டெவலப்பர்களுக்குக் கட்டுப்பாடு... பயனாளருக்குப் புதிய வசதி... இன்னும் என்ன செய்யும் ஃபேஸ்புக்? #CambridgeAnalytica

கேம்பிரிட்ஜ் அனலிடிகா விவகாரம் தகவல் பாதுகாப்பு தொடர்பாக பல கேள்விகளை எழுப்பியிருக்கிறது. இதற்கு ஃபேஸ்புக் நிறுவனம் என்ன சொல்லப்போகிறது என்று அனைவரும் எதிர்பார்த்திருந்த நிலையில் இது தொடர்பாக விளக்கமளித்திருக்கிறார் அதன் நிறுவனர் மார்க் ஸக்கர்பெர்க். தனியார் தொலைக்காட்சியான சி.என்.என் (CNN) -க்கு அளித்த பேட்டியில் தகவல் தவறாகப் பயன்படுத்தப்பட்டதற்கு மன்னிப்பு கேட்டதோடு மட்டுமன்றி இதுபோன்ற தவறுகள் மீண்டும் நடைபெறாமல் இருக்க நடவடிக்கை எடுக்கப்படும் என உறுதியளித்தார்.

அதற்கு முன்னர் இந்தச் சம்பவம் தொடர்பாக தனது ஃபேஸ்புக் பக்கத்தில் விளக்கமளித்திருந்தார் மார்க் ஸக்கர்பெர்க். என்ன தவறு நடந்தது, இனிமேல் தவறுகளைக் குறைப்பதற்காக வழிகள் ஆகியவற்றை விளக்கியிருந்தார் . "உங்களது தகவல்களைப் பாதுகாப்பது என்பது எங்களின் கடமை, அதை செய்ய முடியாமல் போனால் உங்களுக்குச் சேவை செய்ய எங்களுக்குத் தகுதி கிடையாது. என்ன நடந்திருக்கும் என்பதை முழுவதுமாகப் புரிந்து கொள்ளவும், இதுபோல மற்றொரு முறை நடப்பதைத் தடுக்கவும் முயற்சி செய்து கொண்டிருக்கிறேன். அதே வேளையில் இது போன்று எழும் சிக்கல்களைத் தவிர்ப்பதற்கான ஏற்பாடுகளை நாங்கள் பல வருடங்களுக்கு முன்னரே உருவாக்கி விட்டோம். ஆனாலும், நாங்கள் தவறு செய்திருக்கிறோம், அதை சரி செய்து தொடர்ந்து முன்னேறுவோம்"   என்று தனது பதிவில் தெரிவித்திருக்கிறார் மார்க். இது மட்டுமன்றி கேம்பிரிட்ஜ் அனலிடிகா சம்பவம் தொடர்பாக வேறு சில தகவல்களையும் பகிர்ந்திருக்கிறார்.

மார்க் ஸக்கர்பெர்க் 

2013-ம் ஆண்டில் கேம்பிரிட்ஜ் பல்கலைக்கழகத்தைச் சேர்ந்த ஆராய்ச்சியாளரான அலெக்ஸாண்டர் கோகன் என்பவர் ஃபேஸ்புக்கில் பயன்படுத்தும் ஆப் ஒன்றை உருவாக்கியிருக்கிறார். இந்த ஆப் மூலமாகவே பெரும்பாலானவர்களின் தகவல்கள் திருடப்பட்டிருக்கின்றன. இந்த ஆப்பை பயன்படுத்துவதற்கு ஒருவரின் தனிப்பட்ட சில தகவல்களைப் பயன்படுத்துவதற்கு அனுமதி கேட்கும். thisisyourdigitallife என்ற இந்த ஆப் ஒருவரின் தனிப்பட்ட தகவல்களைச் சேகரித்திருக்கிறது. அந்தத் தகவல்களை அவருடைய ஆப்பை மேம்படுத்துவதற்கு பயன்படுத்திக்கொள்ளலாம் என்பதுதான் ஃபேஸ்புக் அவருக்குக் கொடுத்திருந்த அனுமதி. ஆப்பை பயன்படுத்தி 3,00,000 பேரிடமிருந்து அவர்களுடைய தகவல்கள் மட்டுமன்றி, அவர்களுடைய நண்பர்களின் தகவல்களும் சேகரிக்கப்பட்டதாகவும் அவற்றை அலெக்ஸாண்டர் கோகன் மற்ற நிறுவனங்களுக்கும் பகிர்ந்ததாகக் குற்றம் சாட்டியிருக்கிறார் மார்க். 

ஆப்

2015-ம் ஆண்டில் அலெக்ஸாண்டர் கோகன் அவரது ஆப் மூலமாகச் சேகரித்த தகவல்களை கேம்பிரிட்ஜ் அனலிடிகா நிறுவனத்திடம் பகிர்ந்துகொண்டதை அறிந்துகொண்ட பின்னர் உடனடியாக நிறுவனத்தின் சேவை நிறுத்தப்பட்டு, சேகரிக்கப்பட்ட அனைத்துத் தரவுகளும் அழிக்கப்பட்டதை உறுதி செய்ததாகவும் தெரிவித்திருக்கிறார் மார்க் ஸக்கர்பெர்க். அப்படியிருந்தும் மீண்டும் மீண்டும் தனிநபர் தகவல்கள் தவறாகப் பயன்படுத்தப்படுவதையும் அவர்கள் சேகரித்த தகவல்களை இன்னும் அழிக்கவில்லை என்ற தகவலை கடந்த வாரம் சில ஊடகங்கள் மூலம் தெரிந்துகொண்ட பின்னர் ஃபேஸ்புக் நிறுவனம் அவர்களை முற்றிலுமாகத் தடை செய்திருப்பதாகவும், இது தொடர்பாக விசாரித்ததாகவும் தெரிவித்திருக்கிறார். 

என்ன செய்யப்போகிறது ஃபேஸ்புக் 

ஃபேஸ்புக்

எப்படி இருப்பினும் தகவல்கள் தவறாகப் பயன்படுத்தப்பட்டது உறுதி செய்யப்பட்டுள்ளது; அதை சரி செய்ய வேண்டிய பொறுப்பும் ஃபேஸ்புக்கைச் சார்ந்ததே. இந்நிலையில், 2014-ம் ஆண்டிலேயே சில பாதுகாப்பு நடைமுறைகள் அமல்படுத்தப்பட்டாலும்கூட பாதுகாப்பை இன்னும் அதிகரிக்கும் வகையில் விரைவில் சில மாற்றங்களைச் செய்யவிருப்பதாகக் கூறியிருக்கிறார் மார்க். அதன்படி முதலாவதாக அனைத்து ஆப்களும் முறையான தணிக்கைக்கு உட்படுத்தப்படும், தணிக்கைக்கு உடன்படாத எந்த ஆப்பும் தடை செய்யப்படும். ஒரு வேளை ஏதாவது ஆப்பால் யாராவது பாதிக்கப்படுவார்களேயானால் அவர்களுக்கு அது தொடர்பாக எச்சரிக்கை செய்யப்படும். இரண்டாவது டெவலப்பர்கள் தேவையில்லாத டேட்டாவை அணுகுவது தடை செய்யப்படும். மூன்று மாதத்திற்கு மேல் ஒருவர் ஒரு ஆப்பை பயன்படுத்தவில்லை என்றால் அது தானாகவே நீக்கப்படும். இனிமேல் ஒரு ஆப் ஒருவரது பெயர், ப்ரொஃபைல் போட்டோ, மற்றும் ஈமெயில் முகவரி ஆகியவற்றை மட்டுமே அணுக முடியும். அதைத் தவிர வேறு ஏதாவது தகவல்கள் வேண்டுமென்றால் பயன்படுத்துபவரிடம் அனுமதி பெற வேண்டும். இனிமேல், பெர்மிஷன்கள் பற்றி ஒரு பயனாளருக்குத் தெளிவாகத் தெரிவிக்கப்படும். நியூஸ் பீட் பக்கத்தின் மேற்பகுதியில் அதற்கான இடம் உருவாக்கப்படும். இது அடுத்த மாதத்திலிருந்து இது நடைமுறைக்குக் கொண்டுவரப்படும். 

Do you like the story?

Please Appreciate the Author by clapping!