Published:Updated:

International yoga day:`கொரோனா நோயாளிகள் யோகாவால் பலனடைகிறார்கள்!’ - பிரதமர் மோடி

பிரதமர் மோடி
பிரதமர் மோடி

``ஆரோக்கியமான ஒரு பூமியை நோக்கிய மனிதர்களின் தேடலை இந்த யோகா மேம்படுத்துகிறது. ஒற்றுமைக்கான சக்தியாகவும் மனிதகுலத்தின் பிணைப்புகளை ஆழப்படுத்தும் ஒன்றாகவும் யோகா உள்ளது.”

உலகம் முழுவதும் சர்வதேச யோகா தினம் இன்று கடைப்பிடிக்கப்படுகிறது. பிரதமர் மோடி, 2014-ம் ஆண்டு ஐ.நா சபையில் ஜூன் மாதம் 21-ம் தேதியை சர்வதேச யோகா தினமாக அறிவிக்க வேண்டும் எனக் கேட்டுக்கொண்டார். பிரதமரின் வேண்டுகோளை ஏற்று ஐ.நா-வும் சர்வதேச யோகா தினத்தை அறிவித்தது. உலகின் பல நாடுகளிலும் இந்த யோகா தினம் கொண்டாடப்படுகிறது. இந்தியாவின் அரசியல் தலைவர்கள், பிரபலங்கள் உட்பட பலரும் யோகா தினத்தை முன்னிட்டு இன்று காலை பயிற்சிகளை மேற்கொண்டனர். அதன் நன்மைகளை எடுத்துரைக்கும் வகையில் சமூக வலைதளங்களில் பதிவிட்டும் வருகின்றனர். இந்த நிலையில், பிரதமர் மோடியும் யோகாவின் நன்மைகளை விளக்கும் வகையில் இன்று காலை மக்களிடம் உரையாற்றினார்.

யோகா செய்யும் ஜனாதிபதி ராம்நாத் கோவிந்த்
யோகா செய்யும் ஜனாதிபதி ராம்நாத் கோவிந்த்

இந்த நிலையில் பிரதமர் மோடி நாட்டு மக்களிடம் பேசுகையில், ``கொரோனா வைரஸ், மனிதர்களின் சுவாசப் பகுதியில் அதிகளவு பாதிப்பை ஏற்படுத்துகிறது. நமது சுவாச மண்டலத்தை வலிமையாக்க பிராணயாமா பயிற்சிகளை மேற்கொள்ள வேண்டும். சுவாசப் பயிற்சி போன்ற யோகா பயிற்சிகளை அன்றாட வாழ்க்கையின் ஓர் அங்கமாக நாம் மாற்றிக்கொள்ள வேண்டும். யோகா பயிற்சிகள் நோய் எதிர்ப்பு சக்தியை அதிகரிக்கும். வளர்சிதை மாற்றத்தை வலிமையாக மாற்றும். உலகம் எங்கும் உள்ள கொரோனா வைரஸால் பாதிப்படைந்த நோயாளிகள் யோகா பயிற்சிகளை மேற்கொள்வதன் காரணமாகப் பலன் அடைகிறார்கள். கடினமான நேரங்களில் போராடி வெற்றி பெற யோகா பயிற்சிகள் நம்பிக்கையை அளிக்கிறது. உடல் வலிமையையும் மன அமைதியையும் யோகா நமக்கு தருகிறது. எப்போதும் இல்லாத அளவுக்கு யோகாவின் தேவையை நாம் உணர்ந்துள்ளோம்” என்று பேசினார்.

Vikatan

இந்தியாவில் கடந்த சில தினங்களாக கொரோனா வைரஸ் பாதிப்பு அதன் உச்சத்தை அடைந்து வருவதாகக் கூறப்படுகிறது. கொரோனா வைரஸால் பாதிப்படைந்தவர்களின் எண்ணிக்கை இந்தியாவில் 4 லட்சத்தைக் கடந்துள்ளது. கொரோனா வைரஸால் பாதிப்படைந்து உயிரிழந்தவர்களின் எண்ணிக்கையும் 13,000-த்தை நெருங்கியுள்ளது. உலகம் முழுவதும் பாதிப்படைந்தவர்களின் எண்ணிக்கை 90 லட்சத்தை நெருங்கியுள்ளது. உலகளவில் இறந்தவர்களின் எண்ணிக்கையும் 4.60 லட்சத்தைக் கடந்துள்ளது. இந்த வைரஸைக் கட்டுப்படுத்த அமல்படுத்தப்பட்ட ஊரடங்கால் மக்கள் பலரும் வீடுகளிலேயே முடங்கியுள்ளனர். இதனால், இந்த ஆண்டு `Yoga at Home and Yoga with Family' என்ற தலைப்பின் கீழ் யோகா தினத்தை கொண்டாடுவதாக மோடி குறிப்பிட்டார்.

யோகா செய்யும் வீரர்கள்
யோகா செய்யும் வீரர்கள்

தொடர்ந்து அவர் பேசும்போது, ``இந்த ஆண்டு யோகா தினத்தை வீடுகளில் இருந்தபடி நாம் கொண்டாடுகிறோம். குடும்பத்துடனான உறவை வலுப்படுத்தும் ஒரு நாளாக இது அமையும். ஆரோக்கியமான ஒரு பூமியை நோக்கிய மனிதர்களின் தேடலை இந்த யோகா மேம்படுத்துகிறது. ஒற்றுமைக்கான சக்தியாகவும் மனிதகுலத்தின் பிணைப்புகளை ஆழப்படுத்தும் ஒன்றாகவும் யோகா உள்ளது. யோகா பாகுபாடுகளைக் காட்டாது. இனம், நிறம், பாலினம், நம்பிக்கைகள் ஆகியவற்றுக்கு அப்பாற்பட்டது. யார் வேண்டுமானாலும் யோகாவை கற்றுக்கொள்ள முடியும். நம்முடைய ஆரோக்கியத்தையும் நம்பிக்கையையும் வளர்த்துக்கொள்ள முடிந்தால், ஆரோக்கியமான மற்றும் மகிழ்ச்சியான மனிதகுலத்தை இந்த உலகம் காணும் நாள் வெகு தொலைவில் இல்லை. இதைச் செய்ய யோகா நமக்கு நிச்சயமாக உதவும்” என்று கூறினார்.

மத்திய உள்துறை அமைச்சர் அமித் ஷாவும் யோகா தினத்தை முன்னிட்டு இன்று காலை தனது ட்விட்டர் பக்கத்தில், ``யோகா என்பது உடல் மற்றும் மனம், சிந்தனை மற்றும் செயல்பாடு, மனிதத்தன்மை மற்றும் இயற்கை ஆகியவற்றுக்கு இடையே நல்லிணக்கத்தை ஏற்படுத்துவதற்கான ஒரு வழி. மோடியின் முயற்சியால் யோகா உலகளவில் ஏற்றுக்கொள்ளப்பட்டது” என்று பதிவிட்டுள்ளார்.

Vikatan
அடுத்த கட்டுரைக்கு