127 மில்லியன் டாலர் வருமானம்... யூடியூப் மூலம் மில்லினர்கள் ஆன ட்ரெண்டிங் ஸ்டார்கள்!

2017-ம் ஆண்டு நிச்சயம் யூடியூபுக்கு பொற்காலம்தான். காரணம், இதற்கு முன் இல்லாத அளவுக்கு பயனாளர்களின் எண்ணிக்கையும், புதிய வீடியோக்களின் எண்ணிக்கையும் பலமடங்கு அதிகரித்துவிட்டது. முன்பு இருந்ததுபோல, டேட்டா தீர்ந்துவிடுமே என்ற கவலையும் ஜியோவின் வருகைக்குப் பின்னர் மாறிவிட்டதால், மொபைலில் வீடியோ பார்ப்பவர்களின் எண்ணிக்கையும் உயர்ந்துள்ளது. தமிழ், தெலுங்கு, இந்தி, ஆங்கிலம் என எல்லா மொழிகளிலும் வீடியோக்கள் நிரம்பிவழிவதால், இந்தியாவின் எல்லா ஏரியாவிலும் இருந்தும் யூடியூபுக்குப் பயனாளர்கள் குவிகின்றனர். இப்படி, பயனாளர்களால் யூடியூப் பெற்றுள்ள வளர்ச்சி ஒருபுறமிருக்க, இன்னொருபுறமோ, யூடியூப் மூலம் மில்லியன் கணக்கில் பணம் சம்பாதித்து ஆச்சர்யப்படுத்திக் கொண்டிருக்கின்றனர் சிலர். இந்த வருடம் யூடியூப் மூலம் அதிகவருமானம் பெற்றவர்களின் பட்டியலை, ஃபோர்ப்ஸ் பத்திரிகை வெளியிட்டுள்ளது. அதில் முதலிடம் பெற்றுள்ள டேனியல் மிடில்டன், கடந்த ஜூன் மாதம் முதல் இந்த ஆண்டு ஜூன் மாதம் வரைக்கும் யூடியூப் மூலம் சம்பாதித்துள்ள தொகை எவ்வளவு தெரியுமா? 16.5 மில்லியன் டாலர்கள். (₹106.5 கோடி)

யூடியூப்

இவர்களும் பிரபலங்கள்தான்!

டேனியலின் DanTDM யூடியூப் சானலுக்கு இருக்கும் சப்ஸ்கிரைபர்களின் எண்ணிக்கை சுமார் 1.7 கோடி. கேமிங் வீடியோக்கள்தான் இவரின் ஸ்பெஷல். இவருக்கு அடுத்த இடத்தில் இருக்கும் இவான் ஃபாங் சம்பாதித்த தொகை 15.5 மில்லியன் டாலர்கள். இவரும் கேமர்தான். இந்த டாப் 10 பட்டியலில் இருக்கும் யூடியூப் பிரபலங்கள் மொத்தமாக, ஒரு ஆண்டில் சம்பாதித்த தொகை மட்டும் 127 மில்லியன் டாலர்கள். இந்தப் பட்டியலில் 8-வது இடத்தில் இருக்கும் ஒரு நபர்தான், இந்த பட்டியலின் ஒட்டுமொத்த ஆச்சர்யம். அந்த நபர் ரியான். இவரின் வயது 6. ஆம்... 6 வயது சிறுவனான ரியான்தான் கடந்த ஆண்டு 11 மில்லியன் டாலர்களை யூடியூப் மூலம் ஈட்டியிருக்கிறான். இத்தனைக்கும் ரியான் செய்வது பொம்மைகளை ரிவ்யூ செய்வது மட்டுமே. யூடியூபின் ட்ரெண்டிங் ஸ்டாரான, ரியானின் ரிவ்யூக்காகவே காத்திருக்கின்றனர் கோடிக்கணக்கான ரசிகர்கள். ரியானின் 'Ryan ToysReview' என்ற சானலுக்கு இருக்கும் மொத்த சப்ஸ்கிரைபர்களின் எண்ணிக்கை மட்டுமே 1 கோடி.

4 வயதில் தொடங்கிய யூடியூப் சானல்

ரியான் சின்ன வயதில் இருந்தே பொம்மைகளின் பிரியன். அவைகுறித்து யூடியூபில் வரும் வீடியோக்களுக்கு ரசிகன். இதைக்கண்ட ரியானின் பெற்றோர்களுக்கு உதித்த ஐடியாதான், இந்த யூடியூப் சானல். உடனே பொம்மைகளை ரிவ்யூ செய்வதற்காக ஒரு சானல் துவங்கப்பட்டது. 2015-ம் ஆண்டு மார்ச் மாதம் துவங்கப்பட்ட இந்த சானல், மிகக் குறுகிய காலத்திலேயே அமெரிக்காவில் வைரலாகத் தொடங்கியது. உடனே பிரபலமாகிவிட்டான் ரியான். வீடியோவில் ரியான் மட்டுமே ரிவ்யூ செய்தாலும், இந்த நிகழ்ச்சிகளை முழுக்க முழுக்கத் திட்டமிடுவது ரியானின் அம்மாதான். இந்த சானலின் வளர்ச்சியால், ரியானின் அம்மா, தான் பார்த்துவந்த ஆசிரியர் பணியையே விட்டுவிட்டார். தற்போது அமெரிக்காவின் மிகவும் பிரபலமான சானல் ரியானுடையதுதான்.

இத்தனைக்கும் ஒரு நேர்த்தியான ஸ்டூடியோ, திட்டமிடப்பட்ட உரையாடல்கள் என எந்த கமர்ஷியல் அம்சமும் ரியானின் வீடியோக்களில் இருக்காது. ஆனால், 'அதெல்லாம் எதுக்கு? ரியானின் மழலை மொழியும், குறும்பு சேட்டைகளுமே எங்களுக்குப் போதும்' என கமென்ட்ஸ் தட்டுகின்றனர் ரியானின் ஃபேன்ஸ். 

ரியான்

யூடியூப் மில்லினர்கள்

6 வயது மில்லினரான ரியான் ஒரு உதாரணம்தான். இப்படி இன்னும் எத்தனையோ யூடியூப் நட்சத்திரங்கள், இதன்மூலம் அதிகளவில் வருமானம் ஈட்டிவருகின்றனர். இப்படி, டிவி மற்றும் பிறஊடகங்களுக்கு இணையாக யூடியூப் வளர்ந்துவந்தாலும், இங்கே இருக்கும் முக்கியமான சிக்கல்களில் ஒன்று, போலியான மற்றும் தவறான வீடியோக்களும் அதிக கவனம் பெறுவது. யூடியூப் ட்ரெண்டிங் வீடியோக்களில் அதிகமாக இடம்பெறும் வீடியோக்களை கவனித்தாலே இதனை உணர்ந்துகொள்ள முடியும். யார் வேண்டுமானாலும் சானல் ஆரம்பிக்கலாம்; யார் வேண்டுமானாலும் தன் வீடியோவை வெளியிடலாம் என்பதுதான் யூடியூபின் பெரும்பலம். ஆனால், இந்த சுதந்திரமே பலருக்கும் வசதியாகிவிடுகிறது. இதனால்தான் தேவையற்ற அவதூறுகள், தவறான கருத்துகளை பரப்பும் வீடியோக்கள், வதந்திகள் போன்றவையும் யூடியூபில் வைரலாகின்றன. பயங்கரவாதம் மற்றும் பாலியல் ரீதியான தவறான வீடியோக்களைத் தடைசெய்ய, AI மூலம் யூடியூப் முயற்சி செய்துவருகிறது. ஆனால், இதுமாதிரியான தவறான வீடியோக்களுக்கு எவ்விதக் கட்டுப்பாடுகளும் இல்லை. இந்த விஷயத்தில் மட்டும் யூடியூப் கூடுதல் கவனத்துடன் செயல்பட்டால், வருமானம் பெறும் இடமாக மட்டுமின்றி, ஆரோக்கியமான ஒரு ஊடகமாகவும் யூடியூப் இருக்கும்.

Do you like the story?

Please Appreciate the Author by clapping!