Published:Updated:

பேரிளம் பெண்களும் பேறுகாலமும்!

நவோமி கேம்ப்பெல்
பிரீமியம் ஸ்டோரி
நவோமி கேம்ப்பெல்

என்னதான் இயற்கையை மிஞ்சக்கூடிய அறிவாற்றலை வளர்த்துக் கொண்டிருந் தாலும், இயற்கையின் நியதிகளை மீறுவது ஆபத்தானதே.

பேரிளம் பெண்களும் பேறுகாலமும்!

என்னதான் இயற்கையை மிஞ்சக்கூடிய அறிவாற்றலை வளர்த்துக் கொண்டிருந் தாலும், இயற்கையின் நியதிகளை மீறுவது ஆபத்தானதே.

Published:Updated:
நவோமி கேம்ப்பெல்
பிரீமியம் ஸ்டோரி
நவோமி கேம்ப்பெல்

நவோமி கேம்ப்பெல்... இங்கிலாந்தைச் சேர்ந்த பிரபல நடிகை. உலக சூப்பர் மாடல்களில் ஒருவர் என இன்றளவும் கொண்டாடப்படுபவர். `டைம்ஸ்', `வோக்' இதழ்களின் அட்டைகளைப் பலமுறை அலங்கரித்த கறுப்பு தேவதை.

`தத்துப்பெயர்த்தி' என நெல்சன் மண்டேலாவும், `தத்து மகள்' என பிரபல டிசைனர் அசீடின் அலையாவும் கொண் டாடிய பெண். இவர் சென்ற ஆண்டு தனது 50-வது பிறந்த நாளை வண்ண வண்ணப்பூக்களுடன் கொண்டாடியதோடு நிற்கவில்லை. இந்த ஆண்டு, தனது 51-வது பிறந்தநாளை, `என்னைத் தாயாகத் தேர்வு செய்த அற்புத தேவதை இவள்...' என்று தனக்குப் பிறந்த பெண் குழந்தையின் பாதத்தைப் பகிர்ந்து கொண்டாடியுள்ளார்.

சசித்ரா தாமோதரன்
சசித்ரா தாமோதரன்

51 வயதில் முதன்முறையாகத் தாய்மையடைந்துள்ள நவோமி கேம்ப்பெல்லை உலகப் பிரபலங்கள் அனைவரும் வாழ்த்திட, ``எனது வாழ்க்கைக்குப் பெரும் அர்த்தத்தை ஏற்படுத்தியுள்ள இந்த மென்மையான ஆன்மாவுக்கும் அறிவியலுக்கும் தலை வணங்கு கிறேன்” என்று பதிலளித்துள்ளார்.

குழந்தையைக் கொண்டாடுவது சரி... அறிவியலை ஏன் கொண்டாடுகிறார் நவோமி என்பதற்கு பெண்ணின் சினைப்பை பதிலளிக்கிறது.

தாயின் கருவில் இருக்கும்போது பெண் குழந்தை என்பதை நிர்ணயிக்கும் சினைப்பைகள்தான், சினைமுட்டைகளின் மூலவங்கியாக இயங்குகின்றன. ஐந்து மாதக் கருவாக இருக்கும்போது சினைப்பைகளில் ஏறத்தாழ 30 லட்சம் வரை உள்ள இந்த சினைமுட்டைகள், படிப்படியாகக் குறைந்து, பிறக்கும்போது மூன்று லட்சம் அளவிலும், பருவமடையும்போது 30,000 அளவிலும், அதிலும் பூப்பு முதல் மூப்புவரை வெறும் 300 சினை முட்டைகள் மட்டுமே முதிர்ச்சியடைந்து வெளியேறுகின்றன என்று கூறும் மருத்துவ அறிவியல், பெண்ணின் வயது கூடக்கூட இவற்றின் எண்ணிக்கை மட்டுமன்றி தரமும் குறையும் என்கிறது.

பேரிளம் பெண்களும் பேறுகாலமும்!

பருவமடைந்தது முதல் வாழ்நாள் முழுவதும் விந்தணுக்களை உற்பத்தி செய்யும் ஆண்களைப் போலன்றி, பெண் களின் சினைமுட்டைகளைக் குறைந்த அளவு, அதுவும் குறுகிய காலத்துக்கு மட்டுமே என்று படைத்துள்ளது இயற்கை.

உண்மையில் ஒரு பெண்ணின் கருவுறு தலை, அப்பெண்ணின் கர்ப்பப்பை, சினைப்பை மற்றும் சினைக்குழாய் சார்ந்த நோய்கள் மட்டுமன்றி, தைராய்டு ஹார் மோன்கள், பருமன், உணவுமுறை, மன அழுத்தம், வாழ்க்கைமுறை நோய்கள் எனப் பலவும் கட்டுப்படுத்துகின்றன என்றாலும், இவையனைத்துக்கும் மேலாக இருப்பது, பெண்ணின் வயதுதான்.

ஆம்... பெண்களின் சினைமுட்டைகளின் எண்ணிக்கை மற்றும் தரம் 32 வயதுக்கு மேல் படிப்படியாகக் குறைகின்றன என்பதும், 37 வயதுக்கு மேல் இவை அதிவிரைவாகக் குறைகின்றன என்பதும், மெனோபாஸ் என்ற மாதவிலக்கு ஏற்படுவதற்கு நான்கைந்து வருடங்கள் முன்பாகவே சினைமுட்டைகள் முதிர்ச்சியடைவது முழுமையாக நின்று விடுகின்றன என்பதும் பல்வேறு ஆய்வுகளின் மூலமாக உறுதி செய்யப்பட்டுள்ளன.

இங்கு எண்ணிக்கை மட்டும் குறைவ தில்லை. சினைமுட்டைகளுக்குள் இருக்கும் குரோமோசோம்களும், அவற்றுக்கு வேராக இருக்கும் டிஎன்ஏக்களும், இவையனைத்தின் தரமும் குறைகிறது என்ற நிலையில், நவோமி கேம்ப்பெல் போல 50 வயதுக்கு மேலான பெண்கள் செயற்கையாகக் கருத்தரித்தால் ஏற்படும் பாதிப்புகள் என்ன என்பதையும், இதற்கான பரிந்துரைகள் என்ன என்பதையும் அறிவோம் வாருங்கள்..!

கருத்தரிக்கும் பெண்ணின் வயது அதிகரிக்கும்போது, பாதிப்புகளும் நிச்சயம் அதிகரிக்கின்றன என்று கூறும் மகப்பேறு மருத்துவம், கருச்சிதைவு, கர்ப்பகால ரத்த அழுத்தம், கர்ப்பகால நீரிழிவு, குறைப்பிரசவம், குறைந்த எடை குழந்தைகள், இரட்டைக் குழந்தைகள், குறைபாடுகளுடன்கூடிய குழந்தைகள், மன நலிவுடன் பிறக்கும் குழந்தைகள் என கர்ப்பகாலத்திலும்...

அதிக ரத்தப்போக்கு, ரத்தச் சோகை, அதிகரிக்கும் அறுவை சிகிச்சைகள் எனப் பேறுகாலத்திலும்...

தாய்ப்பால் சுரக்காமை, மன அழுத்தம், தொடரும் வாழ்க்கைமுறை நோய்களின் பாதிப்புகள் எனப் பிரசவத் துக்குப் பின்பும் பல்வேறு பாதிப்புகள் இதில் ஏற்படுவ துடன், தாய் மற்றும் குழந்தை யின் இறப்பு விகிதமும் அதிகரிக்கிறது என்று கூறுகிறது.

உண்மையில்... இத்தனை மருத்துவ காரணங்களைக் காட்டிலும் உளவியல் மற்றும் சமூகம் சார்ந்த காரணங்களே இந்த அதிகரிக்கும் வயது கருத்தரித்தலில் மேலோங்கி நிற்கின்றன.

பெற்றோரின் வயோதிக வயதில் பிறக்கும் ஒவ்வொரு குழந்தைக்கும், பெற்றோரின் முழுமையான கவனிப்பு, உணவு, உடை, கல்வி என அதற்கு இயல்பாக கிடைக்க வேண்டிய அனைத்து அடிப் படை உரிமைகளும் மறுக்கப்படுகின்றன என்பதுதான் உண்மை.

இதன் காரணமாக, பெண்கள் செயற்கையாக கருத்தரிக்கும் வயதை, இந்திய செயற்கை கருத்தரிப்பு அமைப்பின் (ISAR) பரிந்துரைப்படி நிர்ணயித்துள்ளது. இந்திய அரசு ART Bill (2020) என அழைக்கப்படும், செயற்கை கருத்தரிப்பு முறைகளைக் கட்டுப்படுத்தும் அரசின் மசோதா, பெற்றோர்கள் செயற்கையாக கருத்தரிக்கும் வயதையும் நிர்ணயித்துள்ளது.

பெண்களுக்கு, 18 வயதுக்குக் கீழும், 50 வயதுக்கு மேலும் கருத்தரிப்பு சிகிச்சை மறுக்கப்பட வேண்டும் என்றும், அதேபோல ஆண்களுக்கு 21 வயதுக்குக் கீழும், 50 வயதுக்கு மேலும் செயற்கை கருத்தரிப்பு சிகிச்சை மறுக்கப்பட வேண்டும் என்றும் கூறும் இந்த மசோதா, பெற்றோரின் கூட்டுத்தொகை வயது (ஆண் + பெண் இருவரின் ஒன்றுசேர்ந்த வயது) நூறைத் தாண்டக்கூடாது என்றும் நிர்ணயித் துள்ளது.

அதாவது கருத்தரிப்பு சிகிச்சைக்கு வரும் தம்பதியினரில் ஆணின் வயது 55, பெண்ணின் வயது 45, ஆக இரண்டும் சேர்ந்த கூட்டுத்தொகை 100 என்றிருப்பது.

கருத்தரித்தல் என்பது ஒவ்வொரு பெண் ணின் அடிப்படை உரிமை என்றாலும், வயோதிகப் பெற்றோர்களுக்கு வளரும் குழந்தையின் உரிமைகள் மட்டும் மறுக்கப் படலாமா என்று கேள்விகளை எழுப்பி வரும் ASRM உள்ளிட்ட சர்வதேச செயற்கை கருத்தரிப்பு மையங்கள் உச்ச வயது வரம்பை முறைப்படுத்தி வருவதுடன், அமெரிக்கா, கனடா, இங்கிலாந்து, ஆஸ்திரேலியா உள்ளிட்ட நாடுகள் Geriatric Pregnancy - அதாவது, வயோதிகக் கருத்தரித்தலை ஆதரிக்காமல், பிள்ளைப்பேற்றைப் பருவத்தே பயிர் செய்ய அழைப்புவிடுக்கின்றன. அதிலும் தற்போதைய கோவிட் பெருந்தொற்றுக் காலத்தில், மனிதர்கள் உயிர்வாழ்வதே பெரும் சிக்கலாக இருக்கும்போது, இன்னும் பல சிக்கல்களை ஏற்படுத்திக் கொள்வது அவசியம்தானா என்ற கேள்வியும் இயல்பாக எழுகிறது.

பேரிளம் பெண்களும் பேறுகாலமும்!

ஆக... இத்தனை சிக்கல்களைத் தாண்டி, தனது 50 வயதிலும் பிள்ளைப்பேறு கனவை நிறைவேற்றிய அறிவியலுக்கு, நவோமி கேம்ப்பெல் தலைவணங்கும் காரணம் இங்கு நன்கு விளங்குகிறது.

என்றாலும், நவோமி போன்ற பேரிளம் பெண்களின் பேறுகாலமும் பிள்ளைப்பேறும் நமக்கு உணர்த்துவது ஒன்றை மட்டும்தான்.

நவீன மருத்துவ விஞ்ஞானமும், தொழில் நுட்பமும் கைகோத்தால் ஐம்பதிலும் பிள்ளைப் பேறு சாத்தியம் என்பது மட்டும்தான்.

ஆக இந்தத் தொழில்நுட்பம், நவோமி கேம்ப்பெல் போல, வாய்ப்புகள் நிறைந்த ஓரிருவருக்கு மட்டுமே சாத்தியம்..

மற்ற நம் அனைவருக்கும்...

`குழந்தைகள்தாம் நமது எதிர்காலம் என்பதை உணர்ந்து அவர்களுக்கான முழு பராமரிப்பையும், முழுமையான அன்பையும் அளிப்பது ஒவ்வொருவரின் கடமை...' என்று முன்பொரு நாளில் நவோமி கூறிய வரிகள் தான் ஏற்புடையவை.

இங்கு ஒவ்வொரு மருத்துவரும் வலியுறுத்து வது பருவத்தே பயிர் செய் என்பதைத்தான். ஆம், என்னதான் இயற்கையை மிஞ்சக்கூடிய அறிவாற்றலை வளர்த்துக்கொண்டிருந்தாலும், இயற்கையின் நியதிகளை மீறுவது ஆபத்தானதே.

எனவே, உரிய பருவத்தில் குழந்தைகளைப் பெற்றெடுப்பதுதான் குழந்தைக்கும் நல்லது... பெற்றோருக்கும் நல்லது... நாட்டுக்கும்கூட!