Published:Updated:

`உலகப்போரைப் போலவே கொரோனாவுக்கு முன், கொரோனாவுக்குப் பின் என உலகம் மாறிவிட்டது!’ - பிரதமர் மோடி

பிரதமர் மோடி
பிரதமர் மோடி

``கொரோனா வைரஸுக்கு எதிராகத் தடுப்பூசி அல்லது தீர்வைக் காணாத வரை வைரஸை எதிர்த்துப் போராடுவதற்கான மிகப்பெரிய ஆயுதம் தனிமனித இடைவெளி என்பதை நினைவில் கொள்ள வேண்டும்.”

கொரோனா வைரஸ் தடுப்பு நடவடிக்கைகள் தொடர்பாக பிரதமர் மோடி அனைத்து மாநில முதல்வர்களுடனும் நேற்று ஆலோசனைக் கூட்டத்தை நடத்தினார். இதில் ஊரடங்கு தளர்த்தப்பட்டதற்குப் பின்பு அரசு எடுக்க வேண்டிய நடவடிக்கைகள், பொருளாதாரத் தேவைகள், தொழிலாளர்கள் பிரச்னை, ரயில் சேவை உள்ளிட்ட பல விஷயங்கள் குறித்து விவாதிக்கப்பட்டதாகத் தகவல்கள் தெரிவிக்கின்றன. மூன்றாம் கட்ட ஊரடங்கு இன்னும் சில நாள்களில் முடிய இருப்பதால் ஊரடங்கை நீட்டிப்பது குறித்தும் விவாதிக்கப்பட்டுள்ளது. அனைத்து மாநிலங்களின் முதல்வர்களும் இந்தக் கூட்டத்தில் ஊரடங்கின் விளைவுகள், தேவையான உதவிகள் தொடர்பான கோரிக்கைகளை பிரதமருக்கு விடுத்துள்ளனர்.

பிரதமர் - முதல்வர்கள் சந்திப்பு
பிரதமர் - முதல்வர்கள் சந்திப்பு

இந்நிலையில் பிரதமர் மோடி பேசும்போது, ``கொரோனா வைரஸ் பாதிப்புக்குப் பிறகு உலகம் முற்றிலுமாக மாறியுள்ளது என்பதை நாம் புரிந்துகொள்ள வேண்டும். உலகப்போரைப் போலவே கொரோனாவுக்கு முன், கொரோனாவுக்குப் பின் என உலகம் மாறிவிட்டது. எனவே, இந்த மாற்றம் நம்முடைய செயல்பாட்டிலும் குறிப்பிடத்தக்க மாற்றங்களை ஏற்படுத்தும். ஊரடங்கை படிப்படியாகத் தளர்த்துவது பற்றிப் பார்க்கும்போது, கொரோனா வைரஸுக்கு எதிராகத் தடுப்பூசி அல்லது தீர்வைக் காணாத வரை வைரஸை எதிர்த்துப் போராடுவதற்கான மிகப்பெரிய ஆயுதம் தனிமனித இடைவெளி என்பதை நினைவில் கொள்ள வேண்டும். மாற்றம் என்பது தனிமனிதர்களிடமிருந்து தொடங்கி ஒட்டுமொத்த சமூகத்துக்கும் வர வேண்டும் என்பதன் அடிப்படையில் செயல்பட வேண்டும்” என்று கூறியுள்ளார்.

`வீட்டுக்குச் செல்ல நினைப்பது மனித இயல்பு!’ -முதல்வர்கள் ஆலோசனைக் கூட்டத்தில் பிரதமர் பேச்சு

ஒவ்வொரு மாநில முதல்வரும் உங்களது மாநிலத்தில் ஊரடங்கை கையாள்வது மற்றும் பொருளாதார நடவடிக்கைகளை தொடங்குவது தொடர்பான விஷயங்களை மே 15-ம் தேதிக்குள் என்னிடம் பகிர்ந்துகொள்ளுங்கள் என்றும் கூறியுள்ளார். ஊரடங்கு அமலில் உள்ள போதும் ஊரடங்கு முடிந்த பிறகும் கையாள வேண்டிய பல்வேறு நுணுக்கமான விஷயங்கள் குறித்து மாநில அரசுகள் ப்ளூ பிரின்ட் ஒன்றைத் தயார் செய்ய வேண்டும் என்றும் முதல்வர்களிடம் கேட்டுக்கொண்டார். மாநில அரசுகளின் நடவடிக்கைகளுக்குப் பாராட்டுகளையும் இந்தக் கூட்டத்தில் தெரிவித்திருந்தார். மேலும், ``இந்தியாவில் மோசமாகப் பாதிக்கப்பட்ட பகுதிகள் உட்பட புவியியல் சார்ந்து தொற்று நோய்களின் பரவல் குறித்து தெளிவாக நமக்கு இப்போது தெரியும். கடந்த சில வாரங்களாக இருக்கும் இதுபோன்ற சூழலில் மாவட்டங்கள் முதல் எவ்வாறு நடைமுறைகள் இருக்க வேண்டும் என அதிகாரிகள் புரிந்துகொண்டனர்” என்றும் குறிப்பிட்டுள்ளார்.

கொரோனா ஊரடங்கு
கொரோனா ஊரடங்கு
vikatan

இந்தியாவில் கொரோனா வைரஸ் தொடர்ந்து அதிக பாதிப்புகளை ஏற்படுத்தி வருவதால் மூன்றாம் கட்டமாக அமலில் இருக்கும் ஊரடங்கானது நான்காம் கட்டமாக நீட்டிக்கப்படலாம் என்றும் பாதிப்புகள் குறைந்துள்ள பகுதிகளில் கட்டுப்பாடுகள் அதிகளவில் குறைக்கப்படலாம் என்றும் அரசு வட்டாரங்கள் தெரிவித்துள்ளன. அப்படித் தொடரும் பட்சத்தில் சில புதிய கட்டுப்பாடுகள் விதிக்கப்படலாம் என்றும் கூறப்படுகிறது. ஏனெனில், பிரதமர் முதல்வர்கள் கூட்டத்தில் பேசும்போது, ``முதலில் ஊரடங்கு அமல்படுத்தப்படும்போது விதிக்கப்பட்ட கட்டுப்பாடுகள் அடுத்தடுத்த ஊரடங்குக்குத் தேவைப்படவில்லை. அதேபோல, நான்காம் கட்ட ஊரடங்குக்கும் அதற்கு முந்தைய கட்டுப்பாடுகள் தேவைப்படாது” எனக் குறிப்பிட்டதாகத் தகவல்கள் தெரிவிக்கின்றன. சிவப்பு மண்டலப் பகுதிகளில் இரவு 7 மணி முதல் காலை 7 மணி வரை ஊரடங்கு உத்தரவு, பொதுப் போக்குவரத்து தடைகள் ஆகியவை இருக்கலாம் எனக் கூறப்படுகிறது.

தொடர்ந்து அவர் பேசும்போது, ``மாநில அரசுகள் கொரோனா வைரஸைக் கட்டுப்படுத்த பல்வேறு நடவடிக்கைகளை எடுப்பது போல பொருளாதார நடவடிக்கைகளைத் தொடங்கவும் முயற்சிகளை எடுக்க வேண்டும். ஆனால், கிராமப் பகுதிகளில் இந்த வைரஸ் பரவாமல் பார்த்துக்கொள்ள வேண்டும்” எனப் பேசியுள்ளார். மேலும், புலம்பெயர்ந்த தொழிலாளர்களின் பிரச்னைகள் குறித்தும் ரயில் போக்குவரத்து சேவைகள் குறித்தும் பேசியுள்ளார். இந்த ஆலோசனைக் கூட்டத்தில் பாதுகாப்புத்துறை அமைச்சர் ராஜ்நாத் சிங், உள்துறை அமைச்சர் அமித் ஷா, நிதியமைச்சர் நிர்மலா சீதாராமன், சுகாதாரத்துறை அமைச்சர் ஹர்ஷ வர்தன் உள்ளிட்டவர்கள் பங்கேற்றனர்.

`பங்கேற்காத பினராயி; 9 பேருக்கு மட்டுமே பேச அனுமதி!’ -முதல்வர்களுடன் 3-வது முறையாக பிரதமர் ஆலோசனை
அடுத்த கட்டுரைக்கு