வெளியிடப்பட்ட நேரம்: 09:20 (02/03/2018)

கடைசி தொடர்பு:09:20 (02/03/2018)

`வெளிநாடுக்குத் தப்பிச் செல்வோரின் சொத்துகளைப் பறிமுதல் செய்ய மசோதா!’ - மத்திய அமைச்சரவை ஒப்புதல்

பொருளாதாரக் குற்றங்களில் ஈடுபட்டு, வெளிநாடுகளுக்குத் தப்பிச் செல்வோரின் சொத்துகளைப் பறிமுதல் செய்யும் வகையிலான சட்ட மசோதாவுக்கு மத்திய அமைச்சரவை ஒப்புதல் அளித்துள்ளது. 

பொதுத்துறை வங்கிகளில் ரூ.9,000 கோடி அளவுக்குக் கடன் பெற்றுவிட்டு மோசடி செய்ததாக கிங் ஃபிஷர்  நிறுவன அதிபர் விஜய் மல்லையா மீது வழக்குப் பதிவு செய்யப்பட்டுள்ளது. இங்கிலாந்தில் தஞ்சமடைந்துள்ள அவரை, இந்தியா கொண்டுவர மத்திய அரசு சட்ட ரீதியான நடவடிக்கைகளை எடுத்து வருகிறது. அதேபோல், பஞ்சாப் நேஷனல் வங்கியில் முறைகேட்டில் ஈடுபட்டு ரூ.11,400 கோடி வரை மோசடி செய்ததாகப் பிரபல நகைக்கடை அதிபர் நிரவ் மோடி மீது அமலாக்கத்துறை மற்றும் சி.பி.ஐ. ஆகிய அமைப்புகள் வழக்குப் பதிவு செய்துள்ளன. அவரும் வெளிநாட்டுக்குத் தப்பிச் சென்ற நிலையில், 6 நாடுகளில் அவரைத் தேடும் பணியில் மத்திய அரசு ஈடுபட்டுள்ளது. இந்த விவகாரம் மத்திய அரசுக்குக் கடும் நெருக்கடியைக் கொடுத்துள்ளது. 

இது தொடர்பாக ஆலோசனை செய்ய பிரதமர் மோடி தலைமையில் மத்திய அமைச்சரவைக் கூட்டம் நேற்று (1.3.2018) டெல்லியில் நடைபெற்றது. அந்தக் கூட்டத்தில், பொருளாதாரக் குற்றங்களில் ஈடுபட்டு, வெளிநாடுகளுக்குத் தப்பிச் செல்வோரின் சொத்துகளைப் பறிமுதல் செய்யும் சட்ட மசோதாவுக்கு ஒப்புதல் அளிக்கப்பட்டது. சட்ட விரோத பணப் பரிவர்த்தனைகள் தடுப்புச் சட்டத்தில் இருந்து மாறுபட்டதாக இந்தச் சட்டம் இருக்கும் என்று அறிவிக்கப்பட்டுள்ளது. நூறு கோடி ரூபாய்க்கும் மேல் மோசடி செய்துள்ளவர்கள் மீது இந்தச் சட்டத்தின்படி நடவடிக்கை எடுத்து, அவர்களது மொத்த சொத்துகளையும் பறிமுதல் செய்ய முடியும். சட்ட விரோத பணப் பரிவர்த்தனைகள் தடுப்புச் சட்டத்தில், குற்றம் சாட்டப்பட்டவரின் அனைத்துச் சொத்துகளையும் பறிமுதல் செய்ய முடியாது. இந்தச் சட்டம் மார்ச் 5-ம் தேதி தொடங்கும்  நாடாளுமன்றக் கூட்டத்தொடரில் தாக்கல் செய்யப்படும் என்று தெரிகிறது. அதேபோல், கணக்குத் தணிக்கையாளர்களைக் கண்காணிக்கும் வகையில் தேசிய நிதிச் செயல்பாடுகள் கண்காணிப்பு ஆணையத்தை (NFRA) அமைக்கவும் மத்திய அமைச்சரவை ஒப்புதல் அளித்துள்ளது.