Published:Updated:

`பசிக்கொடுமை; நிர்கதியான தொழிலாளர்கள்’ - குப்பையிலிருந்து உணவு தேடும் அவலம்

தொழிலாளர்கள்
தொழிலாளர்கள்

முறையான உணவு இல்லாததால் குப்பைகளில் இருக்கும் பழங்களைப் பொறுக்கி உண்ணும் நிலைக்குத் தள்ளப்பட்டுள்ளனர் புலம் பெயர்ந்த தொழிலாளர்கள்.

ஒட்டுமொத்த மனிதகுலத்துக்கும் தற்போது பெரும் எதிரியாக மாறியுள்ளது கொரோனா வைரஸ். கண்ணுக்கே தெரியாத உயிரினத்துக்கு எதிராகக் கடந்த மூன்று மாதங்களாக உலகமே போர் நடத்தி வருகிறது. வளர்ந்த நாடுகள், வளரும் நாடுகள், ஏழை நாடுகள் என யாருக்கும் எந்த வித்தியாசமும் காட்டாமல் அனைவருக்கும் ஒரே மாதிரியான பாதிப்பை ஏற்படுத்தியுள்ளது இந்த வைரஸ். கொரோனா என்ற வார்த்தை காதுகளில் கேட்காத விடியலுக்காகப் புவியே தவம் கிடந்துகொண்டிருக்கிறது.

கொரோனா வைரஸ்
கொரோனா வைரஸ்

கொரோனாவால் பாதிக்கப்பட்டவர்களைப் போன்று பாதிப்பு இல்லாதவர்களும் தினம் தினம் பல்வேறு சிரமங்களைச் சந்தித்து வருகின்றனர். குறிப்பாக, புலம்பெயர்ந்த தொழிலாளர்கள். இந்தியாவைப் பொறுத்தவரை நாட்டின் அனைத்து முக்கிய நகரங்களிலும் லட்சக்கணக்கான புலம்பெயர்ந்த தினக்கூலி தொழிலாளர்கள் வாழ்ந்து வருகின்றனர். வைரஸுக்காகப் பிறப்பிக்கப்பட்டுள்ள ஊரடங்கு அவர்கள் வாழ்வைத்தான் ரணமாக்கிக்கொண்டிருக்கிறது.

இந்தியாவில் ஊரடங்கு பிறப்பிக்கப்பட்டதும் போக்குவரத்து இல்லாததால் ஆயிரக்கணக்கான தொழிலாளர்கள் பல நூறு கிலோமீட்டர்கள் நடந்தே தங்கள் சொந்த ஊருக்குச் சென்றனர். இந்த விஷயம் தேசிய அளவில் பெரும் சர்ச்சையாக வெடித்தது. பிறகு புலம் பெயர்ந்தவர்களுக்கு அரசு சார்பில் தங்க இடமும் உணவும் வழங்க ஏற்பாடு செய்யப்பட்டது. பின்னர், இந்த பிரச்னை சற்று ஓய்ந்தது. தொடர்ந்து 2 தினங்களுக்கு முன்பு இந்தியாவில் மீண்டும் ஊரடங்கு நீட்டிக்கப்பட்டதும் மும்பை பாந்த்ரா பகுதியில் திரண்ட தொழிலாளர்கள் தங்களைச் சொந்த ஊர்களுக்கு அனுப்பி வைக்குமாறு போராட்டம் நடத்தினர். இறுதியில் போலீஸார் தடியடி நடத்தி கூட்டத்தைக் கலைத்தனர். இந்த விஷயமும் பரபரப்பை ஏற்படுத்தியது.

தொழிலாளர்கள்
தொழிலாளர்கள்

இப்படியான தொழிலாளர்களுக்கு முறையாக உணவு கிடைக்காததால் சாலையில் கொட்டப்படும் குப்பைகளிலிருந்து உணவு சேகரிக்கும் நிலைக்குத் தள்ளப்பட்டுள்ளனர். டெல்லியில் யமுனை நதிக்கரையில் உள்ள நிகாம்போத் காட் என்ற பகுதியில்தான் இந்தக் கொடுமையான சம்பவம் நடந்துள்ளது. டெல்லியில் இருக்கும் முக்கியமான இறுதிச் சடங்கு செய்யும் இடங்களில் இதுவும் ஒன்று.

`வேலை இல்லைன்னா கூலி இல்ல.. சோறும் இல்ல!’- கலங்கும் புலம்பெயர்ந்த தொழிலாளர்கள்

இங்கு தூக்கி வீசப்படும் வாழைப்பழங்களிலிருந்து நல்லதாக பொறுக்கி எடுத்து தொழிலாளர்கள் உண்டு வருகின்றனர். அங்கு வீசப்படும் வாழைப்பழங்களில் பெரும்பாலானவை இறுதிச் சடங்கு செய்யப் பயன்படுத்தப்பட்டவை. அவற்றை எடுத்து சாப்பிடும் நிலைக்குத் தள்ளப்பட்டுள்ளனர் தொழிலாளர்கள்.

“எங்களுக்கு வழக்கமாக உணவு கிடைப்பதில்லை. எனவே, இப்படி கிடைக்கும் பழங்களைச் சேகரித்து உண்கிறோம். வாழைப்பழங்கள் சீக்கிரம் கெட்டுப்போகாது. நல்ல பழங்களைப் பொறுக்கி எடுத்துவிட்டால் அது ஒரு வேளை சாப்பாட்டுக்காவது உதவும்” என வேதனையுடன் தெரிவித்துள்ளார் அலிகாரைச் சேர்ந்த ஒரு தொழிலாளி.

தொழிலாளர்கள்
தொழிலாளர்கள்

முதல் 21 நாள்கள் ஊரடங்குக்கே இந்த நிலை, தற்போது இன்னும் 19 நாள்கள் நீட்டிக்கப்பட்டுள்ளதால் தொழிலாளர்கள் சொல்ல முடியாத இன்னலைச் சந்தித்து வருகின்றனர். இவர்களுக்கு உணவு மட்டுமாவது முறையாக வழங்க வேண்டும் எனச் சமூக ஆர்வலர்கள் கோரிக்கை விடுத்துள்ளனர். இந்தியாவில் வைரஸுக்கு நிகராகப் பட்டினியும் பெரும் பிரச்னையாக இருப்பதாக நெட்டிசன்கள் கருத்து தெரிவித்து வருகின்றனர்.

News Credits : NDTV

அடுத்த கட்டுரைக்கு