Published:Updated:

ஒரு வாரத்துக்கு இடமில்லை; 1.7 லட்சம் பேர் புக்கிங்! - வரவேற்பைப் பெற்ற சிறப்பு ரயில்கள்

புது டெல்லி ரயில் நிலையம்
புது டெல்லி ரயில் நிலையம் ( AP | Manish Swarup )

நாடு முழுவதும் மார்ச் மாதம் பயணிகள் ரயில் சேவை நிறுத்தப்பட்டது. அதன் பிறகு தற்போது ரயில் சேவைகள் படிப்படியாகத் தொடங்கப்பட உள்ளன. முதற்கட்டமாக அறிவிக்கப்பட்டுள்ள 30 சிறப்பு ரயில்களிலும் பயணிக்க 1.7 லட்சம் பேர் முன்பதிவு செய்தனர்.

பெருந்தொற்றாக அறிவிக்கப்பட்டுள்ள கொரோனாவுக்கு எதிராக உலக நாடுகள் பல்வேறு நடவடிக்கைகளை எடுத்து வருகின்றன. அதன் ஒரு பகுதியாக ஊரடங்கு, பொதுப் போக்குவரத்து முடக்கம் போன்றவை அமல்படுத்தப்பட்டன. இந்தியாவிலும் மார்ச் 24ம் தேதி முதல் ஊரடங்கு அமலில் இருந்து வரும் நிலையில், அது மே 17ம் தேதி வரை நீட்டிக்கப்பட்டிருக்கிறது. அதற்குப் பிறகும் ஊரடங்கு புதிய விதிமுறைகளுடன் நீட்டிக்கப்படலாம் என்று பிரதமர் மோடி அறிவித்திருக்கிறார்.

ரயில்
ரயில்
AP | Manish Swarup

இந்தநிலையில், நாடு முழுவதும் பயணிகள் ரயில் சேவை படிப்படியாக இயக்கப்படும் என்று ரயில்வே அறிவித்தது. முதற்கட்டமாக நாடு முழுவதும் பல்வேறு மார்க்கங்களில் 30 சிறப்பு ரயில்கள் அறிவிக்கப்பட்டன. உடல் வெப்பநிலை கண்காணிப்பு, முகக் கவசம் எனப் பல்வேறு முன்னெச்சரிக்கை நடவடிக்கைகளோடு இந்த ரயில்களில் பயணிக்க அனுமதிக்கப்படும் என்றும் அறிவிக்கப்பட்டிருந்தது.

தொடங்குகிறது ரயில் சேவை... பாதுகாப்பான பயணத்துக்கு என்ன செய்ய வேண்டும்? #ExpertOpinon

இதில், நாட்டின் 6 ரயில் நிலையங்களிலிருந்து நேற்று பயணத்தைத் தொடங்கிய 9 சிறப்பு ரயில்களில் சுமார் 8,000 பயணிகள் பயணமாகியிருக்கிறார்கள். மேலும், 9 சிறப்பு ரயில்கள் இன்று பயணத்தைத் தொடங்குகின்றன. ``கிட்டத்தட்ட அனைத்துச் சிறப்பு ரயில்களிலும் ஒருவாரத்துக்கு முன்பதிவு முடிந்துவிட்டது. ஒவ்வொரு ரயிலிலும் 800 முதல் 1,100 பயணிகள் பயணிக்க உள்ளனர். ஒருவாரத்தில் சிறப்பு ரயில்களில் 1.7 லட்சம் பேர் பயணிக்க இருக்கிறார்கள்’’ என்று ரயில்வே வட்டாரங்கள் தெரிவிக்கின்றன. அதேபோல், நாடு முழுவதும் பல்வேறு பகுதிகளிலிருந்து புலம்பெயர்ந்த தொழிலாளர்கள், மாணவர்கள், சுற்றுலாப் பயணிகள் என 6.8 லட்சம் பேர் ஷார்மிக் சிறப்பு ரயில்கள் மூலம் தங்கள் சொந்த ஊர்களுக்குத் திரும்பியிருப்பதாகவும் ரயில்வே துறை தரப்பில் தெரிவிக்கப்பட்டுள்ளது.

ரயில் நிலையம்
ரயில் நிலையம்
AP | Manish Swarup

பயணிகள் அனைவரும் பயணத்தைத் தொடங்குவதற்கு முன்பாகவே தங்கள் செல்போன்களில் ஆரோக்கிய சேது செயலியைத் தரவிறக்கம் செய்து வைத்திருக்க வேண்டும் என்று ரயில்வே துறை அறிவித்திருக்கிறது. மேலும், ரயில் நிலையங்களுக்கு வரும் பயணிகள் உள்துறை அமைச்சகத்தின் அறிவுறுத்தியுள்ள வழிகாட்டுதல்களைப் பின்பற்ற வேண்டும் எனவும் ரயில்வே கேட்டுக்கொண்டுள்ளது. அதேபோல், அவர்கள் பயணத்தைத் தொடங்கும் முன்பாகத் தாங்கள் சென்றடைய வேண்டிய மாநிலம் அல்லது யூனியன் பிரதேசங்களில் கடைப்பிடிக்க வேண்டிய வழிகாட்டுதல் நெறிமுறைகளையும் அறிந்துவைத்து அதைப் பின்பற்ற வேண்டியது அவசியம் என்றும் ரயில்வே துறை கூறியிருக்கிறது.

மீண்டும் தொடங்கும் ரயில் சேவை... எந்தெந்த ரயில்கள் இயங்குகின்றன... டிக்கெட் புக் செய்வது எப்படி?!

அதிகபட்சமாக இந்த ரயில்களில் 12,845 படுக்கை வசதி கொண்ட இருக்கைகள் இருக்கின்றன. இதில், ஹவுரா - புதுடெல்லி இடையே இயக்கப்படும் சிறப்பு ரயில்களில் முழுமையாக நிரம்பியிருக்கின்றன. இதற்கு அடுத்தபடியாக, பெங்களூரு - புதுடெல்லி மார்க்கத்திலும் தில்ப்ரூகர்க் - புதுடெல்லி மார்க்கத்திலும் அதிகப்படியான டிக்கெட்டுகள் புக் செய்யப்பட்டிருப்பதாக ரயில்வே துறை தெரிவித்திருக்கிறது.

அடுத்த கட்டுரைக்கு