Published:Updated:

கர்ப்பச் சர்க்கரை எனும் எச்சரிக்கை மணி!

கர்ப்பச் சர்க்கரை எனும் எச்சரிக்கை மணி!
பிரீமியம் ஸ்டோரி
கர்ப்பச் சர்க்கரை எனும் எச்சரிக்கை மணி!

கர்ப்பகாலத்தில் பெண்களுக்கு ஏற்படும் நீரிழிவை ‘கர்ப்பச் சர்க்கரை’ என்கிறோம். இன்று கருத்தரிக்கும் பெண்களிடம் ‘கர்ப்பச் சர்க்கரை இருக்கிறதா?

கர்ப்பச் சர்க்கரை எனும் எச்சரிக்கை மணி!

கர்ப்பகாலத்தில் பெண்களுக்கு ஏற்படும் நீரிழிவை ‘கர்ப்பச் சர்க்கரை’ என்கிறோம். இன்று கருத்தரிக்கும் பெண்களிடம் ‘கர்ப்பச் சர்க்கரை இருக்கிறதா?

Published:Updated:
கர்ப்பச் சர்க்கரை எனும் எச்சரிக்கை மணி!
பிரீமியம் ஸ்டோரி
கர்ப்பச் சர்க்கரை எனும் எச்சரிக்கை மணி!

இன்றைய நிலையில் கருத் தரிக்கும் பெண்கள் எதிர் கொள்கிற, கவனத்தில் எடுத்துக் கொள்ள வேண்டிய பிரச்னையாக இருக்கிறது கர்ப்பச் சர்க்கரை (Gestational Diabetes). இந்திய அளவில் 15% - 30% கர்ப்பிணிகள் கர்ப்ப காலத்தில் ஏற்படும் கர்ப்பச் சர்க்கரை பிரச்னைக்கு ஆளாவதாக மருத்துவர்கள் தெரிவிக்கின்றனர். வாழ்வியல் மாற்றங்களின் விளைவாக நாம் எதிர்கொள்ளும் பிரச்னைகளில் இதுவும் ஒன்று. கர்ப்பச் சர்க்கரை ஏற்படுவதற்கான காரணம் முதல் தீர்வு, தவிர்ப்பதற் கான ஆலோசனைவரை பகிர்கிறார், சென்னையைச் சேர்ந்த மகப்பேறு மருத்துவர் கௌரிமீனா.

“கர்ப்பகாலத்தில் பெண்களுக்கு ஏற்படும் நீரிழிவை ‘கர்ப்பச் சர்க்கரை’ என்கிறோம். இன்று கருத்தரிக்கும் பெண்களிடம் ‘கர்ப்பச் சர்க்கரை இருக்கிறதா?’ என்ற கேள்வியைத் தவறாமல் கேட்கும் அளவுக்கு இந்தப் பிரச்னை நாளுக்கு நாள் அதிகரித்து வருகிறது.

 கௌரிமீனா
கௌரிமீனா

கண்டறிவது எப்படி?

கருத்தரித்த பிறகு மேற்கொள்ளப் படும் பரிசோதனைகளில் ரத்த சர்க்கரை அளவு பரிசோதனை முக்கியமாக இருக்கிறது. ஒவ்வொரு வருக்கும் அவரவர் உட்கொண்ட உணவைப் பொறுத்து சர்க்கரை அளவு வேறுபட்டிருக்கும். எனவே, பொதுவான அளவீட்டுக்காக அவர்களுக்கு குளுக்கோஸ் கொடுத்து ரத்த பரிசோதனையை மேற் கொள்வோம். அந்தப் பரிசோதனை முடிவின் அடிப்படையில் அவர்களுக்கு கர்ப்பச் சர்க்கரை இருக்கிறதா என்பது கண்டறியப்படும்.

ஒரு பெண்ணுக்கு கர்ப்பகாலத்தில் கர்ப்பச் சர்க்கரை ஏற்பட்டால், எதிர்காலத்தில் அவர் நீரிழிவு நோய்க்கு ஆட்பட வாய்ப்பிருப்பதை முன்கூட்டியே உணர்த்தும் ஒரு எச்சரிக்கை மணியாக கர்ப்பச் சர்க்கரையைப் பார்க்கிறோம். கர்ப்பச் சர்க்கரைக்கு ஆளாகும் பெண்களில் 50 சதவிகிதம் பேர் அடுத்த பத்தாண்டுகளில் நீரிழிவுக்கு ஆட்பட வாய்ப்பிருக்கிறது. எனவே, கர்ப்பச் சர்க்கரைக்கு ஆளான பெண்கள் இதை நினைவில்வைத்து ஆரோக்கியத்தில் கூடுதல் கவனம் செலுத்த வேண்டும். கர்ப்பச் சர்க்கரை ஏற்பட்ட பெண்களுக்கு பிரசவித்த பிறகு, 48 நாள்கள் கழித்து மீண்டும் ரத்த சர்க்கரை அளவு பரிசோதனை மேற்கொள்ளப்படும். அப்போது சர்க்கரை அளவு சாதாரண அளவைத் தாண்டி இருந்தால் நிச்சயம் பிரச்னைதான்.

எதனால் ஏற்படுகிறது?

நமது வாழ்வியல் முற்றாக மாறிப் போனதுதான் கர்ப்பச் சர்க்கரைக் கான முக்கியக் காரணி. நல் உணவு, உடற்பயிற்சி, உறக்கம், இயற்கையோடு இணைந்த வாழ்வு ஆகியவை மிக முக்கியமானவை. இன்றைக்கு உணவுப் பழக்கம் மாறிப்போய் விட்டது. சத்தான உணவுகளை உட்கொள்வதை விடவும் ஆரோக்கியத்தைக் கெடுக்கும் உணவுகளை அதிகம் எடுத்துக் கொள்கிறோம். இன்னொருபக்கம் உடல் உழைப்பும் குறைந்து விட்டது.

சூரியன் மறைந்த பிறகு தூங்கிவிட வேண்டும். சூரியன் எழும்போது நாமும் எழுந்துவிட வேண்டும். ஆனால், இன்றைக்கு அது தலைகீழாக மாறிப்போய்விட்டது. ‘மதிய நேரம் வந்தால் உண்ண வேண்டும், இரவு நேரம் வந்தால் உறங்க வேண்டும்’ என்று நம் உடலில் ஓர் உயிரியல் கடிகாரம் (Circadian rhythm) ஓடிக் கொண்டிருக்கிறது. நமது முறை தவறிய வாழ்வியல் மூலம் அக்கடிகாரத்தையே குழப்புகிறோம். ஆகவேதான் உடல் எமர்ஜென்சி காலத்தைப்போல் எப்போதும் உணர்கிறது. உணவு கிடைக்காமல் போகலாம் என அளவுக்கு அதிகமாக சர்க்கரையை கொழுப்பாக சேமித்து வைக்கிறது. மோசமான வாழ்வியலின் விளைவாக மண்ணீரல் பாதிப்புக் குள்ளாகும்போது அது நீரிழிவாக மாறுகிறது.

கர்ப்பச் சர்க்கரை எனும் எச்சரிக்கை மணி!

கர்ப்பகாலத்தில் நீரிழிவு ஏற்படுவது ஏன்?

நாம் ஆதியில் வேட்டையாடி சாப்பிட்ட சூழலில், தேவையான போது உணவு கிடைக்காது என்பதால் உணவு கிடைக்கிறபோதே உடல் அதைக் கொழுப்பாக மாற்றி, தேக்கி வைத்துக்கொள்ளும். பிறகு சத்து தேவைப்படும்போது கொழுப்பை சர்க்கரையாக மாற்றி எடுத்துக் கொள்ளும். தொல்குடிச் சமூகத்தி லிருந்து நாம் பரிணமித்து பல நூறு ஆண்டுகள் ஆன போதிலும், நம் உடல் இன்னும் அந்த நினைவில் தான் இயங்குகிறது.

கருத்தரித்த பிறகு குழந்தைக்குத் தேவையான அனைத்து சத்துகளை யும் தாய்தான் கொடுக்க வேண்டும். எனவே, தாயின் உடலில் எந்நேரமும் சத்து சேமிப்பில் இருந்தாக வேண்டும். நம் உடலைப் பொறுத்தவரை புரதம், நார்ச்சத்து, கொழுப்பு என எல்லா சத்துகளும் செல்களுக்கு சர்க்கரையாகத்தான் சென்று சேரும். அதுவே, உடலின் தேவை போக மிஞ்சும் சர்க்கரை, கொழுப்பாக மாறி உடலில் தேங்கிவிடும்.

நஞ்சுக்கொடி (Placenta) மூலமாகத்தான் தாயின் ரத்தம் வழியாக ஊட்டச்சத்து குழந்தைக்குச் செல்கிறது. மேலும், குழந்தையின் கழிவுகள் இக்கொடி மூலமாகச் சென்று தாயின் சிறுநீரகம் வழியாக வெளியேறுகிறது. இந்த நஞ்சுக்கொடி குழந்தையின் நலனுக்காக மட்டுமே இயங்கும். தாயின் உடலில் சர்க்கரை அதிகம் இருந்தால்தான் குழந்தைக்குத் தேவையான உணவு கிடைக்கும். எனவே,

Human placental lactogen, Prolactin, Progesterone போன்ற ஹார்மோன்களை நஞ்சுக்கொடி வெளியேற்றும். அவை குழந்தைக்கு எந்நேரமும் உணவு கிடைக்க வேண்டி தாயின் உடலில் கொழுப்பைப் படியவைக்கும். ஆகவேதான் கருத்தரித்த பிறகு, பருமன் கூடுகிறது. படிந்திருக்கும் கொழுப்புகள் மூலம் தாயின்

ரத்த சர்க்கரை அளவு அதிகரிக்கும். கருத்தரிக்கும் அனைவருக்கும் இது நிகழ்வது தான். சர்க்கரை அளவைக் கட்டுப்படுத்தும் இன்சுலின் மண்ணீரலில் இருந்துதான் சுரக்கிறது. தாயின் மண்ணீரலில் பிரச்னை இருக்கும் நிலையில் இன்சுலின் முறையாக சுரக்காவிட்டால், அப்போது அது கர்ப்பச் சர்க்கரையாக மாறிவிடும்.

குழந்தையையும் பாதிக்குமா?

கர்ப்பச் சர்க்கரை மரபுரீதியாக குழந்தைக் கும் நீரிழிவை ஏற்படுத்த வாய்ப்பு உண்டாகலாம். மட்டுமன்றி ரத்த அழுத்தம், கொழுப்பு, இதயப் பிரச்னைகள், பருமன் மற்றும் கல்லீரலில் கொழுப்பு படிவது (Fatty liver) போன்ற பிரச்னைகளையும் ஏற்படுத்த லாம். பெண் குழந்தை எனில் கர்ப்பப்பையில் நீர்க்கட்டிகள் ஏற்பட வாய்ப்பிருக்கிறது.

தீர்வு

கர்ப்பச் சர்க்கரை உறுதிப்படுத்தப்பட்டால், மருத்துவ சிகிச்சை வழியாகவும் வாழ்வியல் மாற்றத்தின் வழியாகவும் எப்படிக் குணப்படுத்தலாம் என்பது பற்றி மருத்துவ ஆலோசனை, அறிவுரை பெற வேண்டும். உணவுப் பழக்கம், உறக்கம், உடல் உழைப்பு மற்றும் மனநலம் ஆகியவற்றை முறைப் படுத்துவதற்கான வழிகளை மேற்கொள்ள வேண்டும்.

எதிர்காலத்தில் சந்திக்கவிருக்கும் நீரிழிவை, எச்சரிக்கை மணிபோல முன்பே ஒலிப்பதுதான் கர்ப்பச் சர்க்கரை என இதை நாம் பாசிட்டிவ் வாக எடுத்துக்கொண்டு வரும் முன் காப்பதற் கான நடவடிக்கைகளில் ஈடுபட வேண்டும். ஜங்க் உணவுகள், துரித உணவுகள், பதனிடப் பட்ட உணவுகள் உடல்நலத்துக்கு உகந்தவை அல்ல. அவற்றைத் தவிர்த்து சத்தான உணவுகளை எடுத்துக்கொள்ள வேண்டும். கர்ப்பச் சர்க்கரையாக இருந்தாலும் சரி, பிரசவித்த பிறகும் நீரிழிவு தொடர்ந்தாலும் சரி... மேற்சொன்ன வாழ்வியல் மாற்றங்கள் மூலம் அதைக் கட்டுக்குள் வைக்கலாம்.’’

கர்ப்பச் சர்க்கரை எனும் எச்சரிக்கை மணி!

வருமுன் காப்போம்!

பெண்கள் மருத்துவ ஆலோசனைப்படி முறையாகத் திட்டமிட்டு கருத்தரிக்க வேண்டும். கருத்தரிப்பதற்கு ஏற்ற வயதென 23 - 28 வயதைக் கூறலாம். ஆனால், இன்றைக்கு பெண்ணின் சராசரி திருமண வயது அதிகரித்திருக்கிறது. வயது அதிகரிக்கும்போது கலோரியை எரிக்கும் தன்மை குறையும். வயதை மாற்றியமைக்க முடியாது. ஆனால், அதற்கேற்றபடி வாழ்வியலை மாற்றிக்கொள்ள வேண்டும். பருமனாக உள்ளவர்கள் உடற்பயிற்சி மேற் கொண்டு உணவுப் பழக்கத்தில் மாவுச்சத்தைக் குறைத்து, நீர்ச்சத்து மற்றும் நார்ச்சத்து அதிகம் உள்ள உணவுகளை எடுத்துக்கொள்ள வேண்டும். மருத்துவ வழிகாட்டுதலோடு கருத்தரிக்கையில், கர்ப்பச் சர்க்கரை போன்ற பிரச்னைகள் ஏற்படுவதற்கான வாய்ப்புகள் இருக்கிறதா என்பதைத் தெரிந்துகொண்டு அதைத் தவிர்க்கலாம்.