Published:Updated:

தலைச்சுற்றலா? - தலையை மட்டுமல்ல... காது, கண், கழுத்தையும் கவனியுங்கள்!

சரியான நேரத்துக்குச் சாப்பிடுவது, தூங்குவது, கண்களுக்கு ஓய்வு கொடுப்பது, இடையிடையே கண்களுக்கான பயிற்சிகளைச் செய்வது, உடற்பயிற்சிகள் போன்றவை நிச்சயம் உதவும்.

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

பிரீமியம் ஸ்டோரி
பிரிக்க முடியாதது, `பெண்களும் தலைச்சுற்றலும்' என்று சொல்ல லாம். பெரும்பாலான பெண்கள் தலைச்சுற்றல் அனுபவத்தை நிச்சயம் உணர்ந்திருப்பார்கள். சிலருக்கு அது தொடர்கதையாகவும் இருக்கும்.
விஜயகிருஷ்ணன்
விஜயகிருஷ்ணன்

‘வீக்னெஸ்... சுகர் லோ ஆயிடுச்சு... டென்ஷன்...’ இப்படி ஏதேதோ காரணங்களைச் சொல்லிக்கொண்டு அதை சர்வசாதாரணமாகக் கடந்து கொண்டிருப்பார்கள். அப்படி அலட்சியப்படுத்தும் அளவுக்கு தலைச்சுற்றல் சாதாரண விஷயமில்லை. அந்த விழிப்புணர்வு படித்தவர்களுக்கும் இல்லை என்பது வேதனையளிக்கிறது. தலைச்சுற்றல் ஏன் வருகிறது, அது உணர்த்தும் விஷயம் என்ன, அதற்கான சிகிச்சைகள், வாழ்வியல் மாற்றங்கள் என எல்லாவற்றையும் விளக்குகிறார் காது, மூக்கு, தொண்டை மருத்துவர் விஜயகிருஷ்ணன்.

தலைச்சுற்றலுக்கும் இ.என்.டி மருத்து வருக்கும் என்ன சம்பந்தம் என்று கேள்வி எழுப்புவோருக்கும் கட்டுரையில் விடை இருக்கிறது.

நிஜமாகவே தலை சுற்றுமா?

தலைச்சுற்றல் என்பதை இம்பேலன்ஸ் என்று சொல்லலாம். அதாவது, உங்கள் இடமும் சுற்றவில்லை, நீங்களும் சுற்ற வில்லை. ஆனாலும் எல்லாமே சுற்றுவது போல உணர்வீர்கள்.

வெர்டிகோ Vs டிஸ்ஸினெஸ்

`வெர்டிகோ' என்பதில் உங்களைச் சுற்றி எல்லாமே சுற்றுவது போலத் தெரியும்.

தலைச்சுற்றலா? - தலையை மட்டுமல்ல... காது, கண், கழுத்தையும் கவனியுங்கள்!

`டிஸ்ஸினெஸ்' என்பது சில நொடிகளுக்கு ஏற்படும் இம்பேலன்ஸ். உதாரணத்துக்கு, சரியாகச் சாப்பிடாதபோதும், உட்கார்ந்து திடீரென்று எழும்போதும் நாம் உணர்வது இம்பேலன்ஸ். ரத்தத்தில் சர்க்கரை அளவு குறையும் `லோ சுகர்' நிலையிலும் இப்படி உணர்வார்கள்.

காரணங்கள்

நாம் ஒரு நிலையில் நிற்க வேண்டுமானால் மூளைக்கு பார்வை, ஜாயின்ட் சென்சார்கள் மற்றும் காது... இந்த மூன்று இன்புட்ஸும் கிடைக்க வேண்டும். மூளை என்கிற ப்ராசஸர், இந்த மூன்று இன்புட்ஸையும் எடுத்துக்கொண்டு, ஒருங்கிணைக்கும். ஓர் உதாரணம் பார்ப்போம். உங்கள் எதிரில் ஒரு கார் வருகிறது. அந்த கார் எத்தனை நொடிகளில் உங்கள் அருகில் வரும், சாலை யைக் கடந்துவிடலாமா என்பதையெல்லாம், பார்வை, ஜாயின்ட் சென்சார்கள் மற்றும் காது மூன்றும் கணக்கிட்டு மூளைக்குத் தகவல் கொடுக்கும். உடலின் பேலன்ஸ் சிஸ்டத்தின் அடிப்படைச் செயல்பாடு இதுதான். இந்த மூன்றில் ஒன்று தீவிரமாகவோ, இரண்டு மிதமாகவோ பாதிக்கப்பட்டால் பிரச்னை வரும்.

பரவலான இரண்டுவகை தலைச்சுற்றல்

BPPV (Benign Paroxysmal Positional Vertigo)


இந்த வகை பாதிப்பில் படுத்து எழுந்திருக்கும்போது சில நொடிகளுக்குத் தலை சுற்றும். வலது பக்கமோ, இடது பக்கமோ புரண்டு படுத்தால் தலை சுற்றுகிறது என்பார்கள். இதற்கு பயந்து படுக்கவே பயப்படுவார்கள்.

தலைச்சுற்றலா? - தலையை மட்டுமல்ல... காது, கண், கழுத்தையும் கவனியுங்கள்!

Meniere’s Disease

உள் காதுகளுக்குள் எண்டோலிம்ப் எனும் திரவம் உருவாகும். ரத்த அழுத்தம் மாதிரி, காதுகளுக்குள் உள்ள இந்தத் திரவத்திலும் அழுத்தம் அதிகரிக்கலாம். அதன் காரணமாகவும் தலைச்சுற்றல் வரலாம். இது ஒருநாள் முதல் இரண்டு, மூன்று நாள்கள் வரை இருக்கலாம். அழுத்தம் அதிகரிக்கும்போது, கேட்கும் திறன் குறையும், காதில் வலியும் இரைச்சலும், தலைச்சுற்றலும் இருக்கலாம். திடீரென அந்த அழுத்தம் அதிகரித்துப் பிறகு குறையும்.அதையடுத்து இரைச்சலும் தலைச்சுற்றலும் குறைந்து விடும். கேட்கும் திறன் ஓரளவு சரியாகும். இது அடிக்கடி தொடரும்போது காதுகள் பாதிக்கப்படும். கேட்கும் திறன் குறைந்துகொண்டே போகும்.

இவை தவிர வைரல் தொற்று, பாக்டீரியல் தொற்று, காதில் சீழ் வடிதல் போன்றவையும் தலைச் சுற்றலுக்குக் காரணமாகலாம். அதாவது, காது சவ்வில் ஓட்டை இருந்து, எலும்பில் தொற்று ஏற்பட்டு அதன் காரணமாக சீழ் வடியும். அது உள் காதுக்குப் பரவி தலைச் சுற்றல் வரலாம். உடலிலேயே மிக வலுவான இரண்டு... பல் எனாமலும், காது எலும்பு களும்தான். அப்படிப்பட்ட காது எலும்பையே அரிக்கிற அளவுக்கு சில நேரம் தொற்று வரலாம். அதனால் கேட்கும் திறனும் பேலன்ஸும் பாதிக்கப்படும்.

ஒரு பக்க காதில் இப்படி தொற்றோ, அரிப்போ ஏற்பட்டிருந்தால் இன்னொரு பக்க காதில் இம்பேலன்ஸ் ஏற்படும். அதாவது, வலது, இடது காதுகள் இரண்டும் சம அளவில் வேலை செய்ய வேண்டும். ஒருபக்கம் மட்டும் வேலைசெய்து, இன்னொன்று செய்யாதபோது, ஒரு பக்கம் அதிக வேலை செய்ய வேண்டியிருக்கும். அதையேகூட நாம் தலைச்சுற்றலாக உணரலாம். இதை மூளைக்குப் புரிய வைக்க பயிற்சிகள் தேவைப்படும்.

இவை தவிர காது நரம்பில் கட்டிகள், புற்றுநோய், காதுகளின் ரத்தக்குழாயில் அடைப்பு, தலையில் அடிபடுவதால் காது எலும்பு உடைவது (தலையில் அடிபட்டிருக்கும். ஆனால், காதில் ரத்தம் வடிகிற மாதிரி காட்சிகளை திரைப் படங்களில் பார்த்திருப்போம். காது எலும்பு அடிபட்டு, மூளையின் உள்ளே உள்ள ரத்தம் காது வழியே வெளிவருகிறது என்பதுதான் இதற்கு அர்த்தம்) போன்றவற்றால் காதில் இம்பேலன்ஸ் ஏற்படலாம். தலைச் சுற்றலை ஏற்படுத்தும் காது தொடர் பான பிரச்னைகள் இவையெல்லாம்.

கண் தொடர்பான பிரச்னைகளா லும், மூளையில் கட்டிகள், பக்க வாதம், ரத்த ஓட்டம் தடைப்படுவது போன்றவற்றாலும்கூட தலைச்சுற்றல் வரலாம்.

பொதுவான காரணங்கள்

வைட்டமின் சத்துக்குறைபாடு, ரத்தச் சோகை, சரியாகத் தூங்காதது...

இரவெல்லாம் விழித்திருந்துவிட்டு, வெறும் 2 - 3 மணி நேரம் மட்டுமே தூங்கும் பழக்கம் அதிகரித்திருக்கிறது. தொடர்ந்து இரண்டு நாள்கள் இப்படிச் செய்தால், மூன்றாவது நாளே தலை பாரமாக இருப்பதை உணரலாம். தலைச்சுற்றல் வரலாம். இதற்கு `Migrainous Vertigo' என்றே பெயர். `மைக்ரேன்' என்றால் ஒற்றைத் தலைவலி. மூளையைச் சுற்றியுள்ள ரத்தக்குழாய்கள் விரிவடைந்து, ரத்த ஓட்டம் அதிகரித்து அழுத்தமும் தலைவலியும் வரும். இதேபோல காதுக்குள்ளேயும் பாதிப்பு ஏற்பட்டு வரும் தலைச்சுற்றல்தான் `மைக்ரேனஸ் வெர்டிகோ'.

முதலில் எந்த மருத்துவரை அணுக வேண்டும்?

தலைச்சுற்றலோடு தலைவலி, கேட்கும் திறனில் பாதிப்பு, காதில் சீழ் வடிதல், இரைச்சல் இருந்தால் நேரடியாக காது, மூக்கு, தொண்டை (இ.என்.டி) மருத்துவரைப் பார்க்கலாம். இந்தப் பிரச்னைகள் இல்லாத தலைச்சுற்றலுக்கு நரம்பியல் மருத்துவரை அணுகலாம்.

காதுகளில் வரும் பிரச்னைகள் பெரும்பாலும் அவசர சிகிச்சையாகக் கருதப்படுவதில்லை. ஆனால், மூளை தொடர்பான பாதிப்புகளான ஸ்ட்ரோக், மூளைத்தண்டின் ரத்த ஓட்டத்தில் அடைப்பு, அவற்றால் வரும் தலைச்சுற்றல் எல்லாம் எமர்ஜென்சியாகக் கருதி சிகிச்சை அளிக்கப்பட வேண்டியவை. எனவே, அவற்றில் அலட்சியம் கூடாது.

தேவைப்படும்பட்சத்தில் கண் மருத்துவரைப் பார்க்கவும் பரிந்துரைக்கப்படுவார்கள். கழுத்து எலும்பு தேய்வடைந்திருந்தாலும் தலைச்சுற்றல் வரலாம். கழுத்து வலியோடு, தலைச்சுற்றலும் இருந்தால் எலும்பு மருத்துவரை அணுக வேண்டியிருக்கும்.

பரிசோதனைகள்

சம்பந்தப்பட்ட நபரின் அறிகுறி களையும் அவர்கள் விவரிக்கும் பிரச்னைகளையும் கேட்பதன் மூலமும் தலைச்சுற்றலின் தன்மையை வைத்தும் பாதி விஷயங்களைக் கண்டுபிடித்துவிட முடியும். அடுத்து காது, கண்களுக்கான சில டெஸ்ட் செய்வோம்.

`ஃபங்ஷனல் வெர்டிகோ' என்றொரு கண்டிஷன் இருக்கிறது. உளவியல் ரீதியான பிரச்னை இது. உதாரணத்துக்கு, மாமியார் - மருமகள் பிரச்னையில் இருப்பவர்கள் அதிலிருந்து தப்பிக்கவும் சும்மாவாவது தலை சுற்றுவதாகச் சொல்வார்கள். இதைப் பரி சோதனையில் எளிதாகக் கண்டுபிடிக்க முடியாது.

பெண்கள் அதிகம் பாதிக்கப்படுவது ஏன்?

ஹார்மோன் மாற்றங்கள், ரத்தச்சோகை பாதிப்பு, காலை உணவைத் தவிர்ப்பது, அடிக்கடி விரதம் இருப்பது, சரியான நேரத்துக்குச் சாப்பிடாதது மற்றும் குறைந்த நேரத் தூக்கம் போன்றவற்றால் இருக்கலாம்.

கர்ப்பகால தலைச்சுற்றல்

ஹார்மோன் மாறுதல்கள், ரத்த அழுத்தம் திடீரென கூடுவது, குறைவது, அனீமியா போன்றவையே பொதுவான காரணங்கள். தவிர, வயிறு பெரிதாக ஆக கர்ப்பப்பையில் உள்ள குழந்தையின் எடை வயிற்றை அழுத்தி, ரத்த ஓட்டத்தை தடைசெய்வது, அதிக வாந்தி காரணமாக ஏற்படும் டீஹைட்ரேஷன் போன்றவையும் காரணங்கள். இது பிரசவத்துக்குப் பிறகு சரியாகிவிடும்.

வாழ்க்கைமுறை மாற்றங்கள் உதவுமா?

சரியான நேரத்துக்குச் சாப்பிடுவது, தூங்குவது, கண்களுக்கு ஓய்வு கொடுப்பது, இடையிடையே கண்களுக்கான பயிற்சிகளைச் செய்வது, உடற்பயிற்சிகள் போன்றவை நிச்சயம் உதவும். ரத்தச் சர்க்கரை அளவை கட்டுப்பாட்டுக்குள் வைத்திருக்க வேண்டும்.ரத்த அழுத்தத்தையும் அவ்வப்போது சரிபார்க்கவும். ஸ்ட்ரெஸ் இல்லாமல் வாழப்பழக வேண்டியதும் முக்கியம்.

உணவுமுறையில் கட்டுப்பாடுகள் தேவையா?

காதுக்குள் உள்ள திரவத்தில் அழுத்தம் அதிகரிக்கும் மீனியர்ஸ் டிசீஸ் போன்ற சில கண்டிஷன்களுக்கு, உணவில் உப்பின் அளவைக் குறைக்கச் சொல்வோம். அனீமியா உள்ளவர்கள் இரும்புச்சத்து மிக்க உணவுகளை எடுத்துக்கொள்ள வேண்டும்.

பயிற்சிகள் பரிந்துரைக்கப்படுமா?

சிலருக்கு ஒரு பக்க காதின் திறன் சரியாகவும், இன்னொரு காதின் திறன் குறைவாகவும் இருக்கும். அந்த இம்பேலன்ஸை மூளைக்குப் புரிய வைப்பதற்கான `வெஸ்டிபுலர் ரீஹேபிளிட்டேஷன்' (Vestibular rehabilitation) பயிற்சிகளை தேவை இருப்போருக்கு மருத்துவர் பரிந்துரைப்பார். எல்லோரும் செய்யக் கூடாது.

முதலுதவி?

Cinnarizine போன்ற மாத்திரைகளை மருத்து வரின் பரிந்துரையோடு எடுத்துக் கொள்ளலாம். சுய மருத்துவம் கூடாது. தீவிர தலைச்சுற்றல் பிரச்னை உள்ளவர்கள் டிரைவிங் செய்வதைத் தவிர்ப்பது பாதுகாப்பானது.

சிகிச்சைகள்

காரணத்தைக் கண்டறிந்து அதற்கேற்ப சிகிச்சை அளிக்க வேண்டும். உதாரணத்துக்கு அனீமியாவால் வரும் தலைச்சுற்றல் என்றால் ரத்தச் சோகையை சரிசெய்ய வேண்டும். மேற் குறிப்பிட்ட கண்டிஷன்களுக்கேற்ப சிகிச்சை மாறுபடும்.

கழுத்தெலும்பு தேய்ந்துபோனால் தலைச்சுற்றல் வருமா?

பலரும் நினைத்து பயப்படும் தவறான விஷயம் இது. தேவையே இல்லாமல் கழுத்தில் காலர் போட்டுக்கொண்டு நடமாடுவார்கள். உண்மையில் இந்தப் பிரச்னை 100-ல் ஐந்து பேருக்குகூட வருவதில்லை. ரத்த ஓட்டம் கொடுக்கும் அழுத்தம் மற்றும் தசைகளிலிருந்து வரும் உணர்வுகள் குறைவதால் ஏற்படும் பிரச்னை இது. காலர் போடுவது மட்டும் இதற்குத் தீர்வாகாது. மருத்துவரின் உதவியோடு பயிற்சிகள் மேற்கொள்வதுதான் தீர்வாகும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு