எஞ்சியிருப்பது உயிர் மட்டுமே! - உன்னாவ் பெண்ணின் ஓயாத துயரம்

2017 ஜூன் 4-ம் தேதி... உத்தரப்பிரதேசம், உன்னாவ் பகுதியின் மாகி கிராமத்தைச் சேர்ந்த 17 வயது பெண் ஒருவர், வேலை கேட்டு பங்கர்மாவ் தொகுதியின் பி.ஜே.பி எம்.எல்.ஏ-வான குல்தீப் சிங் செங்கரைச் சந்திக்க அவர் வீட்டுக்குச் சென்றார்.

. அதன் பிறகு, அவர் வீடு திரும்பவில்லை. ஒரு வாரம் கழித்து ஆரையா என்ற இடத்திலிருந்து அவர் மீட்கப்பட்டார். வேலை கேட்டுச் சென்ற இடத்தில் குல்தீப் சிங்கும் அவரின் குடும்ப உறுப்பினர்களும் தன்னை வன்புணர்வு செய்ததாக அந்தப் பெண் குமுறி அழுதார்.

. இதுகுறித்து புகார் அளிக்கச் சென்ற பாதிக்கப்பட்ட பெண்ணும் அவரின் குடும்பத்தினரும் காவல் நிலையத் திலிருந்து விரட்டி அடிக்கப்பட்டனர். ஒரே வாரத்தில், மீண்டும் ஒரு கும்பலால் அவர் கடத்தப்பட்டு வன்புணர்வுக்கு ஆளாக்கப்பட்டார். அந்தக் கடத்தலில் எம்.எல்.ஏ-வின் சகோதரர் அதுல் சிங்குக்கும் தொடர்புள்ளது என்று அடையாளம் காட்டினார் அந்தப் பெண். காவல் துறையின் தொடர் துன்புறுத்தல்களுக்கு அஞ்சிய அந்தப் பெண், குடும்பத்துடன் டெல்லிக்குக் குடிபெயர்ந்தார். ஜூன் 22, 2017-ல் அவர் மாகி காவல் நிலையத்தில் மீண்டும் புகார் அளித்தார். இம்முறை வழக்குப் பதியப்பட்டது. ஆனால், அதில் குல்தீப் குடும்பத்தினரின் பெயரே இல்லை.

. அலகாபாத் நீதிமன்றத்தில் தன் நிலைமையைக் கூறிக் கதறினார் அந்தப் பெண். உ.பி முதல்வர் ஆதித்யநாத்தைக் கடுமையாகக் கண்டித்த நீதிமன்றம், குல்தீப்மீது வழக்குப் பதிய உத்தரவிட்டது. இதில் ஆத்திரமடைந்த குல்தீப் தரப்பு, 2018 ஏப்ரல் 2-ம் தேதி அந்தப் பெண்ணின் தந்தையை கடுமையாகத் தாக்கியது. தொடர்ந்து அவர் மீதே பயங்கர ஆயுதங்கள் வைத்திருந்ததாகக் குற்றம்சாட்டி கைதுசெய்தது காவல்துறை. ஏப்ரல் 7-ம் தேதி, வயிற்றுவலியால் அவதிப்படுவதாகக் கூறிய அந்தப் பெண்ணின் தந்தையை, மருத்துவ மனையில் சேர்த்தது காவல்துறை. ஏப்ரல் 9-ம் தேதி அவர் இறந்தார். அவர் உடலில் 14 இடங்களில் காயங்கள் இருந்தன.

. மக்கள், போராட்டத்தில் குதித்தனர். போராட்டங்களின் அழுத்தங்களால் குல்தீப்பின் சகோதரர் அதுல் கைது செய்யப்பட்டார். சிறப்பு விசாரணைக் குழு அமைக்கப்பட்டு, அறிக்கை பெறப்பட்டது. வழக்கு, சி.பி.ஐ-க்கு மாற்றப்பட்டது. ஆள் கடத்தல், பெண் கடத்தல், பாலியல் பலாத்காரம், கொலை மிரட்டல் மற்றும் போஸ்கோ சட்டத்தின்கீழ் குல்தீப் மீது வழக்குப் பதிவு செய்யப்பட்டது. 2019 ஏப்ரல் 13-ல் குல்தீப் கைதுசெய்யப்பட்டார். ஆனாலும், அரச பயங்கரவாதம் ஓயவில்லை. பாதிக்கப்பட்ட பெண்ணின் மாமா மகேஷ் சிங்கை வேறு வழக்கில் கைதுசெய்தது போலீஸ். ரேபரேலி சிறையில் இருக்கும் அவரைச் சந்திக்க அந்தப் பெண் தன் அத்தையுடன் காரில் சென்றபோது, கார் மீது பயங்கரமாக மோதியது லாரி. அத்தை சம்பவ இடத்திலேயே இறந்தார். பாதிக்கப்பட்ட பெண், உயிருக்கு ஆபத்தான நிலையில் இருக்கிறார். உடன் சென்ற வழக்கறிஞர் மஹேந்திர சிங்கும் படுகாயமடைந்தார். இது ஒரு திட்டமிட்ட கொலை முயற்சி என்று குற்றம்சாட்டுகிறார்கள் சமூகச் செயற்பாட்டாளர்கள். நாடு முழுவதும் கடும் கொந்தளிப்பை ஏற்படுத்தியுள்ளது இந்தச் சம்பவம். நாடாளுமன்றத்தில் எதிர்க்கட்சிகள் ஆர்ப்பாட்டம் செய்தன. வழக்கம்போல அமைதி காக்கிறது பி.ஜே.பி.

‘ஒரே நாடு... ஒரே தேர்தல்’ என்று கோஷமிடுகிறார்கள். அப்படியெனில், இனி உன்னாவ் சம்பவத்தைப்போல ஒரே நாடு... ஒரே அநீதிதானா?

எஞ்சியிருப்பது உயிர் மட்டுமே! - உன்னாவ் பெண்ணின் ஓயாத துயரம்

ராஜு.கே