Published:Updated:

மறைமுகத் தேர்தல் ரகளைகள்

குளறுபடி... முறைகேடு... அடிதடி... அரிவாள் வெட்டு

பிரீமியம் ஸ்டோரி

உள்ளாட்சித் தேர்தல் என்றாலே அடிதடி பஞ்சாயத்துகளுக்கு பஞ்சம் இருக்காது. அதிலும், மறைமுகத் தேர்தல் என்றால் சொல்லவா வேண்டும்? ஊரக உள்ளாட்சித் தேர்தல் 27 மாவட்டங்களில் நடந்து முடிந்த நிலையில், கடந்த 11-ம் தேதி மாவட்ட ஊராட்சித் தலைவர், துணைத் தலைவர், ஒன்றியக்குழுத் தலைவர், துணைத் தலைவர் மற்றும் ஊராட்சிக்கான துணைத் தலைவர்களைத் தேர்வு செய்வதற்கான மறைமுகத் தேர்தல் நடைபெற்றது, இதில் ஏகத்துக்கும் குளறுபடிகள், முறைகேடுகள் ஆளுங்கட்சியினருக்கும் எதிர்க்கட்சியினருக்கும் அடிதடி, மோதல் என பல மாவட்டங்களில் ரணகளமாகிவிட்டது. வன்முறையால் சில இடங்களில் தேர்தலே ஒத்திவைக்கப்பட்டுள்ளது. சில இடங்களில் பாதிக்கும் மேற்பட்ட உறுப்பினர்கள் வாக்களிக்கச் செல்லாததால் தேர்தல் ஒத்திவைக்கப்பட்டிருக்கிறது. இப்படி மறைமுகத் தேர்தலில் நடந்த மறக்க முடியாத சம்பவங்களைத் திரட்டியிருக்கிறது ஜூ.வி டீம்.

டி.எஸ்.பி வெங்கடேசன்
டி.எஸ்.பி வெங்கடேசன்

வாக்குப் பெட்டியுடன் ஓடிய அ.தி.மு.க கவுன்சிலர்!

ஈரோடு ஒன்றியத்தில் தி.மு.க-வும் அ.தி,மு.க-வும் சம பலத்துடன் இருந்த நிலையில், அ.தி.மு.க-வினர் வாக்களிக்க வராததால், தேர்தல் ரத்து செய்யப்பட்டது. தி.மு.க கவுன்சிலர் பிரகாஷ்மீது, கல் குவாரி வழக்கு இருப்பதால் அவரைத் தேர்தலில் நிற்கவிடாமல் செய்து வெற்றியைக் கைப்பற்ற அ.தி.மு.க திட்டமிட்டுள்ளதாக தி.மு.க-வினர் குற்றம்சாட்டுகின்றனர். தூக்கநாயக்கன் பாளையம் ஒன்றியத்தில் மொத்தமுள்ள 10 வார்டுகளில், தி.மு.க கூட்டணி ஏழு இடங்களையும் அ.தி.மு.க மூன்று இடங்களையும் பெற்றிருந்த நிலையில், முதல் ஆளாக வாக்களிக்கச் சென்ற அ.தி.மு.க கவுன்சிலர் கே.வி.நடராஜ், வாக்குப் பெட்டியைத் தூக்கிக்கொண்டு ஓடிவிட்டார். அதனால், அதிகாரிகள் தேர்தலை ரத்து செய்து விட்டனர்.

டி.எஸ்.பி-க்கு அரிவாள் வெட்டு!

விருதுநகர் மாவட்டம் வத்திராயிருப்பு ஒன்றியத்தில் மொத்தமுள்ள 13 இடங்களில் அ.தி.மு.க ஆறு இடங்களிலும், தி.மு.க ஆறு இடங்களையும் ஒரு இடத்தை சுயேச்சையும் வென்றன. ‘அந்த ஒரு சுயேச்சை யாருக்கு வாக்களித்திருப்பார்? உள்ளடி வேலைகள் ஏதேனும் நடந்திருக்கிறதா?’ என்று சஸ்பென்ஸ் எகிறிய நிலையில், தேர்தல் முடிவை அறிவிக்காமல் அதிகாரிகள் காலம் தாழ்த்தினர். இதனால் ஆத்திரமடைந்த அ.தி.மு.க-வினர், தேர்தல் நடந்த அலுவலகத்தைச் சூறையாடினர். தங்களின் வேட்பாளர் வெற்றி பெற்றதாக அறிவிக்கக்கோரி அ.தி.மு.க-வினர் நடத்திய வன்முறையால், தேர்தல் முடிவு ஒத்திவைக்கப்பட்டது.

நரிக்குடி ஒன்றியத்தில் சூறையாடப்பட்ட தேர்தல் அலுவலகம்
நரிக்குடி ஒன்றியத்தில் சூறையாடப்பட்ட தேர்தல் அலுவலகம்

அருப்புக்கோட்டை அருகேயுள்ள நரிக்குடி ஒன்றியத்தில் தலைவர் தேர்தலில் அ.தி.மு.க வேட்பாளர் பஞ்சவர்ணம், தி.மு.க வேட்பாளர் காளீஸ்வரி இருவருக்கும் தலா ஏழு வாக்குகள் கிடைத்தன. தேர்தல் அதிகாரிகள் அடுத்த கட்ட நடவடிக்கையில் இறங்குவதற்குள், இரு தரப்பினரும் மோதிக்கொண்டதால் பரபரப்பு ஏற்பட்டது. மோதலைக் கட்டுப்படுத்தச் சென்ற டி.எஸ்.பி-யான வெங்கடேசனுக்கு அரிவாள் வெட்டு விழுந்ததால், பதற்றம் தொற்றிக்கொண்டது. அதனையடுத்து அங்கு மறுதேர்தல் அறிவிக்கப்பட்டுள்ளது.

தேர்தல் அதிகாரிக்கு நெஞ்சுவலி!

தூத்துக்குடி மாவட்டம் கோவில்பட்டி ஒன்றியத்தில் தேர்தல் நடத்தும் அலுவலருக்கு நெஞ்சுவலி ஏற்பட்டதாகத் தெரிவிக்கப்பட்டு தேர்தல் ஒத்திவைக்கப்பட்டது. இந்த ஒன்றியத்தில் உள்ள 19 வார்டுகளில் தி.மு.க 11 இடங்களையும் அ.தி.மு.க எட்டு இடங்களையும் பெற்றுள்ளன. தேர்தல் நடந்தால் தி.மு.க எளிதாக வென்றுவிடும் என்பதால், அமைச்சர் கடம்பூர் ராஜு தலையீட்டில் தேர்தலைத் திட்டமிட்டு ஒத்திவைத்துவிட்டதாக தூத்துக்குடி பரபரக்கிறது.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

தலைவரான சுயேச்சை கவுன்சிலர்கள்!

திருப்பூர் மாவட்டம் குண்டடம் ஒன்றியத்தில் உள்ள 15 வார்டுகளில் தி.மு.க கூட்டணியும், அ.தி.மு.க கூட்டணியும் தலா ஏழு இடங்களை வென்றிருந்தன. அ.தி.மு.க கூட்டணியில் சீட் கிடைக்காததால், சுயேச்சையாகப் போட்டியிட்ட தே.மு.தி.க-வைச் சேர்ந்த குப்புசாமி என்பவரும் வெற்றிபெற்றிருந்தார். அவரின் ஆதரவைப் பெற இரு தரப்பினரும் முயன்றனர். ‘என்னைத் தலைவராகத் தேர்வுசெய்தால் ஆதரவு தருகிறேன்’ எனக் கறாராகப் பேசிய குப்புசாமியைத் தலைவர் பொறுப்புக்கு நிறுத்தி, வெற்றியைக் கைப்பற்றியிருக்கிறது அ.தி.மு.க கூட்டணி. அதேபோல, காங்கேயம் ஒன்றியத்தில் மொத்தம் உள்ள 11 வார்டுகளில் அ.தி.மு.க ஐந்து வார்டுகளில் வென்றது. தி.மு.க கூட்டணிக்கு நான்கு இடங்கள் கிடைத்திருந்தன. இருவர் சுயேச்சையாக வென்றிருந்த நிலையில், தலைவர் பொறுப்புக்கு சுயேச்சைகளில் ஒருவரான மகேஷ்குமார் களமிறங்கினார். அ.தி.மு.க-வில் சீட் கிடைக்காததால் சுயேச்சையாகக் களமிறங்கி வெற்றிபெற்றிருந்தவர்தான் மகேஷ்குமார். அவருக்கு ஆதரவாக அ.தி.மு.க மற்றும் தி.மு.க கவுன்சிலர்கள் சிலரும் வாக்களித்ததால், அவர் வெற்றி பெற்றார்.

கோவில்பட்டி ஊராட்சி ஒன்றிய அலுவலகம் முன் போலீஸ் பாதுகாப்பு - ஈரோட்டில் தி.மு.க-வினர் போராட்டம்
கோவில்பட்டி ஊராட்சி ஒன்றிய அலுவலகம் முன் போலீஸ் பாதுகாப்பு - ஈரோட்டில் தி.மு.க-வினர் போராட்டம்

பாதுகாப்பு வளையத்தில் காங்கிரஸ் கவுன்சிலர்!

சிவகங்கை மாவட்டத்தில் இருக்கும் 16 மாவட்ட கவுன்சிலர்களில், தி.மு.க மற்றும் அ.தி.மு.க கூட்டணியினர் தலா எட்டு கவுன்சிலர்களுடன் சமநிலையில் இருக்கின்றனர். தி.மு.க கூட்டணியில் உள்ள காங்கிரஸ் கவுன்சிலர் ஆரோக்கிய சாந்தாராணியை தங்கள் பக்கம் இழுக்க அ.தி.மு.க பல்வேறு முயற்சிகளை எடுத்தது. அவரைத் தங்கள் பக்கம் தக்கவைக்க தி.மு.க-வும் முயன்றதால், பெரும் பரபரப்பாகி தேர்தல் ஒத்தி வைக்கப்பட்டது. இந்த நிலையில், ஆரோக்கிய சாந்தாராணி போலீஸ் பாதுகாப்புடன் கலெக்டர் அலுவலகத்திலிருந்து அழைத்துச் செல்லப் பட்டார்.

கறுப்பு ஆடுகள் யார்?

திருவாரூர் மாவட்டம் மன்னார்குடி ஊராட்சி ஒன்றியத்தில் தி.மு.க தரப்பும் அ.தி.மு.க தரப்பும் தலா 11 கவுன்சிலர்களுடன் சம நிலையில் இருந்தனர். அதனால், தலைவர் பதவியைக் கைப்பற்ற இரு தரப்பும் கடுமையாக மோதிய நிலையில், அ.தி.மு.க சார்பில் களமிறங்கிய மனோகரன் 12 வாக்குகள் பெற்று வெற்றி பெற்றார். துணைத் தலைவருக்கான தேர்தலில் தி.மு.க கூட்டணி சாரபில் இந்திய கம்யூனிஸ்ட் கட்சியும், அ.தி.மு.க கூட்டணி சார்பில் பா.ஜ.க-வும் போட்டியிட்டன. இதில் இந்திய கம்யூனிஸ்ட் கட்சியைச் சேர்ந்த வனிதா 12 வாக்குகள் வாங்கி வெற்றி பெற்றார். ‘தலைவர் மற்றும் துணைத் தலைவர் தேர்தலில் இரு தரப்பிலும் மாற்றி வாக்களித்த அந்த கறுப்பு ஆடுகள் யாராக இருக்கும் என்று பட்டிமன்றம் நடத்தாத குறையாக விவாதம் நடக்கிறது.

போலீஸ் பாதுகாப்பு வளையத்தில் ஆரோக்கிய சாந்தாராணி
போலீஸ் பாதுகாப்பு வளையத்தில் ஆரோக்கிய சாந்தாராணி

தஞ்சாவூர் தகிடுதத்தம்!

தஞ்சாவூர் மாவட்டம் பேராவூரணி ஒன்றியத்தில் மொத்தமுள்ள 15 இடங்களில் ஆறு இடங்களை தி.மு.க-வும், எட்டு இடங்களை அ.தி.மு.க-பா.ஜ.க கூட்டணியும் ஒன்றில் சுயேச்சையும் வெற்றிபெற்றிருந்தன. எப்படியாவது அ.தி.மு.க-வைத் தோற்கடிக்க நினைத்த தி.மு.க, தலைவர் பதவி தருவதாகச்சொல்லி அ.தி.மு.க-விலிருந்து மாலா என்ற கவுன்சிலரைத் தங்கள் பக்கம் இழுத்துவிட்டது. மாலா தவிர இன்னொருவரும் தி.மு.க-வுக்கு வாக்களிப்பதாக இருந்தது. தி.மு.க-வின் தகிடுதத்தத்தைத் தடுக்க நினைத்த அ.தி.மு.கழக எம்.பி-யான வைத்திலிங்கம், அ.தி.மு.க கவுன்சிலர்கள் யாரும் வாக்களிக்கச் செல்லக் கூடாது கட்டளையிட்டுவிட்டார். பாதிக்கும் மேற்பட்டோர் வாக்களிக்கச் செல்லாததால், தேர்தல் தள்ளி வைக்கப்பட்டது.

பாபநாசம் ஒன்றியத்தில் உள்ள 21 வார்டுகளில் ஆறு இடங்களை மட்டுமே அ.தி.மு.க பிடித்திருந்த நிலையில், அந்தக் கட்சியைச் சேர்ந்த சுமதி ஒன்றியத் தலைவராகி இருக்கிறார். தி.மு.க-வில் தலைவர் பொறுப்பைக் கைப்பற்ற நடந்த கோஷ்டிப்பூசல் காரணமாக இருவர் வேட்பாளர் களாகக் களமிறங்கினர். அதைச் சாதகமாக்கி சுமதி வெற்றிபெற்றுவிட்டார்.

முதல்வரின் மாவட்டத்தில் தி.மு.க சரண்டர்!

முதல்வர் எடப்பாடி பழனிசாமியின் சொந்த மாவட்டமான சேலத்தில் உள்ள 20 ஒன்றியங்களில் 18 இடங்களை அ.தி.மு.க கைப்பற்றியுள்ளது. இரண்டு இடங்களில் தேர்தல் தள்ளிவைக்கப் பட்டுள்ளது. சேலத்தைப் பொறுத்தவரையில் தி.மு.க கவுன்சிலர்கள் பலர் அ.தி.மு.க-வுக்கு ஆதரவாக வாக்களித்திருப்பது, தி.மு.க தலைமைக்கு அதிர்ச்சியை ஏற்படுத்தியிருக்கிறது. குறிப்பாக ஏற்காடு ஒன்றியத்தில் அ.தி.மு.க-வும் தி.மு.க-வும் தலா மூன்று இடங்களைக் கைப்பற்றி சம பலத்துடன் இருந்தனர். ஆனால், அங்கு அ.தி.மு.க போட்டியின்றி வென்றுள்ளது. சேலம் ஒன்றியத்தில் மொத்தம் உள்ள 10 கவுன்சிலர்களில் நான்கு இடங்களை தி.மு.க-வும் அதன் கூட்டணிக்கட்சியான சி.பி.ஐ ஒரு இடத்திலும் வெற்றிபெற்றிருந்தனர். ஆனால், அங்கு அ.தி.மு.க ஏழு வாக்குகள் பெற்று வென்றது. அயோத்தியாப்பட்டணம் ஒன்றியத்தில் தி.மு.க-வுக்கு மெஜரிட்டி கவுன்சிலர்கள் இருந்தனர். ஆனால், அங்கும் அ.தி.மு.க-வே வென்றது.

அத்துமீறி நுழைந்த மணிகண்டன் - மணிகண்டன் கார் முற்றுகை
அத்துமீறி நுழைந்த மணிகண்டன் - மணிகண்டன் கார் முற்றுகை

தி.மு.க-வை ஜெயிக்கவைத்த முன்னாள் அமைச்சர்!

ராமநாதபுரம் மாவட்டம் மண்டபம் ஒன்றியத்தில் தி.மு.க-வே பெரும்பான்மை பெற்றிருந்தது. ஆனால், தலைமையால் அறிவிக்கப் பட்ட சுப்புலட்சுமிமீது தி.மு.க கவுன்சிலர்கள் அதிருப்தியில் இருந்தனர். இந்த வாய்ப்பைப் பயன்படுத்திக்கொள்ள நினைத்த அ.தி.மு.க முன்னாள் அமைச்சர் மணிகண்டன், தேர்தல் நடைபெற்ற ஒன்றிய அலுவலகத்துக்குள் அத்துமீறி நுழைந்தார். இதனால் கோபமான தி.மு.க-வினர் சாலைமறியலில் ஈடுபட்டனர். சிலர் அலுவலகக் கண்ணாடிகளை உடைத்தனர். இதனையடுத்து மணிகண்டர் வெளியேற்றப் பட்டார். அவர் கார்மீது செருப்புகளும், தண்ணீர் பாட்டில்களும் வீசப்பட்டன. மணிகண்டன் உண்டாக்கிய பிரச்னையால், மூன்று அணிகளாகப் பிரிந்திருந்த தி.மு.க-வினர் கருத்து வேறுபாடுகளை மறந்து ஒன்றிணைந்து வாக்களித்து சுப்புலட்சுமியை வெற்றிபெற வைத்துவிட்டனர்.

டென்ஷனை ஏற்படுத்திய பா.ம.க!

கடலூர் மாவட்டத்தின் 29 மாவட்ட ஊராட்சி கவுன்சிலர் பதவிகளில் 15 இடங்களை அ.தி.மு.க கூட்டணியும், 14 இடங்களை தி.மு.க கூட்டணியும் கைப்பற்றி இருந்ததால், போட்டி கடுமையாக இருந்தது. ‘மாவட்ட ஊராட்சித் தலைவர் பதவி தங்களுக்கு வேண்டும்’ என்று பா.ம.க அடம் பிடித்தது. ஆனால், அ.தி.மு.க விட்டுத்தரவில்லை. தேர்தலின்போது பா.ம.க-வினர் தனியாக வந்ததுடன். அவர்கள் அ.தி.மு.க-வினரைக் கண்டு கொள்ளாததால் டென்ஷன் அதிகரித்தது. அ.தி.மு.க வேட்பாளர் திருமாறன், ஒவ்வொரு அ.தி.மு.க கூட்டணி கவுன்சிலர்களிடமும் கெஞ்சிக் கூத்தாடினார். இறுதியில் அவர் வெற்றிபெற்றதாக அறிவிக்கப்பட்ட பிறகே, நிம்மதியடைந்தார்.

தஞ்சை மாவட்டத்தில் தள்ளுமுள்ளு
தஞ்சை மாவட்டத்தில் தள்ளுமுள்ளு

ஓ.பி.எஸ் பிளான் சொதப்பியதா?

ஓ.பன்னீர்செல்வத்தின் சொந்த மாவட்டமான தேனியில் உள்ள சின்னமனூர், பெரியகுளம் ஒன்றியங்களில் தி.மு.க கவுன்சிலர்களை அ.தி.மு.க-வினர் வளைத்ததால் சம பலத்துடன் இருக்கின்றனர். கடமலை ஒன்றியத்திலும் சம பலமே உள்ளது. அந்த மூன்று ஒன்றியத்திலும் நடைபெற்ற தேர்தலின்போது ‘அ.தி.மு.க கவுன்சிலர்கள் வாக்களிக்கச் செல்ல வேண்டாம்’ என ஓ.பி.எஸ் தரப்பிலிருந்து சொல்லப்பட்டதால், ஒருவரும் தேர்தல் நடந்த அலுவலகம் பக்கம் எட்டிக்கூடப் பார்க்கவில்லை. பாதிக்கும் மேற்பட்டோர் வாக்களிக்க வராததால், தேர்தல் தள்ளி வைக்கப்பட்டது. கடமலை மயிலை ஒன்றியத்தில் தேர்தல் நடந்த, ஒன்றிய அலுவலகத்துக்கு அ.தி.மு.க கவுன்சிலர்கள் வந்தனர். ஆனால், அங்கிருந்த அ.தி.மு.க-வினர் அவர்களை எச்சரித்துத் திருப்பி அனுப்பிவிட்டனர். ‘ஒருவேளை அவர்கள் தி.மு.க பக்கம் சாய்ந்து விட்டார்களோ... நம் பிளான் சொதப்பிவிட்டதா?’ என்கிற கவலை ஓ.பி.எஸ் ஆதரவாளர்களுக்கு ஏற்பட்டுள்ளதாம்.

தி.மு.க வேட்பாளரை ஆதரித்த அ.தி.மு.க!

கன்னியாகுமரியில் காங்கிரஸ் - தி.மு.க இடையே உள்ளாட்சித் தேர்தல் அறிவிக்கப் பட்டதிலிருந்தே முட்டல்- மோதல்கள்தான். கன்னியாகுமரி மேற்கு மாவட்டத்தில் இரு கட்சிகளும் தனித்தனியே வேட்பாளர்களை அறிவித்தன. பேச்சுவார்த்தையிலும் உடன்பாடு எட்டப்படாததால், தனியாகவே போட்டி யிட்டனர். இந்தக் குழப்பம் திருவட்டாறு ஒன்றியத் தலைவருக்கான தேர்தலிலும் நீடித்தது. தலைவருக்கான வேட்பாளராக முன்னாள் யூனியன் சேர்மன் பிரேமசுதாவை அறிவித்தது தி.மு.க. ஆனால், அவரை எதிர்த்து தி.மு.க-வின் போட்டி வேட்பாளராக ஜெகன்நாதன் களமிறங்கி னார். தே.மு.தி.க-விலிருந்து தி.மு.க-வுக்கு வந்த ஜகன்நாதனுக்கு அ.தி.மு.க-வும் பா.ஜ.க-வும் ஆதரவு அளித்ததால், பிரேமசுதாவை தோற்கடித்து ஜெகன்நாதன் தலைவராகத் தேர்வானார்.

***

‘‘இது தி.மு.க-வுக்கும் பழங்குடிகளுக்கும் கிடைத்த வெற்றி!’’

பொன்தோஸ்
பொன்தோஸ்

மிழகத்தின் முதல் பழங்குடியின மாவட்ட ஊராட்சித் தலைவராகியிருக்கிறார் கொடநாட்டைச் சேர்ந்த பொன்தோஸ். ஆம்... மறைந்த முன்னாள் முதல்வர் ஜெயலலிதாவுக்குச் சொந்தமான கொடநாடு எஸ்டேட் அமைந்துள்ள கொடநாடு கிராம ஊராட்சித் தலைவராக இருந்து பல்வேறு சவால்களையும் சங்கடங்களையும் சந்தித்த அதே பொன்தோஸ்தான்.

நீலகிரியில் மொத்தமுள்ள ஆறு மாவட்ட ஊராட்சி வார்டுகளில் நான்கில் தி.மு.க-வும், ஒன்றில் இந்திய கம்யூனிஸ்ட் கட்சியும், ஒன்றில் அ.தி.மு.க-வும் வெற்றிபெற்றிருந்தன. நீலகிரி மாவட்ட ஊராட்சித் தலைவர் பதவி பழங்குடியினருக்கு ஒதுக்கப்பட்டுள்ளது. தி.மு.க சார்பாகப் போட்டியிட்டு வெற்றிபெற்றுள்ள நான்கு பேரில் பொன்தோஸ் மட்டும்தான் பழங்குடியினத்தைச் சேர்ந்தவர். இதனால், போட்டியின்றி மாவட்ட ஊராட்சித் தலைவராக பொன்தோஸ் தேர்வாகியுள்ளார்.

இந்த வெற்றி குறித்து நம்மிடம் பேசிய பொன்தோஸ். ‘‘உள்ளாட்சித் தேர்தல் மூன்றாண்டுகள் தள்ளிபோனதற்கு தி.மு.க-தான் காரணம் என்று பலரும் சாடி வருகின்றனர். ஆனால், எங்கள் தலைவர் ஸ்டாலின் நடத்திய சட்டப் போராட்டத்தால்தான் என்னைப் போன்ற பழங்குடி இனத்தைச் சேர்ந்த ஒருவனால் இன்றைக்கு இந்த அதிகாரத்தையும் உரிமையையும் அடைய முடிந்திருக்கிறது. இது தி.மு.க-வுக்கும் பழங்குடிகளுக்கும் கிடைத்த வெற்றி’’ என்றார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு