வெளியிடப்பட்ட நேரம்: 09:33 (30/08/2018)

கடைசி தொடர்பு:09:33 (30/08/2018)

`போர்ஷன் கன்ட்ரோல்'... உடல் பருமன் குறைக்க உதவுமா? #PortionControl

உடல் பருமனை `ஆரோக்கிய உடல் எடை குறைப்பு வழி' எனும் `போர்ஷன் கண்ட்ரோல்' அணுகுமுறை மூலம் குறைக்கலாம்!

`போர்ஷன் கன்ட்ரோல்'... உடல் பருமன் குறைக்க உதவுமா? #PortionControl

ன்றைக்கு வயது வித்தியாசமின்றி எல்லோரையும் பாதிக்கும் பிரச்னைகளில் ஒன்று, உடல் பருமன். இதன் பக்கவிளைவாக ஏற்படும் பிரச்னைகள் ஏராளம். உடல் பருமன் உண்டாவதற்கானக் காரணங்களைத் தேடினால், நம் அலட்சியமே முன்னிற்கிறது.தவறான உணவுப் பழக்கங்கள், துரித உணவுகள் மீதான நாட்டம், உழைப்பின்மை, உடற்பயிற்சியின்மை எனக் காரணங்களை அடுக்கலாம்.  நடைப்பயிற்சி செய்தால் உடல் எடை குறையும் என்றாலும் அது ஓரளவுக்குத்தான் பயனளிக்கும். 

உடல் பருமன்

ஒரே நாளில் எவரின் உடலும் பருமனாகி விடுவதில்லை. அதேபோல, ஒரேநாளில் உடல் பருமனைக் குறைத்துவிடவும் முடியாது. உணவுப் பழக்கத்தில் மெள்ள மெள்ள மாற்றங்களைக் கொண்டுவருவதே உடல் பருமனை சரிசெய்யத் தீர்வாக அமையும். அதற்கு வழிகாட்டுகிறது `ஆரோக்கிய உடல் எடை குறைப்பு வழி' எனும் `போர்ஷன் கன்ட்ரோல்' (Portion Control ) அணுகுமுறை!
ஒருநாளைக்கு எவ்வளவு உணவுகளைச் சாப்பிடுகிறோம், உண்ணும் உணவிலுள்ள கலோரியின் அளவு எவ்வளவு  என்பதை அறிந்துகொண்டு உண்பதே `போர்ஷன் கண்ட்ரோல்'. இது அனைவருக்கும் ஒரே மாதிரியாக அமையாது. ஆண்கள், பெண்கள், அதிக உடல் உழைப்பில் ஈடுபடுவோர், அதிக உடல் உழைப்பு இல்லாதவர்கள், விளையாட்டுகளில் ஈடுபடுவோர், வயதானவர்கள் என ஒவ்வொருவரின் உடலுக்கு ஏற்றவாறு அது மாறுபடும். தங்களது உடலுக்கேற்றபடி, உண்ணும் உணவை மாற்றியமைத்துக்கொள்ள வேண்டியிருக்கும். இதற்கு `பெர்சனலைஸ்டு ஃபுட் பிளான்' (Personalised Food Plan) உதவும்.

`போர்ஷன் கன்ட்ரோல்'  அணுகுமுறை மூலம், நம்முடைய உடலுக்கு, 'இவ்வளவு சாப்பிட்டால் இந்த வேளைக்குப் போதுமான ஆற்றல் கிடைத்துவிடும்' என்பதை அறிந்துகொள்ள முடியும். இதனால், உணவுப்பழக்கத்தில் ஒழுங்கு ஏற்படுவதுடன் நேரம், காலமின்றி எதை வேண்டுமானாலும் சாப்பிடும் பழக்கத்திலிருந்து விடுபடலாம். சரியான உணவுப்பழக்கத்துக்கு மாறுவதால், நேரங்கெட்ட நேரத்தில் பசிக்காது.

உடல் பருமன்

உடல் பருமனைக் குறைக்க நினைப்பவர்கள் ஒருவேளை உணவைச் சாப்பிடாமல் தவிர்த்து, அடுத்த இருவேளை வயிறு நிறையச் சாப்பிடுவார்கள்; அப்படிச் செய்வது சரியல்ல. உடல் ஏற்கத்தக்க உணவு வகைகளையும் அதன் கலோரி அளவுகளையும் தெரிந்துகொள்ள வேண்டும். அதற்கேற்ப காலை, மதியம், இரவு என மூன்று வேளையும் போதுமான அளவு உணவு உட்கொள்ள வேண்டும். அப்போதுதான் உட்கொண்ட உணவு செரிமானமாகி, அதன் ஆற்றல் செலவழிக்கப்பட்டு, உடல் பருமனாவது தடுக்கப்படும். மாறாக, ஒருவேளை மட்டும் `போர்ஷன் கன்ட்ரோல்' அணுமுறையைத் தேர்வு செய்து, மற்ற நேரங்களில் விருப்பம்போல் சாப்பிட்டால், அவர்களுக்கு இந்த அணுகுமுறை பயனளிக்காது. மூன்று வேளையும் உணவுக் கட்டுப்பாடு மேற்கொள்ள வேண்டும். அதேநேரத்தில், உடலைத் தளர்ச்சியடையாமலும் சோர்வடையாமலும் வைத்திருப்பது அவசியம்.

உலகம் முழுவதும் `அட்கின்ஸ் டயட்' (atkins diet), `வீகன் டயட்' (Vegan Diet), `ஸோன் டயட்' (Zone Diet), `பேலியோ டயட்' (Paleo Diet), `மெடிட்டேரானியன்' (Mediterranean), `ரா ஃபுட் டயட்' (Raw food  Diet) உள்ளிட்ட உணவுக் கட்டுப்பாட்டுமுறைகள் உள்ளன.

டயட் வகைகளுக்கு பல்வேறு வழிமுறைகள் உண்டு. ஆனால், `போர்ஷன் கன்ட்ரோல்' அணுகுமுறைக்கென எந்த வழிமுறைகளும் உருவாக்கப்படவில்லை. இருந்தாலும் அடிப்படையான சில விஷயங்கள் உண்டு. எனவே, இதை முதலில் கடைப்பிடிக்க வேண்டும். அதன்பிறகே, மேற்கண்ட டயட்டுகளில் உடலுக்கு ஏற்றதைத் தேர்ந்தெடுத்துப் பின்பற்ற வேண்டும்.

உடல் பருமன்

`போர்ஷன் கன்ட்ரோல்' அடிப்படைகள்:

* தட்டு முழுவதும் உணவை நிறைத்துவைத்தபடி சாப்பிடக்கூடாது.

* சந்தையில் `போர்ஷன் கன்ட்ரோல்' பாத்திரங்கள் கிடைக்கின்றன. அந்த பாத்திரங்களில் உணவை வைத்தே சாப்பிட வேண்டும். இதனால், எவ்வளவு சாப்பிடுகிறோம் என்பதை அறிந்துகொள்ளலாம்.

* மன அழுத்தம், கோபம், பதற்றம் போன்றவற்றுக்குத் தீர்வாக உணவைப் பயன்படுத்தக்கூடாது.

* `பஃபே' உணவுமுறையைத் தவிர்ப்பது நல்லது.

* பொழுதுபோக்குக்காக எந்நேரமும் ஏதாவதொரு எண்ணெய்யில் பொரித்த உணவுகளைக் கொறிக்கக் கூடாது.

* இனிப்பு, புளிப்பு, துவர்ப்பு, உவர்ப்பு, கசப்பு, கார்ப்பு என ஆறு சுவைகளும் உண்ணும் உணவில் இருக்குமாறு பார்த்துக்கொள்ள வேண்டும்.

`பெர்சனலைஸ்டு ஃபுட் பிளான்' குறித்த நிறையச் செயலிகள் (Apps) இணையத்தில் கிடைக்கின்றன. அவற்றில் ஏதேனும் ஒன்றைத் தேர்ந்தெடுத்து பின்பற்றலாம்.

`போர்ஷன் கன்ட்ரோல்' வழிமுறையைக் கடைப்பிடிப்பதற்கு முன்பாக, மருத்துவரிடம் கலந்து ஆலோசிப்பது நல்லது.

 


டிரெண்டிங் @ விகடன்