Published:Updated:

காபூலைக் கைப்பற்றிய தாலிபன்கள்... காஷ்மீரைக் குறிவைக்கும் பயங்கரவாத இயக்கங்கள்!

காஷ்மீர்
பிரீமியம் ஸ்டோரி
காஷ்மீர்

சில இளைஞர்கள் ஆப்கானிஸ்தானுக்குச் சென்று தாலிபன்களுடன் சேர்ந்து சண்டையிட்டு, பாகிஸ்தான் ஆக்கிரமிப்பு காஷ்மீருக்குத் திரும்புகின்றனர்.

காபூலைக் கைப்பற்றிய தாலிபன்கள்... காஷ்மீரைக் குறிவைக்கும் பயங்கரவாத இயக்கங்கள்!

சில இளைஞர்கள் ஆப்கானிஸ்தானுக்குச் சென்று தாலிபன்களுடன் சேர்ந்து சண்டையிட்டு, பாகிஸ்தான் ஆக்கிரமிப்பு காஷ்மீருக்குத் திரும்புகின்றனர்.

Published:Updated:
காஷ்மீர்
பிரீமியம் ஸ்டோரி
காஷ்மீர்

ஆப்கானிஸ்தானில் ஆட்சியதிகாரத்தை தாலிபன்கள் கைப்பற்றியிருக்கும் நிலையில், ஜம்மு காஷ்மீரின் பாதுகாப்புக்கு அச்சுறுத்தல் ஏற்படக்கூடிய சூழல் உருவாகியிருக்கிறது. கடந்த சில வாரங்களாக, ஜம்மு காஷ்மீருக்குள் ஊடுருவுவதற்கான முயற்சியில் பயங்கரவாதிகள் ஈடுபட்டிருப்பதாகவும், தீவிரவாதச் செயல்பாடுகள் அங்கு அதிகரித்திருப்பதாகவும் உளவு அமைப்புகள் தெரிவிக்கின்றன!

ஆப்கானிஸ்தானிலிருந்து அமெரிக்கப் படைகள் வெளியேறியதைத் தொடர்ந்து, அங்கு ஆட்சியை தாலிபன்கள் கைப்பற்றியுள்ளனர். தற்போது அந்த நாட்டில் அமைதியற்ற சூழல் நிலவுகிறது. குண்டு வெடிப்புச் சம்பவங்கள் உள்ளிட்ட பயங்கர நிகழ்வுகளால் உயிருக்கு உத்தரவாதம் இல்லாத நிலையில், ஆப்கானிஸ்தானிலிருந்து மக்கள் வெளியேறுகிறார்கள். இந்தக் களேபரங்களால், உலகின் கவனம் ஆப்கானிஸ்தான்மீது குவிந்திருக்கிறது. இந்த வாய்ப்பைப் பயன்படுத்தி, ஜம்மு காஷ்மீருக்குள் ஊடுருவுவதற்கான முயற்சியில் பயங்கரவாத இயக்கங்கள் ஈடுபட்டுள்ளன. இந்தியாவுக்கும் பாகிஸ்தானுக்கும் இடையே கடந்த பிப்ரவரி மாதம் ஏற்பட்ட சண்டை நிறுத்த ஒப்பந்தத்துக்குப் பிறகு, காஷ்மீருக்குள் ஊடுருவல் நடவடிக்கை நின்றுவிட்டது. ஆப்கானிஸ்தான் நிலவரங்களால், கடந்த ஒரு மாதத்தில் காஷ்மீரில் மீண்டும் ஊடுருவல் முயற்சி அதிகரித்திருப்பதாகச் செய்திகள் வருகின்றன.

காபூலைக் கைப்பற்றிய தாலிபன்கள்... காஷ்மீரைக் குறிவைக்கும் பயங்கரவாத இயக்கங்கள்!

தாலிபன்களுக்கு வாழ்த்து சொன்ன காஷ்மீர் இளைஞர்கள்!

ஜம்மு காஷ்மீரில் என்ன மாதிரியான சூழல் நிலவுகிறது என்பதை உற்றுநோக்குவது அவசியம். ஜம்மு காஷ்மீருக்குச் சிறப்பு அந்தஸ்து வழங்கிவந்த பிரிவு 370, மத்திய பா.ஜ.க அரசால் 2019-ம் ஆண்டு ரத்துசெய்யப்பட்டது. அந்த மாநிலம் இரண்டாகப் பிரிக்கப்பட்டு, யூனியன் பிரதேசங்களாக மாற்றப்பட்டன. சிறப்பு அந்தஸ்து நீக்கப்பட்டு தற்போது இரண்டு ஆண்டுகள் நிறைவடைந்த நிலையில், மீண்டும் மாநில அந்தஸ்து வழங்கப்பட வேண்டும், தேர்தல் நடத்தப்பட வேண்டும் என்ற கோரிக்கைகளை ஜம்மு காஷ்மீரைச் சேர்ந்த அரசியல் கட்சிகள் முன்வைக்கின்றன. அதைத் தொடர்ந்து, பிரதமர் மோடி தலைமையில் கடந்த ஜூன் 24-ம் தேதி, டெல்லியில் ஜம்மு காஷ்மீர் அரசியல் கட்சித் தலைவர்கள் பங்கேற்ற ஆலோசனைக் கூட்டம் நடைபெற்றது. அதில், மாநில அந்தஸ்து உள்ளிட்ட கோரிக்கைகளை ஜம்மு காஷ்மீர் தலைவர்கள் வலியுறுத்தினர். ஆனால், அந்தக் கோரிக்கைகள் குறித்து மத்திய அரசு மௌனம் காத்துவருகிறது.

பிரிவு 370 நீக்கப்பட்ட பிறகு, ஜம்மு காஷ்மீரில் தீவிரவாத நடவடிக்கைகள் குறைந்துவிட்டதாகவும், அங்கு அமைதி திரும்பிவிட்டதாகவும் மத்திய ஆட்சியாளர்கள் கூறிவருகின்றனர். ஜம்மு காஷ்மீரைச் சேர்ந்த அரசியல் தலைவர்களோ, முன்பைக் காட்டிலும் தற்போது அதிகமான இளைஞர்கள் பயங்கரவாத இயக்கங்களை நோக்கி ஈர்க்கப்படுவதாகக் கூறுகின்றனர். இந்தநிலையில், ‘கடந்த இரண்டு மாதங்களில் காஷ்மீரிலிருந்து சுமார் 60 இளைஞர்கள் காணாமல் போயிருக்கிறார்கள்’ என்று காவல்துறை அதிகாரி ஒருவர் கூறியதாக, கடந்த ஆகஸ்ட் 30-ம் தேதி என்.டி.டி.வி தொலைக்காட்சி செய்தி வெளியிட்டது. அதன் இரண்டு நாள்களுக்குப் பிறகு, அந்தச் செய்தியை ஜம்மு காஷ்மீர் காவல்துறை மறுத்தது. ஆனாலும், ஆப்கானிஸ்தானில் தாலிபன்கள் மீண்டும் அதிகாரத்தைக் கைப்பற்றியிருப்பது, ஜம்மு காஷ்மீர் இளைஞர்கள் மத்தியில் பெரும் தாக்கத்தை ஏற்படுத்தியுள்ளது. தாலிபன்கள் காபூலைக் கைப்பற்றியவுடன், ஜம்மு காஷ்மீரில் ஏராளமான இளைஞர்கள் சமூக ஊடகங்களில் வாழ்த்துகளைப் பகிர்ந்தனர்.

கவலைக்குரிய இன்னொரு செய்தி, சில இளைஞர்கள் ஆப்கானிஸ்தானுக்குச் சென்று தாலிபன்களுடன் சேர்ந்து சண்டையிட்டு, பாகிஸ்தான் ஆக்கிரமிப்பு காஷ்மீருக்குத் திரும்புகின்றனர். அந்த இளைஞர்களுக்கு ஆரவாரமான வரவேற்பு அளிக்கப்படுகிறது. இந்தக் காட்சிகள் இடம்பெற்ற வீடியோ ஒன்று ஜம்மு காஷ்மீரில் வைரலாகியிருக்கிறது. அந்த வீடியோவைப் பார்க்கும் காஷ்மீர் இளைஞர்களிடையே, தாலிபன்களுடன் சேர்ந்து சண்டையிட்ட இளைஞர்களை ஹீரோக்களாகப் பார்ப்பதும், காபூலை தாலிபன்கள் கைப்பற்றியதை இஸ்லாமியப் படைகளின் வெற்றியாகப் பார்ப்பதுமான மிக அபாயகரமான மனநிலை உருவாகியிருக்கிறது.

காபூலைக் கைப்பற்றிய தாலிபன்கள்... காஷ்மீரைக் குறிவைக்கும் பயங்கரவாத இயக்கங்கள்!

‘இஸ்லாமிய நிலங்களில் விடுதலை வேண்டும்!’

‘ஜம்மு காஷ்மீரில் பாதுகாப்புச் சூழல் நம்முடைய கட்டுப்பாட்டில் இருக்கிறது’ என்று பாதுகாப்புத்துறை அதிகாரிகள் கூறிவருகின்றனர். ஆனால், இந்தப் பாதுகாப்புச் சூழல் எத்தனை நாள் நீடிக்கும் என்ற கேள்வியும் கவலையும் எழுந்திருக்கின்றன. காரணம், காபூலை தாலிபன்கள் கைப்பற்றியவுடன் தாலிபன் இயக்கத் தலைவர்களை ‘ஜெய்ஷ் இ முகம்மது’ இயக்கத்தின் தலைவர் மௌலானா மசூத் அஸார் கந்தஹாரில் சந்தித்திருக்கிறார். அப்போது, ஜம்மு காஷ்மீரில் ‘ஜெய்ஷ் இ முகம்மது’ இயக்கத்தின் செயல்பாடுகளுக்கு தாலிபன் உதவ வேண்டும் என்று அவர் வலியுறுத்தியதாகச் செய்திகள் கூறுகின்றன. 1999-ம் ஆண்டு காத்மண்டுவில் இந்திய விமானத்தை பயங்கரவாதிகள் கடத்திச் சென்று, ஆப்கானிஸ்தானின் கந்தஹாரில் தாலிபன்களின் ஆதரவுடன் நிறுத்தினர். அப்போது, இந்தியச் சிறையில் இருந்த மௌலானா மசூத் அஸாரை விடுதலை செய்துதான், விமானப் பயணிகளை இந்தியா மீட்டது என்பது குறிப்பிடத்தக்கது.

தற்போது, ஆப்கானிஸ்தானில் தாலிபன் அரசின் உச்ச தலைவராக ஹிபத்துல்லா அகுந்த்ஸடா பொறுப்பேற்கும் சூழலில் அல்கொய்தா, ஜெய்ஷ் இ முகம்மது, லஷ்கர் இ தொய்பா ஆகிய பயங்கரவாத அமைப்புகள் காஷ்மீர் என்ற பெயரை உச்சரிக்கத் தொடங்கியுள்ளன. “காஷ்மீரிலுள்ள முஸ்லிம்களுக்காகக் குரல் கொடுக்க எங்களுக்கு உரிமை இருக்கிறது!” என்று சமீபத்தில் கூறியிருக்கிறார் தாலிபன் செய்தித் தொடர்பாளர் சுஹைல் ஷாஹீன். ஆப்கானிஸ்தானைத் தொடர்ந்து, ‘உலகில் மற்ற இஸ்லாமிய நிலங்களிலும் விடுதலை வேண்டும்’ என்று அல் கொய்தா வெளிப்படையாக அறிவித்துள்ளது. அபாயகரமான இந்தப் புதிய சவாலை இந்திய அரசு எப்படி எதிர்கொள்ளப்போகிறது?

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism