Vikatan.com

www.vikatan.com would like to send you push notifications.

Notifications can be turned off anytime from browser settings.

இறந்து ஓராண்டு கழித்து ஜெயலலிதாவின் உடலை மரபணு சோதனை செய்ய முடியுமா? #DNATest

`ஜெயலலிதாவின் உண்மையான வாரிசு நான்தான். நான் அவரின் மகள் என்பதைச் சட்டபூர்வமாகவும் பரிசோதனைகள் மூலமாகவும் கண்டிப்பாக நிரூபிப்பேன்’’ என்கிறார் பெங்களூரு கெங்கேரியைச் சேர்ந்த அம்ருதா. ``நான் 1980-ம் ஆண்டு ஆகஸ்ட் 14-ம் தேதி ஜெயலலிதா-சோபன்பாபு தம்பதியருக்கு மகளாகப் பிறந்தேன். இந்த விஷயம் வெளியில் தெரிந்தால், தனக்கு அவப்பெயர் ஏற்பட்டுவிடும் என்பதற்காக ஜெயலலிதா தன் சகோதரியான சைலஜாவிடம் கொடுத்து வளர்த்தார்’’ என்று பரபரப்பைக் கிளப்பியிருக்கிறார் அம்ருதா. இது தொடர்பாக, உச்ச நீதிமன்றத்தில் அம்ருதா தொடர்ந்த வழக்கை, நீதிபதி மதன் பி லோகூர் தலைமையிலான அமர்வு தள்ளுபடி செய்தது. ஆனால், இது தொடர்பாக, கர்நாடக உயர் நீதிமன்றத்தில் மனுத்தாக்கல் செய்துகொள்ளலாம் என்று அனுமதியளித்திருக்கிறது. இவ்வளவு காலம், ஜெயலலிதாவைத் தன் பெரியம்மா என்று சொல்லி வந்த அம்ருதா, இப்போது 'அம்மா' என்று சொல்ல ஆரம்பித்திருக்கிறார். அதற்காக மரபணு (DNA) பரிசோதனைக்கும் தயார் என்கிறார்.

மரபணு சோதனை கோரும் அம்ருதா

பொதுவாக மரபணு ((DNA) சோதனை என்றால் என்ன... எப்படிப் பரிசோதிக்கப்படுகிறது... இறந்து ஒரு வருடம் கழித்து ஒருவரின் உடலை மரபணு சோதனை செய்வதற்கு வாய்ப்பிருக்கிறதா? விரிவாகப் பார்ப்போம்.

மரபணு என்றால் என்ன ?

``நம் உடல் பல்வேறு உறுப்புகளால் (Organs) ஆனது. உறுப்புகள் பல்வேறு செல்களால் (Cells) ஆனவை. ஒவ்வொரு செல்லிலும், பல அணுக்களும் (Nuclears), சைட்டோபிளாசமும் (Cytoplasm) இருக்கின்றன. ஒவ்வோர் அணுவுக்குள்ளும் பல குரோமோசோம்கள் உள்ளன. குரோமோசோம்கள் பல ஜீன்களால் ஆனவை. இந்த ஜீன்களின் பண்புகளைத் தீர்மானிக்கும் குறியீடுதான் (Code) மரபணு.

ஓர் உயிரினத்தின் இயல்பை, அமைப்பை, குணத்தை அதன் அடுத்தடுத்த சந்ததிகளுக்குக் கடத்த உதவுவதுதான் மரபணு (DNA). மரபணுக்கள்தான், நம் உடலில் உள்ள புரதத்துக்கான குறியீட்டைக் (Code) கொண்டுள்ளன. புரதங்களின் மூலமாகத்தான் உடலின் பல்வேறு செயல்பாடுகள், அமைப்புகள் தீர்மானிக்கப்படுகின்றன.

மரபணுக்களை ரத்தம், திசுக்கள் ஆகியவற்றின் வழியாக அறிந்துகொள்ள முடியும். பி.சி.ஆர் (Polymerase chain reaction) ரியல் டைம் பி.சி.ஆர் (Real time pcr) போன்ற முறைகளின் மூலமாக மரபணுக்களைக் கண்டறியலாம்.

இதன் மூலம் இருவரின் மரபணுக்களை வரிசைப்படுத்தி (Sequence) ஒப்பிட்டுப் பார்த்து, ஒருவரின் வாரிசுதானா (Paternity testing) என்பதைக் கணக்கிடலாம்’’ என்கிறார் மரபணு நிபுணர் அனுராதா.

ஜெயலலிதா

இறந்து ஒரு வருடம் ஆன ஒருவரின் டி.என்.ஏ-வைப் பரிசோதிக்க வாய்ப்பிருக்கிறதா? தடவியல் நிபுணர்களிடம் கேட்டோம்

"இறந்து போன ஒருவரின் தலை முடியை வைத்து, அவர் இறந்து எத்தனை வருடங்கள் ஆயிருந்தாலும், அவரின் வயதைக் கண்டறியலாம். இறக்கும்போது அவருக்கு என்ன வயது என்பதையும் கண்டறியலாம். இறந்து போன ஒருவரின் உடலிலிருந்து எடுத்த ரத்த மாதிரிகளையோ, திசுக்களையோவைத்து டி.என்.ஏ பரிசோதனை செய்ய முடியும். அதன் மூலம் வாரிசு சோதனை (Paternity testing) செய்துகொள்ளலாம். இறந்துபோன சில நாள்களில், அதுவும் இறந்தவரின் உடல் புதைக்கப்பட்டிருந்தால், அதற்கான வாய்ப்பு அதிகம் உண்டு.

இறந்து பல மாதங்கள், வருடங்கள் ஆகிவிட்டால் வாய்ப்பு குறைவு. ஆனால் வாய்ப்பே இல்லை என்று சொல்ல முடியாது. உடல் மண்ணில் புதைக்கப்பட்டிருந்தால் கடினம். ஆனால், பெட்டியில் வைக்கப்பட்ட உடல்கள் என்றால் வாரிசு சோதனைக்கு வாய்ப்பிருக்கிறது. ஜெயலலிதாவின் உடல் பெட்டியில் வைத்துத்தான் புதைக்கப்பட்டிருக்கிறது. பெட்டியில் வைக்கப்பட்ட உடல் முழுவதுமாகச் சிதைந்து போயிருக்க வாய்ப்பில்லை.  எலும்புகளில் படிந்திருக்கும் ரத்தத்துளிகளைக் கொண்டு மரபணு சோதனை செய்யலாம்,  ஏற்கெனவே அவருடைய ரத்த மாதிரி ஏதாவது சேகரித்து வைக்கப்பட்டிருந்தால், அதைக்கொண்டும் வாரிசு சோதனையைச் செய்யலாம்" என்கிறார்கள் நிபுணர்கள்.

மரபணுக்களைக் கண்டறிவதில் பல நன்மைகளும் இருக்கின்றன. குழந்தைகளுக்கு ஏற்படும் மரபணு சார்ந்த பல நோய்களை, இந்தப் பரிசோதனைகள் மூலமாகக் கண்டுபிடித்து, தற்காத்துக்கொள்ள முடியும்.

கர்பிணிப் பெண்கள்

அதைப் பற்றி விரிவாக விளக்குகிறார் மரபியல் நோய் மருத்துவர் பீனா சுரேஷ்... "மூளை வளர்ச்சி இல்லாத குழந்தைகளுக்கு இது உதவும். ஜீன் அல்லது குரோமோசோம் இரண்டில் எதில் பிரச்னை, அது எந்த நிலையில் இருக்கிறது என்பதைக் கண்டறிந்து அதற்கேற்ப சிகிச்சையளிக்க முடியும்.

உணவுகளில் இருக்கும் சில புரதங்கள் மூளை வளர்ச்சி குறைவாகயிருக்கும் குழந்தைகளுக்கு செரிமானம் ஆகாது. அதைக் கண்டறிந்து, அந்தப் புரதங்கள் நீக்கப்பட்ட உணவுகளைக் கொடுத்தால், மூளை வளர்ச்சியை மேம்படுத்த முடியும். அதுபோல, சில குழந்தைகளுக்கு உடலுக்குத் தேவையான மிக முக்கியமான என்சைம்கள் இல்லாமல் இருக்கும். அவர்களுக்கு `என்சைம் ரீப்ளேஸ்மென்ட் தெரபி’ மூலமாக என்சைம்களை மாற்றியமைக்க முடியும்.

தாயின் கர்ப்பத்தில் இருக்கும் குழந்தைகளை ஸ்கேன் செய்து பார்க்கும்போது ஏதாவது பாதிப்பு தெரிந்தால், குழந்தையின் உமிழ்நீர், நச்சுக்கொடியில் (Chorionic villus sampling) இருந்து நீர் எடுத்து என்ன பாதிப்பு என்று கண்டறியலாம். இதன் மூலம் மரபணுவால் ஏற்படக்கூடிய நோயான 'டவுண் சிண்ட்ரோம்' ஏற்படுவதைத் தடுக்க முடியும்.

குரோமோசோம் பிரச்னைகளால், டவுண் சிண்ட்ரோம் (Down Syndrome), டர்னர் சிண்ட்ரோம் (Turner Syndrome), எட்வர்ட்ஸ் சிண்ட்ரோம் (Edwards syndrome) போன்ற நோய்கள் உண்டாகும். ஜீன்களால், ம்யூக்கோபாலிசாச்சாரிடோசிஸ் (Mucopolysaccharidosis (Mps)), கேய்ச்சர் (Gaycher) போன்ற நோய்களும், எம்.எம்.ஏ., (Methylmalonic acidemia (MMA)), எம்.எஸ்.யூ.டி (Maple syrup urine disease (MSUD)) போன்ற மெட்டாபாலிக் டிஸ் -ஆர்டர்களும் உண்டாகும். மரபணு நோய்களில் சிலவற்றை, உணவுக் கட்டுப்பாடுகளின் மூலமாகவும், சில நோய்களை என்சைம் ரீப்ளேஸ்மென்ட் மூலமாகவும், தலசீமீயா போன்ற ரத்தம் தொடர்பான நோய்களை ரத்தத்தை மாற்றுவதன் மூலமாகவும் சரிசெய்ய முடியும்.

ஜீன்கள்

இந்தப் பிரச்னை ஏற்படும் என நினைக்கும் பெண்கள்  கர்ப்பம் தரிப்பதற்கு முன்னர் சிகிச்சைக்கு வந்துவிட வேண்டியது அவசியம். முதல் குழந்தைக்கு இது போன்ற பாதிப்பு ஏதாவது இருந்தால், இரண்டாவது குழந்தையைப் பெற்றுக்கொள்ள திட்டமிடுவதற்கு முன்னதாகவே வந்துவிட வேண்டும்.

அதேபோல் பரம்பரையாக இது போன்ற குடும்ப நோய்கள் ஏதாவது இருந்தால், முதல் குழந்தை பெற்றுக்கொள்ள ஆயத்தமாவதற்கு முன்னதாகவே வந்துவிட வேண்டும். அப்படி வந்தால்தான் மரபணுக்களால் வரக்கூடிய பல நோய்களை வராமல் தடுக்க முடியும். அதற்கான வாய்ப்புகளும் உண்டு’’ என்கிறார் பீனா சுரேஷ்.

 

 

உங்கள் கருத்தைப் பதிவு செய்யுங்கள்

Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement