டி.டி.எஸ், டி.சி.எஸ் மாற்றம்!

மத்திய அரசாங்கம் தற்போது டி.சி.எஸ் (டாக்ஸ் கலெக்டட் அட் சோர்ஸ்), டி.சி.எஸ்ஸில் சில புதிய மாற்றங்களை அறிமுகம் செய்துள்ளது.

‘டி.டி.எஸ்’ என்பது பணம் கொடுப்பவர் செலவு அல்லது தொகையைக் கொடுக்கும்போது, அதைப் பெறுபவருக்காக ஒரு குறிப்பிட்ட தொகையை வருமான வரியாகப் பிடித்து அரசாங்கத்திடம் செலுத்த வேண்டும். டி.சி.எஸ் என்பது பணத்தைப் பெறுபவரே கொடுப்பவருக்காகக் குறிப்பிட்ட சதவிகிதத்தைக் கூடுதலாக வாங்கி, கொடுப்பவர் கணக்கில் வரிச் சேகரிப்புத் தொகையாக அரசுக்குச் செலுத்த வேண்டும்.

உதாரணமாக, ரூ.10 லட்சத்துக்கு அதிகமான கார் வாங்கும்போது, கார் விலையுடன் 1% தொகையைக் கூடுதலாகப் பெற்று வாங்குபவரின் கணக்கில் செலுத்த வேண்டும். கார் வாங்குபவர், அவரது வரிக் கணக்குத் தாக்கல் செய்யும்போது இந்தத் தொகையை வரி வரவாக எடுத்துக்கொள்ள முடியும். டி.சி.எஸ் மாற்றங்கள் சில, 2020 அக்டோபர் 1-ம் தேதி முதல் நடைமுறைக்கு வந்துள்ளன.

அந்நியச் செலாவணி உஷார்..!

இந்தியாவில் வசிக்கும் ஒருவர் வெளி நாடுகளில் வாழும் நெருங்கிய உறவினர்களைப் பராமரிப்பதற்கும், வெளிநாட்டில் மருத்துவச் செலவுக்கும், நிறுவனப் பங்குகளை வாங்கு வதற்கும், வெளிநாட்டில் கல்வி பயில்வதற்கும் அந்நியச் செலாவணியை வங்கிகள் மூலம் அனுப்ப முடியும். இந்த அந்நியச் செலாவணியைக் கட்டுப்படுத்துவது ரிசர்வ் வங்கியின் அதிகாரத்தில் வருகிறது. சில குறிப்பிட்ட காரணங்களுக்கு, தாராளமயமாக்கல் கொள்கைகளின்கீழ் ரிசர்வ் வங்கியின் முன் அனுமதியின்றி வங்கி மூலம் அந்நியச் செலாவணி அனுப்ப முடியும்.

2020 அக்டோபர் 1-ம் தேதி முதல் இந்தத் திட்டத்தின்கீழ் அனுப்பப்படும் அந்நியச் செலாவணி தொகை ரூ.7 லட்சத்துக்கு அதிகமாகும்பட்சத்தில் அந்தத் தொகைக்கு 5% டி.சி.எஸ் பிடித்து கட்ட வேண்டிய கடமையில் வங்கிகளும், அங்கீகரிக்கப்பட்ட அந்நியச் செலாவணி ஏஜென்டுகளும் உள்ளனர். உதாரணமாக, அமெரிக்காவில் இருக்கும் உங்கள் மகனுக்கு அன்பளிப்பாக ரூ.10 லட்சம் அந்நியச் செலாவணி அனுப்ப வேண்டும் என்று வைத்துக்கொள்வோம். ரூ.7 லட்சத்துக்கு அதிகமாக உள்ள ரூ.3 லட்சத்துக்கு 5% டி.சி.எஸ் ஆக ரூ.15,000 பிடிக்கப்படும். அது உங்கள் கணக்கில் வரி வருவாயாக எடுத்துக்கொள்ளலாம்.

படிப்புச் செலவுக்கும் டி.சி.எஸ்

வெளிநாட்டில் மேற்படிப்பு தொடரும் நெருங்கிய உறவினரின் கல்விச் செலவுக்குப் பணம் அனுப்புவது அடிக்கடி கேள்விப்படும் ஒன்று. பெரும்பாலும், வங்கிக் கடன் வாங்கி வெளிநாட்டுப் பல்கலைக்கழகங்களுக்கு அனுப்பப்படும். இவ்வாறு வங்கிக் கடன் மூலம் அனுப்பப்படும் தொகைக்கு டி.சி.எஸ் பிடிக்கப்பட வேண்டும். ஆனால், அதற்கான பிடித்தம் 0.5% இருந்தால் போதுமானது.

வெளிநாட்டுக்குப் பறந்தாலும் வரி..!

வெளிநாட்டுப் பயணம் மேற்கொள்பவர் களின் பயணச் செலவு, மற்ற வெளிநாட்டுச் செலவுத் தொகையில் 5% டி.சி.எஸ் வசூல் செய்ய வேண்டிய கடமை சுற்றுலா ஏற்பாடு செய்பவர்களுக்கும், வங்கிகளுக்கும் உள்ளது. இது அலுவலக வேலை பார்ப்பவர்களுக்கும், இன்பச் சுற்றுலா செல்பவர்களுக்கும் பொருந்தும். இதற்கு மேலே கூறிய ரூ.7 லட்சம் வரம்பு ஏதும் இல்லை. உதாரணமாக, உங்கள் குடும்பத்துடன் சிங்கப்பூர் சென்றுவர மொத்தமாக ரூ.4 லட்சம் அந்நியச் செலாவணி மூலம் செலவு செய்கிறீர்கள் என்று வைத்துக் கொண்டால், அதற்கு 5% டி.சி.எஸ் மூலம் பிடிக்கப்படும்.

எனவே, வெளிநாட்டுத் தொடர்புடைய வர்கள் தற்போது கொண்டுவரப்பட்டுள்ள மாற்றங்களை மனதில் கொண்டு சற்று கவனமாக இருப்பது நல்லது!