வெளியிடப்பட்ட நேரம்: 19:45 (29/10/2018)

கடைசி தொடர்பு:11:40 (30/10/2018)

3.16 கோடிக்கு விலைபோன AI ஓவியம்... என்ன ஸ்பெஷல்?

14-ம் நூற்றாண்டு முதல் 20-ம் நூற்றாண்டு வரையான காலத்தில் வரையப்பட்ட சுமார் 15,000 பழைய ஓவியங்களை தரவாக எடுத்துக்கொண்டு அதில் இருக்கும் நுட்பங்களைக் கற்று அதை வைத்துச் சொந்தமாக ஓவியம் வரைய முயல்வது இது.

3.16 கோடிக்கு விலைபோன AI ஓவியம்... என்ன ஸ்பெஷல்?

கிறிஸ்டிஸ் என்னும் ஏல நிறுவனமானது செயற்கை நுண்ணறிவு (AI) மூலம் கணினி வரைந்த ஓவியம் ஒன்றை 3.16 கோடி ரூபாய்க்கு விற்பனை செய்து அனைவரையும் ஆச்சர்யத்துக்கு உள்ளாக்கியுள்ளது. 252 வருடம் பழைமையான இந்த நிறுவனம் ஏலத்தில் விடும் முதல் AI ஓவியம் இதுதான். ஆனால், ஆச்சர்யத்துக்கு இதுமட்டும் காரணம் அல்ல; வெறும் 7 லட்சம் வரைதான் இந்த ஓவியம் ஏலம் போகும் என்று அந்த நிறுவனமே நினைத்திருந்தது. ஆனால், இப்போது 3.16 கோடி ரூபாய்க்கு ஏலம் போயிருக்கிறது. அதுதான் ஆச்சர்யத்துக்கு முக்கியக் காரணம். இந்த அசத்தல் ஓவியத்தின் பெயர் `Portrait of Edmond Belamy.’

Obvious என்ற குழு இதைத் தயாரித்துள்ளது. 3 பிரெஞ்சு மாணவர்களைக் கொண்ட இந்தக் குழு GAN (generative adversarial network) என்ற தானே கற்றுக்கொள்ளும் (machine learning) வழிமுறையின் மூலம் கணினியில் இந்த ஓவியத்தை வரைந்துள்ளனர். 14-ம் நூற்றாண்டு முதல் 20-ம் நூற்றாண்டு வரையான காலத்தில் வரையப்பட்ட சுமார் 15,000 பழைய ஓவியங்களைத் தரவாக எடுத்துக்கொண்டு அதில் இருக்கும் நுட்பங்களைக் கற்று அதை வைத்து சொந்தமாக ஓவியம் வரைய முயற்சி செய்வது இந்த GAN. வரைந்த ஓவியத்தை அச்சடித்து ஏலத்தில் விட்டுள்ளது இந்தக் குழு. கையெழுத்தைக்கூட அதுவாகச் சேர்த்துள்ளது இந்த செயற்கை நுண்ணறிவு.

இந்த வழிமுறை 19 வயது மாணவர் ஒருவர் ராபி பராட் வடிவமைத்த முறையைக் காப்பி அடித்து உருவாக்கப்பட்டது என்று புகார்கள் எழுந்துள்ளன. முழுதாக இல்லையென்றாலும் முக்கால்வாசி முக்கியமான டெக்னிக்கல் விஷயங்கள் எடுக்கப்பட்டிக்கின்றன என்றே AI ஓவிய சமூகத்தைச் சேர்ந்த வல்லுநர்கள் தெரிவிக்கின்றனர். Open Licenseல் தான் இதை ராபி பராட் செய்துள்ளதால், இப்போது வந்திருக்கும் தொகையில் சட்டப்படி பங்குகேட்க முடியாது என்பது குறிப்பிடத்தக்கது.

மறுபுறம் Obvious குழுவோ மொத்த AI சமூகத்துக்கும் தங்கள் நன்றிகளைத் தெரிவித்து, ராபி பாராட்டுக்கும் சிறப்பாக நன்றி கூறியுள்ளனர். ஏலத்தில் ஓவியத்தை வாங்கியவர் தனது பெயரை வெளியிட வேண்டாம் எனக் கேட்டுக்கொண்டுள்ளார் என்பது குறிப்பிடத்தக்கது. 

ராபி பராட், தான் மக்களுக்கு இந்த AI கற்றுக்கொள்ளவும் தங்கள் பெரிய முயற்சிகளில் ஒரு பகுதியாகப் பயன்படுத்திக்கொள்ளவும்தான் Open License-ல் இந்த விஷயங்களை பதிந்திருந்ததாகவும், இதில் வரையப்பட்ட ஓவியங்கள் ஏலம் விடும் அளவுக்குச் செல்லும் என்று எதிர்பார்க்கவில்லை என்றும் கூறியுள்ளார். இதில் வரையப்படும் ஓவியங்கள் இன்னும் உண்மையான ஓவியங்கள் அளவுக்கு உயர்தரமானவை கிடையாது என்றும், இன்னும் இது முழுமை அடைய வேண்டும் என்றும் நம்புகிறார் அவர். அவரது ட்விட்டர் பக்கத்தில் பல முழுமையடையாத AI ஓவியங்களை அவர் பதிவுசெய்துள்ளார். அதிலிருந்து இந்த ஓவியம் பெரிதாக எந்த விதத்திலும் மாறுபட்டது இல்லை என்றும் குற்றம் சாட்டியுள்ளார் அவர்.

AI

credit: twitter/DrBeef_ ( Robbie Barrat )

கிறிஸ்டிஸ் ஏல நிறுவனம் இந்த ஓவியம் 250 வருடங்களாக தாங்கள் விற்றுவரும் ஓவியங்கள் போல்தான் இதுவும் இருந்தது. எனவேதான் ஏலத்தில் இதை விற்க சம்மதித்ததாகவும், ஆனாலும் சில இடங்கள் விடுபட்டும், முகம் சரியாக இல்லாமல்தான் இது இருக்கிறது என்றும் தெரிவித்திருக்கிறது. ஓவியம் என்றில்லாமல் பல கலைவடிவங்களில் இந்த செயற்கை நுண்ணறிவு முயற்சிகள் மேற்கொள்ளப்பட்டு வருகின்றன. பாடல்வரிகள் எழுதுவது, இசையமைப்பது, கதை எழுவது என இந்தப் பட்டியல் நீண்டுகொண்டே போகிறது. 

ஆனால், ``கலையோ மனிதனின் உணர்வுகளைப் பிரதிபலிக்கும் ஒரு வடிவம். வெறும் ஆயிரம் வருடத் தரவை வைத்து உருவாக்கப்படுவதெல்லாம் கலை ஆகிவிடாது. உணர்வுகள் இல்லாத, தானாக இயங்க முடியாத கணினிகளால் எப்படி ஒரு மனிதன் உருவாக்குவதைவிட நல்ல நுட்பமான கலையை உருவாக்க முடியும். பிழைதான் கலையின் அழகு, மனித பிழையில்லாமல் சரியாக எது வேண்டுமோ அதைத் தரும் இவற்றால் நுட்பமான ரசனைமிகு கலையை நமக்குத் தரமுடியாது" என்பதுதான் பலரின் வாதமாக இருக்கிறது. நம்மூரில்கூட டிஜிட்டல் இசையில் ஆத்மா இல்லை, அதிகமாக டிஜிட்டல் இசை உருவாக்குவதைத் தவிர்க்க வேண்டும் என இளையராஜா தெரிவித்திருந்தார். இதனால் மனிதர்களுக்கு வேலையில்லாமல் போய்விடும் என்பது இன்னொரு வாதம்.

இன்னும் முழுமையடையவில்லை என்ற போதிலும் இப்படி வருங்காலத்தில் செயற்கை நுண்ணறிவு மூலம் உருவாக்கப்படுவதைக் கலை என்று நீங்கள் ரசிப்பீர்களா, உங்கள் கருத்து என்ன?

Coverphoto Courtesy: Christie's

நீங்க எப்படி பீல் பண்றீங்க


டிரெண்டிங் @ விகடன்