வெளியிடப்பட்ட நேரம்: 16:39 (10/08/2017)

கடைசி தொடர்பு:16:49 (10/08/2017)

கருணாநிதிக்கு மட்டுமல்ல... ஜெயலலிதாவுக்கும் செய்யப்பட்டது 'ட்ரக்கியோஸ்டோமி'..? ஏன்? எப்படி?

தி.மு.க தலைவர் கருணாநிதி, உடல்நலக்குறைவு காரணமாக சில மாதங்களுக்கு முன் காவேரி மருத்துவமனையில் அனுமதிக்கப்பட்டார். அவருக்கு தொண்டை மற்றும் நுரையீரல் தொற்று பாதிப்பு இருந்ததால்  ஐசியூ-வில் வைத்து சிகிச்சை அளிக்கப்பட்டது. அவருக்கு அளிக்கப்பட்ட சிகிச்சை  தொடர்பாக காவேரி மருத்துவமனை சார்பில் அறிக்கை ஒன்று வெளியிடப்பட்டது. அதில், நுரையீரலில் உள்ள சளியை அகற்ற 'ட்ரக்கியோஸ்டோமி ' சிகிச்சையளிக்கப்பட்டதாக கூறப்பட்டிருந்தது. 

ஏற்கெனவே 'ட்ரக்கியோஸ்டோமி' சிகிச்சை, மறைந்த முதல்வர் ஜெயலலிதாவுக்கும் அளிக்கப்பட்டது. 

கருணாநிதி

 'ட்ரக்கியோஸ்டோமி ' (Tracheostomy)  சிகிச்சை என்றால் என்ன? எந்த மாதிரியான பாதிப்புகளுக்கு இந்த சிகிச்சை அளிக்கப்படும்? காது-மூக்கு- தொண்டை மருத்துவ நிபுணர் சங்கரிடம் கேட்டோம்.

'ட்ரக்கியோஸ்டோமி '  என்றால் என்ன ?மருத்துவர் சங்கர்

'ட்ரக்கியோஸ்டோமி' என்பது,  குரல் வலையில்  அடைப்பு காரணமாக மூச்சுத்திணறல் ஏற்படும்போது, செய்யப்படும் அறுவைசிகிச்சை.  இதைத் தமிழில் 'செயற்கை சுவாச உபகரணச் சிகிச்சை' என்று குறிப்பிடலாம். குழந்தைகள் முதல் பெரியவர்கள் வரை அனைவருக்கும் இந்த சிகிச்சை மேற்கொள்ளப்படும்.

கழுத்து வழியாக துளையிட்டு, அதில் ஒரு டியூப் நுழைக்கப்படும். அந்த டியூப் சுவாசக்குழாயுடன் இணைக்கப்பட்டு நுரையீரலுக்கு நேரடியாக ஆக்சிஜன் கொண்டு செல்லப்படும். அதாவது சுவாசமானது மூக்கு வழியாகவோ, வாய் வழியாகவோ அல்லாமல் டியூப் வழியாக நேரடியாக நிகழும். தொண்டையில் பொருத்தப்பட்டுள்ள ட்ரக்கியோஸ்டோமி இணைப்புக் குழாயை நோய்த்தொற்று பூரணமாக குணமடைந்த பிறகே அகற்றவேண்டும். ஆனாலும், இந்த சிகிச்சையின்போது வழக்கம்போல் உணவருந்தலாம். அதில் எந்த பாதிப்பும் இல்லை.

யாருக்கு இது அவசியமாகிறது ?

குரல்வளையில் புற்றுநோய், நுரையீரலில் சளி அடைப்பு, சுயநினைவு இழந்தவர்கள்  ஆகியோருக்கு மூச்சுத்திணறல் உண்டாகும். அவர்களுக்கு இந்த முறையில் செயற்கை சுவாசம் அளிக்கப்படுகிறது. மேலும், வாய் மற்றும் நாக்கு போன்றவற்றில் அறுவைசிகிச்சை மேற்கொள்வதற்கு முன், அவர்களுக்கு மூச்சத்திணறல் ஏற்படுவதைத் தடுக்க இந்தச் சிகிச்சை அளிக்கப்படும்.  

'ட்ரக்கியோஸ்டோமி

சுய நினைவு இழந்தவர்களுக்கு ஏன் அவசியம் ?

சுயநினைவை இழந்தவர்களால் இரும முடியாது. அவர்கள் உடலில் அதிக அளவில் சளி தேங்கியிருக்கும். அதனால் செயற்கையாக சளியை வெளியேற்ற வேண்டிய அவசியம் உண்டாகிறது. இவர்களுக்கு ஆரம்பத்தில்  'என்டோட்டிராகில் டியூப்'  (endotracheal tube) கருவி மூலம் செயற்கை சுவாசம் அளிக்கப்படும். ஆனால், இந்த முறையில் பல்வேறு பிரச்னைகள் இருக்கின்றன. இதைத் தவிர்க்கவும், அதிலிருந்து விடுபடவும்  'ட்ரக்கியோஸ்டோமி' சிகிச்சை அளிக்கப்படுகிறது. சளியை வெளியே எடுத்தால்தான் உடலுக்குத் தேவையான  அளவு ஆக்ஸிஜன் கிடைக்கும். அப்போதுதான் அவர்கள் எளிதில் குணமடைவார்கள்.

டியூப் பொருத்தப்பட்டவர்களால் பேச முடியுமா ?

'ட்ரக்கியோஸ்டோமி'  டியூபிலேயே பேசுவதற்கு உண்டான (Speaking volve) தனிக்கருவி உள்ளது. அதைப் பயன்படுத்தி பேசிக் கொள்ளலாம். ஆனால், ஆஸ்துமா போன்ற நோயால் பாதிக்கப்பட்டவர்கள் சுயநினைவு இருந்தாலும் மூச்சுவிட சிரமப்படுவார்கள். அவர்களால் பேச முடியாது.

நுரையீரலில் தேங்கியிருக்கும் சளி எவ்வாறு அகற்றப்படுகிறது ?

'ட்ரக்கியோஸ்டோமி'  டியூப் என்பது,  காற்று உள்ளே செல்வதற்காக உள்ள டியூப்பாகும். ஆனால், சளியை அகற்ற சக்ஸன் கதீட்டர் ( Suction Catheter) என்னும் தனி டியூப் பயன்படுத்தப்படுகிறது. இந்த டியூபை குழாய் வழியாக அனுப்பி சளி வெளியேற்றப்படுகிறது. நுரையீரலில் உள்ள  சளியின் அளவைப் பொறுத்து ஒரு நாளைக்கு ஒரு முறையோ, இல்லை மூன்று முறையோ வெளியேற்றப்படும். ஐசியு- வில் இருக்கும்போது ஒரு மணி நேரத்துக்கு ஒருமுறை இந்த முறையில் சளி வெளியேற்றப்படுகிறது.

'ட்ரக்கியோஸ்டோமி டியூப்' எத்தனை நாளில் அகற்றப்படும்? 

நோயாளியின் உடல்நிலையைப் பொறுத்தே டியூப் அகற்றப்படும். சுயநினைவு திரும்பி இயல்பாக சுவாசிக்கும் நிலைக்கு வந்துவிட்டால் டியூபை அகற்றிக் கொள்ளலாம். அகற்றிய பின்பு தையல் போடப்படும்.  மாவீரன் அலெக்ஸாண்டர்

இந்த சிகிச்சையை பெரும்பாலும் குழந்தைகளுக்கு தவிர்க்கிறோம். டியூப்பை கழற்றிய பிறகும்கூட  அவர்களால் மூக்கின் வழியாக மூச்சுவிட சிரமம் இருக்கும். ஆனால், பெரியவர்களுக்கு பெரும்பாலும் இத்தகைய அறுவை சிகிச்சையே மேற்கொள்ளப்படுகிறது. அதிலும் குறிப்பாக சுயநினைவை இழந்தவர்களுக்கு தற்போது அதிகமாக இந்த சிகிச்சை மேற்கொள்ளப்படுகிறது.

உலகில் முதன் முதலில் 'ட்ரக்கியோஸ்டோமி'  சிகிச்சையைப் செய்தது மாவீரன் அலெக்ஸாண்டர்தான். தனது படை வீரர் ஒருவரின் தொண்டையில் மாமிசத்துண்டு அடைத்துக்கொள்ள, அவர் மூச்சுவிட மிகவும் சிரமப்பட்டார். இதைக்கண்ட அலெக்ஸாண்டர் தன் வாளால் படைவீரரின்  தொண்டையை லேசாகக் கிழித்தார். அடுத்தகணமே  சிக்கியிருந்த மாமிசம் அகற்றப்பட்டது. அவருக்கு, மூச்சுத்திணறல் சரியானது. அதன், பின்னர்தான் உலகம் முழுவதும் இந்த சிகிச்சைமுறை பரவியது..." என்கிறார் டாக்டர் சங்கர்!

நீங்க எப்படி பீல் பண்றீங்க


டிரெண்டிங் @ விகடன்