Published:Updated:

அடிக்கடி சேதமாகும் வைகை இணைப்புக் கால்வாய்!

வைகை இணைப்புக் கால்வாய்
பிரீமியம் ஸ்டோரி
வைகை இணைப்புக் கால்வாய்

தவிப்பில் ஐந்து மாவட்ட விவசாயிகள்

அடிக்கடி சேதமாகும் வைகை இணைப்புக் கால்வாய்!

தவிப்பில் ஐந்து மாவட்ட விவசாயிகள்

Published:Updated:
வைகை இணைப்புக் கால்வாய்
பிரீமியம் ஸ்டோரி
வைகை இணைப்புக் கால்வாய்

மதுரை, திண்டுக்கல், தேனி, சிவகங்கை, ராமநாதபுரம் என ஐந்து மாவட்ட மக்களின் குடிநீர் மற்றும் பாசன ஆதாரம், வைகை அணை. வைகை ஆற்றுத் தண்ணீரும் முல்லைப்பெரியாறு தண்ணீரும் ஒன்றுசேர்ந்து வைகை அணைக்கு வரும். இந்தத் தண்ணீரானது, அணையிலிருந்து ராமநாதபுரம் கடைமடை வரை உள்ள ஆயக்கட்டுதாரர்கள் ஒவ்வொருவருக்கும் உரிமையானது. எனவே, தண்ணீரை மிகச் சரியாகப் பகிர்ந்து கொடுக்க வேண்டும் என்பது மட்டுமல்லாமல், வீணாக்காமல் பகிரவேண்டும் என்பதும் அவசியமாகிறது. இதை கருத்தில் கொண்டு 1992-ம் ஆண்டு கட்டப்பட்டதே வைகை இணைப்புக் கால்வாய். வைகை அணையிலிருந்து மேலூர் வரை உள்ள இந்த இணைப்புக் கால்வாய், சரியாக வடிவமைக்காத காரணத்தால் அடிக்கடி சேதமடைந்துவருவதாகக் குற்றம்சாட்டுகின்றனர் விவசாயிகள்.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

வைகை அணையின் பிக்கப் அணையிலிருந்து 32 கிலோமீட்டர் வரை செல்லும் கால்வாய், பேரணையை அடைகிறது. அங்கிருந்து 42 கிலோமீட்டர் வரை சென்று கள்ளந்திரி மதகை அடையும் கால்வாய், அங்கிருந்து 16 கிலோமீட்டர் சென்று மேலூரை அடைகிறது. மொத்தம் 90 கிலோமீட்டர். இதில், வைகை அணையிலிருந்து பேரணை வரையிலான 32 கிலோமீட்டரில் எந்தவித பாசனமும் இல்லை. பேரணையிலிருந்து கள்ளந்திரி வரை இருபோகப் பாசனப் பரப்பும், அங்கிருந்து மேலூர் வரை ஒருபோகப் பாசனப் பரப்பும் இந்தக் கால்வாய்மூலம் தண்ணீர் பெறுகின்றன. இடையே பேரணையிலிருந்து திருமங்கலம் பிரதான கால்வாய் பிரிகிறது. வழிநெடுங்கிலும் 12 கிளைக் கால்வாய்களைக் கொண்டது இந்த வைகை இணைப்புக் கால்வாய்.

வைகை இணைப்புக் கால்வாய்
வைகை இணைப்புக் கால்வாய்

வாடிப்பட்டி பகுதியைச் சேர்ந்த விவசாயி ஜெயரட்சகன், ‘‘இந்தக் கால்வாய் பணி நடைபெறும்போது நான் அதில் வேலை செய்திருக்கிறேன். வைகை ஆற்றின் மணலை எடுத்துதான் இந்தக் கால்வாய் பணி நடைபெற்றது. அந்தந்தப் பகுதியைச் சேர்ந்த அரசு ஒப்பந்ததாரர்கள் கால்வாய் அமைக்கும் பணியை மேற்கொண்டார்கள். வைகை அணையிலிருந்து திறந்துவிடப்படும் தண்ணீர் மிக வேகமாக வரும். அதன் வேகத்துக்கு கால்வாயில் போடப்பட்டுள்ள கான்கிரீட் ஈடுகொடுக்க முடியாது. ஓர் இடத்தில் சிறியதாக உடைந்தால் போதும், கால்வாயில் பெரிய சேதத்தை ஏற்படுத்திவிடும்.

அடிக்கடி சேதமாகும் வைகை இணைப்புக் கால்வாய்!

இப்படித்தான் கடந்த வருடம் வாடிப்பட்டி அருகே உடைப்பு ஏற்பட்டது. அதை சரிசெய்ய இரண்டு நாள்கள் ஆனது. அதுவரை வைகை அணையில் தண்ணீர் நிறுத்தப்பட்டது. இந்த ஆண்டு அக்டோபர் இறுதியில் தேனி குள்ளப்புரம் அருகே கால்வாயின் பக்கவாட்டுச் சுவர் சேதமடைந்தது. ஐந்து நாள்கள் தண்ணீரை நிறுத்தி சரிசெய்தனர். இப்படி வருடா வருடம் மதுரைக்கு வரும் தண்ணீரை, கால்வாய் சேதமடைந்தது எனக் கூறி நிறுத்தி நிறுத்திக் கொடுத்துக்கொண்டிருக்கிறார்கள்.

அணையிலிருந்து தண்ணீர் திறந்தால், அந்தத் தண்ணீர் எவ்வளவு வேகத்தில் வெளியே வரும் எனக் கணக்கிடாமல் கால்வாயைக் கட்டிவிட்டனர். அதுமட்டுமல்லாமல், கால்வாய் ஓரங்களில் வளர்ந்துள்ள மரங்களின் வேர்களால் கால்வாய் பக்கவாட்டுச் சுவர் சேதமடைகிறது. தண்ணீரின் வேகத்துக்கு ஈடுகொடுக்கும் விதமாக, புதிதாக ஒரு கால்வாயை மறுகட்டமைப்பு செய்தால்தான் இந்தப் பிரசனைக்கு நிரந்தரமான தீர்வுகாண முடியும்’’ என்றார்.

மேலூர் ஒருபோக விவசாயிகள் சங்கத் தலைவர் முருகன், ‘‘வைகை அணையிலிருந்து தண்ணீர் வரும் வேகத்தைப் பார்த்தால் பயமாக இருக்கும். அவ்வளவு வேகத்தில் வரும் தண்ணீரால், இணைப்புக் கால்வாய் சேதமடைவது தொடர்கதையாகவே இருக்கிறது. இந்த இணைப்புக் கால்வாயை நம்பி இரண்டு லட்சம் ஏக்கருக்குமேல் விளைநிலங்கள் உள்ளன. போதிய மழை இல்லாமல் ஜூன் மாதம் திறக்க வேண்டிய தண்ணீரை எப்போதும் செப்டம்பர் மாதத்துக்குப் பிறகுதான் திறப்பார்கள். அப்படி இருக்கையில், திறக்கப்படும் தண்ணீரையாவது முறையாகக் கொண்டுசேர்க்க வேண்டும். பெரிதாக ஓர் உடைப்பு ஏற்படுவதற்குள் கால்வாயைச் சரிசெய்தால் நன்றாக இருக்கும்’’ என்றார்.

வைகை இணைப்புக் கால்வாய்
வைகை இணைப்புக் கால்வாய்

இது தொடர்பாக பெரியாறு வைகை வடிநிலக் கோட்டம் (நீர்வள ஆதார அமைப்பு) செயற்பொறியாளர் சுப்பிரமணியனிடம் கேட்டபோது, ‘‘வைகை இணைப்புக் கால்வாய் கட்டப்பட்ட நோக்கமே, தண்ணீரை வீணாக்கக் கூடாது என்பதுதான். வைகை அணையிலிருந்து ஆற்று வழியே தண்ணீர் திறந்தால் பேரணைக்குச் சென்று சேர்வதற்குள், 20 சதவிகிதத் தண்ணீர் வீணாகும். அதை கருத்தில்கொண்டு கட்டப்பட்ட கால்வாய் இது. அந்தக் காலத்தில் விவசாயிகளின் நிலங்களை அதிகமாக எடுக்கக் கூடாது என்ற நோக்கத்தில் இப்படி வடிவமைத் திருக்கிறார்கள். ஏனென்றால், வைகை அணையிலிருந்து பேரணை வரை இந்தக் கால்வாயால் எந்தப் பாசனமும் இல்லை. அதே நேரத்தில் இந்த இடைப்பட்ட பகுதியில்தான் கால்வாய் அதிக சேதத்தைச் சந்திக்கிறது. இதற்காக வருடா வருடம் தொடர்ந்து செலவு செய்துகொண்டிருக்கிறோம். கால்வாயை நிரந்தரமாகச் சரிசெய்ய அரசுக்குப் பரிந்துரை செய்ய இருக்கிறோம். அதற்கான மதிப்பீட்டுப் பணி நடந்துவருகிறது. வரும் மார்ச் மாதத்துக்குள் அரசுக்கு முறையாகப் பரிந்துரை செய்துவிடுவோம். கால்வாயை சரிசெய்ய அரசும் தயாராக இருக்கிறது’’ என்றார்.

விரைவில் சரிசெய்தால் விவசாயிகள் மகிழ்வர்.