வெளியிடப்பட்ட நேரம்: 04:00 (06/12/2018)

கடைசி தொடர்பு:10:59 (06/12/2018)

”இனிமேலாச்சும் பிரதமர் வேலையைப் பாருங்க...” - மோடியைக் கிண்டலடித்த ராகுல்!

`இனிமேலாவது பார்ட் டைமாகப் பார்க்கும் பிரதமர் வேலைக்கு நேரம் ஒதுக்குங்கள்” என்று ராகுல் காந்தி தனது ட்விட்டர் பக்கத்தில் மோடியைக் கிண்டலடித்துள்ளார்.

ராகுல்காந்தி

தெலங்கானா, மத்தியப் பிரதேசம், ராஜஸ்தான் உள்ளிட்ட 5 மாநிலத் தேர்தல் பிரசாரம் நேற்றோடு நிறைவடைந்தது. டிசம்பர் 11-ம் தேதி முடிவுகள் வெளியாகிறது. ஒரு மாதத்திற்கும் மேலாக நடந்த தேர்தல் பிரச்சாரத்தில், மோடியும் ராகுலும் நடத்திய வார்த்தைப்போர்தான், ஹைலைட்டாக இருந்தது. இந்த நிலையில், ராகுல் காந்தி  ட்விட்டர் சமூக வலைதளத்தில் ஆட்டத்தை ஆரம்பித்திருக்கிறார். அவர் தனது ட்விட்டர் பக்கத்தில், “அன்புள்ள மோடி அவர்களே... இப்போது பிரசாரம் முடிந்துவிட்டது. இனிமேலேனும் நீங்கள் ‘பார்ட் டைமாக’ பார்க்கும் பிரதமர் வேலைக்கு நேரம் ஒதுக்குங்கள். நீங்கள் பிரதமராகி 1654 நாள்கள் ஆகிவிட்டன.

ஆனால், இன்னும் பத்திரிகையாளர் சந்திப்புகளில் பங்கேற்காமல் இருக்கிறீர்கள். அதை, ஒருநாள் முயற்சி செய்யுங்கள். கேள்விகளை எதிர்கொள்வது கொண்டாட்டமாக இருக்கும்” என்று கூறியிருக்கிறார். மேலும், ஹைதராபத்தில் தான் கலந்துகொண்ட பத்திரிகையாளர் சந்திப்பின் புகைப்படங்களையும் ராகுல் பகிர்ந்துள்ளார். 2014-ம் ஆண்டு பிரதமராவதற்கு முன்னால், மோடி பலமுறை பத்திரிகையாளர் சந்திப்புகளில் பங்கேற்றார். அதற்குப் பிறகு, பத்திரிகையாளர் சந்திப்புகளைத் தொடர்ந்து தவிர்த்துவருகிறார். பொதுக்கூட்டங்கள் மற்றும் ‘மன் கி பாத் பண்பலை நிகழ்ச்சியில் மட்டுமே, பிரதமர் மோடி பேசிவருகிறார்.