மொபைல் டேட்டாவை மிச்சப்படுத்த கூகுள் தரும் புதிய ஆப்... டேட்டாலி! #Datally

Datally

பலநேரங்களில் ஆண்ட்ராய்டு மொபைலில் டேட்டா எப்படி காலியாகிறது என்று நமக்கே தெரியாது. டேட்டா முடிந்து டாக்டைம்மில் இருக்கும் பேலன்ஸும் போய் திண்டாடியிருப்போம். இப்படி டேட்டா விரயமாகும் பிரச்னையை தீர்க்க கூகுள் நிறுவனம் டேட்டாலி (datally) என்ற அப்பை வெளியிட்டுள்ளது. இது நமது போனின் அன்றாட டேட்டா செலவுகளை உடனுக்குடன் நமக்கு தருவதோடு அதை மிச்சப்படுத்தும் வழிகளையும் கூறிக்கொண்டே இருக்கும். மேலும் அருகில் இருக்கும் பொது இலவச Wifi வசதிகளையும் நமக்கு உடனுக்குடன் தெரியப்படுத்தும். லாலிபாப்க்கும் அதற்கு மேலான ஆண்ட்ராய்டு ஓ.எஸ்களுக்கும் பிளேஸ்டோரில் இந்த டேட்டாலி அப் கிடைக்கும் என அறிவித்துள்ளது கூகுள்.

இந்த ஆப் கூகுளின் நெக்ஸ்ட் பில்லியன் யூஸர்ஸ் (Next billion users) என்ற ஒரு பிரிவின்கீழ் உள்ள குழுவால் தயாரிக்கப்பட்டுள்ளது. இந்தப் பிரிவின் முக்கிய நோக்கம் இன்டர்நெட் வசதிகள் சரியாக இல்லாத இடங்களுக்கும் இன்டர்நெட்டை சரியான அளவிலும், நல்ல தரத்திலும் எடுத்துச்செல்வதே. ஜியோ வந்த பிறகு நம்மூரில் மொபைல் டேட்டா விலை மிகவும் குறைந்துவிட்டது. அதனால் நம்மில் பலர் இந்தப் பிரச்னையை பெரிதாக எடுத்துக்கொள்வதில்லை. ஆனால் இன்னும் பல நாடுகளில் இன்டர்நெட் வசதிகள் நம் அளவிற்கு சென்று சேரவில்லை. அதனால் அங்கு மொபைல் டேட்டாவின் விலையும் அதிகம். எனவே அதை திறம்பட பயன்படுத்த வேண்டும் என்பதற்காகவே இந்த அப் வெளியிடப்பட்டுள்ளதாக கூகுள் தெரிவித்துள்ளது.

அப்படி என்ன செய்கிறது இந்த அப்....? 
இதன் முக்கியமான வசதிகள் மூன்று. முதல் வசதி, நாம் தினசரி உபயோகிக்கும் மொபைல் டேட்டாவை நாள்வாரியாக, மாதவாரியாக, மணிவாரியாக என உங்களுக்கேற்ப எப்போது, எவ்வளவு, எந்த ஆப் எடுத்திருக்கிறது என்று துல்லியமாக காட்டுகிறது. மேலும் பைக் ஸ்பீடோமீட்டர் போன்று இப்போது எவ்வளவு டேட்டா செலவாகிக்கொண்டிருக்கிறது என்பதை நேரடியாகவும் பார்க்கலாம். இரண்டாம் வசதி, பின்னணியில் எடுக்கப்படும் டேட்டாவை இதனால் நிறுத்திவைக்கமுடியும், அதாவது நீங்கள் இப்போது பேஸ்புக் உபயோகித்து கொண்டிருக்கிறீர்கள் என்றால் பேஸ்புக்கிற்கு மட்டுமே டேட்டா செலவிடப்படும். மற்ற ஆப்களுக்கு டேட்டா நிறுத்திவைக்கப்படும். இதந்த வசதி அல்லாமல் வேறு மாதிரியும் டேட்டாவை கட்டுப்படுத்தலாம். அதாவது எந்த எந்த செயலிக்கு டேட்டா வேண்டுமோ அதைத் தவிர மற்ற ஆப்களுக்கு டேட்டாவை டேட்டாலி மூலம் ஆஃப் செய்து வைத்துவிடலாம். மூன்றாவது வசதி, பொது இடங்களில் அருகில் ஏதேனும் இலவச wifi சேவை இருந்தால் அதைப் பற்றி உடனே தெரியப்படுத்தும். இலவச wifi என்றால் மொபைல் டேட்டா பற்றி கவலையே வேண்டாமல்லவா? அதனால் இது ஒரு முக்கிய விஷயமாக கூகுள் கருதுகிறது. மேலும் ஒவ்வொரு மொபைலுக்கும் ஏற்ப, எப்படி மொபைல் டேட்டாவை சேமிக்கலாம் என அவ்வப்போது டிப்ஸும் வழங்குமாம் டேட்டாலி. இவை அனைத்தும் 6 MB சைஸ்ஸில். ஸ்டாரேஜூம் முக்கியம் அல்லவா?


இந்த செயலியின் தயாரிப்பு மேலாளரான ஜோஷ் வுட்வர்ட் "டேட்டாவை மிச்சப்படுத்த மக்கள் எந்த எல்லைக்கும் செல்ல தயாராக உள்ளனர், சிலர் தங்கள் போன்களை ஏரோபிளேன் மோடில் போட்டு அவ்வப்போது ஆன் செய்து நோட்டிபிகேஷன்களை பார்த்துவிட்டு, மீண்டும் ஏரோபிளேன் மோடிற்கு செல்கின்றனர்" என்று கூறியிருந்தார். ஆனால் உண்மையில் பார்த்தால் இதில் இருக்கும் அனைத்து விஷயங்களுமே நமது போன்களின் செட்டிங்ஸ் பகுதியில் ஆங்காங்கே ஒளிந்து கொண்டுதான் கிடக்கின்றன. அதை நம்மில் பலர் பயன்படுத்துவதே இல்லை. அதனால் தான் இதைப் போன்ற சாதாரண விஷயங்களுக்கெல்லாம் தனித்தனி ஆப் விடுவதென்று கூகுள் முடிவெடுத்துள்ளது. அந்த முடிவின் ஒரு பகுதிதான் இந்த டேட்டாலி ஆப் ரிலீஸ். இந்த அப்பை உலகம் முழுவதும் வெளியிடுவதற்கு சிலமாதங்களுக்கு முன்பு கூகுள் இதை பிலிப்பைன்ஸில் மட்டும் வெள்ளோட்டம் விட்டது. இந்தக் காலக்கட்டத்தில் 5 லட்சம் பேரால் இந்த ஆப் அங்கு உபயோகிக்கப்பட்டது. டேட்டாலியால் அனைவரும் கிட்டத்தட்ட 30 சதவிகித மொபைல் டேட்டாவை அங்கு மிச்சப்படுத்த முடிந்ததாக கூகுள் தெரிவித்துள்ளது. 

Do you like the story?

Please Appreciate the Author by clapping!