கடந்த ஜூன் மாதம் மத்திய அரசு வெளியிட்ட ‘இந்திய கடல் மீன்பிடி ஒழுங்காற்று மற்றும் மேலாண்மைச் சட்ட முன்வரைவு’, மீனவர்களை கண்ணீர்க் கடலில் தள்ளியிருக்கிறது. ‘கடலோர மாநிலங்களில் உள்ள மீனவர்கள் மத்தியில் கருத்துக் கேட்புக் கூட்டங்கள் நடத்தி, கருத்துகளை அறிந்த பிறகு அது சட்டமாக்கப்படும்’ என மத்திய அரசு கூறியிருந்தது. `‘மீனவர்களை பெருமளவு பாதிக்கக்கூடிய இந்தச் சட்ட முன்வரைவு குறித்து விரிவாக விவாதிக்காமல், பெயரளவுக்கு கருத்துக் கேட்புக் கூட்டங்கள் நடத்திவிட்டு, சட்டத்தைக் கொண்டுவரப் பார்க்கிறார்கள்’’ எனக் கதறுகிறார்கள் தமிழக மீனவர்கள்.

கடந்த 2009-ல் ‘கடல் மீன்பிடித் தொழில் ஒழுங்காற்று மற்றும் மேலாண்மைச் சட்ட முன்வரைவை’ காங்கிரஸ் அரசு அறிமுகப் படுத்தியது. அதைச் சட்டமாக்கினால் மீன்பிடித் தொழிலே அழிந்துவிடும் என்று கடுமையான எதிர்ப்புகள் கிளம்ப, அது கைவிடப்பட்டது.

‘‘காங்கிரஸ் அரசாங்கம் கொண்டுவந்த அதே சட்டத்தை, நாசூக்கான வார்த்தைகளில் முன்பைவிட மோசமான ஷரத்துகளை இணைத்து மீண்டும் கொண்டுவந்திருக்கிறது இன்றைய மோடி அரசு’’ என்று கொந்தளிக்கிறார்கள் மீனவர்கள்.

இதுகுறித்து ஏ.ஐ.டி.யூ.சி மீனவர் தொழிற்சங்க மாநிலச் செயலாளர் சி.ஆர்.செந்தில்வேலிடம் பேசினோம். ‘‘இந்தியாவில் இரண்டு கோடி மீனவர்கள் நாட்டுப் படகு மற்றும் விசைப் படகு மூலம் கடல் மீன்பிடிப்பில் ஈடுபட்டுவருகின்றனர். அவர்களுடைய எதிர்காலம் பற்றிச் சிந்திப்பதைவிட, கப்பல்கள் மூலம் ஆழ்கடலில் உள்ள சூரை மீனைப் பிடிப்பது, கடலில் பண்ணை அமைத்து மீன் வளர்ப்பது, அதற்காக கடற்பரப்பில் பிளாட் போட்டு தனியாருக்குக் கொடுப்பது போன்ற விஷயங்களையே இந்த மீன்பிடிக் கொள்கை அதிகம் பேசுகிறது. இந்தக் கொள்கையின் நோக்கம், பாரம்பர்ய முறையிலான மீன்பிடித் தொழிலை அழித்து, அதை கார்ப்பரேட் மயமாக்குவது தான். சர்வதேச நாடுகளுடன் ஒப்பந்தம் செய்யும்போதோ, இந்தியாவுக் கான மீன்பிடிக் கொள்கைகளை உருவாக்கும்போதோ மீனவர் களிடம் கருத்துக் கேட்கப் படுவதே இல்லை. சட்ட வடிவங்களைக் கொண்டுவரும் கடைசி நேரத்தில் மக்களிடம் கருத்து கேட்கும் நாடகத்தை நடத்துகிறார்கள்.

இந்தச் சட்ட முன்வரைவுப்படி பார்த்தால், 12 கடல் மைலுக்கு அப்பால் உள்ள ஆழ்கடலில் மீன் பிடிக்க, மத்திய அரசின் சிறப்பு அனுமதி பெற வேண்டும். சிறு மீனவர்கள் 12 கடல் மைல் தூரம்கொண்ட பிராந்திய கடல் எல்லையைத் தாண்டக் கூடாது என்று 2009-ம் ஆண்டு காங்கிரஸ் அரசு கொண்டுவந்த சட்டத்தை, இப்போது இப்படி மாற்றியுள்ளார்கள். அத்துடன், ‘மீன் பிடிக்கச் செல்லும் ஒவ்வொரு படகும், மீன் பிடித்தலுக்கு ஏற்ப கட்டணம் செலுத்த வேண்டும்’ என்ற புதிய நடைமுறை கொண்டுவரப்பட்டுள்ளது. உலக நாடுகள் முழுவதும் மீன்பிடித் தொழிலுக்கு மானியங்கள் கொடுத்து ஊக்குவித்துக்கொண்டிருக்கும்போது, மீன்பிடித் தொழிலுக்கும் பிடிக்கிற மீனுக்கும் இந்திய அரசு கட்டணம் நிர்ணயிப்பது அதிர்ச்சியை ஏற்படுத்துகிறது. ஏற்கெனவே மத்திய அரசின் ஜி.எஸ்.டி வரிவிதிப்பால் திணறிக்கொண்டிருக்கும் மீன்பிடித் தொழில், இந்தச் சட்ட முன்வரைவால் மேலும் அழிவை நோக்கிச் செல்லும்.