Published:Updated:

`போலீஸ் அங்கிள்... எங்க அக்காவை அரெஸ்ட் பண்ணுங்க..!’- 8 வயதுச் சிறுவன் புகாரும் கலகலப்பு பின்னணியும்

காவலர்
காவலர் ( Representational Image )

பணியை முடித்துவிட்டு வீடு திரும்பிக்கொண்டிருந்த காவலரைப் பார்த்த 8 வயதுச் சிறுவன், `போலீஸ் அங்கிள் கொஞ்சம் நில்லுங்க’ என்று சொல்லி விட்டு கையில் தயாராக எழுதி வைத்திருந்த புகார் மனுவைக் கொடுத்தான்.

கொரோனா ஊரடங்கு காரணமாக ஏராளமானோர் அன்றாட வேலைகளுக்குச் செல்ல முடியாமல் உணவுக்கே வழியின்றி தவித்து வருகிறார்கள். ஆனாலும், ஒரு சில சம்பவங்கள் கொரோனா கால வேதனையை மறந்து சிரிக்க வைத்துவிடுகிறது. அத்தகைய சம்பவம் கோழிக்கோடு மாவட்டத்தில் நடந்திருக்கிறது. 

`மீண்டும் அதே வார்டில் பணியாற்ற விரும்புகிறேன்!’-கொரோனா பாதிப்பிலிருந்து மீண்ட நர்ஸ் உருக்கம்

கோழிக்கோடு மாவட்டம் கசாபா காவல்நிலையத்தில் பணியாற்றி வரும் காவலர் ஒருவர், தன்னுடைய வேலை நேரம் முடிந்ததால் வீடு திரும்பிக்கொண்டிருந்தார். அவர் செல்வதைப் பார்த்ததும் ஓடோடி வந்த 8 வயதுச் சிறுவன், `போலீஸ் அங்கிள்...’ என அழைத்ததால், அவர் வாகனத்தை நிறுத்தியுள்ளார்.

சோர்வடைவதில் இருந்து தப்பிக்க வழி! - க்வாரன்டீனில் இருப்பவர்களுக்கு புத்தகம் வழங்கும் காவல்துறை

அந்தச் சிறுவனின் கையில் ஆங்கிலத்தில் எழுதப்பட்ட புகார் மனு இருந்துள்ளது. அதைக் காவலரிடம் கொடுத்த சிறுவன், `இந்தப் புகாரை விசாரித்து உடனடியாக என்னுடைய 10 வயது அக்காவையும் அவருடைய தோழிகளையும் கைது செய்ய வேண்டும்’ என வலியுறுத்தினான்.

representational image
representational image

மூன்றாம் வகுப்பு படிக்கும் அந்தச் சிறுவனிடம் காவலர் எவ்வளவோ எடுத்துச் சொல்லியும் அவன் கேட்க மறுத்ததுடன், தன்னுடைய புகார் மீது நடவடிக்கை எடுத்தே தீர வேண்டும் என வலியுறுத்தியதால் அந்தக் காவலர் சரியெனச் சொல்லிவிட்டுச் சென்றார்.

காவல் நிலையத்துக்குச் சென்று நடந்த விவரங்களை உயரதிகாரியிடம் தெரிவித்ததும், அந்தச் சிறுவனின் சகோதரியையும் அவருடைய தோழிகளையும் பெற்றோரின் உதவியுடன் அழைத்து வரச் செய்தனர். புகார் கொடுத்த சிறுவனிடம் விசாரித்தபோது, ``10 வயதுடைய என் அக்காவும் அவருடைய 14, 15 மற்றும் 18 வயதுடைய தோழிகளும் என்னை விளையாட்டில் சேர்ப்பதே இல்லை. 

என் சகோதரியும் அவரின் தோழிகளும் எப்போது விளையாடினாலும் என்னைச் சேர்ப்பதே இல்லை. அதனால் அவர்களை அரெஸ்ட் செய்யுங்க.
காவல் நிலையத்தில் சிறுவன் புகார்

நான் அவர்களோடு விளையாடச் சென்றாலும் விரட்டி விடுகிறார்கள். என்னை ஒருநாளும் விளையாட்டில் சேர்க்காமல் அவர்களாகவே விளையாடுவதுடன் என்னைப் பார்த்து கேலியாகச் சிரிக்கிறார்கள். அவர்களை நீங்கள் கைது செய்யணும்” என்று அழாத குறையாகப் புகார் செய்தார்.

கைது செய்ய வேண்டும் என்கிற ஒற்றைக் கோரிக்கையுடன் இருந்த அந்தச் சிறுவனை சமாதானப்படுத்த மேற்கொண்ட முயற்சிகள் அனைத்தும் தோல்வியில் முடிந்தன. அதனால் சிறுவனின் சகோதரியையும் அவருடைய தோழிகளையும் காவல்துறையினர் அழைத்துப் பேசினார்கள்.

கேரள காவல்துறை
கேரள காவல்துறை

அவர்களிடம், இனிமேல் சிறுவனையும் விளையாட்டில் சேர்க்க வேண்டும் என்று போலீஸார் நிபந்தனை விதித்தார்கள். அதற்குச் சிறுமிகளும் ஒப்புக்கொண்டு அந்தச் சிறுவனிடம் உறுதியளித்தனர். அதன் பிறகே அந்தச் சிறுவன் மகிழ்ச்சியாகப் பெற்றோருடன் வீட்டுக்குச் சென்றான்.

வீட்டுக்குப் போகும்போது, `போலீஸ் அங்கிள் ரொம்ப தாங்க்ஸ்...’ என்று சொன்னதைக் கேட்டு அந்த போலீஸ் ஸ்டேஷனே கலகலப்படைந்தது.

அடுத்த கட்டுரைக்கு