கட்டலோனியாவில் மறுதேர்தல்: முடிவெடுத்தது ஸ்பெயின்

கட்டலோனியா நாடாளுமன்றத்தைக் கலைத்த ஸ்பெயின் அரசு தற்போது கட்டலோனியாவில் மறுதேர்தல் நடத்த முடிவெடுத்துள்ளது.

கட்டலோனியா

 

ஸ்பெயின் நாட்டில் வளம் மிகுந்த பகுதியான கட்டலோனியா, தொடர்ந்து தனிநாடு கோரிக்கையை வைத்துவந்தது. ஸ்பெயின் நாட்டின் பொருளாதாரத்தில் ஐந்தில் ஒரு பங்கு, கட்டலோனியா பகுதியிலிருந்து கிடைக்கிறது. ஸ்பெயின் அரசாங்கம், இவர்களது கோரிக்கையை நிராகரித்துவந்தது. இந்நிலையில், கட்டலோனிய மாநில அரசு, தனிநாடுகுறித்து ஸ்பெயினின் தடையையும் மீறி பொது வாக்கெடுப்பு நடத்தியது. ஆனால், இந்த வாக்கெடுப்பில், ஸ்பெயின் அரசு காவல்துறைமூலம் முடக்க, வாக்களிக்க வந்தவர்கள்மீது தாக்குதல் நடத்தியது. வாக்கெடுப்பில், 90 சதவிகித கட்டலோனிய மக்கள், தனி நாடு வேண்டும் என்ற கோரிக்கைக்கு ஆதரவாக வாக்களித்துள்ளதாக அந்த மாநில அரசு தெரிவித்து, தனிநாடு வாக்கெடுப்பில் வெற்றிபெற்றுள்ளதாகவும் அறிவித்தது.

இந்நிலையில், தனிநாடு கோரிக்கையைத் தொடர்ந்து முன்வைத்து வந்த கட்டலோனியா அரசைக் கலைத்துவிட்டு மறுதேர்தல் நடத்துவது குறித்து ஸ்பெயின் அரசு ஆலோசனை நடத்தியது. ஸ்பெயின் நாடாளுமன்றத்தில் ஆளுங்கட்சிக்குப் பெரும்பான்மை உள்ளதால் கட்டலோனியா நாடாளுமன்றம் கவிழ்க்கப்படும் எனக் கூறப்பட்டது. தற்போது கட்டலோனியா நாடாளுமன்றம் கலைக்கப்பட்டது என ஸ்பெயின் பிரதமரே நேற்று அதிகாரபூர்வமாக அறிவித்தார்.

இதையடுத்து, வருகிற டிசம்பர் மாதம் 21-ம் தேதி ஸ்பெயின், கட்டலோனியாவில் மறுதேர்தல் நடத்தவுள்ளதாக புதிய அறிவிப்பை வெளியிட்டுள்ளது. இந்தத் தேர்தலில் கட்டலோனியாவின் தலைவர் கார்லஸ் பூட்சியமோண்ட் போட்டியிட வேண்டும் என ஸ்பெயின் விருப்பம் தெரிவிக்க, இந்தத் தேர்தலையே புறக்கணிக்கவுள்ளதாகக் கட்டலோனியா மக்கள் தெரிவித்துவருகின்றனர்.

Do you like the story?

Please Appreciate the Author by clapping!