Published:Updated:

`இந்துக்களுக்கு யாகம்... சீக்கியர்களுக்கு கிர்தான்!' -டெல்லியைக் கதிகலக்கிய `சர்வ தர்ம சமா பவா’

டெல்லி போராட்டம்
டெல்லி போராட்டம் ( Twitter )

குடியுரிமை சட்டத் திருத்தத்துக்கு எதிர்ப்பு தெரிவித்து, டெல்லி ஷஹீன் பாக் பகுதியில் ஆயிரக்கணக்கான மக்கள் கலந்துகொண்ட மாபெரும் போராட்டம் நடைபெற்றது.

குடியுரிமை சட்டத் திருத்தத்தை ரத்துசெய்யக் கோரி, கடந்த ஒரு மாதமாக நாட்டின் பல்வேறு இடங்களிலும் தொடர் போராட்டங்கள் நடைபெற்றுவந்தன. அரசியல் கட்சித் தலைவர்கள், பொதுமக்கள், மாணவர்கள் எனப் பலதரப்பினரும் குடியுரிமை சட்டத்தை எதிர்த்து ஆர்ப்பாட்டம் நடத்தி வருகின்றனர். இதனால் பல்வேறு மாநிலங்கள் கடுமையான பிரச்னைகளை எதிர்கொண்டன.

டெல்லி போராட்டம்
டெல்லி போராட்டம்
Twitter

உயிரிழப்பு, படுகாயம், கண்ணீர்ப் புகைக்குண்டுவீச்சு, தடியடி, பொதுச் சொத்துகளுக்கு சேதம், வாகனங்களுக்குத் தீவைப்பு போன்ற பல்வேறு சம்பவங்கள் நடந்தன. இவை அனைத்தும் தற்போதுதான் சற்று ஓய்ந்துள்ளது. அதற்குள், நாடு முழுவதும் குடியுரிமை சட்டத் திருத்தம் அமலானதாக மத்திய உள்துறை அமைச்சகம் அறிவிப்பு வெளியிட்டது. இந்த அறிவிப்பு, போராட்டம் நடத்திய பொதுமக்கள் மற்றும் அரசியல் கட்சித் தலைவர்கள் மத்தியில் அதிர்ச்சியை ஏற்படுத்தியுள்ளது.

இந்நிலையில், மத்திய அரசுக்குக் கண்டனம் தெரிவித்தும் குடியுரிமை சட்டத்தைத் திரும்பப் பெற வலியுறுத்தியும் டெல்லி ஷஹீன் பாக் பகுதியில் நடந்த போராட்டத்தில் பல ஆயிரக்கணக்கான மக்கள் கலந்துகொண்டனர். இந்தப் பகுதியில், கடந்த ஒரு மாதமாகத் தொடர் போராட்டம் நடைபெற்றுவருகிறது. ஆனால், நேற்று ‘சர்வ தர்ம சமா பவா’ (அனைத்து மதத்தினருக்கும் ஒரே கொள்கை) என்ற பல மதங்களின் பிரார்த்தனைக் கூட்டம் நடைபெற்றது. இதில் கலந்துகொண்ட மக்கள், குடியுரிமை சட்டத்துக்கு எதிராகத் தங்கள் குரலைப் பதிவுசெய்துள்ளனர்.

டெல்லி போராட்டம்
டெல்லி போராட்டம்
Twitter

நேற்றைய கூட்டத்தில், இந்துக்கள் யாகம் நடத்தினர், சீக்கியர்கள் கிர்தான் (இசை, பாடல் மூலம் இறைவனை வழிப்படுதல்) செய்தனர். அதேபோல், அனைத்து மதத்தினரும் தங்கள் முறைகளில் இறைவனை வழிபட்டு குடியுரிமை சட்டத்துக்கு தங்கள் எதிர்ப்பைத் தெரிவித்தனர். இறுதியாக, அனைவரும் இணைந்து அரசியலமைப்பின் முன்னுரையைப் படித்து, நாட்டின் மதச்சார்பின்மையைப் பாதுகாக்க உறுதிமொழி எடுத்துக்கொண்டனர்.

`பேச்சை மீறிச் சென்றான், இறுதியில்...! - அஸ்ஸாம் துப்பாக்கிச் சூட்டில் மகனை இழந்த தாய் கதறல்

காலை முதலே, நூற்றுக்கணக்கானவர்கள் மட்டுமே கூடியிருந்த அந்தப் பகுதி, பிற்பகலுக்குப் பிறகு ஆயிரத்துக்கும் மேலாக அதிகரிக்கத் தொடங்கியது. காங்கிரஸ் மூத்த தலைவர் சசிதரூரும் இதில் கலந்துகொண்டு, குடியுரிமை சட்டத் திருத்தத்துக்கு எதிராகத் தனது கருத்தைக் கூறினார்.

‘சர்வ தர்ம சமா பவா’ என்ற போராட்ட பிரார்த்தனைக் கூட்டம், முன்னதாக இந்தியாவின் சுதந்திரப் போராட்டத்தின்போது பல இடங்களில் நடைபெற்றது. மகாத்மா காந்தி, இந்தப் போராட்டத்தை அனைத்து இடங்களிலும் பரப்பினார்.

டெல்லி போராட்டம்
டெல்லி போராட்டம்
Twitter

பெரியவர்கள், இளைஞர்கள், மாணவர்கள், பெண்கள், சிறுவர்கள் எனப் பலரும் இந்தப் போராட்டத்தில் பங்கேற்றனர். இதே இடத்தில், குடியுரிமை சட்டத்துக்கு எதிர்ப்பு தெரிவித்து, ஜைனுல் ஆபிதின் என்ற 44 வயது நபர், கடந்த டிசம்பர் 16-ம் தேதி முதல் தொடர் உண்ணாவிரதப் போராட்டம் நடத்திவருகிறார். இதே போன்ற மற்றொரு கூட்டம், டெல்லியில் உள்ள இந்தியா கேட் பகுதியிலும் நடைபெற்றுள்ளது.

அடுத்த கட்டுரைக்கு