Published:Updated:

புதிய கொள்கைகள்... சலுகைகள்... வேகமெடுக்குமா மின்சார வாகன உற்பத்தி?

வாகனத்துறை

பிரீமியம் ஸ்டோரி

மின்சார வாகனங்களின் உற்பத்தியையும் அதன் பயன்பாட்டையும் ஊக்குவிப்பதற்காகத் தமிழக அரசு புதிய மின்சார வாகனக் கொள்கையை அறிவித்துள்ளது. இந்தப் புதிய கொள்கையின்படி, என்னென்ன சலுகைகள் வழங்கப்பட்டுள்ளன எனப் பார்ப்போம்.

டி.முரளி
டி.முரளி

பொதுமக்களுக்குக் கிடைக்கும் பலன்கள்

1. வருகிற 2022-ம் ஆண்டு வரை அனைத்து மின்சார வாகனங் களுக்கும் சாலை வரி முழுமையாக ரத்து செய்யப்படுகிறது. இதனால் தமிழ்நாட்டில் மின்சார வாகனங்கள் ரூ.8,000 முதல் ரூ.2 லட்சம் வரை விலை குறையலாம். 2. மத்திய அரசு, வாகனத்தின் பதிவுத்தொகையைத் தள்ளுபடி செய்தால், தமிழ்நாட்டிலும் அதைக் கடைப்பிடிப்போம் என்று கூறியிருக்கிறது தமிழக அரசு. இதன்மூலம் கூடுதலாக ரூ.10,000 முதல் ரூ.3 லட்சம் வரை வாகனங்களின் விலை குறையும். 3. முக்கியமான உணவகங்கள், வணிக வளாகங்கள், திரையரங்குகள் என வணிகக் கட்டடங்களில் தமிழக மின்சாரவாரியத்தின்கீழ் சார்ஜிங் நிலையங்கள் கட்டப்படவிருக்கிறது. 4. இனி வரப்போகும் புதிய கட்டுமானங்கள் மற்றும் அடுக்குமாடிக் குடியிருப்புகளில் மின் வாகனங்களுக்கான சார்ஜிங் ஸ்டேஷனைக் கட்டாயமாக்கும் விதமாகச் சட்டத்திருத்தம் கொண்டுவரப்படும். 5. சென்னை, கோவை, திருச்சி, சேலம், மதுரை, திருநெல்வேலி ஆகிய இடங்களில் அனைத்து அரசு அலுவலகங்களிலும் சார்ஜிங் பாயின்ட் வைக்கப்படும். 6. தேசிய மற்றும் மாநில நெடுஞ் சாலைகளில் ஒவ்வொரு 25 கி.மீ தொலைவிலும் சார்ஜிங் ஸ்டேஷன் உருவாக்கப்படும். 7. வீடுகளில் வைக்கப்படும் சார்ஜிங் ஸ்டேஷன்களுக்குக் கூடுதல் மின்சாரக் கட்டணம் கிடையாது.

வாகனத் தயாரிப்பாளர்களுக்குக் கிடைக்கும் சலுகைகள்

மின்சார வாகனத்துறையில் ரூ.50 ஆயிரம் கோடி முதலீட்டுடன், 50 நேரடி வேலைவாய்ப்பு களை உருவாக்கும் நிறுவனங்களுக்குச் சில சலுகைகள் அறிவிக்கப்பட்டுள்ளன. இந்தச் சலுகைகள் ஏப்ரல் 1, 2018-லிருந்து முதலீடு செய்த நிறுவனங்களுக்குப் பொருந்தும். அதன்படி,

1. தமிழ்நாட்டில் உற்பத்தி செய்யப்பட்டு விற்பனை செய்யப்படும் மின்சார வாகனங்களுக்கு 2030-ம் ஆண்டுவரை மாநில ஜி.எஸ்.டி (SGST) 100% திரும்பக் கிடைத்துவிடும். 2. மின்சார வாகனங்கள் உற்பத்திக்கான முதலீடுகளுக்கு 15% வரையும், மின்கலன் (Battery) உற்பத்திகளுக்கு 20% வரையும் 2025-ம் ஆண்டு வரை மூலதன மானியம் கிடைக்கும்.

3. வருகிற 2022 வரை அரசு தொழில் பூங்காக் களில், மின்வாகன சார்ஜர் மற்றும் பேட்டரி உற்பத்தி செய்யும் தொழிற்சாலைகள் அமைக்க வரும் நிறுவனங்களுக்கு, நிலத்தின் விலையில் 20% வரை மானியம் கிடைக்கும். இதே முதலீடுகளைத் தென் மாவட்டங்களில் செய்தால் 50% மானியமாகத் தரப்படும். இந்த நிறுவனங்களுக்கு 100% முத்திரைத்தாள் கட்டண விலக்கு உண்டு. 4. மின்வாகன சார்ஜர் உபகரண தொழிற் சாலைகள் அமைப்பவர்களுக்கு 100% மின்சார வரி விலக்கு அறிவிக்கப்பட்டுள்ளது.

புதிய கொள்கைகள்... சலுகைகள்... வேகமெடுக்குமா மின்சார வாகன உற்பத்தி?

எம்.எஸ்.எம்.இ நிறுவனங்களுக்கு என்ன பயன்?

1. மின்வாகனத்துக்கான உதிரிபாகங்கள் மற்றும் சார்ஜர் உபகரணங்கள் உற்பத்தியில் ஈடுபடும் சிறு, குறு மற்றும் நடுத்தரத் தொழில் நிறுவனங்களுக்கு ஏற்கெனவே அறிவிக்கப் பட்டுள்ள 20% மூலதன மானியத்துடன் சேர்த்துக் கூடுதலாக 20% மானியம் கிடைக்கும். 2. வாகன உற்பத்தி மையங்களிலும் முதலீடுகளை ஈர்க்கும் திறன்கொண்ட பகுதிகளிலும் மின்சார வாகன நிறுவனங்களுக்கான பிரத்யேக தொழிற்பூங்கா வரப்போகிறது. இதில் உள்ள நிறுவனங்கள் அனைத்தும் பயன்படுத்திக்கொள்ள டெஸ்ட்டிங், ட்ரெயினிங், ப்ரோட்டோ டைப்பிங் போன்ற விஷயங்களுக்கான தனி இடங்கள் உருவாக்கப்பட உள்ளன. 3. மின்சார ஆட்டோ ஓட்டுபவர்களுக்கு பர்மிட்டுக்காகப் பெறப்படும் தொகை, தள்ளுபடி செய்யப்பட்டு ஓப்பன் பெர்மிட் சிஸ்டம் கொண்டுவரப்படுகிறது. 4. மின் வாகனத்துறையில் புதிதாகத் தொடங்கப்படும் ஸ்டார்ட்அப் நிறுவனங்களுக்குத் தனி இன்கு பேஷன் சென்டர் அமைத்து அலுவலக இடம், பொது வசதிகள் மற்றும் வழிகாட்டுதல் கள் தரப்பட உள்ளன. 5. பொதுமக்கள் பயன் பாட்டுக்காக பப்ளிக் சார்ஜிங் ஸ்டேஷன் வைப்பவர்களுக்கு மின்சாரக் கட்டணம், அரசு மின்சாரம் வாங்கும் தொகை யிலிருந்து 15 சதவிகிதத்துக்கு அதிகமாக இருக்காது. இதனால், சார்ஜிங் ஸ்டேஷன் வைப்பது ஒரு சுயதொழிலாக உருவெடுக்கும்.

வளர்ச்சி எப்படி இருக்கும்?

அரசின் இந்த அறிவிப்புகள் பற்றி ஆட்டோமொபைல் துறை நிபுணரும் ஆட்டோ பார்ட்ஸ் ஏசியா இதழின் ஆசிரியருமான டி.முரளியிடம் கேட்டோம். “தமிழக அரசு அறிவித்திருக்கும் மின்சார வாகனக்கொள்கையில் மின்சார வாகனம் வாங்குபவர் களுக்கு நிறைய நல்ல சலுகைகள் தரப்பட்டுள்ளன. இதனால், எலெக்ட்ரிக் 2 வீலர் மற்றும் 3 வீலர்களின் விற்பனை நிச்சயம் அதிகரிக்கும். ஆனால், மின்சாரக் கார்களில் அதிக மாடல்கள் இல்லாததால், விற்பனையில் பெரிய வளர்ச்சி இருக்காது.

சிறு, குறு மற்றும் நடுத்தர நிறுவனங்களுக்கு நிறைய நல்ல திட்டங்களைத் தந்திருக்கிறார்கள். மின்சார வாகன உற்பத்தி சார்ந்திருக்கும் தொழில்களில் இதனால் சின்ன சின்ன முதலீடுகள் வரும்.

சிறு, குறு மற்றும் நடுத்தர நிறுவனங்களுக்கு நிறைய நல்ல திட்டங்களைத் தந்திருக்கிறார்கள். மின்சார வாகன உற்பத்தி சார்ந்திருக்கும் தொழில்களில் இதனால் சின்ன சின்ன முதலீடுகள் வரும். அரசு எதிர்பார்க்கும் அளவுக்கு முதலீடு களும் வேலைவாய்ப்புகளும் இந்தக் குறுகிய காலத்துக்குள் வருவது சந்தேகமே. பேட்டரியைப் பொறுத்தவரை, செல்களை வெளிநாடுகளிலிருந்து வாங்கி இங்கு அசெம்பிள் மட்டுமே செய்வார்கள். இதனால், பெரிய வேலைவாய்ப்புகளோ முதலீடுகளோ இதில் வராது.

மோட்டார், இ.சி.யு (ECU), சார்ஜர், கேபிள் இவற்றில் ஓரளவுக்கு முதலீடுகள் வர வாய்ப்புகள் உள்ளன. எனினும், திறமை மாற்றம் மற்றும் புதிய திறமைகளை வளர்ப்பது ஆகியவற்றில் அரசு இன்னும் கவனம் செலுத்தியிருக்கலாம்.

தமிழ்நாடு எப்போதும் இந்தியாவைவிட ஒரு படி மேலே. ஆட்டோமொபைல் உதிரிபாகம் தயாரிப்பில் முதலில் இறங்கிய தமிழ்நாடு, முதல்முறையாக பிஸ்டன் தயாரிப்பிலும் இறங்கியது. முதல் பிரைவேட் டிரான்ஸ்போர்ட் உருவானது இங்கே தான். அப்படியிருக்க, நாம் இன்னும் தொலைநோக்கு டன் கூடிய ஒரு கொள்கையை உருவாக்கியிருக்கலாம். வெறும் எலெக்ட்ரிக் என்று இல்லாமல் ஃப்யூவல் செல் உள்பட மாற்றுப் போக்குவரத்தில் (Alternate Mobility) கவனம் செலுத்தியிருந்தால் இன்னும் நன்றாக இருந்திருக்கும்’’ என்றார்.

அரசின் புதிய கொள்கை யினால் விளையப்போகிற மாற்றங்களைப் பொறுத்திருந்து பார்ப்போம்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு