Published:Updated:

‘ஏடிஎம் மூலம் பரவிய கொரோனா; 3 ராணுவ வீரர்கள் பாதிப்பு’ - அதிர்ச்சிகொடுத்த ட்ராக் ஹிஸ்டரி

ஏ.டி.எம்
ஏ.டி.எம்

குஜராத்தில் பணம் எடுக்கும் ஏடிஎம் மூலம் மூன்று ராணுவ வீரர்களுக்கு கொரோனா பரவியுள்ளது முதல்கட்ட விசாரணையில் தெரியவந்துள்ளது.

இந்தியாவில், கொரோனா வைரஸால் பாதிக்கப்படுபவர்களின் எண்ணிக்கை நாளுக்குநாள் தொடர்ந்து அதிகரித்துவருகிறது. இதை கட்டுப்படுத்தத்தான் கடந்த ஒரு மாதத்துக்கும் மேலாக தேசிய அளவில் ஊரடங்கு அமல்படுத்தப்பட்டுள்ளது. மேலும், அத்தியாவசிய தேவைகளுக்காக வெளியில் செல்லும் மக்கள், கட்டாயம் சமூக இடைவெளியைக் கடைப்பிடிக்க அறிவுறுத்தப்படுகிறார்கள். தற்போது வரை இந்தியாவில் கொரோனாவால் பாதிக்கப்பட்டவர்களின் எண்ணிக்கை 23,077 - ஆகவும் உயிரிழந்தவர்களின் எண்ணிக்கை 718 - ஆகவும் உள்ளதாக மத்திய சுகாதாரத்துறையின் அதிகாரபூர்வ கொரோனா இணையப் பக்கத்தில் குறிப்பிடப்பட்டுள்ளது.

கொரோனா வைரஸ்
கொரோனா வைரஸ்

இந்நிலையில், குஜராத் மாநிலம் பரோடாவில், பாதுகாப்புப் பணியில் ஈட்டுப்பட்டிருந்த மூன்று இந்திய ராணுவ வீரர்களுக்கு கொரோனா தொற்று இருப்பது உறுதிசெய்யப்பட்டுள்ளது. அவர்கள் மூவரும் மருத்துவமனையில் அனுமதிக்கப்பட்டு சிகிச்சைபெற்று வருகின்றனர். இந்த மூன்று பேருடன் நெருங்கிய தொடர்பிலிருந்த சக வீரர்கள் உட்பட, 28 பேர் தனிமைப்படுத்தப்பட்டுள்ளதாகக் கூறப்படுகிறது.

`வங்கி, ஏ.டி.எம் மையம் செல்லத் தேவையில்லை; வீடு தேடி பணம் வரும்!' - கைகொடுக்கும் தபால்துறை சேவை

இவர்களுக்கு கொரோனா எப்படிப் பரவியிருக்கும் என்பது தொடர்பாக நடந்த ட்ராக் ஹிஸ்டரியில், மூவரும் ஒரே நாளில் ஒரு ஏடிஎம்மை உபயோகித்திருப்பது முதல் கட்ட விசாரணையில் தெரியவந்துள்ளது. பின்னர், அந்த ஏடிஎம் சீல் செய்யப்பட்டு தூய்மைப்படுத்தப்பட்டுள்ளது. அந்த ஏடிஎம்மை பயன்படுத்திய பொதுமக்களும் தாங்களாக முன்வந்து அரசுக்குத் தகவல் தெரிவித்து, தங்களைத் தனிமைப்படுத்திக்கொள்ளுமாறு பரோடா நகர அதிகாரிகள் கேட்டுக்கொண்டுள்ளனர்.

ராணுவ வீரர்கள்
ராணுவ வீரர்கள்

இதேபோல், ஜம்மு - காஷ்மீரின் குப்வாராவில் உள்ள பட்டாலியனில் நர்ஸிங் உதவியாளராகப் பணிபுரிந்துவந்த மேலும் ஒரு ராணுவ வீரருக்கும் கொரோனா தொற்று உறுதியாகியுள்ளது. இவர், டெல்லி மருத்துவமனையில் அனுமதிக்கப்பட்டுள்ளார். அவருடன் தொடர்பிலிருந்தவர்களும் தனிமைப்படுத்தப்பட்டுள்ளனர்.

அடுத்த கட்டுரைக்கு