Published:Updated:

`சீன நிறுவனங்களின் ஹவாலா நெட்வொர்க்; டெல்லியில் அதிரடி ரெய்டு!’ - சிக்கிய சீன நபர்

 லூவோ சாங்
லூவோ சாங்

இந்தியாவில் சீன நிறுவனங்களின் ஹவாலா பரிவர்தனைகளில் முக்கியமானவர் இந்த சார்லி பாங். இவர் ஏற்கெனவே 2018-ம் ஆண்டில் ஹவாலா வழக்கில் டெல்லி போலீஸாரால் கைது செய்யப்பட்டு, பின்னர் நீதிமன்றம் மூலம் விடுதலை ஆனார்.

இந்தியாவில் சீன நிறுவனங்களின் ஹவாலா நெட்வொர்க், வருவான வரித்துறை அதிகாரிகளுக்கு கிடைத்த ரகசிய தகவல் மூலம் கண்டுபிடிக்கப்பட்டுள்ளது. இந்த நெட்வொர்க் மூலம் சுமார் 1,000 கோடி ரூபாய்க்கு ஹவாலா பண பரிவர்த்தனைகள் நடைபெற்று இருப்பதாக சந்தேகிக்கப்படுகிறது.

ஹவாலா
ஹவாலா
மாதிரி படம்

ஹவாலா பணம்:

ஹவாலா பண பரிவர்த்தனைகள் சட்டவிரோதமானது. இந்தியாவில் ஹவாலா பரிவர்த்தனைகளைத் தடுக்க பல்வேறு நடவடிக்கைகள் தொடர்ந்து கடுமையாக எடுக்கப்பட்டு வந்தாலும், முழுமையாகத் தடுக்க முடியவில்லை என்பதுதான் உண்மை. சட்டபூர்வமாக வங்கிகள் மூலம் பண பரிமாற்றம் செய்யும்போது முறையாக வரி கட்ட வேண்டும். சட்ட விரோதமாகக் கிடைக்கும் பணத்தை வங்கிகள் மூலம் அனுப்ப முடியாது. அனுப்பும் பணத்துக்கான ஆவணங்களை சமர்ப்பிக்க வேண்டும். பரிவர்தனைக்கான கமிஷன் தொகையும் அதிகம். அதனால் சட்ட விரோதமாக சம்பாதித்த அல்லது ஆவணங்கள் அல்லாத பண பரிவர்த்தனைகளுக்கு ஹவாலா ஏஜென்ட்டுகளை அணுகிறார்கள் பலர். ஹவாலா வாலா என்று அழைக்கப்படும் இவர்களிடம் கமிஷனும் குறைவு. பணத்துக்கான ஆவணங்களும் தேவையில்லை.

டெல்லி மற்றும் அதன் சுற்றுவட்டாரப் பகுதிகளில் உள்ள சில சீன நிறுவனங்கள், ஒருசில இந்திய நிறுவனங்களுடன் சேர்ந்து ஹவாலா மற்றும் அன்னிய செலாவணி மோசடியில் ஈடுபடுவதாக வருமான வரித்துறைக்கு, புலனாய்வு அமைப்புகள் மூலம் ரகசிய தகவல் கிடைத்தது. இந்த ரகசிய தகவல் அடிப்படையில் வருமான வரித்துறை நேற்று டெல்லியில் 21 இடங்களிலும், காஸியாபாத், குருகிராம் உள்ளிட்ட பகுதிகளிலும் அதிரடி சோதனை மேற்கொண்டது.

வருமான வரி
வருமான வரி

நேற்று இரவு வரையில் கிட்டத்தட்ட 300 கோடி ரூபாய்க்கு ஹவாலா பண பரிவர்த்தனை நடந்திருப்பது கண்டுபிடிக்கப்பட்டுள்ளதாகவும், சோதனைகள் நிறைவடைந்து முழு விசாரணைக்குப் பின்னர், சுமார் 1,000 கோடி ரூபாய் வரையில் ஹவாலா மற்றும் அன்னிய செலாவணி மோசடி நடைபெற்று இருப்பது கண்டுபிடிக்க வாய்ப்பு இருப்பதாகவும் அதிகாரிகள் தெரிவித்திருக்கிறார்கள்.

இது தொடர்பாக மத்திய நேரடி வரிகள் வாரியம் வெளியிட்டுள்ள அறிக்கையில், ``சில சீன தனிநபர்களின் கட்டளையின் பெயரில் பல்வேறு போலி நிறுவனங்கள் உருவாக்கப்பட்டு அந்நிறுவனங்கள் மூலம் சுமார் 40-க்கும் மேற்பட்ட வங்கிக் கணக்குகள் தொடங்கி, ஒரு குறிப்பிட்ட காலகட்டத்தில் அதில் 1,000 கோடி ரூபாய்க்கு மேல் வரவு வைக்கப்பட்டுள்ளது, எங்களின் ரெய்டு நடவடிக்கை மூலம் தெரிய வந்திருக்கிறது” எனத் தெரிவித்திருக்கிறது. மேலும், இந்த மோசடியில் சில வங்கி ஊழியர்கள் மற்றும் ஆடிட்டர்களின் பங்களிப்பும் இருப்பதும் கண்டுபிடிக்கப்பட்டுள்ளதாக மத்திய நேரடி வாரியம் தெரிவித்திருக்கிறது. ஹாங்காங் மற்றும் அமெரிக்க டாலர்கள் சம்பந்தப்பட்ட வெளிநாட்டு ஹவாலா பரிவர்த்தனைகளின் ஆதாரங்களும் இந்தச் சோதனையில் கண்டுபிடிக்கப்பட்டுள்ளன.

ஹவாலா பணம்
ஹவாலா பணம்
மாதிரி படம்

இந்த விவகாரங்களில் தொடர்புடைய சீன நபர் ஒருவர் கைது செய்யப்பட்டிருக்கிறார். லூவோ சாங் (Luo Sang) என்று அறியப்படும் இவர் இந்தியாவில் சார்லி பாங் என்ற பெயரில் வலம் வந்திருக்கிறார். அந்தப் பெயரில் அவரிடம் இந்திய போலி பாஸ்போர்ட் இருந்ததும் கண்டுபிடிக்கப்பட்டுள்ளதாக அதிகாரிகள் தெரிவித்திருக்கிறார்கள். இது தொடர்பான விசாரணையில் மணிப்பூர் மாநிலத்தில் இருந்து அவர் போலி பாஸ்போர்ட் பெற்றிருக்கிறார் எனத் தெரிய வந்திருக்கிறது. மேலும், பல்வேறு இந்திய பெயர்களில் 8 முதல் 10 வங்கி கணக்குகளையும் இவர் பயன்படுத்தி வந்ததும் கண்டு பிடிக்கப்பட்டுள்ளது.

இந்தியாவில் சீன நிறுவனங்களின் ஹவாலா பரிவர்த்தனைகளில் முக்கியமானவர் இந்த சார்லி பாங். இவர் ஏற்கெனவே 2018-ம் ஆண்டில் ஹவாலா வழக்கில் டெல்லி போலீஸாரால் கைது செய்யப்பட்டு, பின்னர் நீதிமன்றம் மூலம் விடுதலை ஆனார் என இந்தியா டுடே செய்தி நிறுவனம் குறிப்பிட்டுள்ளது. அந்த வழக்கு தொடர்பான விசாரணையும் இனி உயிர் பெறும் என எதிர்பார்க்கப்படுகிறது.

லூவோ சாங்
லூவோ சாங்

இந்த ஹவாலா பரிவர்த்தனை தொடர்பாக சீன நிறுவனங்களிலும் அது தொடர்பான நபர்களின் இடங்களிலும் இரண்டு வங்கி ஊழியர்களின் இடங்களிலும் சோதனை நடைபெற்றதாகக் கூறப்படுகிறது. முழு விசாரணையின் முடிவில் ஹவாலா பரிவர்த்தனையின் உண்மையான விவரங்கள் தெரிய வரும் என்கிறார்கள் அதிகாரிகள்.

அடுத்த கட்டுரைக்கு