Published:Updated:

சவூதி எண்ணெய் ஆலைகள் மீது தாக்குதல்... இந்தியாவுக்கு என்ன பாதிப்பு?

கடந்த மூன்று மாதங்களாக இந்தியாவைச் சுழற்றியடிக்கிறது பொருளாதார மந்தநிலை.

பிரீமியம் ஸ்டோரி

ஆட்டோமொபைல், டெக்ஸ்டைல்ஸ் எனப் பல துறைகளும் விற்பனை பாதிப்பு, வேலையிழப்பைச் சந்திந்துவருகின்றன. இந்தச் சூழலில், சவூதி அரேபியாவில் உள்ள எண்ணெய் சுத்திகரிப்பு ஆலைகள்மீது நடத்தப்பட்ட தாக்குதல், இந்தியாவை மேலும் பதற்றத்தில் தள்ளியிருக்கிறது.

சவூதி அரேபியா அரசுக்குச் சொந்தமான அராம்கோ நிறுவனத்தின் அப்கைக் எண்ணெய் சுத்திகரிப்பு நிலையம் மற்றும் குராய்ஸ் எண்ணெய் வயல் ஆகியவற்றின் மீது ஏமனில் செயல்படும் கிளர்ச்சிப் படைகள் ஆள் இல்லா விமானங்கள் மூலம் நடத்திய தாக்குதலால், கச்சா எண்ணெய் உற்பத்தி பாதிக்கப்பட்டுள்ளது. நாள் ஒன்றுக்கு 57 லட்சம் பேரல் எண்ணெய் தயாரிப்பு பாதிக்கப்பட்டுள் ளதாக சவூதி அரசு தெரிவித்துள்ளது.

அராம்கோ நிறுவனத்தில் ஏவுகணை தாக்குதல்
அராம்கோ நிறுவனத்தில் ஏவுகணை தாக்குதல்

இதுகுறித்து துறைசார்ந்த நிபுணர்களிடம் பேசியபோது, ‘‘கச்சா எண்ணெய் உற்பத்தி திடீரெனக் குறைந்துள்ளதால் சர்வதேச அளவில் கச்சா எண்ணெய் விலை உயரத் தொடங்கியுள்ளது. தாக்குதலுக்கு முன்பு, கச்சா எண்ணெய் பேரலுக்கு 60 டாலர் என்ற விலையில் விற்பனையானது. தற்போது கச்சா எண்ணெயின் விலை 19 சதவிகிதம் அதிகரித்து, 72 டாலராக உள்ளது. அடுத்த சில நாள்களில் 80 டாலரைத் தாண்டக்கூடும். இந்தியாவைப் பொறுத்தவரை, கச்சா எண்ணெய் விலை ஒரு டாலர் உயர்ந்தாலும், ஓர் ஆண்டுக்கு 10,700 கோடி ரூபாய் கூடுதல் விலை கொடுக்க வேண்டியிருக்கும்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

இந்தியாவில், குறிப்பிட்ட காலத்துக்கு கச்சா எண்ணெயைச் சேமித்துவைக்கும் வசதி இருப்பது சற்றே ஆறுதலான செய்தி. கச்சா எண்ணெயை இருப்பு வைத்திருக்கும் சேமிப்புக் கிடங்குகள் விசாகப்பட்டினம், மங்களூரு மற்றும் படூர் ஆகிய இடங்களில் உள்ளன. இவற்றில், மொத்த இந்தியாவுக்குமான தேவையில் 12 நாள்களுக்கான கச்சா எண்ணெயைச் சேமிக்க முடியும். அதுபோக, இந்தியாவில் உள்ள ஒட்டுமொத்த சுத்திகரிப்பு ஆலைகளின் சேமிப்புக் கிடங்குகளில் 65 நாள்களுக்கான கச்சா எண்ணெயை இருப்புவைக்கும் வசதியுள்ளது. ஆக, 87 நாள்களுக்குத் தேவையான கச்சா எண்ணெய் இருப்பு எப்போதும் நம்மிடம் இருக்கும்.

வ.நாகப்பன்
வ.நாகப்பன்

நமது கச்சா எண்ணெய் தேவையில், 7.4 சதவிகிதம் அளவுக்கு சவூதி அரேபியாவைச் சார்ந்தே இருக்கிறோம். நமக்கான கச்சா எண்ணெய் விநியோகம் பாதிக்காதபடி பார்த்துக்கொள்வதாகவும், விலை மட்டும் இன்னும் சிறிது காலத்துக்கு ஏற்ற இறக்கத்தோடு இருக்கும் என்றும் சவூதி அரேபியா தரப்பில் தெரிவிக்கப்பட்டுள்ளது. இன்னொரு பக்கம், அமெரிக்காவிலிருந்து கச்சா எண்ணெய் இறக்குமதியை மூன்று மடங்கு அதிகரித்துள்ளோம். எனவே, கச்சா எண்ணெய் தட்டுப்பாடு ஏற்பட வாய்ப்பில்லை’’ என்கிறார்கள்.

சவூதி எண்ணெய் ஆலைகள் மீது தாக்குதல்...
இந்தியாவுக்கு என்ன பாதிப்பு?

கச்சா எண்ணெய் விலை உயர்வு இந்தியப் பொருளாதாரத்தில் என்ன மாதிரியான பாதிப்புகளை ஏற்படுத்தும் என்று பொருளாதார நிபுணர் வ.நாகப்பனிடம் கேட்டோம். ‘‘சர்வதேச சந்தையில் தங்கத்தின் விலை கடந்த மூன்று மாதங்களாக உயர்ந்துவருகிறது. கச்சா எண்ணெயின் விலை கடந்த இரண்டு நாள்களாக 20 சதவிகிதம் உயர்ந்துள்ளது. இவற்றை இறக்குமதி செய்வதற்காக, கூடுதல் டாலர் தேவைப்படுவதால் அந்நியச்செலாவணி கையிருப்பு குறையும். அமெரிக்க டாலரின் மதிப்பும் தானே உயரத் தொடங்கிவிட்டது. டாலர் மதிப்பு உயர்வதால் ஏற்கெனவே உயர்ந்திருக்கும் தங்கம் மற்றும் கச்சா எண்ணெய் விலை, உள்ளூர் சந்தையில் மேலும் அதிகரிக்கும். அதனுடைய தாக்கம் பணவீக்கத்திலும் இருக்கும். ஏற்கெனவே பொருளாதார மந்தம் நிலவிவரும் நிலையில் இது நமக்குப் பின்னடைவுதான்’’ என்கிறார்.

பொருளாதார நிபுணர் ஜெயரஞ்சன் வேறொரு கோணத்தில் கச்சா எண்ணெய் விலை உயர்வு குறித்துப் பேசுகிறார். “அரசாங்கம், ஏற்கெனவே நிதிப் பற்றாக்குறையில் இருக்கிறது. ‘பெட்ரோல் விலை ஏறப்போகிறது’ என்ற செய்தி வெளியாகத் தொடங்கினாலே அந்நிய முதலீடுகள் பெருமளவு விலக்கப்படும். அதன் காரணமாக டாலருக்கு நிகரான ரூபாய் மதிப்பு வீழ்ச்சியடையும். அப்போது வாங்கும் கச்சா எண்ணெய்க்குச் செலுத்தவேண்டிய தொகை கூடுதலாகும்.

ஜெயரஞ்சன்
ஜெயரஞ்சன்

இப்படி ஓர் இக்கட்டான சூழல் வரும்போது அதை எதிர்கொள்வதற்காகத்தான் ரிசர்வ் வங்கியில் உபரி வருமானம் வைத்திருக்கிறார்கள். ஆனால், அந்த உபரி வருமானத்திலிருந்து 1.76 லட்சம் கோடி ரூபாயை மத்திய அரசு ஏற்கெனவே வாங்கிவிட்டது. இதையெல்லாம் கணக்கில்கொண்டுதான் பொருளாதார நிபுணர்கள் மத்திய அரசை முன்பே எச்சரித்தார்கள். ஆனால், அவற்றை அரசாங்கம் கண்டுகொள்ளவில்லை. கச்சா எண்ணெய் விலை உயர்வால் ஏற்படும் பாதிப்பை மக்கள்தான் எதிர்கொள்ள வேண்டியிருக்கும்” என்கிறார் அவர்.

இவற்றை எதிர்கொள்ள சரியான திட்டமிடல் மத்திய அரசிடம் இருக்கிறதா என்பதைப் பொறுத்தே, இதிலிருந்து நம்மால் மீள முடியும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு