நிர்பயா வழக்கு: மறுஆய்வு மனுமீது உச்ச நீதிமன்றம் இன்று தீர்ப்பு!

மருத்துவ மாணவி நிர்பயா, பாலியல் வன்கொடுமை செய்யப்பட்டு கொலைசெய்யப்பட்ட வழக்கில், குற்றவாளிகள் தாக்கல் செய்த மேல்முறையீட்டு மனுக்கள் மீது இன்று உச்ச நீதிமன்றம் தீர்ப்பு வழங்குகிறது.

நிர்பயா

டெல்லியில், கடந்த 2012-ம் ஆண்டு டிசம்பர் மாதம், ஓடும் பேருந்தில் மருத்துவ மாணவி நிர்பயாவை ஆறு பேர் சேர்ந்த கும்பல் கூட்டு பாலியல் வன்கொடுமை செய்தது. அப்போது அவர் கொடூரமாகத் தாக்கப்பட்டார். பின்னர் மருத்துவமனையில் சேர்க்கப்பட்ட அவர் சிகிச்சை பலனின்றி உயிரிழந்தார். இந்த வழக்கு தொடர்பாக ராம்சிங், அக்ஷய் தாகூர், வினய் சர்மா, பவன் குப்தா, முகேஷ் மற்றும் சிறுவன் ஒருவன் என ஆறு பேரை போலீஸார் கைதுசெய்தனர். 

இளம் குற்றவாளியான சிறுவன், சீர்திருத்தக் காப்பகத்துக்கு அனுப்பப்பட்டான். மற்ற ஐந்து பேருக்கும் டெல்லி பெருநகர நீதிமன்றம் மரண தண்டனை விதித்துத் தீர்ப்பு அளித்தது. குற்றவாளிகள், டெல்லி திகார் சிறையில் அடைக்கப்பட்டனர். இதில், முக்கியக் குற்றவாளியான ராம்சிங், 2014–ம் ஆண்டு மார்ச் மாதம் சிறையில் தூக்குப்போட்டுத் தற்கொலை செய்துகொண்டார். 

இந்நிலையில், பவன் குப்தா, முகேஷ் மற்றும் வினய் சர்மா ஆகிய மூவரும் தங்களுக்கு விதிக்கப்பட்ட மரண தண்டனையை ரத்து செய்யக்கோரி உச்ச நீதிமன்றத்தில் மனு தாக்கல் செய்தனர். இதில், அக்சய்குமார் சிங் என்ற நான்காவது குற்றவாளி மட்டும் மேல்முறையீட்டு மனுத்தாக்கல் செய்யவில்லை. இதையடுத்து, மூவரின் தண்டனையை ரத்து செய்யக் கோரி தாக்கலான மனு மீது உச்ச நீதிமன்றம் இன்று தீர்ப்பு வழங்குகிறது.  

Do you like the story?

Please Appreciate the Author by clapping!