Published:Updated:

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!

பாலிசிஸ்டிக் ஓவரி சிண்ட்ரோம்
பிரீமியம் ஸ்டோரி
பாலிசிஸ்டிக் ஓவரி சிண்ட்ரோம்

பருமன், முகத்தில் ரோம வளர்ச்சி, முறைதவறும் பீரியட்ஸ், கருத்தரிப்பதில் சிக்கல்...

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!

பருமன், முகத்தில் ரோம வளர்ச்சி, முறைதவறும் பீரியட்ஸ், கருத்தரிப்பதில் சிக்கல்...

Published:Updated:
பாலிசிஸ்டிக் ஓவரி சிண்ட்ரோம்
பிரீமியம் ஸ்டோரி
பாலிசிஸ்டிக் ஓவரி சிண்ட்ரோம்

சினைப்பை நீர்க்கட்டி எனப்படுகிற பிசிஓஎஸ் (PCOS) பெண்களைப் பாடாய்ப்படுத்திக்கொண்டிருக்கும் பிரச்னைகளில் ஒன்று. பீரியட்ஸ் ஒரு மாதம் தள்ளிப் போனால்கூட ‘இது அதுவா இருக்குமோ’ என்ற பிசிஓஎஸ் குறித்த பயமும் கவலையும் வந்து கவ்விக்கொள்ளும். முடி உதிர்வு, இர்ரெகுலர் பீரியட்ஸில் தொடங்கி, `பொண்ணு ரொம்ப குண்டா இருக்காங்களே... ஒருவேளை பிசிஓஎஸ் பிரச்னையா இருக்குமோ...' என்று பெண் பார்க்கும் படலத்தில் விமர்சிப்பது முதல் குழந்தையின்மை பிரச்னைக்கு பலிகடா ஆக்குவதுவரை பிசிஓஎஸ் பிரச்னையால் பெண்களுக்கு மனதாலும், உடலாலும் ஏற்படும் பாதிப்புகள் ஏராளம்.

மனுலட்சுமி
மனுலட்சுமி

‘பிசிஓஎஸ் என்பது ஹார்மோன் பாதிப்பு. இதற்கு தொடர்ந்து சிகிச்சை எடுத்துக்கொள்ளும்பட்சத்தில் இதனால் ஏற்படும் பிரச்னைகளிலிருந்து எளிதில் விடுபட முடியும்’ என்ற விழிப்புணர்வு பெண்களுக்கு இருக்கும் அதே நேரத்தில், இதுகுறித்த பல கேள்விகளும் இருக்கத்தான் செய்கின்றன. பிசிஓஎஸ், அதன் அறிகுறிகள், பாதிப்புகள், பரிசோதனைகள், தீர்வுகள் குறித்துத் தெளிவாகவும், விரிவாகவும் எடுத்துரைக்கிறார் மகப்பேறு மருத்துவர் மனுலட்சுமி.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!
Menshalena

பிசிஓஎஸ்...

இது ஒருவகையான ஹார்மோன் தொந்தரவு. பிறவிக்குறைபாடாகப் பெண்களை பாதிக்கிற பிரச்னை இது. சினைப்பைகளின் செயல்திறனில் பிரச்னை ஏற்படுவதைத்தான் ‘பாலிசிஸ்டிக் ஓவரீஸ்’ என்கிறோம். அதாவது சினைப்பைகளை இயங்கச் செய்கிற ஹார்மோன்கள் சரியாக வேலை செய்யாதது தான் காரணம். சினைப்பையில் பெரிய கட்டிகள் ஏதுமிருக்காது. ஆனால் குட்டிக்குட்டி கொப்புளங்கள் போன்று இருக்கும். இந்தக் கொப்புளங்களைக் கண்டு பயப்படத் தேவையில்லை. ஆனால் இவர்களுக்கு ஹார்மோன் கோளாறுகள் இருக்கும் என்பதால் அதில் கவனம் அவசியம்.

காரணங்கள் என்னென்ன?

பிசிஓஎஸ் ஏற்படுவதற்கு உறுதிசெய்யப்பட்ட காரணம் எதுவும் இல்லை. ஆனால், ஆரோக்கியமற்ற வாழ்க்கைமுறையைப் பின்பற்றுவதாலும், சுற்றுச் சூழல் மூலம் வெளிப்படும் மாசு கலந்த காற்றை சுவாசிப்பதாலும், மரபணு காரணமாகவும் இந்தப் பிரச்னை அதிகரிக்கிறது என்கின்றன ஆய்வுகள். இவற்றில் மரபணு மற்றும் சுற்றுச்சுழல் காரணங் களைத் தடுக்க முடியாது. ஆனால், வாழ்க்கைமுறையில் மாற்றங்களை ஏற்படுத்திக்கொள்வது பலன் தரும்.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!

பிசிஓஎஸ் (PCOS), பிசிஓடி (PCOD) இரண்டும் ஒரே பிரச்னையா..?

‘பாலிசிஸ்டிக் ஓவரி சிண்ட்ரோம் (PolyCystic Ovary Syndrome)’ என்பதைத்தான் பிசிஓஎஸ் (PCOS) என்கிறோம்.பிசிஓடி (Polycystic Ovarian Disease) என்பது `பாலிசிஸ்டிக் ஓவேரியன் டிசீஸ்'. சமீபகாலமாக பிசிஓஎஸ் என்ற வார்த்தை தான் பெரும்பாலும் பயன்படுத்தப்பட்டு வருகிறது. பிசிஓஎஸ் (PCOS), பிசிஓடி(PCOD) இரண்டும் ஒரே பிரச்னைதான். பெண்களுக்கு ஏற்படும் இந்த ‘பாலிசிஸ்டிக் ஓவரீஸ்' பிரச்னையை ஒவ்வொரு நாட்டிலும்ஒவ்வொரு பெயரில் குறிப்பிட்டார்கள். இதன் காரணமாக மருத்துவத்துறையில் பெயர்க் குழப்பம் ஏற்பட்டது. இந்தக் குழப்பத்தைத் தவிர்க்க 2018-ம் ஆண்டு இதுகுறித்து சர்வதேச வழிகாட்டு நெறிமுறை ஒன்றை வெளியிட்டார்கள். அதில் ‘பாலிசிஸ்டிக் ஓவரீஸ்’ பிரச்னையைக் குறிக்க ‘பிசிஓஎஸ் (PCOS)’ என்ற வார்த்தை பரிந்துரைக்கப் பட்டிருந்தது. அதனால் தற்போது மருத்துவத்துறையில் ‘பாலிசிஸ்டிக் ஓவரி சிண்ட்ரோம்’ அல்லது ‘பிசிஓஎஸ்’ என்ற பெயரே எல்லா நாடுகளிலும் பயன்படுத்தப்பட்டு வருகிறது.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!

அறிகுறிகள்

18,19 வயதிலிருக்கும் இளம் பெண்களில் தொடங்கி 40, 50 வயதுவரை உள்ள பெண்களுக்கு பிசிஓஎஸ் ஏற்படும். பிசிஓஎஸ் உள்ள பெண்களுக்கு ஹார்மோன் கோளாறால் ஒருசில அறிகுறிகள் வரும். முறையற்ற மாதவிலக்கு சுழற்சி (40, 50 நாள்களுக்கொரு முறை வரும் அல்லது ஹார்மோன் மாத்திரைகள் எடுத்துக்கொண்டால்தான் மாதவிலக்கு வரும்), முகத்தில் அதிகளவில் பருக்கள் உருவாகும், முடி உதிர்வு பிரச்னை ஏற்படும், எடை அதிகரிக்கும், குழந்தையின்மை பிரச்னை உருவாகும். இந்த எல்லா அறிகுறிகளையும் சேர்த்தே ‘பாலிசிஸ்டிக் ஓவரி சிண்ட்ரோம்’ என்கிறோம். தவிர, பெண் உடலில் ஈஸ்ட்ரோஜென், புரொஜெஸ்ட்ரோன் என்ற பெண் ஹார்மோன்களும், டெஸ்டோஸ்டீரான் என்ற ஆண் ஹார்மோனும் இருக்கும். இவற்றின் சமநிலையில் பிரச்னை வருவதை ‘ஹார்மோனல் இம்பேலன்ஸ் (Hormonal Imbalance)' என்கிறோம். சிலருக்கு ஆண் ஹார்மோன் அதிகமிருக்கும். முகத்தில் ரோம வளர்ச்சிபோல அதற்கேற்ற அறிகுறிகளை உணர்வார்கள்.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!
SolStock

கர்ப்பப்பையை பாதிக்குமா?

பிசிஓஎஸ் என்பது சினைப்பை சார்ந்த பிரச்னை. பிசிஓஎஸ் உள்ளவர்களுக்கு கர்ப்பப்பை நார்மலாகவே இருக்கும். கர்ப்பப்பைக்கு வலது, இடது என இரண்டு பக்கங்களிலும் சினைப்பைகள் இருக்கும். இந்த சினைப்பைகளில் உருவாகும் கருமுட்டைதான் விந்தணுக்களுடன் இணைந்து கருவாக மாறுகிறது. உடலில் ஏற்படும் ஹார்மோன் பிரச்னையின் காரணமாக சினைப்பையில் உருவாகும் முட்டைகள் சரியாக வளர்ச்சியடையாமல் குட்டிக்குட்டி கொப்புளங்கள்போல சினைப்பையின் சுவர்களில் ஒட்டிக்கொண்டிருக்கும்.

பிசிஓஎஸ் பிரச்னை உள்ளவர்களின் சினைப்பையை ஸ்கேன் எடுத்துப்பார்க்கும்போது, சரியாக வளர்ச்சியடையாத கருமுட்டைகள் சினைப்பையின் சுவரில் சின்ன சின்ன கொப்புளங்கள்போல் ஒட்டிக்கொண்டிருப்பது தெரியும். இதையே பிசிஓஎஸ் என்கிறோம். பிசிஓஎஸ் உள்ளவர்களுக்குக் கர்ப்பப்பை ஆரோக்கியமாகத்தான் இருக்கும். அதில் கட்டி, வீக்கம் போன்ற பிரச்னைகள் எதுவும் ஏற்படாது. ஆனால், அதன் செயல்திறன் பாதிக்கப்பட்டிருக்கும். இதன் காரணமாகத்தான் மாதவிடாய் பிரச்னை, இனப்பெருக்க கோளாறுகள் ஏற்படுகின்றன.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!
Mohammed Haneefa Nizamudeen

எந்த வயதுப் பெண்களுக்கு ஏற்படும்?

14 வயது முதல் 40 வயது வரை உள்ள பெண்களுக்கு பிசிஓஎஸ் பிரச்னை ஏற்படலாம். ஒரு பெண்ணின் உணவுமுறை மற்றும் அவரின் வாழ்க்கைமுறையும் அவருக்கு பிசிஓஎஸ் பாதிப்பை ஏற்படுத்தலாம். நீரிழிவு இருக்கும் பெற்றோர்களின் பெண் குழந்தைக்கு பிசிஓஎஸ் வருவதற்கான வாய்ப்புகள் அதிகம். தவிர, பருவமடைந்த பெண்களில் தொடங்கி மெனோபாஸ் நிலையில் உள்ள பெண்கள்வரை யார் வேண்டுமானாலும் பிசிஓஎஸ் பிரச்னையால் பாதிக்கப்படலாம்.

தாயிடமிருந்து பெண் குழந்தைக்கு வருமா?

பிசிஓஎஸ் பிரச்னையால் பாதிக்கப்பட்ட பெண்களின் பெண் குழந்தைகளும் இதே பிரச்னையால் பாதிக்கப்பட 50 சதவிகித வாய்ப்புகள் உள்ளதென மருத்துவ ஆய்வுகள் கூறுகின்றன. இது தவிர ஒரு குழந்தையின் பெற்றோர்கள் மற்றும் முன்னோர்களுக்கு நீரிழிவு இருக்கும்பட்சத்தில் அக்குடும்பத்தில் உள்ள பெண் குழந்தைகளுக்கு பிசிஓஎஸ் ஏற்படலாம். நீரிழிவுக்கும், பிசிஓஎஸ் பிரச்னைக்கும் இடையே உள்ள தொடர்பு ‘இன்சுலின் ஹார்மோன்’. உடலில் இன்சுலின் சுரப்பு பாதிக்கப்படுவதால் நீரிழிவு ஏற்படுகிறது. இதே இன்சுலின் ஹார்மோனின் சுரப்பு பிசிஓஎஸ் பிரச்னைக்கும் ஒரு காரணம் என்பதால் நீரிழிவு உள்ள குடும்பத்தில் உள்ள பெண்களுக்கு பிசிஓஎஸ் ஏற்படுகிறது. பெண்ணின் உடலில் இன்சுலின் அளவு சரியாக இல்லாத காரணத்தால் சினைப்பையின் செயல்திறன் பாதிக்கப்படுகிறது.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!

எடைக்குறைப்பு ஏன் அவசியம்?

உடல் எடையைக் குறைப்பதால் பிசிஓஎஸ் பிரச்னையை முழுவதுமாக குணப்படுத்த முடியாது. ஆனால், இதன் அறிகுறிகளில் பலவற்றைக் குணப்படுத்த வாய்ப்புள்ளது. பிசிஓஎஸ் பாதிப்புள்ள, உடல் எடை அதிகமுள்ள ஒரு பெண், தன் எடையைக் குறைக்கும்போது முறையற்ற மாதவிலக்கு சுழற்சி சீராகும். குழந்தையின்மை பிரச்னை சரியாகி அந்தப் பெண் கருவுறலாம். ஒருவர் 5 முதல் 10 சதவிகிதம் எடையைக் குறைத்தாலே பிசிஓஎஸ் பிரச்னைக்கான அறிகுறிகளில் பெரும்பாலானவை குறைந்துவிடும்.

பீரியட்ஸ் சுழற்சி மாறினால் `பிசிஓஎஸ்'தானா?

இர்ரெகுலர் பீரியட்ஸுக்கு நிறைய காரணங்கள் உள்ளன. பிசிஓஎஸ் என்பது அதில் ஒரு காரணம்தான். அதனால் இர்ரெகுலர் பீரியட்ஸுக்கு பிசிஓஎஸ் மட்டும் காரணமாகாது. தைராய்டு, புரோலாக்டின் போன்ற வேறு ஏதேனும் ஹார்மோன்களின் குறைபாடு இருந்தாலும் முறையற்ற மாதவிலக்கு சுழற்சி ஏற்படும். அளவுக்கதிகமாக உடற்பயிற்சி செய்யும் பெண்களுக்கும், தடகள வீராங்கனைகளுக்கும் இர்ரெகுலர் பீரியட்ஸ் ஏற்படுவதற்கான வாய்ப்புகள் அதிகம். பாலூட்டும் பெண்களுக்கும் இர்ரெகுலர் பீரியட்ஸ் ஏற்படலாம். அதனால் இர்ரெகுலர் பீரியட்ஸ் ஏற்பட்டால் அது பிசிஓஎஸ் பிரச்னையாகத்தான் இருக்கும் என்று நீங்களாகவே முடிவெடுக்காமல், எதனால் இந்தப் பிரச்னை ஏற்பட்டுள்ளது என்று கண்டறிய மருத்துவப் பரிசோதனை செய்து கொள்வது நல்லது.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!

கருத்தரித்தலில் பிரச்னை...

பிசிஓஎஸ் என்பது மரபியல் சார்ந்த பிரச்னை, பிறக்கும்போதே ஏற்படக்கூடிய பிரச்னை என்று கூறிக்கொண்டிருக்கிறோம். இதில் கருத்தரித்தலில் ஏற்படும் பிரச்னை என்பது பிசிஓஎஸ்ஸால் ஏற்படும் பல பாதிப்புகளில் ஒன்று. சினைப்பையில் உருவாகும் கருமுட்டைகள் சரியாக வளர்ச்சியடைந்து வெளியேறாமல் இருப்பதால் குழந்தையின்மை பிரச்னை ஏற்படுகிறது.

பிசிஓஎஸ் இருப்பவர்களுக்கு மாதவிடாய் மற்றும் குழந்தையின்மை பிரச்னை ஏற்படுவதால் அவர்களால் கடைசிவரை கருத்தரிக்கவே முடியாது என்றில்லை. பாதிக்கப்பட்ட பெண்கள் தொடர்ந்து எடுத்துக்கொள்ளும் சிகிச்சை மற்றும் அவர்களின் வாழ்க்கைமுறையைப் பொறுத்து குழந்தையின்மை பிரச்னையை சரிசெய்ய முடியும். குழந்தை யின்மைக்கான பிரத்யேக சிகிச்சையிலும் எடைக்குறைப்புதான் பிரதானமாக இருக்கும். பிறகு கருமுட்டை உருவாக மாத்திரைகள் தரப்படும். அவை உதவாதபட்சத்தில் ஊசிகள் போடவேண்டியிருக்கும். அதிலும் முட்டை வளர்ச்சி இல்லாவிட்டால் லேப்ராஸ்கோப்பி செய்ய வேண்டும். கடைசி தீர்வாக ஐ.வி.எஃப் சிகிச்சை பரிந்துரைக்கப்படும்.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!

பிசிஓஎஸ் இருந்தால் செயற்கை கருத்தரிப்புதான் தீர்வா?

குழந்தையின்மை பிரச்னைக்குப் பல்வேறு காரணங்கள் இருக்கலாம். பெண்ணின் வயது, எத்தனை ஆண்டுகளாகக் குழந்தைக்கு முயற்சி செய்கிறார்கள், கர்ப்பப்பையில் ஏதாவது பாதிப்பு இருக்கிறதா, அவரின் கணவருக்கு ஏதாவது பிரச்னை உள்ளதா என்பன உள்ளிட்ட பல்வேறு விஷயங்களின் அடிப்படையில் அவருக்கு என்ன வகையான சிகிச்சை தேவைப்படும் என்பதைத் தீர்மானிக்க முடியும்.

பிசிஓஎஸ் தவிர வேறு எந்தப் பிரச்னையும் இல்லை, இளவயதில் இருக்கிறார்கள் என்றால் வாழ்க்கைமுறை மாற்றங்கள்தான் முதலில் பரிந்துரைக்கப்படும். ஆரோக்கியமான உணவுப்பழக்கம், எடைக்குறைப்பு செய்து இயற்கையாகவே கருத்தரிக்க முடிகிறதா என்றுதான் முதலில் பார்ப்போம். வாழ்க்கைமுறை மாற்றம் செய்வதன் மூலம் கருத்தரிக்க முடியவில்லை என்றால் மாத்திரைகள், ஊசிகள் போன்ற எளிய சிகிச்சை முறைகளை முயற்சி செய்துவிட்டு, ஒன்றும் பலனளிக்காத பட்சத்தில்தான் செயற்கை கருத்தரிப்பு சிகிச்சை செய்யப்படும். பெண்ணுக்கு வயது 35-க்கும் மேல் ஆகிறது, தானாகவே கருத்தரிக்க முடியாத அளவு பிரச்னை இருக்கிறது என்றால் மட்டும் செயற்கை கருத்தரிப்பு சிகிச்சை பரிந்துரைக்கப் படும்.

தைராய்டு பிரச்னையும் சேர்ந்து பாதிக்குமா?

`தைராய்டு' என்பதும் ஒரு ஹார்மோன் குறைபாடுதான். கழுத்துப் பகுதியில் வண்ணத்துப்பூச்சி போன்ற தோற்றத்தில் காணப்படும் சுரப்பிதான் தைராய்டு. அதிலிருந்து சுரக்கும் ஹார்மோன் தலை முதல் கால்வரையிலான உடலின் இயக்கத்துக்கு உதவும். பிசிஓஎஸ்ஸும் ஒரு ஹார்மோன் குறைபாடுதான். ஒருவருக்கு ஒரு ஹார்மோன் குறைபாடு காணப்பட்டால் வேறு ஹார்மோன்கள் குறைபாடும் இருக்க வாய்ப்புள்ளது. எனவே, பிசிஓஎஸ் இருப்பது கண்டறியப்பட்டால் உடலிலுள்ள பிற ஹார்மோன்களையும் பரிசோதனை செய்வார்கள். பிசிஓஎஸ் இருக்கும் பலருக்கு தைராய்டு பிரச்னையும் காணப்படும். பிசிஓஎஸ் பிரச்னைக்கு சிகிச்சையளிக்கும்போது தைராய்டு பிரச்னைக்கும் மாத்திரைகள் பரிந்துரைப்பார்கள். ஆனால், இந்த இரண்டு பிரச்னைகளும் ஒன்றுடன் ஒன்று தொடர்புடையவை என்றோ... ஒன்று வந்தால் மற்றொன்று வரும் என்றோ கூற முடியாது.

சாக்லேட்டும் பிசிஓஎஸ்ஸும்!

உடல் எடை அதிகரித்தால் ஒருவருக்கு பிசிஓஎஸ் அறிகுறிகளும் அதிகரிக்கும். சாக்லேட் மற்றும் இனிப்புகள் சாப்பிடும்போது உடலில் இன்சுலின் அளவு அதிகரிக்கும். இன்சுலின் அளவு அதிகரிக்கும்போதுதான் பிசிஓஎஸ் அறிகுறிகள் அதிகரிக்கும். இந்தப் பிரச்னையைச் சரிசெய்வதற்கு எடைக்குறைப்பு, வாழ்க்கைமுறை மாற்றம், உணவுக் கட்டுப்பாடுகளைப் பரிந்துரைக்கும்போது, உணவுக்கட்டுப்பாடு அவசியமாகிறது. சாக்லேட் சாப்பிட வேண்டுமென்று எப்போதாவது தோன்றினால் சாப்பிடலாம். அடிக்கடி இனிப்புகள் சாப்பிட்டால் உடல் எடை அதிகரிக்கும். ஒட்டு மொத்தமாக உடல் எடையைப் பராமரித்து, பி.எம்.ஐ 23-க்குள் தக்க வைப்பவர்கள் எப்போதாவது சாக்லேட் சாப்பிடுவதால் எந்தப் பிரச்னையும் ஏற்படாது.

மருத்துவ சிகிச்சை இல்லாமல் பிசிஓஎஸ் பிரச்னையைச் சரிசெய்ய முடியுமா?

சிகிச்சைக்கு வருபவர்களுக்கான பிரச்னைகளைப் பொறுத்துதான் சிகிச்சை முறை தீர்மானிக்கப்படும். பிசிஓஎஸ் இருந்து சீரற்ற மாதவிடாய் சுழற்சி மட்டுமே அறிகுறியாக இருந்தால் வாழ்க்கைமுறை மாற்றத்தை முன்னெடுப்பதன் மூலம் அதைச் சரிசெய்துவிட முடியும். எடைக்குறைப்பு, மன அழுத்தத்தைக் குறைப்பது, ஆரோக்கியமான உணவு, சரியான தூக்கம் ஆகிய மாற்றங்களைத்தான் முதல்கட்ட சிகிச்சையாக மருத்துவர்கள் பரிந்துரைப்பார்கள். ஒருவேளை சிகிச்சைக்கு வருபவர்களுக்குக் குழந்தையின்மை பிரச்னை இருந்தால் அதற்கு சிகிச்சையளிப்பார்கள். நோயாளிக்கு நீரிழிவு இருந்தால் அதற்கான சிகிச்சையளிப்பார்கள்.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!
dragana991

சிகிச்சைக்கு அதிக செலவு பிடிக்குமா?

பிசிஓஎஸ் பிரச்னையைப் பொறுத்தவரை எல்லோருக்கும் மருத்துவ சிகிச்சை தேவை என்று சொல்ல முடியாது. வாழ்க்கைமுறை மாற்றத்தினால் மட்டுமே அதைக் கட்டுக்குள் வைக்க முடிந்தால் செலவே ஏற்படப் போவதில்லை. வாழ்க்கைமுறை மாற்றம் என்ற முதல் அடியைச் சரியான நேரத்தில் எடுத்துவைக்கவில்லை என்றால்தான் பிரச்னை தீவிரமாகி சிகிச்சை தேவைப்படும். சரியான வாழ்க்கைமுறையைப் பின்பற்றுகிறோம் என்றால் ஹார்மோன் உற்பத்தியைச் சீராக்குவதற்கான ஹார்மோன் மாத்திரைகளை மட்டும் எடுத்தால் போதுமானது. பிசிஓஎஸ் அறிகுறிகளுக்கு மாத்திரைகள் எடுத்துக்கொள்வது அதிக செலவு பிடிக்காது. மாத்திரைகளே தேவையில்லாமல்கூட போகலாம். ஆனால், பிசிஓஎஸ்ஸின் பிற பிரச்னைகளில் ஒன்றான குழந்தையின்மை ஒருவருக்கு இருக்கிறது என்று வைத்துக்கொள்வோம். ஆரம்பகட்ட சிகிச்சைகள் பலனளிக்கவில்லை யென்றால், செயற்கை கருத்தரிப்பு செய்ய வேண்டியிருந்தால், அதற்கான சிகிச்சை கட்டாயம் செலவு மிகுந்ததாகத்தான் இருக்கும்.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!

மன அழுத்தத்துக்கு ‘நோ’ சொல்லுங்கள்!

மன அழுத்தம் அதிகமானால் பிசிஓஎஸ் அறிகுறிகளும் அதிகரிக்கும். பிசிஓஎஸ் காரணமாக இளவயது பெண்களுக்கு முகத்தில் பரு, உடலில் முடி வளர்ச்சி, கருமை படிவது, முடி உதிர்வு போன்றவை ஏற்படும்போது மன அழுத்தம் ஏற்படும். பிசிஓஎஸ் பிரச்னை இருப்பவர்களுக்கு மன அழுத்தமும் இருப்பதற்கான வாய்ப்புகள் அதிகம். பிசிஓஎஸ்ஸால் ஏற்படும் மன அழுத்தம், மனப்பதற்றம் ஆகிய பிரச்னைகளுக்கு ஆரம்பத்திலேயே நாமே தீர்வு காண முடியும்.

உடல்நலத்தில் ஏற்படும் பிரச்னைகளுக்கு மருத்துவ சிகிச்சை எடுக்கும்போது அந்தப் பிரச்னைகள் குறையும். உதாரணத்துக்கு முகத்தில் முடி வளர்ச்சி அதிகமாக இருப்பதால் மன அழுத்தம் ஏற்பட்டால், அதற்கான சிகிச்சை எடுக்கும்போது முடி வளர்ச்சி குறையும். இதனால் மன அழுத்தத்திலிருந்தும் விடுபடுவார்கள். ஆனால் அன்றாட வாழ்க்கையை பாதிக்கும் அளவுக்கோ, அலுவலகத்துக்குச் செல்ல முடியாத அளவுக்கோ மன அழுத்தம் தீவிரமானால் மருத்துவர் அல்லது மனநல மருத்துவரை அணுக வேண்டும். இன்சுலின் அளவு அதிகமாக இருப்பதால் பிசிஓஎஸ் இருப்பவர்கள் கடின உடற்பயிற்சி, உணவுக்கட்டுப்பாடு போன்றவற்றைக் கடைப்பிடித்தாலும் எடை குறைய மிகவும் சிரமப்படுவார்கள். அதே சமயம் பிசிஓஎஸ் பிரச்னை இல்லாமல், பருமனாக இருப்பவர்கள் எளிதில் எடை குறைவார்கள். ‘நாம் இத்தனை சிரமப்பட்டும் எடை குறையவில்லை. ஆனால். அவர் எளிதாகக் குறைத்துவிட்டாரே’ என்று நினைத்து மன அழுத்தம் ஏற்படும். ஆனால், துவண்டுவிடாமல் முயற்சி செய்தால்தான் நல்ல ரிசல்ட் கிடைக்கும். இதுபோன்ற நேரத்தில் மருத்துவர்கள், குடும்பத்தினர் அவர்களுக்கு உத்வேகம் அளிக்க வேண்டும். மனம் துவளாமல் பார்த்துக்கொள்ள வேண்டும்.

130 கிலோ எடையில், சீரற்ற மாதவிடாய் பிரச்னைக்காக ஓர் இளம்பெண் என்னிடம் சிகிச்சைக்காக வந்தார். பூப்படைந்ததிலிருந்தே மாத்திரை போட்டால்தான் அவருக்கு மாதவிடாய் வரும். இல்லையென்றால் 4, 5 மாதங்களானாலும் மாதவிடாய் ஏற்படாது. இந்தப் பிரச்னையோடு என்னை அணுகியபோது எடையைக் குறைப்பதற்குப் பரிந்துரை செய்யப்பட்டது. ஐந்தாறு மாதங்கள் ஜிம்முக்குப் போன பிறகும் எடை குறையவேயில்லை. ஆனால் மருத்துவர்களும், குடும்பத்தினரும் தொடர்ந்து ஊக்கமளித்துக்கொண்டே இருந்தோம். மனதைத் தளரவிடாமல், ஊக்கமளிக்கும் வார்த்தைகளைப் பேசி மன அழுத்தத்துக்கு ஆளாகாமல் பார்த்துக்கொண்டோம். விளைவு, 50 கிலோ எடையைக் குறைத்தார்.

50 கிலோ எடையைக் குறைப்பதென்பது அவ்வளவு சாதாரண விஷயம் கிடையாது. எடை குறைந்ததும் மாதவிடாய் சீரானது, கருவும் தரித்தார்.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!
triloks

வொர்க் ஃப்ரம் ஹோம் ஆபத்து!

`வொர்க் ஃப்ரம் ஹோம்' என்பது சிலருக்கு வசதியாக இருக்கிறதே தவிர, பலருக்கு சிரமமாகத் தான் உள்ளது. அலுவலக மீட்டிங், வேலைகள், வீட்டு வேலைகள் என அனைத்தையும் ஒரே இடத்தில் ஒன்றாகப் பார்க்க வேண்டும் என்ற நிலை மன அழுத்தத்தை அதிகரித்துவிடுகிறது.

வீட்டிலேயே இருந்து வேலை செய்வதால் உடல் இயக்கம் குறைகிறது. வேலைக்குச் செல்லும் போது சாலைவரை நடப்பது, அலுவலகத்தில் அங்குமிங்கும் நடப்பது, மாடிப்படிகள் ஏறி இறங்குவது போன்ற சின்ன சின்ன உடல் இயக்கம் கூடத் தடைப்பட்டுவிடுகிறது. பெரும்பாலும் ‘ஜீரோ ஆக்டிவிட்டி’ லெவலுக்கு வந்துவிடுகின்றனர். இதனால் பிசிஓஎஸ், எடை அதிகரிப்பு, சீரற்ற மாதவிடாய் சுழற்சி எனப் பல்வேறு பிரச்னைகளால் பாதிக்கப்படுகின்றனர்.

வீட்டிலேயே இருந்து வேலை செய்தாலும் தங்களுக்கென்று ஒருநேர அட்டவணையைப் பின்பற்ற வேண்டும். குறித்த நேரத்தில் சாப்பிடுவது, உடற்பயிற்சி செய்வது, நொறுக்குத் தீனிகளைத் தவிர்ப்பது, மனதை இலகுவாக வைத்துக்கொள்வது போன்ற விஷயங்களைப் பின்பற்றினால் உடல், மனம் இரண்டும் ஆரோக்கியமாக இருக்கும்.

மெனோபாஸில் குறையும் பிரச்னை!

மெனோபாஸை நெருங்கும்போது பிசிஓஎஸ் பிரச்னையின் அறிகுறிகள் குறையத் தொடங்கும். மெனோபாஸை நெருங்கும்போது சிலருக்கு அதீத ரத்தப்போக்கு இருக்கும். அவர்களுக்கு டி அண்டு சி செய்து புற்றுநோய் அபாயம் ஏதுமிருக்கிறதா என்பதையும் உறுதிப்படுத்திக் கொள்ள வேண்டும்.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!

பிசிஓஎஸ்ஸும் முக்கிய பரிசோதனைகளும்...

ரத்தப் பரிசோதனை: இதன் மூலம் ஹார்மோன் குறைபாடுகள் கண்டறியப்படும். முக்கியமாக, டெஸ்டோஸ்டீரான், தைராய்டு, அட்ரீனல் சுரப்புகளின் அளவுகள் பரிசோதிக்கப்படும்.

அல்ட்ரா சவுண்டு: கர்ப்பப்பையில் செய்யப்படும் இந்த ஸ்கேன், சினைப்பையில் நீர்க்கட்டிகள் இருக்கின்றனவா என்று பரிசோதிக்க உதவும். ஒருவேளை கட்டிகள் இருந்தால், மேற்கொண்டு சி.டி மற்றும் எம்.ஆர்.ஐ ஸ்கேன்கள் செய்யப் பரிந்துரைக்கப்படும்.

வாழ்வியல் பிரச்னைகளான நீரிழிவு, இதயப் பிரச்னைகள் ஏதேனும் இருக்கின்றனவா என்றும் பரிசோதிக்கப்படும். இது, ‘கிளினிகல் ஹிஸ்டரி’ (Clinical History) எனப்படும்.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!

துவள வேண்டாம்!

பிசிஓஎஸ் என்பது உயிருக்கு அச்சுறுத்தலை விளைவிக்கும் பிரச்னை கிடையாது. புதிய சூழலில், வாழ்க்கைமுறை மாறும்போது. மன அழுத்தம் அதிகரிக்கும்போது, எடை அதிகரிக்கும்போது பிசிஓஎஸ் பிரச்னை ஏற்படலாம். ஆரம்பத்திலேயே இந்தப் பிரச்னையைக் கண்டறிந்து, வாழ்க்கைமுறை மாற்றத்தாலோ, எளிய சிகிச்சையினாலோ கட்டுப்படுத்திவிட முடியும். அப்படியிருக்கும் பட்சத்தில் கருத்தரிப்பதற்கோ, நீண்ட கால ஆரோக்கியத் துக்கோ எந்தவிதப் பிரச்னையும் ஏற்படாது. பிசிஓஎஸ் பிரச்னை இருப்பவர்கள் ஆரோக்கியமான வாழ்க்கைமுறைக்கு மாறுவதற்கு ஒரு வாய்ப்பாகக் கருதி, பாசிட்டிவ் மனநிலையில் இதை அணுக முயற்சி செய்யுங்கள்.

உடற்பயிற்சிகள் உதவும்!

பிசிஓஎஸ் அறிகுறிகளைக் கட்டுக்குள் கொண்டுவருவதில் உடற்பயிற்சி மற்றும் உணவுக்கட்டுப்பாடு மிகப்பெரும் பங்காற்றுகின்றன.

உடல் எடையை 5 - 10 சதவிகிதம் குறைப்பதற்கான உடற்பயிற்சிகளை மேற்கொள்ள வேண்டும். கோவிட் சூழலில் வீட்டு மொட்டை மாடியிலேயே வேக நடை, ஸ்கிப்பிங் பயிற்சி, படிக்கட்டுகளில் ஏறி இறங்குவது போன்ற உடற்பயிற்சிகளைச் செய்யலாம். யூடியூப் அல்லது இணையத்தில் முறையான உடற்பயிற்சி டுட்டோரியல் வீடியோக்களைப் பார்த்தும் வீட்டிலேயே உடற்பயிற்சியில் ஈடுபடலாம். நம்முடைய உடல்நலனுக்காக ஒருநாளைக்கு குறைந்தது 30 நிமிடங்களை ஒதுக்க வேண்டும் என்ற மனநிலைக்கு வர வேண்டும். இரண்டு முதல் மூன்று மாதங்கள் தொடர்ந்து இதுபோன்று உடற்பயிற்சிகளில் ஈடுபடும்போதே உடலில் இன்சுலின் அளவு குறைந்து, பிசிஓஎஸ் அறிகுறிகள் குறைவதற்கான சாத்தியம் தெரியும். உடற்பயிற்சியை அன்றாட பழக்கமாக மாற்றும்போது வாழ்நாள் முழுவதும் இந்தப் பிரச்னையை கட்டுக்குள் வைக்க முடியும்.

தொடர்ந்து உடற்பயிற்சியில் ஈடுபட வேண்டும் என்பதுதான் இதில் முக்கியமான விஷயம். சிலர் சில நாள்கள் மட்டுமே உடற்பயிற்சியில் ஈடுபட்டுவிட்டு நமக்கு எடை குறையாது என்ற முடிவுக்கு வந்துவிடுவார்கள். உடற்பயிற்சியையும் நிறுத்திவிடுவார்கள். தொடர்ச்சியாக சில மாதங்கள் ஒருநாளைக்கு 30 நிமிடங்கள் உடற்பயிற்சியில் ஈடுபடும்போது பிசிஓஎஸ் அறிகுறிகள் நிச்சயம் குறையத் தொடங்கும்.

மாத்திரைகள் உண்டா?

‘ஏதாவது மாத்திரை கொடுத்து என்னோட பிசிஓஎஸ் பிரச்னையைக் குறைங்க டாக்டர்’ என்பது மருத்துவமனையில் நாங்கள் அதிகம் கேட்கும் வேண்டுகோள். பிசிஓஎஸ் என்பது ஹார்மோன் தொடர்பான பிரச்னை என்பதால் அது தொடர்பான பிரச்னைகளும் இருக்கும். குறிப்பிட்ட நோயாளிக்கு என்ன அறிகுறிகள் இருக்கின்றனவோ அதற் கேற்றாற்போல் மருத்துவர்கள் மாத்திரையைப் பரிந்துரைப்பார்கள்.

உதாரணமாக, அந்த நோயாளிக்கு இர்ரெகுலர் பீரியட்ஸ் இருந்தால் ஹார்மோன் மாத்திரைகள் கொடுத்து பிரச்னை சரி செய்யப்படும். ஹார்மோன் அதிகரிப்பு காரணமாக உடலில் பல்வேறு இடங்களில் அதிக முடி வளர்ச்சி இருந்தால் அதற்கு மாத்திரை கொடுத்து ஹார்மோன் அளவைக் கட்டுக்குள் வைத்து, முடி வளர்ச்சி குறைக்கப் படும்.

முகப்பருக்கள், முடி உதிர்வு, குழந்தை யின்மை போன்ற பிரச்னைகள் இருந்தால் அதற்கான சிகிச்சை, மாத்திரைகள் கொடுக்க வேண்டும். உணவுக் கட்டுப்பாடு, உடற் பயிற்சி ஆகியவற்றால் முயன்றும் உடல் எடை குறையாதவர்களுக்கு, எடையைக் குறைப்பதற்கான சிகிச்சை பரிந்துரைக்கப் படும். பிசிஓஎஸ் அறிகுறிகள் நபருக்கு நபர் வேறுபடும் என்பதால் சிகிச்சையும் மாத்திரைகளும்கூட நபருக்கு நபர் வேறுபடும். ஒரே மாத்திரையில் பிசிஓஎஸ் பிரச்னைக்குத் தீர்வு என்பது கிடையாது.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!
damircudic

பிசிஓஎஸ்ஸும் கோவிட்-19 தொற்றும்...

பெருந்தொற்றுக் காலத்தில் பிசிஓஎஸ் பிரச்னையுடைய எல்லோர் மனதிலும் முதன்மையாக இருக்கும் கேள்வி என்பது ‘நமக்கு எளிதில் கோவிட் தொற்று ஏற்படுமா அல்லது கோவிட் தொற்று ஏற்பட்டால் அதன் அறிகுறிகள் தீவிரமாக இருக்குமா’ என்பதுதான். பிசிஓஎஸ் பிரச்னை இருப்பவர்களில் பெரும்பாலானவர்கள் இளம் பெண்கள் என்பதால் அவர்களைத் தாக்குவதற்கான வாய்ப்பு குறைவுதான். ஆனால், அந்த நோயாளிகளில் 45-50 சதவிகிதம் பேர் பருமனுடன் இருக்கிறார்கள். நீரிழிவு, உயர் ரத்த அழுத்தம் போன்ற வாழ்வியல் நோய்கள் இருந்து, அவர்களுக்கு கோவிட் தொற்று ஏற்பட்டால் அவர்களுக்கு கோவிட் அறிகுறிகள் தீவிரமாவதற்கோ, தீவிர பாதிப்பு ஏற்படுவதற்கோ வாய்ப்புகள் அதிகம்.

கோவிட் தொற்று ஏற்படாமலோ, வந்தால் தீவிரமாகாமல் தடுப்பதற்கோ எடுக்க வேண்டிய முக்கியமான நடவடிக்கை என்னவென்றால்... உடல் எடையை நிர்வகித்தல், உடற்பயிற்சி, ஆரோக்கியமான உணவுமுறைக்கு மாறுவது ஆகியவைதான். எடை கட்டுக்குள் இருந்து, நீரிழிவு, உயர் ரத்த அழுத்தம் போன்ற வாழ்வியல் நோய்களைக் கட்டுப்பாட்டுக்குள் வைத்திருந்தால் கோவிட் தொற்று வந்தால்கூட அது தீவிரமாகாமல் தடுக்க முடியும். அனைத்துப் பிரச்னைகளுக்கும் ஆரோக்கியமான வாழ்க்கைமுறை என்பது அவசியமாகிறது.

துவள வேண்டாம்!

பிசிஓஎஸ் என்பது உயிருக்கு அச்சுறுத்தலை விளைவிக்கும் பிரச்னை கிடையாது. புதிய சூழலில், வாழ்க்கைமுறை மாறும்போது. மன அழுத்தம் அதிகரிக்கும்போது, எடை அதிகரிக்கும்போது பிசிஓஎஸ் பிரச்னை ஏற்படலாம். ஆரம்பத்திலேயே இந்தப் பிரச்னையைக் கண்டறிந்து, வாழ்க்கைமுறை மாற்றத்தாலோ, எளிய சிகிச்சையினாலோ கட்டுப்படுத்திவிட முடியும். அப்படியிருக்கும் பட்சத்தில் கருத்தரிப்பதற்கோ, நீண்ட கால ஆரோக்கியத்துக்கோ எந்தவிதப் பிரச்னையும் ஏற்படாது. பிசிஓஎஸ் பிரச்னை இருப்பவர்கள் ஆரோக்கியமான வாழ்க்கைமுறைக்கு மாறுவதற்கு ஒரு வாய்ப்பாகக் கருதி, பாசிட்டிவ் மனநிலையில் இதை அணுக முயற்சி செய்யுங்கள்.

விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer
பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!

5 நாள்கள்... 5 டிப்ஸ்

வாரத்தில் ஐந்து நாள்கள் தினமும் குறைந்தது அரை மணி நேரம் உடற்பயிற்சியில் ஈடுபட வேண்டும். எடை அதிகமாக இருப்பவர்கள்,

45 நிமிடங்கள் உடற்பயிற்சி செய்ய வேண்டும். சைக்கிளிங், நடைப்பயிற்சி, ஜாகிங் போன்ற எளிய பயிற்சிகளையும் செய்யலாம்.

யோகா அல்லது தியானப் பயிற்சிகள் மன அழுத்தத்தைக் குறைக்கும்.

நேரத்துக்குத் தூங்கி எழுவது, 8 மணி நேரத் தூக்கம் இரண்டும் அவசியம்.

கார்பனேட்டடு (Carbonated) குளிர்பானங்களைத் தொடவே கூடாது.

ரத்தத்தில் சர்க்கரை அளவு சீராக இருக்கும்படி உணவு முறையைப் பராமரிக்க வேண்டும்.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!

தவிர்ப்பது எப்படி?

இந்தப் பிரச்னையைத் தவிர்ப்பதற்கான முதன்மை யான வழி சரியான உடல் எடையைப் பராமரிப்பதே. பிசிஓஎஸ் இருக்கும் சிலர் உணவுக்கட்டுப்பாடு, உடற் பயிற்சிகள் மூலம் எடையைக் குறைத்துவிடுவதால் கர்ப்பம் தரித்துவிடுவார்கள். அதே நபர் மீண்டும் எடை அதிகரித்தால் மறுபடி மாத விடாய் சுழற்சி முறை தவறிப்போகும். எனவே, உடல் எடையை எந்த நேரத்திலும் கட்டுக்குள் வைத்திருக்க வேண்டும்.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!

டயட்டில் வேண்டும் கவனம்!

பிசிஓஎஸ் பிரச்னையுள்ளவர்கள் உணவு விஷயத்திலும் அதிக அக்கறை காட்ட வேண்டும். குறிப்பாக கலோரி மற்றும் சர்க்கரைச்சத்து குறைவான உணவுகள், நார்ச்சத்து மிகுந்த பழங்கள் மற்றும் காய்கறிகளை எடுத்துக்கொள்ள வேண்டும். ஒரு நாளைக்கு 25 முதல் 30 கிராம்வரை நார்ச்சத்துள்ள உணவை எடுத்துக்கொள்வது நல்லது. சாப்பாட்டுத் தட்டில், பாதிக்குப் பாதி காய்கறிகளால் நிறைந்திருக்க வேண்டும். ஒமேகா-3 அதிகமுள்ள ஆளி விதை, மீன், அவகேடோ பழம், எள், கம்பு, கேழ்வரகு, வரகு, சாமை ஆகிய சிறுதானியங்களை அதிகம் எடுத்துக்கொள்ளலாம்.

முட்டையின் வெள்ளைக்கரு, நட்ஸ், ஆன்டிஆக்ஸிடன்ட்ஸ் அதிகமுள்ள குடமிளகாய், பூசணிக்காய், அடர் நிறமுள்ள பப்பாளி, தர்பூசணி போன்ற பழங்கள், காய்கறிகள், கீரைகள் ஆகியவற்றையும் உணவில் அதிகம் சேர்த்துக் கொள்ள வேண்டும். கொழுப்பு அதிகமான தோல்பகுதியை நீக்கிவிட்டு நாட்டுக்கோழியைச் சாப்பிடலாம். நீரிழிவாளர்களுக்குப் பரிந்துரைக்கும் குளுகோஸ் அளவைக் கட்டுப்படுத்தும் கைக்குத்தல் அரிசி, நாட்டுச்சர்க்கரை, பனைவெல்லம் ஆகியவற்றை உணவில் சேர்க்கலாம்.

ஒட்டுமொத்தமாக கார்போஹைட்ரேட், சர்க்கரைச்சத்து குறைவான உணவுகளை அதிகம் எடுத்துக்கொள்ள வேண்டும். கார்போஹைட்ரேட் உணவுகளில் அரிசியைத்தான் நாம் அதிகம் எடுத்துக்கொள்வோம். இனிப்பையோ, கார்போஹைட்ரேட் சத்துள்ள உணவையோ முழுவதும் தவிர்ப்பது என்பது நம்மால் இயலாத காரியம். அதனால்தான் இந்தச் சத்துகளை குறைவான அளவில் எடுத்துக்கொள்ள பரிந்துரைக்கிறோம். இயற்கை உணவுகள் எடுத்துக்கொள்வதை அதிகரித்துவிட்டாலே நொறுக்குத்தீனிகள், துரித உணவுகள் போன்றவற்றைத் தவிர்த்துவிடலாம். சுத்திகரிக்கப்பட்ட மற்றும் கார்போஹைட்ரேட் அதிகமுள்ள அரிசி மற்றும் மைதா, பிராய்லர் சிக்கன், மட்டன் போன்ற கொழுப்புச்சத்து மிகுந்த கறி வகைகள், நெய், ரசாயனம் சேர்த்த நொறுக்குத்தீனிகள், துரித உணவுகள், கோதுமை, சோயா பருப்பு போன்றவற்றைத் தவிர்க்க வேண்டும்.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!

கட்டுப்படுத்த மட்டும்தான் முடியும்!

பிசிஓஎஸ் ஹார்மோன் பிரச்னையும் நீரிழிவு போல தான். அதனைக் கட்டுக்குள் வைக்க முடியுமே தவிர முழு வதுமாகக் குணப்படுத்த முடியாது. வாழ்நாள் முழுவதும் பிசிஓஎஸ் அறிகுறிகளைக் கட்டுப்பாட்டுக்குள் வைப்பதற்கான விஷயங்களைக் கடைப் பிடித்தால் ஆரோக்கியமான வாழ்க்கை உறுதி. இது இன்சுலின் அளவு அதிகரிப்பதால் வரும் பிரச்னை என்பதால் பின்னாளில் உயர் ரத்த அழுத்தம், கொலஸ்ட்ரால், நீரிழிவு போன்ற வாழ்வியல் நோய்கள் வருவதற்கும் வாய்ப்புகள் உள்ளன. எனவே, இந்த நோய்களுக்கான பரிசோதனைகளையும் மருத்துவர் பரிந்துரையின்படி, குறிப்பிட்ட நாள்களுக்கு இடை யில் செய்துகொள்ள வேண்டும்.

பாலிசிஸ்டிக் ஓவரி சிண்ட்ரோம் ... பாதிப்புகள், தீர்வுகள்!

பதில் தெரியாத கேள்வி!

பிசிஓஎஸ் பிரச்னை உள்ளவர்களுக்கு ஏற்படும் உடல்நலப் பிரச்னைகளுக்கு சிகிச்சையும் மருந்து, மாத்திரைகளும் உள்ளன. ஆனால், ஒரு பெண்ணுக்கு ஏன் பிசிஓஎஸ் வருகிறது என்ற கேள்விக்கு இன்று வரை பதில் கிடைக்கவில்லை. மரபணு பிரச்னையா, ஒரு பெண் குழந்தை தன் அம்மாவின் வயிற்றில் இருக்கும்போதே ஹார் மோன் தாக்கம் ஏற்படுகிறதா என்பதெல்லாம் இன்னும் அவிழாத மர்ம முடிச்சுகள்தான். குறிப்பிட்ட ஒரு நபருக்கு எந்தக் காரணத்தால் பிசிஓஎஸ் வருகிறது என்பதைக் கண்டறிந்தால், பிரத்யேக சிகிச்சையைப் பின்பற்ற முடியும். பிசிஓஎஸ் ஏற்படுவதற்கான காரணத்தைக் கண்டறிவதற்கு உலகம் முழுவதும் தொடர்ந்து ஆராய்ச்சிகள் நடைபெற்று வருகின்றன.