வெளியிடப்பட்ட நேரம்: 12:18 (20/02/2018)

கடைசி தொடர்பு:12:18 (20/02/2018)

நூதன முறையில் நிரவ் மோடி பல்லாயிரம் கோடி ஏமாற்றிய கதை!

ர்ஷத் மேத்தா, விஜய் மல்லய்யாவின் பண மோசடியைத் தொடர்ந்து இந்தியா மீண்டும் ஒருமுறை ஆடிப்போயிருக்கிறது. காரணம், நிரவ் மோடி. 2017-ம் ஆண்டு `ஃபோர்ப்ஸ்' நாளிதழ் வெளியிட்ட இந்தியாவின் பணக்காரத் தொழிலதிபர்கள் பட்டியலில் 85-வது இடத்தைப் பெற்ற நிரவ் மோடி, இப்போது மோசடிப் பேர்வழிகளில் ஒருவராக அறியப்பட்டுள்ளார். அதே ஆண்டில், ஃபோர்ப்ஸ் உலக பில்லியனர்கள் பட்டியலிலும் நிரவ் (1,234-வது இடம்) இடம்பெற்றார். `இவரின் சொத்துமதிப்பு 1.8 பில்லியன் அமெரிக்க டாலர்கள்' என ஃபோர்ப்ஸ் சொன்னது. தற்போது, அதே அளவுக்கு மோசடியில் ஈடுபட்டுள்ளார் நிரவ் மோடி. வங்கிகளில் கோர் பேங்க்கிங் சிஸ்டத்தில் இணைக்கப்படாத, `ஸ்விப்ட்' (Society for Worldwide Interbank Financial Telecommunication) முறையிலான கடன் உத்தரவாத நடைமுறையில் இத்தகைய மெகா மோசடி நடத்தப்பட்டுள்ளது.

நிரவ் மோடி

உலகிலேயே மிகப்பெரிய டிஜிட்டல் கடன் உத்தரவாத நடைமுறை `ஸ்விப்ட்'. 2012-ம் ஆண்டு, நாள் ஒன்றுக்கு 6 டிரில்லியன் அமெரிக்க டாலர்கள் அளவுக்குப் பணப்பரிவர்த்தனை நடைபெற்றுள்ளது என்றால் பார்த்துக்கொள்ளுங்களேன்! டெலக்ஸுக்கு மாற்றாக, 1973-ம் ஆண்டு ஸ்விப்ட் முறை அறிமுகப்படுத்தப்பட்டது. 200 நாடுகளில் உள்ள 11 ஆயிரம் வங்கிகள் - நிதி நிறுவனங்களுக்கிடையே கடன் பரிமாற்றத்துக்கு ஸ்விப்ட் முறை உதவுகிறது. இதில் பயன்படுத்தப்படும் பிரத்யேக மொழி, சாமானியர்களுக்குப் புரியாது. 2015-ம் ஆண்டு மட்டும் ஒரு லட்சம் கோடி மெசேஜ்கள் ஸ்விப்ட் முறையில் பயன்படுத்தப்பட்டுள்ளன. இந்த முறையில் பணம் அனுப்பப்படுவதில்லை.

இந்திய நிறுவனம் ஒன்று, அமெரிக்காவில் செயல்படுகிறது என வைத்துக்கொள்வோம். அந்த நிறுவனம் வாங்கும் கடனுக்கு பஞ்சாப் நேஷனல் வங்கி பொறுப்பேற்று உறுதிமொழி மெசேஜ் அளிக்கும். இந்த மெசேஜைப் பயன்படுத்தி, அமெரிக்காவில் உள்ள இந்திய வங்கி, சம்பந்தப்பட்ட நிறுவனங்களுக்குக் கடன் அளிக்கும். ஒவ்வொரு வங்கியிலும் இதைக் கையாள தனி ஊழியர்கள் இருப்பார்கள். இந்த ஸ்விப்ட் முறையைப் பயன்படுத்தித்தான் பஞ்சாப் நேஷனல் வங்கியின் மும்பை ப்ரீச் கேண்டி கிளையிலிருந்து போலி கடன் உறுதிமொழி மெசேஜ்களைப் பெற்று வெளிநாட்டு இந்திய வங்கிக் கிளைகளில் கோடிக்கணக்கில் மோசடி செய்துள்ளார் நிரவ் மோடி.  

கடன் உறுதிமொழி, 90 நாள்களுக்குத்தான் செல்லுபடியாகும். ஆனால், நிரவ் மோடியின் நிறுவனங்களின் கடன் உறுதிமொழி, ஒரு வருடம் வரைகூட நீட்டிக்கப்பட்டுள்ளது. சாமான்யர்கள் ஒரு லட்சம் ரூபாய் கடன் வாங்கினால், நகையையோ சொத்துப் பத்திரத்தையோ ஈடாக பெற்றுக்கொண்டே வங்கிகள் கடன் அளிப்பது வழக்கம். ஆனால், நிரவின் நிறுவனங்களிடமிருந்து ஈடாக எதுவும் பெறப்படவில்லை. வங்கியின் தலைமை அலுவலர்களுக்குத் தெரியாமல் கடைநிலை ஊழியர்கள் இருவரே இந்த முறைகேட்டுக்கு உறுதுணையாக இருந்ததாகவும் சொல்லப்படுகிறது. மும்பை ப்ரீச் கேண்டி கிளையிலிருந்து மட்டும் 2011-ம் ஆண்டிலிருந்து 150 கடன் உறுதிக் கடிதங்கள் வழங்கப்பட்டுள்ளன. பஞ்சாப் நேஷனல் வங்கியின் ப்ரீச் கேண்டி கிளை சீல் வைக்கப்பட்டுள்ளது. 

நிரவ் மோடியின் நிறுவனங்கள், பஞ்சாப் நேஷனல் வங்கியை மட்டுமல்ல இந்தியாவைச் சேர்ந்த மேலும் 17 வங்கிகளை ஏமாற்றியுள்ளதாக பிரபல ஆங்கில நாளிதழ் ஒன்று செய்தி வெளியிட்டுள்ளது. சென்ட்ரல் வங்கியில் 194 கோடி ரூபாய், தேனா வங்கியில் 153.25 கோடி ரூபாய், பேங்க் ஆஃப் இந்தியாவில் 127 கோடி ரூபாய், சிண்டிகேட் வங்கியில் 125  கோடி ரூபாய், ஓரியன்டல் பேங்க் ஆஃப் காமர்ஸில் 120 கோடி ரூபாய், யூனியன் பேங்க் ஆஃப் இந்தியாவில் 110 கோடி ரூபாய், ஐ.டி.பி.ஐ-யில் 100 கோடி ரூபாய் என,  மொத்தம் 3 ஆயிரம் கோடி ரூபாய் அளவுக்கு நீரவ் மோடி நிறுவனங்கள் மோசடி செய்துள்ளதாக அந்த நாளிதழ் தெரிவித்துள்ளது. நிரவ் மோடியின் ஃபயர்ஸ்டார் இன்டர்நேஷனல் நிறுவனம்தான், போலி கடன் உத்தரவாத கடிதங்கள் வழியே பெரும்பாலான கடன்களைப் பெற்றுள்ளதாக அந்த நாளிதழ் செய்தியில் குறிப்பிட்டுள்ளது.

பஞ்சாப் நேஷனல் வங்கியின் ஸ்விப்ட் நடைமுறையின் பாஸ்வோர்டே நிரவ் மோடியிடம் இருந்ததாம்! வங்கியின் முன்னாள் துணைப் பொதுமேலாளர் கோகுல்நாத் ஷெட்டி என்பவரை சி.பி.ஐ கைதுசெய்து விசாரித்தபோது, இந்த அதிர்ச்சித் தகவல் வெளியாகியுள்ளது. இவர்தான் நிரவ் மோடிக்கு பாஸ்வோர்டை வழங்கியுள்ளார். ``முதலில் ஸ்விப்ட் முறையில் வங்கிக்கணக்கில் சிறிய தொகையைப் பதிவேற்றிவிடுவேன். பிறகு ஸ்விப்ட் மெசேஜில் உள்ள தொகையை உயர்த்தி மெசேஜ் அனுப்பி, மாற்றப்படும் தொகையை வங்கிக்கணக்கில் பதிய மாட்டேன். இதை எளிதாகக் கண்டுபிடித்துவிடமுடியாது'' என்று கோகுல்நாத் ஷெட்டி விசாரணையில் தெரிவித்துள்ளார். 

இந்த விவகாரத்தில் காங்கிரஸும் பாரதிய ஜனதாவும் ஒருவரை ஒருவர் குற்றம்சாட்டியுள்ளன. நிரவ் மோடி, ஜனவரி முதல் தேதி இந்தியாவிலிருந்து வெளியேறியுள்ளார். கடைசியாக, ஜனவரி 23-ம் தேதி ஸ்விட்சர்லாந்தின் டாவோஸ் நகரில் நடந்த உலகப் பொருளாதார மாநாட்டில் பங்கேற்றுள்ளார். அப்போது பிரதமர் மோடியுடன் அவர் புகைப்படமும் எடுத்துக்கொண்டுள்ளார். நிரவ் மோடி மற்றும் அவரின் உறவினரும் கீதாஞ்சலி ஜுவல்லர்ஸ் உரிமையாளருமான மெகுல் ஷோக்ஸி ஆகியோர் மீது 2016-ம் ஆண்டு ஜூலை 26-ம் தேதி பிரதமர் அலுவலகத்தில் ஹரிபிரசாத் என்பவர் புகார் கடிதம் அளித்ததாகவும், மத்திய அரசு மெத்தனமாக இருந்தாகவும் காங்கிரஸ் கட்சி குற்றம்சாட்டியுள்ளது. ஐக்கிய ஜனநாயகக் கூட்டணியின் ஆட்சியில்தான் வங்கிகளின் செயல்பாடுகள் முடங்கிப்போனதாகவும், கடந்த ஆண்டு செப்டம்பர் 13, 14-ம் தேதிகளில் நிரவ் மோடி நடத்திய நிகழ்ச்சிகளில் ராகுல் காந்தி பங்கேற்றதாகவும் பா.ஜ.க பதிலடி கொடுத்துள்ளது. 

இந்த முறைகேட்டில் ஈடுபட்டவர்களில் யாரும் தற்போது இந்தியாவில் இல்லை. ஒருவார காலத்துக்குள் நாட்டைவிட்டு ஒவ்வொருவராக வெளியேறியுள்ளனர். நிரவ் மோடி சகோதரர் நிஷால் (இவர் பெல்ஜியம் நாட்டுக் குடிமகன்) ஜனவரி முதல் தேதியும், மனைவி ஆமி மோடி ஜனவரி 6-ம் தேதியும், மெகுல் ஷோக் ஷி ஜனவரி 4-ம் தேதியும் நாட்டைவிட்டு வெளியேறியுள்ளனர். `பிரதமர் அலுவலகம் வரை புகார் சென்ற பிறகும் மத்திய அரசு ஏன் மெத்தனமாக இருந்தது?' என்ற கேள்வி எழாமல் இல்லை. ஏற்கெனவே 9 ஆயிரம் கோடி ரூபாய் அளவுக்கு வங்கி மோசடியில் ஈடுபட்டு லண்டனில் திரியும் மல்லையாவை, இன்னும்கூட இந்தியாவுக்குக் கொண்டு வர முடியவில்லை என்ற நிலையில், நிரவ் மோடி விவகாரமும் புதிதாகச் சேர்ந்துள்ளது.

நீரவ் மோடியின் சகோதரர் நிஷால்

நாட்டில், பொதுத்துறை வங்கிகளின் வாராக்கடனும் அதிகரித்துள்ளது. விவசாயிகளை ஆள்வைத்து மிரட்டும் வங்கிகள், நிரவ் போன்ற மலை முழுங்கிகளுக்குக் கடன் வழங்கிவிட்டு வசூலிக்க முடியாமல் விழி பிதுங்கிக் கிடக்கின்றன. இதுவரை 9 லட்சம் கோடி ரூபாய்க்குமேல் வாராக்கடன் அதிகரித்துள்ளது. 2.50 லட்சம் கோடி ரூபாயை, பொதுத்துறை வங்கிகளுக்கு வழங்க மத்திய அரசு முடிவெடுத்துள்ளது.

நிரவ் மோடி இந்தியாவில் பிறந்தவர் என்றாலும் வளர்ந்தது படித்தது எல்லாமே பெல்ஜியத்தின் ஆன்ட்வெர்ப் நகரில்தான். பெல்ஜியம் நாட்டிக் குடிமகனான நிரவின் சகோதரர் நிஷால், இந்திய பாஸ்போர்ட்டை ஒப்படைத்துவிட்டார். நிரவ், தன்னை இந்தியக் குடிமகன் என்றே அறிவித்துக்கொண்டார். இந்தியாவில் மிகப்பெரிய தொழிலதிபராகக் காட்டிக்கொள்வதற்காக நிரவ் தன் சகோதரர் நிஷாலுக்கு இந்தியாவிலேயே முதல் பணக்காரர் வீட்டில் பெண் எடுத்தார். ரிலையன்ஸ் நிறுவனர் திருபாய் அம்பானியின்  மகள் தீப்தி,  நிரவின் சம்பந்தி.

முகேஷ் அம்பானி, அனில் அம்பானிக்கு, நினா கோத்தாரி, தீப்தி சல்கோகர் என்கிற இரு சகோதரிகள் உண்டு. நிஷாலின் மனைவி நிஷிதா, கோவாவைச் சேர்ந்த தொழிலதிபர் தத்தாரஜ் சல்கோகர் - தீப்தி தம்பதியின் மகள்.  நிரவ் மோடி நிறுவனங்களின் தலைமை நிதி அதிகாரியாக திருபாய் அம்பானியின் சகோதரரான நட்டுபாய் அம்பானியின் மகன் விபுல் பணிபுரிந்துள்ளார். அவரிடம் கிடுக்குப்பிடி விசாரணையை நடத்திவருகிறது சி.பி.ஐ.

நிரவ் மோடியின் மனைவி ஏமி, அமெரிக்கக் குடியுரிமை பெற்றவர். நிரவ், மெகுல் ஷோக்ஸி ஆகியோரின் பாஸ்போர்ட் நான்கு வாரங்களுக்கு முடக்கப்பட்டிருந்தாலும், அவரிடம் பெல்ஜியம் பாஸ்போர்ட் இருப்பதாகச் சொல்லப்படுகிறது.  இரு ஆண்டுகளுக்கு முன், அடிக்கடி இந்தியா வந்துகொண்டிருந்த நிரவ், கடந்த இரண்டு வருடங்களாக இந்தியா வருவதைக் குறைத்துள்ளார். இன்னொரு குழப்பமான தகவலும் இருக்கிறது. நீரவ் மோடிக்குச் சொந்தமான ஏ.எம்.என் என்டர்பிரைசஸ் நிறுவனம் 2017 நவம்பர் 6-ம் தேதி நடத்திய பங்குதாரர் கூட்டத்தில், நீரவ் மோடியை `என்.ஆர்.ஐ' எனக் குறிப்பிடப்பட்டுள்ளது. கடந்த செவ்வாய்க்கிழமை வரை, நியூயார்க் நகரில் உள்ள எஸ்ஸக்ஸ் ஹோட்டலில் நிரவ் குடும்பத்துடன் தங்கியிருந்தாகத் தகவல். பின்னர் தலைமறைவாகிவிட்டார்.

என்ன செய்யப்போகிறது இந்திய அரசு?

நீங்க எப்படி பீல் பண்றீங்க


டிரெண்டிங் @ விகடன்