Published:Updated:

`பாடத்திட்டதில் விழிப்புணர்வு தேவை!’ -இன்று சர்வதேச போதைப்பொருள் ஒழிப்புதினம்

போதைப்பொருள்
போதைப்பொருள்

ஐ.நா அமைப்பால் ஜூன் 26-ம் தேதி போதைப்பொருள்களைப் பயன்படுத்துதல் மற்றும் கடத்துதல் ஆகியவற்றுக்கு எதிரான விழிப்புணர்வு நாளாக அனுசரிக்கப்படுகிறது.

மனித இனத்துக்குத் தனது மூளையில் இருக்கும் டோபமைனை சுரக்க வைப்பதில்தான் அலாதி ஆர்வம். நமது மூளையில் இருக்கும் டோபைமன் நமக்கு மிகவும் பிடித்த செயல்களைச் செய்யும்போது தானாகவே சுரக்கும். ஆனால், இதைச் செயற்கையாக உற்பத்தி செய்யவே போதைப் பொருள்கள் பயன்படுத்தப்படுகின்றன. அப்படிப் பயன்படுத்தப்படும் போதைப் பொருள்களுக்கு நாளடைவில் அடிமையாகி, வாழ்க்கையையே இழந்தவர்கள் பலர். இதை விற்பனை செய்வதற்கென்றே ரகசிய குழுக்கள் இயங்குகின்றன.

போதை
போதை
representational image

அவ்வப்போது இவர்களில் சிலரை காவல்துறை பிடித்தாலும் , இதை முற்றிலுமாக ஒழிக்க முடியவில்லை.1987-ம் ஆண்டு முதல் ஐ.நா அமைப்பால் ஜூன் 26-ம் தேதி போதைப்பொருள்களைப் பயன்படுத்துதல் மற்றும் கடத்துதல் ஆகியவற்றுக்கு எதிரான விழிப்புணர்வு நாளாக அனுசரிக்கப்படுகிறது. கடந்த 2018-ம் ஆண்டின் ஆய்வுப்படி உலகம் முழுவதும் 26.9 கோடி மக்கள் போதைப்பொருள்களைப் பயன்படுத்துகின்றனர். இது 2009-ம் வருடத்தைவிட 30 சதவிகிதம் அதிகம். இதனால் 3.5 கோடிக்கும் மேற்பட்ட மக்கள் போதைப் பொருள்களால் ஏற்படும் உடல்நலப் பிரச்னைகளால் சிக்கித் தவிக்கின்றனர். கொரோனா காலத்தில் தமிழகத்தில் போதைப் பொருள்களின் பயன்பாடு எந்த அளவில் இருக்கிறது என்பதை அறிந்துகொள்ள இந்திய சுங்கத்துறையின் உதவி ஆணையர் மற்றும் முன்னாள் மத்திய போதைப்பொருள் வாரியத்தில் பணிபுரிந்த டாக்டர் வெங்கடேஷ் பாபுவிடம் பேசினோம்.

``ஊரடங்கு காலத்தில் போதைப் பொருள்களைப் பயன்படுத்துவது குறைந்துள்ளது. தமிழ்நாட்டில் பெரும்பாலும் கல்லூரி இளைஞர்கள் அதிக அளவில் போதைப் பொருள்களைப் பயன்படுத்தி வந்தனர். இதில் வெளி மாநிலங்களிலிருந்து வந்தவர்களும் அடக்கம். இப்போது எல்லாரும் அவர் அவர் வீடுகளுக்குச் சென்றுவிட்டதால், அவர்களுக்கு போதைப்பொருள்கள் கிடைப்பதில்லை.

வெங்கடேஷ் பாபு
வெங்கடேஷ் பாபு

பொதுவாக பத்து வயதுக்குப் பிறகு குழந்தைகள் உலகம் பற்றித் தெரிந்துகொள்ள ஆரம்பிக்கிறார்கள். அப்போதே அவர்கள் போதைப்பொருள்கள் பற்றியும் அறிந்துகொள்கிறார்கள். ஆனால், முழுமையாகத் தெரிந்துகொள்ளாததால் அதன் பாதிப்புகளை அவர்கள் உணர்வதில்லை. இதனால் போதைக்கெதிரான விழிப்புணர்வை நாம் எட்டாவது, ஒன்பதாவது வகுப்பிலேயே தொடங்கிவிட வேண்டும்.

இதை அந்தமான் அரசின் பாடத்திட்டத்தில் சேர்ப்பதற்காக நான் உதவி செய்துள்ளேன். தமிழ்நாடு அரசும் கூடிய விரைவில் இதை பாடத்திட்டத்தில் சேர்க்க வேண்டும். இந்த வருடம் ஐநா அமைப்பும் "Better knowledge for better care " என்பதையே இன்றைய நாளுக்கான தலைப்பாக வைத்துள்ளது. இதில் போதைப்பொருள்களின் பாதிப்பை பாடத்திட்டத்தின் மூலம் தான் நாம் சொல்லித் தர முடியும். இதனுடைய பாதிப்புகளை அறிந்தால் யாரும் அதை உபயோகிக்க மாட்டார்கள். விளையாட்டாக இதற்குப் பழகும் நபர்கள் நாளடைவில் போதைக்கு அடிமையாகிறார்கள். பெற்றோர்களும் பத்து வயது முதலே குழந்தைகளிடம் போதைப் பொருள்கள் மற்றும் அவற்றின் பாதிப்புகள் பற்றி பேச வேண்டும். அப்போதுதான் இதன் பயன்பாட்டை நிறுத்த முடியும்" என்றார்.

அடுத்த கட்டுரைக்கு