வெளியிடப்பட்ட நேரம்: 11:32 (10/10/2018)

கடைசி தொடர்பு:11:32 (10/10/2018)

"மருத்துவர்கள் தெளிவான கையெழுத்தில் மருந்துகளை எழுத வேண்டும்!"- எச்சரிக்கும் மருத்துவ கவுன்சில்

மருந்துச்சீட்டில் தெளிவாக எழுதாவிட்டால் மருத்துவருக்கு அபராதம்... தமிழகத்தில் நடைமுறைக்கு வருமா?

`கையெழுத்து அழகா இருந்தா தலையெழுத்து சரியா இருக்காது’ என்பது மூத்தோர் வாக்கு. அது உண்மையாக இருக்குமோ என்று மருத்துவர்கள் தரும் மருந்துச் சீட்டின் கிறுக்கல்களைப் பார்க்கும்போது நினைக்கத் தோன்றும். இனிமேல் அப்படிக் கிறுக்கியெல்லாம் மருந்துச்சீட்டை நோயாளிகளுக்குத் தரமுடியாது. உத்தரப்பிரதேசத்தில் கிறுக்கலான கையெழுத்துடன் மருந்துச் சீட்டு எழுதிக் கொடுத்த மூன்று டாக்டர்களுக்குத் தலா 5,000 ரூபாய் அபராதம் விதித்து கோர்ட்டு உத்தரவிட்டுள்ளது. ஆனாலும் இன்றைக்கும் தமிழ்நாட்டில் பல டாக்டர்களின் கையெழுத்து புரியாத புதிராகவே உள்ளது. 

மருந்துச் சீட்டு

`` `மருத்துவர்கள் பரிந்துரைக்கும் மருந்துச் சீட்டில் மருந்து, மாத்திரைகளின் பெயர்களை கேபிடல் லெட்டரில் எழுத வேண்டும்' என்ற இந்திய மருத்துவ கவுன்சிலின் (எம்.சி.ஐ) உத்தரவு இருக்கிறது. ஆனால் அதைப் பெரும்பாலான டாக்டர்கள் பின்பற்றுவதில்லை. 

மருத்துவர் புகழேந்தி

``டாக்டர்கள் மருந்துகளைப் பரிந்துரைக்கும்போது பெரிய எழுத்துகளில் (Capital letter) எழுத வேண்டும் என்று மருத்துவ கவுன்சில் அறிவுறுத்தியுள்ளது உண்மைதான். பார்மசிஸ்ட்டுகள் மருந்துச் சீட்டுகளைப் பார்த்துத்தான் மருந்து கொடுக்க வேண்டுமென்பதால் அப்படிச் சொல்லியிருக்கிறது. ஆனால், பெரும்பாலான டாக்டர்கள் அதை நடைமுறைப்படுத்துவதில்லை. மேலும் இங்கே உள்ள பல மருந்துக்கடைகளில் பார்மசிஸ்ட்டுகள் மருந்து கொடுப்பதில்லை. அவர்களுக்குப் பதிலாக பார்மசி படிக்காத ஒருவரை பணியமர்த்துகிறார்கள். மருந்துகளைப் பற்றிய விவரம் தெரியாத அவர்கள் டாக்டர் கூறியுள்ள மருந்துகளுக்குப் பதிலாக வேறொன்றை மாற்றித் தரும் அபாயம் உள்ளது. இதனால் நோயாளிக்கு மருந்துகளால் பின்விளைவு ஏற்பட வாய்ப்பு உள்ளது. சில நேரங்களில் அது இறப்பில்கூட முடியும். பென்சிலின், இன்சுலின் என இரண்டு ஊசிகள் உள்ளன. இந்த இரண்டுமே `in' எனத்தான் முடியும். ஆனால், பென்சுலினையும் இன்சுலினையும் வேறு வேறு நோய்களுக்குக் கொடுக்க வேண்டும். மருத்துவரின் கையெழுத்து சரியாக இல்லாதபோது, அதைப் பார்த்து மருந்து கொடுப்பவர்கள் தவறாகக் கொடுக்கும்பட்சத்தில் நிச்சயம் உயிரிழப்பு ஏற்பட வாய்ப்புள்ளது. இதுபோன்ற ஆபத்துகள் இருப்பதால்தான் டாக்டர்கள் தெளிவான கையெழுத்தில், பெரிய எழுத்துகளில் மருந்துகளைப் பரிந்துரைப்பது அவசியமாகிறது.

மாத்திரை

நோயாளிகளுக்கு டாக்டர்கள் எவ்வளவு நேரம் செலவிடுகிறார்கள் என்று சமீபத்தில் இந்திய அளவில் ஒரு புள்ளிவிவரம் எடுக்கப்பட்டது. அதன்படி, `ஒரு நோயாளியைப் பார்க்க 1 நிமிடத்திலிருந்து 2 நிமிடங்கள் வரைதான் டாக்டர்கள் நேரம் ஒதுக்குகிறார்கள்’ என்பது கண்டறியப்பட்டது. இப்படியான சூழலில் மருந்துகளைப் பரிந்துரைக்கும் சீட்டில் எழுதுவதற்கு அவர்கள் எவ்வளவு நேரம் எடுத்துக்கொள்வார்கள் என்பதை நீங்களே கணக்கிட்டுக் கொள்ளுங்கள்.

 `ஒரு நோயாளிக்கு அதிக நேரம் ஒதுக்க முடியாது; நிறைய நோயாளிகளைப் பார்க்க வேண்டும்' என்று டாக்டர்கள் நினைக்கும்போது இதைத் தடுக்க முடியாது.  டாக்டர் -நோயாளி உறவு மனிதாபிமான அடிப்படையில் இருந்தால் இத்தகையப் பிரச்னைகள் நடக்கவே நடக்காது. அது, வணிகரீதியான உறவாக மாறும்போதுதான் இதுபோன்ற சிக்கல்கள் ஏற்படுகின்றன. பெரும்பாலான டாக்டர்கள், `நாம எழுதுற கையெழுத்து பார்மசிஸ்ட்டுக்குத் தெரியும். அதனால், எதற்கு கேபிடல் லெட்டரில் எழுத வேண்டும்’ என்றே நினைக்கிறார்கள்..." என்கிறார் மருத்துவர் புகழேந்தி.  

பரிந்துரைச் சீட்டு

மேலும், ``கார்ப்பரேட் மருத்துவமனைகளில் எதற்காக தெளிவாக பிரின்ட் செய்து பிரிஸ்கிரிப்ஷன் கொடுக்கிறார்கள் என்றால், அவர்களது பார்மஸியிலேயே மருந்து வாங்க வேண்டும் என்பதற்காகத்தான். ஆனால், அப்படிச் செய்யக் கூடாது என்று நீதிமன்ற உத்தரவே இருக்கிறது. `டாக்டர்கள் மருந்துகளை எழுதிக் கொடுத்து, அந்த மருந்தை நோயாளி சரியாகக் கடைப்பிடிக்கிறாரா என்பதைக் கவனிக்க வேண்டும்’ என்றும் அறிவுறுத்தியுள்ளது. அதேபோல, டாக்டர்கள் தெளிவில்லாமல் எழுதுவதில் மற்றொரு காரணமும் உள்ளது. நோயாளிக்கு மருந்து எதுவென்று புரிந்துவிடக் கூடாது என்பதற்காகவே அப்படிச் செய்கிறார்கள். நம்முடைய தாய்மொழியிலேயே மருந்துகளை எழுதித் தரலாம்; அதில் தவறேதும் இல்லை. ஆங்கிலத்தில்தான் எழுத வேண்டும் என்று எந்தச் சட்டமும் இல்லை. தாய்மொழியிலேயே எழுதும்போது டாக்டர்கள் தேவையில்லாத மருந்துகளை எழுதியிருந்தால் நோயாளி அதைக் கண்டுகொள்ள முடியும். இதுபோன்ற காரணங்களால்தான் டாக்டர்கள் கிறுக்கலாக எழுதுகிறார்கள்” என்கிறார் அவர்.  

மருத்துவர் செந்தில்`உ.பி.யில் நடந்துள்ளதைப் போன்றே கிறுக்கலாக எழுதும் தமிழக டாக்டர்கள் மீது நடவடிக்கை எடுக்கப்படுமா?’ என்று, தமிழ்நாடு மருத்துவ கவுன்சில் தலைவர் டாக்டர் செந்திலிடம் கேட்டபோது, ``மருத்துவர்களின் கையெழுத்து மருந்தாளுநர்களுக்குப் புரியும் என்பதால்தான் அதற்கேற்றவாறு எழுதுகிறார்கள். ஆனால், மருத்துவர்களின் புரியாத கையெழுத்தால் நோயாளிகள் யாரேனும் பாதிக்கப்பட்டிருந்தால் எங்களிடம் புகார் அளிக்கலாம். நிச்சயமாக அதுகுறித்து உரிய நடவடிக்கை எடுப்போம். டாக்டர்கள் தெளிவான கையெழுத்தில் மருந்துச் சீட்டுகளை எழுதிக் கொடுக்க வேண்டும் என்று இன்னும் ஓரிரு நாள்களில் சுற்றறிக்கை அனுப்ப உள்ளோம்’’ என்றார் செந்தில். 

``டாக்டர்களின் கையெழுத்தை எப்படிப் புரிந்துகொள்கிறீர்கள்... ஒருவேளை பரிந்துரைக்கும் மருந்துச் சீட்டில் அவரது கையெழுத்து புரியவில்லை என்றால், என்ன செய்வீர்கள்?’’ என்று மருந்தாளுநர் ஆனந்திடம் கேட்டோம்.

``பெரிய மருத்துவமனைகளில் உள்ள டாக்டர்கள் பெரும்பாலும் கேபிடல் லெட்டரில் எழுதுவதால், எங்களுக்கு மருந்து தருவதில் எந்தப் பிரச்னையும் கிடையாது. இதைத் தவிர்த்து, வேறு சில டாக்டர்கள் கிறுக்கலாக எழுதினாலும் அதை பார்மசிஸ்ட் புரிந்துகொள்ளும் வகையில்தான் இருக்கும். கையெழுத்துப் புரியவில்லை என்றால் பரிந்துரை மருந்துச் சீட்டில் உள்ள டாக்டரிடம் கேட்டு, `என்ன மருந்து', `எந்த கம்பெனி' என்பதைத் தெரிந்து கொள்வோம். அப்படியும் புரியாத வகையில் கையெழுத்து இருந்தால் நோயாளியிடமே சொல்லி, சம்பந்தப்பட்ட மருத்துவரிடம் ஆலோசித்து, அவர் பரிந்துரைக்கும் மருந்துக் கடையில் வாங்க அறிவுறுத்துவோம். ஆனால், கையெழுத்து புரியவில்லை என்பதற்காக ஒருபோதும் வேறொரு மருந்தைத் தர மாட்டோம்’’ என்று உறுதியளித்தார் ஆனந்தன். 

 


டிரெண்டிங் @ விகடன்