வெளியிடப்பட்ட நேரம்: 16:29 (12/06/2015)

கடைசி தொடர்பு:17:47 (12/06/2015)

ஆண் விஞ்ஞானிகளின் கவனத்தை சிதறடிக்கிறோம்: பெண் விஞ்ஞானிகளின் கிண்டல் ட்விட்!

ய்வுக்கூடத்தில் பெண்கள் கவனத்தை சிதற வைப்பார்கள் எனும் கருத்தை பெண் விஞ்ஞானிகள் எப்படி பொறுத்துக்கொள்வார்கள்? அதிலும் நோபல் பரிசுப்பெற்ற விஞ்ஞானி ஒருவர் இப்படி ஒரு அவதூறான கருத்தை தெரிவித்தால் எப்படி பொறுத்துக்கொள்வார்?

அதனால்தான் உலகம் முழுவதும் உள்ள பெண் விஞ்ஞானிகள் பொங்கி எழுந்து, இந்த கருத்துக்கு டிவிட்டரில் அழகாக, ஆனால் அழுத்தமாக பதிலடி கொடுத்து வருகிறார்கள்.

நோபல் பரிசு பெற்ற மேதையான டிம் ஹண்ட், அண்மையில் அறிவியல் பத்திரிகையாளர் மாநாட்டில் பேசியபோது, பெண் விஞ்ஞானிகளுக்கு எதிராக கருத்து தெரிவித்திருந்தார்.
 

“ஆய்வுக்கூடத்தில் பெண்கள் இருந்தால் மூன்று விஷயங்கள்தான் நடக்கும். அவர்களிடம் நீங்கள் காதல் கொள்வீர்கள், அவர்கள் உங்கள் மீது காதல் கொள்வார்கள், அதன் பிறகு அவர்கள் கண்ணை கசக்கும் போது நீங்கள் புலம்ப நேரிடும்” என்பது போல அவர் கருத்து தெரிவித்திருந்தார்.

பெண் விஞ்ஞானிகளை அவமதிக்கும் வகையிலான இந்த கருத்து, கடும் கண்டனத்திற்கு உள்ளானது. எதிர்ப்பு அலை வலுவாக எழுந்ததை அடுத்து விஞ்ஞானி டிம் ஹண்ட்,  லண்டன் பல்கலைக்கல்லூரி பதவி யில் இருந்து விலகினார். இதனிடையே டிம் ஹண்டின் அவமதிப்பான கருத்திற்கு உலகம் முழுவதும் உள்ள பெண் விஞ்ஞானிகள் டிவிட்டரில் அழகாக பதிலடி கொடுத்து வருகின்றனர்.

பெண்கள் கவர்ச்சியால் கவனத்தை சிதற வைக்கின்றனர் என டிம் ஹண்ட் கூறிய கருத்தை விமர்சித்து  மறுக்கும் வகையில் #DistractinglySexy  எனும் ஹாஷ்டேகுடன், டிவிட்டரில் தங்கள் பணியிடத்து புகைப்படங் களை பெண் விஞ்ஞானிகள் டிவிட்டரில் வெளியிட்டு வருகின்றனர்.

ஆய்வுக்கூடத்தில் பணியாற்றும் முழு ஆடையுடன் காட்சி தரும் இந்த புகைப்படங்கள், கவர்ச்சி வாதத்தை தவிடுபொடியாக்குகின்றன என்றால், அதனுடன் பகிரப்படும் கருத்துக்கள், ஹண்ட் போன்றவர்களின் ஆணாதிக்க கருத்துக்களை விமர்சிக்கும் வகையில் அமைந்துள்ளன.

உதாரணத்திற்கு டேனியேலா ஸ்பிட்சர் எனும் பெண் விஞ்ஞானி, தலை முதல் கால் வரை மூடிய ஆய்வுக் கூட ஆடையுடன், 'இருபாலர் பணிபுரியும் ஆய்வுக்கூடத்தில் பணிபுரிவது சிக்கலாக இருக்கிறது. ஏனெனில் நான் ஆண் விஞ்ஞானி கவனத்தை சிதற வைக்கிறேன்' என கிண்டலாக குறிப்பிட்டுள்ளார்.

ஏமி எனும் விஞ்ஞானி, நோபல் பரிசு பெற்ற மேதை மேடம் கியூரியின் புகைப்படத்தை வெளியிட்டு, 'கியூரி கண்ணீர் சிந்துவதை ஒதுக்கி வைத்துவிட்டு ரேடியம் மற்றும் போலோனியத்தை கண்டுபிடித்ததற்கு நன்றி' என குறிப்பிட்டுள்ளார்.

இவ்வாறு பெண் விஞ்ஞானிகளின் அர்ப்பணிப்பை பறைசாற்றும் வகையில் பத்தாயிரத்துக்கும் மேற்பட்ட குறும்பதிவுகள் டிவிட்டரில் வெளியாகி, இந்த ஹாஷ்டேக் கவனத்தை ஈர்த்துள்ளது.

பெண் விஞ்ஞானிகளின் பதிலடியை காண: https://twitter.com/hashtag/distractinglysexy?src=rela

- சைபர்சிம்மன்





 

நீங்க எப்படி பீல் பண்றீங்க


டிரெண்டிங் @ விகடன்