கும் தலைமை என்பதால், தனி ராஜ்யமே நடத்திவருகிறார். இவர்தான் பிரச்னைகளுக்கு ஆணி வேர்’’ என்று அதிரடிப் புகார் கிளப்புகின்றனர்.

அம்பத்தூர் கம்பெனி கமாண்டராக இருந்த பாலாஜி சுபாஷ் இது குறித்து நம்மிடம் பேசினார். ‘‘ஊர்க்காவல் படையில், ஏரியா கமாண்டர் பொறுப்பு என்பது கெளரவப் பொறுப்பு. கொஞ்சம் வசதி படைத்தவர்கள்தான் அந்தப் பொறுப்புக்கு வருவார்கள். ஒரு வருடத்துக்கு 3 முதல் 5 லட்சம் ரூபாய் வரை ஊர்க்காவல் படை வீரர்களுக்குச் செலவு செய்கிறோம் என எழுதிக்கொடுத்துத் தான் இந்த பொறுப்புக்கே வருகிறார்கள். ஆனால், சென்னையிலுள்ள நான்கு ஏரியா கமாண்டர்களும் எங்களுக்கு அப்படி எந்தச் செலவையும் இதுவரை செய்த தில்லை. ஏரியா கமாண்டர் பொறுப்பில் இருப்பவர்கள் மூன்று ஆண்டுகளுக்கு ஒரு முறை மாற வேண்டும். ஆனால், இப்போது இருப்பவர்கள் அதிகாரிகளைக் கைக்குள் போட்டுக்கொண்டு கிட்டத்தட்ட பத்து வருடங்களாகப் பொறுப்புகளில் நீடிக்கின்றனர். இவர்களுக்கு வரிச்சலுகை இருப்பதால் மற்றவர்களை வரவிடாமல் தடுத்துவைத்துள்ளனர்.

அடிமைகள்போல் நடத்தப்படும் ஆண்கள்... பாலியல் தொந்தரவுக்கு உள்ளாக்கப்படும் பெண்கள்...

சென்னை வடக்கு மண்டல ஏரியா கமாண்டரான பன்சாலி, வட்டிக்குப் பணம் கொடுப்பதைத் தொழிலாகச் செய்துவருகிறார். பிரச்னையில்லாமல் வட்டி வசூலிக்க அவர் ஊர்க்காவல்படை வீரர்களைப் பயன்படுத்திக் கொள்கிறார். கட்டுமான தொழில் செய்துவரும் சென்னை தெற்கு மண்டல கமாண்டர் சுகுமார், அந்தத் தொழில் சார்ந்த வேலை களுக்கு ஹோம்கார்ட்ஸைப் பயன்படுத்தி வருகிறார். பள்ளிக்கூடம் நடத்தி வரும் கிழக்கு மண்டல ஏரியா கமாண்டர் விட்டோபிளாக்கா அந்தப் பள்ளிக்கு செக்யூரிட்டி களாக ஊர்க்காவல் படையினரைப் பயன்படுத்திக் கொள்கிறார். இதுமட்டுமல்ல, சுகுமாரன், விட்டோ பிளாக்கா மற்றும் மேற்கு மண்டல கமாண்டர் சந்திரசேகர் ஆகிய மூன்று கமாண்டர்கள் சேர்ந்து `எஸ்.சி.வி’ எனும் பெயரில் ஒரு ஹோட்டல் நடத்திவருகிறார்கள். ஹோட்டலுக்கு காய்கறி வாங்குவதற்குக் கூட ஊர்க்காவல் படையினரைத்தான் பயன்படுத்தி வருகிறார்கள்.

`அரசுப் பணிகளுக்கு அல்லாமல், தனியார் பந்தோபஸ்துக்கு ஊர்க்காவல் படையினரைப் பயன்படுத்தக் கூடாது’ என்று விதி உள்ளது. அந்த விதியை மீறி இவர்கள் ஊர்க்காவல் படைவீரர்களை வேலை வாங்குவது தெரிந்தும் இவர்களை அசிஸ்டன்ட் கமாண்டர் ஜெனரல் பொறுப்பிலிருக்கும் மஞ்சித் சிங் நய்யார் கண்டுகொள்வதில்லை. காரணம், அவர் தாளாளராக இருக்கும் குருநானக் கல்லூரியில் நடக்கும் அனைத்து விழாக் களுக்கும் பந்தோபஸ்து பணிகளுக்கே ஊர்க்காவல் படையினரைத்தான் தொடர்ச்சியாகப் பயன்படுத்திவருகிறார்.

எங்களுக்கு ஒரு நாள் சம்பளம் 560 ரூபாய். ஆனால், 300 ரூபாய் மட்டுமே கொடுத்து வேலை வாங்குகின்றனர். கீழ் நிலையில் உள்ளவர்கள் அதிகாரிகளை எதிர்த்துக் கேள்வி எதுவும் கேட்க முடியாததால், அவர்கள் சொல்வதைச் செய்துவருகிறார்கள். எதிர்த்துக் கேள்வி கேட்டால் மெமோ கொடுத்து மன உளைச்சலுக்கு ஆளாக்குகிறார்கள். ஏதோ கார்ப்பரேட் கம்பெனிபோல் நடத்தி வருகிறார்கள். எங்களைக் காவல்துறையின் நேரடிக் கட்டுப்பாட்டில் கொண்டுவந்தால் போதும், நாங்கள் பிழைத்துக்கொள்வோம்’’ என்கிறார் ஆதங்கத்துடன்.

பெண்களுக்குக் கொடுக்கப்படும் பாலியல் தொல்லைகள் குறித்து நம்மிடம் பேசிய ஹோம்கார்டு மலர்விழி, ‘‘நான் பதினெட்டு வருடங்களாக ஊர்க்காவல் படையில் இருக்கிறேன். கம்பெனி கமாண்டர் பொறுப்புகளில் இருப்பவர்கள் பெண்களுக்குப் பாலியல் தொல்லை கொடுப்பது தொடர்கதையாக உள்ளது. இரவு நேரத்தில் தேவையில்லாமல் போன் செய்வார்கள், மெசேஜ் அனுப்புவார்கள். இது குறித்து எங்கள் ஏரியா கமாண்டராக இருக்கும் சஞ்சய் பன்சாலியிடம் புகார் செய்தாலும் அவர் கண்டுகொள்வதில்லை. அப்படியே பாலியல் தொல்லை குறித்த புகாரை விசாரித்தாலும், எங்கள் அலுவலகத்தில் வைத்து விசாரிக்காமல், தனியார் கல்யாண மண்டபத்தில் சுற்றிலும் ஆண்களை வைத்துக்கொண்டு விசாரிப்பார்கள். அவர்களுக்கு இணங்கிப் போகாத பெண்களுக்கு டியூட்டி கொடுக்காமல் இழுத்தடிப்பார்கள். ஊர்க்காவல் படையில் டிரான்ஸ்ஃபர் என்ற நடைமுறையே இல்லையென்றாலும், இவர்கள் டிரான்ஸ்ஃபர் செய்வார்கள். இது குறித்து நாங்கள் எங்கள் மூத்த அதிகாரிகள் யாரிடமாவது புகார் செய்தால், அவர்களும் சேர்ந்துகொண்டு எங்களைப் பழிவாங்குவார்கள். லோக்கல் காவல்நிலையத்தில் புகார் செய்தாலும், எங்கள் புகாரை எடுத்துக்கொள்வதில்லை. கமிஷனர் அலுவலகத்துக்குப் புகார் அனுப்பினால், அங்கிருக்கும் இவர்களுக்குச் சாதகமான நபர் ஒருவர், அந்தப் புகார் கமிஷனர் கவனத்துக்குச் செல்லாமல் பார்த்துக்கொள்கிறார். ஆன்லைனில் புகார் செய்தாலும் எந்தப் பலனுமில்லை. நாங்கள் என்ன செய்வதென்றே தெரியவில்லை’’ என்றார் பரிதாபமாக.

அடிமைகள்போல் நடத்தப்படும் ஆண்கள்... பாலியல் தொந்தரவுக்கு உள்ளாக்கப்படும் பெண்கள்...

இது மட்டுமல்ல, ஊர்க்காவல் படையினர் நலனுக்காக, ‘ஹோம்கார்டு கம்யூனிட்டி ஃபோர்ஸ்’ எனும் அமைப்பைத் தொடங்கியுள்ள நாகேந்திரன் என்பவருக்கும் நெருக்கடி கொடுக்கப்படுகிறதாம். அசிஸ்டன்ட் செக்‌ஷன் லீடராக உள்ள நாகேந்திரனிடம் பேசினோம். ‘‘எங்கள் நல அதிகாரிகள் இதுவரை எங்களுக்கு எதுவும் செய்யவில்லை. எனவே, நாங்கள் இந்த அமைப்பை உருவாக்கி, எங்கள் நலன் சார்ந்த விஷயங்களை முன்னெடுக்கிறோம். இதை எங்கள் உயரதிகாரிகளால் பொறுத்துக்கொள்ள முடியவில்லை. எங்களுக்குத் தொடர்ந்து தொந்தரவு கொடுத்துவருகிறார்கள். எங்கள் அமைப்பில் சேருபவர்களைப் பணி செய்யவிடாமல் தடுப்பது, மெமோ கொடுப்பது, நலப்பணிகள் செய்யவிடாமல் தடுப்பது போன்ற செயல்களில் ஈடுபட்டுவருகிறார்கள். இது குறித்து, தமிழக டி.ஜி.பி முதல் டெல்லி டி.ஜி.பி அட்மின் வரைக்கும் புகார் அனுப்பியிருக்கிறோம். ஆனால், இதுவரை எந்த நடவடிக்கையும் எடுக்கப்படவில்லை நீதிமன்றத்தில் வழக்கும் தொடர்ந்திருக்கிறேன்’’ என்கிறார்.

அசிஸ்டன்ட் ஏரியா கமாண்டராக இருந்து வெளியேற்றப்பட்டவர்கள் சிலரிடம் பேசினோம், ‘‘அசிஸ்டன்ட் கமாண்டர் ஜெனரல் மற்றும் ஏரியா கமாண்டர் ஆகிய உயர் பதவிகளில் இருக்கும் ஐந்து பேரில் நான்கு பேர் தமிழர்கள் இல்லை. அதற்கு அடுத்த பதவியான அசிஸ்டன்ட் ஏரியா கமாண்டர்களாக இருந்த மூன்று பேரை வேண்டுமென்றே ரெனுவல் செய்யாமல் வெளியேற்றியிருக்கின்றனர். தங்களுக்கு வேண்டப்பட்ட நபர்களை நியமிப்பதற்காக இப்படிச் செய்கிறார் மஞ்சித் சிங் நய்யார்’’ என ஆதங்கப்பட்டனர்.

இந்தக் குற்றச்சாட்டுகள் குறித்து, சென்னை மாநகர ஊர்க்காவல் படையின் அசிஸ்டன்ட் கமாண்டர் ஜெனரல் மஞ்சித் சிங் நய்யாரிடம் பேசினோம். ‘‘இது குறித்து நீங்கள் அரசாங்கத்திடம்தான் கேட்க வேண்டும்’’ என்றவர், என்ன நினைத்தாரோ... ‘‘கடந்த நான்கு மாதங்களாக அனைவருக்கும் சிறப்பான பேமன்ட் கொடுத்திருக்கிறோம். தற்போது நான் கொரோனா தொற்றால் குவாரன்டைனில் இருக்கிறேன். என்னால் 15 நாள்கள் பேச முடியாது’’ என்று சொல்லிவிட்டு இணைப்பைத் துண்டித்தார்.

இது குறித்து, காவல்துறை கூடுதல் இயக்குநர் (ஊர்க்காவல் படை) ராஜீவ் குமாரிடம் பேசினோம். “உங்களுக்கு வந்த புகார்களை கமிஷனருக்கு அனுப்புங்கள். அவர் நடவடிக்கை எடுப்பார்’’’ என்பதோடு முடித்துக்கொண்டார்.

அடிமைகள்போல் நடத்தப்படும் ஆண்கள்... பாலியல் தொந்தரவுக்கு உள்ளாக்கப்படும் பெண்கள்...

சென்னை மாநகர கமிஷனர் மகேஷ் குமார் அகர்வாலிடம் பேசினோம், ‘‘என்னிடம் எந்தப் புகாரும் இதுவரை வரவில்லை. யார் என்ன தவறு செய்கிறார்கள் என்பது குறித்து முறையாகப் புகார் செய்தால், கண்டிப்பாக நான் விசாரித்து நடவடிக்கை எடுப்பேன்’’ என்றார்.

``புகார் வந்தால் நடவடிக்கை எடுப்பேன்’’ என்கிறார் மாநகர போலீஸ் கமிஷனர். தவறு நடப்பதாகக் கேள்விப்பட்டால் தாமாகவே முன்வந்து நடவடிக்கை எடுக்க வேண்டிய பொறுப்பு காவல்துறைக்கு இருக்கிறது. இதைப் பல சந்தர்ப்பங்களில் நீதிமன்றங்களும் உறுதிப்படுத்தியுள்ளன. இந்நிலையில், அவர் சார்ந்த துறையிலேயே நடக்கும் அக்கிரமங்கள் குறித்தே அவருடைய கவனத்துக்கு நாம் எடுத்துச் சென்றும்கூட, `புகார் வந்தால் நடவடிக்கை எடுப்பேன்’ என்பது எந்த வகையில் சேர்த்தி என்று தெரியவில்லை. தன்னுடைய துறையிலேயே நடக்கும் அநியாயத்தைக் கண்டுகொள்ள மாட்டேன் என்று சொல்லும் இவர் போன்றவர்களை நம்பித்தான் நாம் வாழ்ந்துகொண்டிருக் கிறோம் என்று நினைக்கும்போதே... `பகீர்’ என்கிறது. பாவம்தான் தமிழக மக்கள்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு