வெளியிடப்பட்ட நேரம்: 19:00 (19/05/2018)

கடைசி தொடர்பு:19:00 (19/05/2018)

‘ஜனநாயம் வென்றுள்ளது’ - எடியூரப்பா ராஜினாமாவுக்கு அரசியல் தலைவர்கள் வரவேற்பு

கர்நாடக முதல்வர் பதவியில் இருந்து எடியூரப்பா ராஜினாமா செய்ததை அடுத்து, ஜனநாயகம் வென்றுள்ளதாகப் பல அரசியல் கட்சித் தலைவர்கள் கருத்து தெரிவித்துள்ளனர். 

 இதுகுறித்து ட்விட்டரில் கருத்து தெரிவித்துள்ள தி.மு.க செயல் தலைவர் மு.க ஸ்டாலின், “ உச்ச நீதிமன்றத் தீர்ப்பின்மூலம் ஜனநாயகம் வென்றுள்ளது. மதச்சார்பற்ற ஜனதா தளம் கட்சியின் குமாரசாமிக்கு எனது வாழ்த்துகளைத் தெரிவித்துக்கொள்கிறேன்” எனக் குறிப்பிட்டுள்ளார். 

 மேற்கு வங்க முதல்வரும், திரிணமுல் காங்கிரஸ் கட்சியின் தலைவருமான மம்தா பானர்ஜி, “ ஜனநாயகம் வென்றுவிட்டது. கர்நாடகாவுக்கு வாழ்த்துகள். தேவ கவுடா, குமாரசாமி, காங்கிரஸ் மற்றும் அனைவருக்கும் எனது வாழ்த்துகள்” எனத் தனது ட்விட்டரில் பதிவிட்டுள்ளார்.

இதுகுறித்து செய்தியாளர்களிடம் பேசிய ஆந்திரப்பிரதேச முதல்வர் சந்திரபாபு நாயுடு, “ கர்நாடக முதல்வராகப் பதவியேற்ற எடியூரப்பா பதவி விலகியிருப்பதாகச் செய்தி வந்துள்ளது. ஜனநாயகத்தின்மீது நம்பிக்கைகொண்ட அனைவரும் சந்தோஷமாக உள்ளனர்” என தெரிவித்துள்ளார். 

கர்நாடக சட்ட சபைக்கு வெளியே செய்தியாளர்களைச் சந்தித்த காங்கிரஸின் மூத்த நிர்வாகி குலாம் நபி ஆசாத், “ பா.ஜ.க-வின் தூண்டுதல்களுக்கு அடிபணியாமல் நின்ற காங்கிரஸ் மற்றும் ம.ஜ.த எம்.எல்.ஏ-க்களுகு வாழ்த்துகள். பல தடைகளைக் கடந்தும் அவர்கள் கட்சியின் கொள்கை மற்றும் கட்சித் தலைமை எடுத்த முடிவுக்குக் கட்டுப்பட்டுள்ளனர்” எனக் கூறியுள்ளார். 

முன்னாள் நிதித்துறை அமைச்சர் ப. சிதம்பரம், “ கர்நாடக சட்டசபைக் கூட்டத்தை நேரடியாக ஒளிபரப்பியதால், மக்கள் ஒவ்வொருவரும் தற்காலிக சபாநாயகராக இருந்துள்ளனர்; ஜனநாயகம் காப்பாற்றப்பட்டுள்ளது'' என ட்விட்டியுள்ளார்.

கங்கிரஸ் தலைவர் ராகுல் காந்தி, “ எந்த மாநிலத்திலும் மக்களின் தீர்ப்பை பா.ஜ.க மதிப்பதில்லை. கர்நாடக மக்களுக்கு எனது வாழ்த்துகளையும், நன்றியையும் தெரிவித்துக்கொள்கிறேன். ஒற்றுமையோடு செயல்பட்டு, எதிர்க்கட்சியினர் பா.ஜ.க-வை வீழ்த்தியது பெருமையாக உள்ளது” எனத் தெரிவித்துள்ளார். 

பகுஜன் சமாஜ் கட்சியின் மாயாவதி இதுகுறித்துக் கூறும்போது, “கர்நாடக நிகழ்வு பா.ஜ.க-வுக்கு பெரும் அடியாக இருக்கும். அடுத்த ஆண்டு நடைபெற உள்ள நாடாளுமன்றத் தேர்தலுக்காக அவர்கள் செய்திருந்த திட்டங்கள் அனைத்தும் முறியடிக்கப்பட்டுள்ளன. இனி ,பா.ஜ.க புது முயற்சிகளையே கையாள வேண்டும்” எனப் பேசியுள்ளார்.