Published:Updated:

“கொரோனாவால் பிரிந்தாலும் மாரடைப்பால் பிரிந்தாலும் உயிர் ஒன்றுதான்!”

பிற நோய்களால் பாதிக்கப்பட்டு உயிரிழப்போரின் எண்ணிக்கை அதிகரிக்கக்கூடும்

பிரீமியம் ஸ்டோரி
கொரோனாவின் தாக்கம், வெவ்வேறு வடிவங்களில் கடும் சிக்கல்களை உருவாக்கிவருகிறது. பல விஷயங்கள் நாம் எதிர்பாராதவை. ‘‘ஊரடங்கு உத்தரவு மற்றும் தனியார் மருத்துவமனைகளில் மருத்துவர்கள் பற்றாக்குறை காரணமாக, பிற நோய்களால் பாதிக்கப்பட்டு உயிரிழப்போரின் எண்ணிக்கை அதிகரிக்கக்கூடும்’’ என்று எச்சரிக்கிறார்கள் மருத்துவச் செயற்பாட்டாளர்கள்.

இந்தியாவில் ஓராண்டின் இறப்புவிகிதம் 1,000 பேருக்கு 7.3 ஆக உள்ளது. அதுவே தமிழகத்தில், 6.7 ஆக உள்ளது. அதில் நான்கில் ஒருவர், இதயம் மற்றும் ரத்தநாளப் பிரச்னைகளால் உயிரிழக் கின்றனர். கொரோனா வைரஸ் பரவிவரும் நிலையில், இது பற்றிப் பேச வேண்டிய அவசியமும் ஏற்பட்டிருக்கிறது.

இராமலிங்கம், ரெக்ஸ் சற்குணம்
இராமலிங்கம், ரெக்ஸ் சற்குணம்

இது தொடர்பாக நம்மிடம் பேசிய தனியார் இதயநோய் மருத்துவர் ஒருவர், ‘‘மாரடைப்பு ஏற்பட்டு ஒரு நோயாளி என்னிடம் வந்தார். அவசரம் என்பதால், அருகில் ஆஞ்சியோ கிராம் வசதியுள்ள தனியார் மருத்துவமனையை அவருக்குப் பரிந்துரைத்தேன். ஊரடங்கு காரணமாகவும், கொரோனா நோய்த்தொற்று ஏற்பட்டுவிடுமோ என்ற பயத்தினாலும், அந்த மருத்துவமனையில் மருத்துவர்களும் மருத்துவப் பணியாளர்களும் பணிக்கு வரவில்லை. பிறகு, அந்த நோயாளியை அரசு மருத்துவக் கல்லூரிக்கு அனுப்பி வைத்தோம்.

மாரடைப்பு, குடல்வால் சேதம், பக்கவாதம் போன்ற அவசரமான பிரச்னைகளுக்கு ‘கோல்டன் ஹவர்’ எனச் சொல்லப் படும் குறிப்பிட்ட நேரத்துக்குள் செல்லா விட்டால் உயிரிழப்பு ஏற்பட்டுவிடும். இந்த அபாயத்தை அனைவரும் உணர்ந்து செயல்பட வேண்டும்.

தனியார் மருத்துவமனைகள் செயல்பட வேண்டும் என அறிவுறுத்தி யுள்ள அரசு, அதற்கான வழிகாட்டு நெறிமுறை களை வழங்கவில்லை. பெரிய நகரங்கள் தவிர்த்து சிறிய கிராமங்கள், டவுன்களில் பல தனியார் மருத்துவமனைகள் செயல்படவில்லை. இதனால் அனைத்து மக்களும் அரசு மருத்துவமனைகளை அணுக வேண்டியுள்ளது. கொரோனா வைரஸுக்கு அளிக்கும் முக்கியத்துவத்தை, பிற மருத்துவ அவசர சிகிச்சைகளுக்கும் அளிக்க வேண்டும். இல்லையென்றால், கொரோனாவைவிட பிற நோய்களின் காரணமாக ஏற்படும் உயிரிழப்புகள் அதிகரிக்கும்’’ என்று எச்சரித்தார்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

“இந்த நேரத்தில் கொரோனா தவிர்த்து பிற மருத்துவ அவசர சிகிச்சைகளை அரசு மருத்துவமனைகள் எவ்வாறு கையாள்கின்றன?” என்று அரசு மருத்துவர்கள் மற்றும் பட்டமேற்படிப்பு மருத்துவர்கள் சங்கத்தின் மாநிலச் செய லாளர் டாக்டர் அ.இராமலிங்கத்திடம் கேட்டோம். ‘‘அரசு மருத்துவமனைகள் எப்போதும் போல் இயங்கிக் கொண்டுதான் இருக்கின்றன. ஊரடங்கு காரணமாக போக்குவரத்து தடைப்பட்டுள்ளதால், சிகிச்சைக்கு வருவோர் எண்ணிக்கை வெகுவாகக் குறைந்துள்ளது. கொரோனா வைரஸ் சிகிச்சைக்கு முக்கியத்துவம் கொடுக்கும் வகையில், அரசு மருத்துவமனைகளில் திட்டமிடப்பட்ட அறுவைசிகிச்சைகளை 20 நாள்களுக்கு தள்ளி வைத்திருக்கிறோம். அவசர அறுவைசிகிச்சைகள் மட்டும் செய்யப்படுகின்றன. தற்போது நாங்கள் தள்ளிவைக்கும் அறுவை சிகிச்சைகள் அல்லது சிகிச்சைகள் 20 நாள்களுக்குப் பிறகு அவசர சிகிச்சையாக மாறக்கூடிய ஆபத்தும் இருக்கிறது. ஒருபுறம் கொரோனா நோயாளிகளின் எண்ணிக்கையும் அதிகரித்துவருகிறது. மறுபுறம் இதுபோன்ற அவசரங்களும் அதிகரித்தால், அவற்றை எப்படி அரசு மருத்துவர்கள் கையாள முடியும் எனத் தெரியவில்லை’’ என்றார்.

“கொரோனாவால் பிரிந்தாலும் மாரடைப்பால் பிரிந்தாலும் உயிர் ஒன்றுதான்!”

“கொரோனாவுக்கும் சிகிச்சையளிக்க வேண்டும். அதே நேரம் பிற மருத்துவ அவசரங்களையும் கையாள வேண்டும். இரண்டையும் எப்படி சமநிலைப்படுத்துவது?” என்று மக்கள் நலவாழ்வு இயக்கத்தின் தலைவர் டாக்டர் ரெக்ஸ் சற்குணத்திடம் கேட்டோம். ‘‘அரசு மருத்துவமனைகள் தற்போது கொரோனா நோயாளிகளுக்கு சிகிச்சையளிப்பதில் கவனம் செலுத்திவருகின்றன. இந்த நிலையில், ஒவ்வொரு பகுதியிலும் செயல்படும் நிலையிலுள்ள தனியார் மருத்துவமனைகள் குறித்த விவரங்களை அரசு சேகரிக்க வேண்டும். அந்த விவரங் களை, மக்களுக்கு தொடர்ந்து தெரிவிக்க வேண்டும். இதன்மூலம் அவசர நேரத்தில் நோயாளிகளை ஒவ்வொரு மருத்துவமனை யாகக் கொண்டுசெல்வதைத் தவிர்க்க முடியும். தனியார் மருத்துவக் கல்லூரி மருத்துவமனைகள், கார்ப்பரேட் மருத்துவமனைகளும் இந்த நேரத்தில் அறத்துடன் செயல்பட்டு, குறைந்த செலவில் நோயாளிகளுக்கு சிகிச்சை அளிக்க வேண்டும்’’ என்றார்.

இதுதொடர்பாக பொது சுகாதாரத் துறை இயக்குநர் டாக்டர் குழந்தைசாமி யிடம் பேசியபோது, ‘‘தனியார் மருத்துவ மனைகள் சரியாக இயங்குவதில்லை என்ற புகார்கள் எங்களுக்கும் வந்து கொண்டிருக்கின்றன. நோயாளிகள் வரவு குறைவாக இருக்கிறது என்ற காரணத் தாலும், கொரோனா பரவிவிடுமோ என்ற அச்சத்தாலும் பல தனியார் மருத்துவமனை கள் செயல்படுவதற்குத் தயங்குகின்றன. தனியார் மருத்துவமனைகளை முழுவீச்சில் செயல்பட வைப்பதற்கு இந்திய மருத்துவச் சங்கத்தின் நிர்வாகி களிடம் பேச்சுவார்த்தை நடத்தப் பட்டுள்ளது. இந்த நேரத்தில் பொறுப்பை உணர்ந்து தனியார் மருத்துவமனைகளும் களத்தில் இறங்கி சேவையளிக்க வேண்டும்’’ என்றார்.

கொரோனா பாதிப்பைத் தடுக்கவும், நோயாளிகளுக்கு சிகிச்சையளிக்கவும் மருத்துவர்கள் தன்னலமற்றுப் பணியாற்றுவது பாராட்டுக்குரியது. இதற்கான அரசின் நடவடிக்கைகளையும் மனதார பாராட்டுகிறோம். அதே நேரத்தில் தராசின் இரண்டு தட்டுகளையும் சமநிலையில் நிறுத்துவதற்கும் அரசு முயலவேண்டும். காரணம், ஓர் உயிர் கொரோனாவால் பிரிந்தாலும், மாரடைப்பால் பிரிந்தாலும் இரண்டும் ஒன்றுதான்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு